Ta Iesu e haapii maira

E nafea ia pee i te Mesia?

Ia faatupu te taata i te faaroo ia Iesu, e pinepine oia i te parau atu: “A pee mai ia ˈu.” (Mataio 9:9; 19:21) Eaha te auraa e riro ei pǐpǐ a Iesu, oia hoi ei Kerisetiano? A hiˈo na i te pahonoraa i na uiraa faufaa e toru.

E nafea ia haa i nia ia vetahi ê?

▪ E haapao te hoê pǐpǐ a Iesu i ta ˈna mau faaueraa no nia i te haaraa i nia ia vetahi ê, mai teie: “Te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” E ia faainoino mai te hoê taata ia oe? Ua parau Iesu: “Ia peepee oe i te faaau i te parau i to taata tarahu.” Ua na ô atoa oia i ta ˈna mau pǐpǐ: “Ia ore . . . outou ia faaore i ta vetahi ê ra hapa, e ore atoa to outou Metua e faaore mai i ta outou hapa.”—Mataio 5:25; 6:15; 7:12.

Ua aˈo Iesu i te feia faaipoipo: “Ua faaroo hoi outou, e i parauhia mai te feia tahito ra e, Eiaha oe e faaturi. Te parau atu nei râ vau ia outou, O te hiˈo noa ˈtu i t[a] vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.” E vaiiho te hoê Kerisetiano mau i ta Iesu mau haapiiraa ia ohipa i nia i to ˈna feruriraa e to ˈna aau.—Mataio 5:27, 28.

Mai ia Iesu, e haapae te mau Kerisetiano mau ia ratou iho no te tauturu ia vetahi ê. Ei hiˈoraa, i te hoê tere pororaa rohirohi mau, aita to Iesu e ta ˈna mau aposetolo e taime no te amu i te tahi maa. Fano atura ïa ratou i te hoê vahi moemoe no te faafaaea. Ua faaroo râ te taata e te haere ra oia ihea, e tapapa ˈtura. Te faatia ra te Bibilia: “E tei te tipaeraa ˈtu Iesu ra, hiˈo atura oia i taua feia rahi ra, aroha ˈtura ia ratou; no te mea mai te nǎnǎ mamoe tiai ore ra ratou; haapii atura oia ia ratou i te parau e rave rahi.” (Mareko 6:30-34) E nehenehe oe e pee ia Iesu ma te rave i ta te Atua e ani ra ia oe, noa ˈtu te mau fifi ta oe e farerei.

 No te aha ia poro i te evanelia?

▪ Ua haapii Iesu i ta ˈna mau pǐpǐ ia poro i te evanelia. Ua na ô oia i ta ˈna mau aposetolo: “E poro haere outou, e na ô atu, Te fatata mai nei te basileia o te ao.” (Mataio 10:7) Mea faufaa roa te poroi a te mau pǐpǐ a Iesu. Ua pure oia: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

Ua tohu Iesu i te hoê ohipa e ravehia e ta ˈna mau mirioni pǐpǐ: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa.” (Mataio 24:14) Ua haapii anei oe no nia i te Basileia o te Atua e te tiaturi ra anei oe i ta te Bibilia e parau ra? E oaoa iho â ïa oe i te faaite i ta oe i ite. E rave rahi pǐpǐ a Iesu tei haamata i te paraparau no nia i te Basileia o te Atua i to ratou mau fetii.—Ioane 1:40, 41.

No te aha e bapetizohia ˈi?

▪ A bapetizohia ˈi oia i Ioridana, mai te huru ra e te parau ra Iesu: “E tau Atua, te haere nei au e faatia i to oe hinaaro.” (Hebera 10:7) No te rave i to te Atua hinaaro, ia bapetizo-atoa-hia ïa oe. Ua faaue Iesu: “E faariro i te mau fenua atoa ei pǐpǐ, a bapetizo atu ai ia ratou.”—Mataio 28:19.

Eaha te mau hopoia e te mau maitai ia bapetizohia? E tavini te mau pǐpǐ bapetizohia a Iesu i te Atua ma to ratou taata taatoa. Ua faahiti Iesu i ta te Atua Ture: “Hinaaro oe i to Atua ia Iehova ma to aau atoa, e ma to varua atoa, e ma to manaˈo atoa.” (Mataio 22:37) Ua na ô atoa oia: “Te taata i hinaaro i te pee mai ia ˈu, e faarue oia ia ˈna iho.” (Mataio 16:24) A bapetizohia ˈi oia, e faaite te hoê taata e ua faaoti oia i te faarue ia ˈna iho e no te Atua oia i teie nei. E nehenehe te feia e fanaˈo ra i teie taairaa taa ê e ani i te Atua i te hoê aau, aore ra manaˈo haava, hapa ore.—Petero 1, 3:21.

No te mau haamaramaramaraa hau, a hiˈo i te pene 18 o teie buka, Eaha ta te Bibilia e haapii mau ra? piahia e te mau Ite no Iehova.