Ẹkwọrọ “Eti Mbụk” ke Mme Isuo Ata Edere Edere Australia

JESUS ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.” (Matthew 24:14) Mme Ntiense Jehovah ẹnam ewụhọ Jesus emi ẹnyụn̄ ẹnen̄ede ẹsịn ukeme man ẹkwọrọ etop Bible emi ẹnọ mme owo ke ebiet ekededi oro mmọ ẹdụn̄de. (Matthew 28:19, 20) Mmọ ẹnam utom emi ke imaesịt, ndien ndusụk ini esitak mmọ okụk ye ifụre.

Ke uwụtn̄kpọ, Nathan ye Carly ẹma ẹkpụhọde nte mmọ ẹsidude uwem man ẹkeme ndika n̄kọkwọrọ ikọ nnọ mme owo emi ẹdụn̄ọde ke ata nsannsan Isuo Utịp Torres. Ke 2003, owo emi adade ke ibuot n̄kọk itieutom Mme Ntiense Jehovah ke Australia ama ọdọhọ mmọ ẹka Isuo Thursday ẹkenam utom ye esop Mme Ntiense Jehovah emi odude do. Isuo oro edi kiet ke otu ediwak ndiye isuo emi ẹdude ke ufọt Australia ye New Guinea ke Inyan̄ Pacific.

Ke 2007, ubon mme Nathan ẹma ẹdep akani ubom eto emi ẹkekotde Teisan-Y. Mmọ ẹma ẹda okụk mmọ ẹdiọn̄ ubom oro ẹnyụn̄ ẹsito Isuo Thursday ẹka ẹkekwọrọ ikọ ẹnọ mbon emi ẹdụn̄ọde ke isuo duop ke otu isuo oro ẹdude ata nsannsan. Nte isan̄ mmọ eketiede edi emi:

January 2008: Mfịn, n̄wat flaibot n̄ka Bamaga—emi uka ye unyọn̄ edide kilomita 80—man n̄kemen Mme Ntiense itiokiet do. Idahaemi imodụk Teisan-Y, iwat ika isuo Warraber ye Poruma. Imọdọn̄ aranuwat iyọhọ aban̄ emi odụkde lita aranuwat 5,500, ndien lita kiet akpa n̄kpọ nte ₦296. Ubom emi ọnyọnyọni, awat n̄kpọ nte kilomita duop kpọt ke hour kiet. Edi enyọn̄ enen̄ede eye, inyan̄ onyụn̄ ana sụn̄.

Ke ima ikebehe, ima idian ke esụk inyụn̄ isio an̄kọ isịn ke mmọn̄, idọn̄ mbon ubom nnyịn ifan̄ oro ẹnyenede iman ke Isuo Warraber ke flaibot, inyụn̄ ika ikokụt ọbọn̄ isuo oro man iben̄e enye ayak nnyịn ikwọrọ ikọ do. Enye edi pastọ ke ufọkabasi isuo oro, edi enye enyịme nnyịn ikwọrọ ikọ inọ mbon emi ẹdụn̄ọde do. Inyụn̄ inam kpasụk ntre ke Isuo Poruma, ẹnyụn̄ ẹnyịme nnyịn ikwọrọ ikọ do n̄ko. Mme owo ẹdara owo etieti do ẹnyụn̄ ẹnen̄ede ẹma ndikot mme n̄wed nnyịn. Imọtọn̄ọ ndikpep ediwak owo Bible.

April 2008: Imodiomi nte idisan̄ade ika Dauan, Saibai, ye Boigu—isuo ita oro ẹyomde usụn̄ ẹkan—emi ẹdude ẹkpere adan̄a Papua New Guinea. Enyọn̄ enen̄ede ofụhọ, ntre nnyịn ikabade ika Isuo Mabuiag. Tọn̄ọ ke Isuo Thursday oro idude sịm Mabuiag edi kilomita 70 kpọt, edi se iwatde edi kilomita 140 sia usụn̄ etiede n̄wọn̄ọde n̄wọn̄ọde ke ntak ndifep ikpọ itiat.

 Akaka mbufụt ama ekịbi flaibot oro ke Teisan-Y. Kpa ye oro mbufịt mmọn̄ oro ekenen̄erede okon̄, ima iwọn̄ọrede ifiak man ikemen flaibot oro. Mmọn̄ imeheke ata ediwak owo oro ẹsan̄ade ye nnyịn.

Ẹnyịme nnyịn ikwọrọ ikọ ke Isuo Mabuiag, ndien mme andidụn̄ isuo oro ẹnen̄ede ẹdara nnyịn tutu nnyịn itịghi aba ufen oro ikọbọde ke usụn̄. N̄wan kiet enen̄ede ama ukwọrọikọ nnyịn tutu enye ọbọ mme n̄wed en̄wen man okobon ke itie ubon n̄wed obio oro, emi enye esinamde utom.

May esịm October 2008: Idiọk enyọn̄ iyakke nnyịn iwọrọ ika mme isuo. Ntre, nnyịn ida ini oro ikwọrọ ikọ ke Isuo Thursday, inam utom, inyụn̄ idiọn̄ ubom nnyịn.

Oyom inen̄ede idiọn̄ ubom nnyịn, ntre nnyịn ika esụkmbehe obio Weipa inyụn̄ idụri ubom oro isio ke mmọn̄ idori ke edem anyan ubomisọn̄ mbiomo. Enem nditetịn̄, edi idịghe ifia ubọk kiet! Mme Ntiense emi ẹdude ke esop obio oro ẹdi ẹdin̄wam nnyịn ẹnam utọ utom nte, ndidiọn̄ esan̄ mmọn̄ esan̄ukwak, ndiyet ndom mbakara, ye utom usọeto. Mme Ntiense eken ẹda udia ẹdi. Ndusụk mmọ ẹnọ nnyịn mme n̄kpọ oro ididade ika ukwọrọikọ ke ebiet efen. Ntatubọk mmọ ye un̄wam oro mmọ ẹn̄wamde nnyịn ẹnen̄ede ẹsọn̄ urua ke enyịn nnyịn.

December 2008: Imafiak itọn̄ọ isan̄ ndika Dauan, Saibai, ye Boigu. Ekpri ukwak uwụt owo usụn̄ nnyịn an̄wam nnyịn ifep ọkpọsọn̄ oyobio, ekanem mbakara nnyịn onyụn̄ anam ifep ikpọ itiat. Ada nnyịn hour 12 ndiwat nsịm Dauan, edi akananam nnyịn ikwe isuo emi eyede ntre. Ntọn̄enyọn̄ ofụk edikon̄ obot itiat oro ẹdude do. Mbon Dauan ẹnen̄ede ẹma ndikpan̄ utọn̄ nnọ nnyịn, nnyịn inyụn̄ idọhọ mmọ ke iyaka iso ikpep Bible ye mmọ ke urụk ukopikọ ima isịm ufọk.

N̄wan kiet emi odụn̄de do, emi ekerede Lettie, ama ọbọ mme magazine nnyịn onyụn̄ ada mme ekebe edem magazine oro otobo mme n̄wed nnyịn. N̄kọk itieutom nnyịn ke Australia ama ọnọ mme n̄wed oro ẹsọk enye onyụn̄ ọnọ leta ẹsọk esop nnyịn ete ika ikese enye edieke ikemede. Nnyịn imokụt enye ke akpatre, onyụn̄ enem nnyịn esịt nditiene n̄kpep enye n̄kpọ mban̄a Abasi.

Ọbọn̄ Isuo Saibai inyịmeke nnyịn ikwọrọ ikọ inọ mme andidụn̄ isuo oro. Edi enye ayak mbon ubom nnyịn oro ẹnyenede iman do ẹka ẹkese ẹnyụn̄ ẹnyene nneme ye iman mmọ. Ukara ẹnọ mi utom ediyet ndom mbakara ke mme ufọk ke Saibai, ndien okụk emi ẹkpede mi ke ida in̄wam idem.

Kiet ke otu eyenete nnyịn an̄wan, emi ekerede Tassie, oto ekpri obio kiet ke Papua New Guinea, emi edide n̄kpọ nte kilomita inan̄ kpọt ọtọn̄ọde ke Saibai. Ediomi emi Papua New Guinea akanamde ye Australia anam ẹnyịme mmọ ẹsidi ẹdinyam urua ke Saibai. Tassie okụt ediwak mbio obio mmọ edi inyeneke n̄wed awak ekem ndinọ kpukpru mmọ. Akpa Tassie okụtde mbio obio mmọ edi emi tọn̄ọ enye akakabade edi kiet ke otu Mme Ntiense Jehovah. Nnyịn imaka ubom ikosio ekebe n̄wed isọk enye, ediwak ke otu n̄wed  emi ẹdi ke una mbon Papua New Guinea emi ẹkotde Tok Pisin. Tassie ọkwọrọ etop Bible ọnọ otuowo emi ẹbede owo 30, emi ẹtode Papua New Guinea, ndien mbon oro ẹnyenede udọn̄ ẹbọ kpukpru n̄wed oro ọkọdọn̄ọde ke ekebe oro. Ubom kpọt ke ẹkeme ndiwat ndụk edem oro, ndien etie nte akananam Mme Ntiense Jehovah isịmke obio oro.

Imemke utom ndika Boigu, emi edide akpatre isuo. To ke ebiet emi nnyịn idude sịm esụk edi kilomita inan̄, ndien mmọn̄ oro otụn̄ọ mita iba ye ubak. Ubom nnyịn osụhọde odụk mmọn̄ ekpere mita iba. Ami ye owo ubom nnyịn kiet isio flaibot iwat iyom usụn̄ emi idisan̄ade ika isuo oro. Edịm ke edem ọbọn̄ nnyịn nte usen ọmọn̄ okụre. Ada nnyịn hour iba ndikụt usụn̄ emi idisan̄ade.

Ke ini ibehede, idem akpa mbon isuo oro, mmọ ẹnyụn̄ ẹdọhọ mi ke n̄wed usụn̄ inyan̄ibom mi inenke, n̄ko ke idem ekpeme esụkmbehe ye mme an̄wanaekọn̄ mmọn̄ isidụkke edem oro. Ọbọn̄ isuo oro iyakke ikwọrọ ikọ do, edi ayak mbon ubom nnyịn oro ẹnyenede iman do ẹkese ẹnyụn̄ ẹkwọrọ ikọ ẹnọ iman mmọ. Nnyịn inyụn̄ inam ke uyo ọbọn̄ oro, ika ikese mme ubon oro kpọt. Ete kiet ọbọ n̄wed Nso ke Bible Enen̄ede Ekpep?, * okot ye unana ubiatini, onyụn̄ ọtọn̄ọ ndiwet mme mbụme ke edem Bible esie. Enye afiak osobo ye Mme Ntiense ke ini enye edide Isuo Thursday.

January 2009: Nnyịn imafiak ika isuo Moa ye Mabuiag man ifiak inyene nneme ye mbon emi ẹkenyenede udọn̄ ke etop Bible. Mme andidụn̄ ke isuo mbiba ẹdara nnyịn etieti. Ediwak mbon emi ẹdụn̄ọde ke obio-in̄wan̄ St. Paul ke Isuo Moa ẹte nnyịn ikûbịghi ntre aba ndifiak ndi. Ọbọn̄ isuo oro ete idi idikwọrọ ikọ do ini ekededi oro imade.

Mme owo ẹdụn̄ọ ke isuo 17 ke Utịp Torres. Nnyịn ifiọkke m̀mê iyekeme ndikwọrọ ikọ nnọ kpukpru owo emi ẹdụn̄ọde ke mme isuo emi. Edi kpukpru nnyịn emi idude ke esop mme isuo ata edere edere Australia imokop inemesịt ndinam se ikekeme man inam mme owo ẹtoro Jehovah, kpa Akwa Andibot nnyịn.

[Ikọ Idakisọn̄]

[Ndise obio ke page 23]

(Ama oyom ndikụt nte enye enen̄erede etie, se idem n̄wed)

AUSTRALIA

Weipa

Bamaga

MME ISUO UTỊP TORRES

PAPUA NEW GUINEA

[Ebiet Ẹdade N̄kpọ Ẹto]

Ẹda ẹto NASA/Visible Earth imagery

[Ndise obio ke page 24, 25]

Bamaga

Isuo Thursday

Isuo Moa

Isuo Warraber

Isuo Poruma

Isuo Mabuiag

Isuo Saibai

Isuo Dauan

Isuo Boigu

PAPUA NEW GUINEA

[Ebiet Ẹdade N̄kpọ Ẹto]

Ẹda ẹto NASA/Visible Earth imagery

[Ndise ke page 24]

Ini emi ibehede ke Isuo Thursday

[Ndise ke page 24]

Ini emi isan̄ade ikese mme owo ke Isuo Saibai

[Ndise ke page 25]

Ini emi ikwọrọde eti mbụk inọ mme owo ke usem Tok Pisin