Leswi Hi Swi Dyondzaka Eka Yesu

Ndlela Yo Va Mulandzeri Wa Kreste

Loko vanhu va kombisa ripfumelo eka Yesu, hakanyingi a a va byela a ku: “Vana mulandzeri wa mina.” (Matewu 9:9; 19:21) U fanele u endla yini leswaku u va mulandzeri wa Yesu, leswi vulaka ku va Mukreste? Xiya tinhlamulo ta swivutiso swinharhu swa nkoka leswi landzelaka.

U fanele u va khoma njhani van’wana?

▪ Mudyondzisiwa wa Yesu u fanele ku landzela swiletelo swo karhi malunghana ni ndlela leyi van’wana va faneleke va khomiwa ha yona. Hi xikombiso, Yesu u te: “Hikokwalaho, swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona.” Ku vuriwa yini loko un’wana a ku khunguvanyisa? Yesu u te: “Lulamisa timhaka hi ku hatlisa ni loyi a ku mangalelaka.” U tlhele a byela valandzeri vakwe a ku: “Loko mi nga va rivaleli vanhu swivi swa vona, na yena Tata wa n’wina a nge mi rivaleli swivi swa n’wina.”—Matewu 5:25; 6:15; 7:12.

Yesu u nyikele ndzayo leyi, eka lava tekaneke a ku: “Mi swi twile leswaku ku vuriwe leswi, ‘U nga tshuki u endla vuoswi.’ Kambe ndza mi byela leswaku un’wana ni un’wana la tshamelaka ku languta wansati lerova a n’wi navela, ana se u endle vuoswi na yena embilwini yakwe.” Mukreste wa ntiyiso u pfumelela tidyondzo ta Yesu ti lawula mianakanyo ni mbilu yakwe.—Matewu 5:27, 28.

Hi ku tirhandzela, Vakreste va ntiyiso va titsona swo karhi leswaku va ta pfuna van’wana. Yesu na yena u swi endlile sweswo. Hi xikombiso, loko Yesu ni vadyondzisiwa vakwe va ri eriendzweni leri karharisaka ro chumayela, a va nga ri na wona hambi nkarhi wo dya swakudya. Hikwalaho, Yesu u va teke hi byatso va ya endhawini leyi rhuleke leswaku va ya wisa. Endzhaku ka loko ntshungu wu swi twile leswaku u ya kwihi, wu tsutsume wu n’wi rhangela ku fika laha a ya kona. Rungula ra le Bibeleni ri ri: “Loko a huma, a vona ntshungu lowukulu, kambe a wu twela vusiwana, hikuva a wu fana ni tinyimpfu leti nga riki na murisi. Hiloko a sungula ku wu dyondzisa swilo swo tala.” (Marka 6:30-34) U nga tekelela Yesu hi ku endla leswi Xikwembu xi swi lavaka eka wena, hambiloko u langutane ni swiyimo swo tika.

 Ha yini u fanele u chumayela mahungu lamanene?

▪ Yesu u dyondzise valandzeri vakwe ndlela yo chumayela mahungu lamanene. U byele vaapostola vakwe a ku: “Loko mi ri karhi mi famba, chumayelani, mi ku, ‘Mfumo wa matilo wu tshinele.’” (Matewu 10:7) Valandzeri va Yesu a va ri ni rungula ra nkoka swinene. Yesu u khongele a ku: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso.”—Yohane 17:3.

Yesu u profete hi ta ntirho lowu timiliyoni ta valandzeri vakwe a va ta wu endla. U te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.” (Matewu 24:14) Loko u dyondze hi Mfumo wa Xikwembu naswona u pfumela leswi Bibele yi swi vulaka, a swi kanakanisi leswaku u ta swi tsakela ku byela vanhu van’wana ha swona. Vo tala va valandzeri va Yesu va rhanga hi ku byela maxaka ya vona hi Mfumo wa Xikwembu.—Yohane 1:40, 41.

Ha yini u fanele u khuvuriwa?

▪ Loko Yesu a khuvuriwile enambyeni wa Yordani, u khongele a ku: ‘Ndza ta ku ta endla ku rhandza ka wena, Wena Xikwembu.’ (Vaheveru 10:7) Loko u lava ku endla ku rhandza ka Xikwembu, na wena u fanele u khuvuriwa. Yesu u lerise a ku: ‘Endlani vanhu va matiko hinkwawo va va vadyondzisiwa, mi va khuvula.’—Matewu 28:19.

Loko u khuvuriwile, hi byihi vutihlamuleri lebyi u vaka na byona naswona u vuyeriwa njhani? Valandzeri va Yesu lava khuvuriweke va tirhela Xikwembu hi mimoya-xiviri ya vona hinkwayo. Yesu u tshahe Nawu wa Xikwembu lowu nge: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo.” (Matewu 22:37) U tlhele a ku: “Loko munhu a lava ku ndzi landzela, a a titshike.” (Matewu 16:24) Nkhuvulo i xikombiso xa leswaku munhu wa titshika naswona u lava ku kongomisiwa hi Xikwembu. Hinkwavo lava nga ni vuxaka lebyi byo hlawuleka, va nga kombela Xikwembu leswaku xi va nyika ripfalo lerinene.—1 Petro 3:21.

Leswaku u kuma rungula leri engetelekeke, vona ndzima 18 ya buku leyi, leyi kandziyisiweke hi Timbhoni ta Yehovha.