ဩစတြေးလျ မြောက်ဖျားပိုင်းရှိ ကျွန်းများတွင် “သတင်းကောင်း” ဟောပြောခဲ့ကြ

‘ဘုရားသခင့်နိုင်ငံတော်နှင့်ဆိုင်သော သတင်းကောင်းကို လူနေရာ မြေတစ်ပြင်လုံး၌ ဟောပြောရလိမ့်မည်’ ဟု ယေရှု မိန့်ဆိုခဲ့သည်။ (မဿဲ ၂၄:၁၄) ယေဟောဝါသက်သေများသည် ယေရှု၏ ထိုမိန့်မှာချက်ကို နာခံသည့်အနေဖြင့် လူတို့ မည်သည့်နေရာတွင်ပင် နေထိုင်ကြပါစေ သူတို့ကို သမ္မာကျမ်းစာပါသတင်း ဝေမျှရန် ကြိုးပမ်းကြသည်။ (မဿဲ ၂၈:၁၉၊ ၂၀) တစ်ခါတစ်ရံ အဆင်မပြေမှုများနှင့် ကုန်ကျမှုများ ရှိသည့်ကြားမှ ထိုလုပ်ငန်းကို စေတနာအလျောက် သူတို့ လုပ်ကိုင်ကြသည်။

ဥပမာ၊ နာသန်နှင့် ကာရ်လီတို့သည် ဝေးလံသော တောရစ်စတရိတ်ရေလက်ကြားရှိ ကျွန်းများတွင် နေထိုင်သောလူတို့ကို ဟောပြောနိုင်ရန် မိမိတို့ဘဝပုံစံကို ပြောင်းလဲလိုက်ကြသည်။ ၂၀၀၃ ခုနှစ်တွင် ဩစတြေးလျရှိ ယေဟောဝါသက်သေများ၏ ဌာနခွဲရုံးမှ ကိုယ်စားလှယ်တစ်ဦးသည် သူတို့ကို သားစတေးကျွန်းသို့ ပြောင်းရွှေ့ပြီး ထိုတွင်ရှိ ဒေသခံအသင်းတော်နှင့် ပူးပေါင်းလုပ်ဆောင်ဖို့ တောင်းဆိုခဲ့သည်။ ထိုကျွန်းသည် ဩစတြေးလျတိုက်နှင့် နယူးဂီနီကျွန်းကြားရှိ အပြာရောင်ပစိဖိတ်သမုဒ္ဒရာတွင် အစိမ်းရောင်ကျောက်မျက်များအလား ပြန့်ကျဲနေသော ကျွန်းများအနက် တစ်ကျွန်းသာဖြစ်သည်။

၂၀၀၇ ခုနှစ်တွင် နေသန်၏မိသားစုသည် တိုင်ဆန်ဝိုင် ဟုအမည်ပေးထားသော သင်္ဘောအဟောင်းတစ်စီးကို ဝယ်လိုက်ကြသည်။ ထို့နောက် သူတို့စရိတ်ဖြင့် သင်္ဘောကို ပြန်လည်ပြုပြင်ကြသည်။ သားစတေးကျွန်းပေါ်တွင် အခြေချပြီး အဝေးဆုံးကျွန်းဆယ်ကျွန်းတွင် နေထိုင်သူများကို ဟောပြောရန် စတင်ခရီးထွက်ခဲ့ကြသည်။ သူတို့၏ခရီးစဉ်အချို့မှာ အောက်ပါအတိုင်းဖြစ်သည်။

၂၀၀၈၊ ဇန်နဝါရီ- ဒီနေ့၊ အသွားအပြန်မိုင် ၅၀ ခရီးရှိတဲ့ ဘာမာဂါမြို့က ဒေသခံယေဟောဝါသက်သေ ခြောက်ယောက်ကို လှေငယ်လေးတစ်စီးနဲ့ ကျွန်တော် သွားခေါ်တယ်။ အခု ကျွန်တော်တို့ ဝါရာဘာကျွန်းနဲ့ ပါရူမာကျွန်းတွေဆီကို သင်္ဘောနဲ့ ခရီးထွက်လာကြတယ်။ လောင်စာဆီတစ်ဂါလံကို ၈ ဒေါ်လာနှုန်းနဲ့ ဂါလံပေါင်း ၁,၄၅၀ ဝယ်ပြီး သင်္ဘောကို ဆီအပြည့်ဖြည့်ထားတယ်။ သင်္ဘောက တစ်နာရီကို ခြောက်မိုင်နှုန်းနဲ့ပဲ သွားနေတဲ့အတွက် အရမ်းနှေးလွန်းတယ်။ ဒါပေမဲ့ ရာသီဥတုက အရမ်းသာယာပြီး လှိုင်းလည်း ငြိမ်နေတယ်။

ဝါရာဘာကျွန်းကို ရောက်တော့ သင်္ဘောကို ကမ်းနဲ့ခပ်ဝေးဝေးမှာ ကျောက်ချထားခဲ့တယ်။ အဲဒီကျွန်းမှာ ဆွေမျိုးတွေရှိတဲ့ သက်သေခံတချို့နဲ့အတူ လှေငယ်စီးပြီး ကျွန်းပေါ်မှာ ဟောပြောခွင့်ရဖို့ ဒေသခံအာဏာပိုင်တစ်ယောက်ကို သွားတွေ့ကြတယ်။ အဲဒီလူက ဓမ္မဆရာဖြစ်ပေမဲ့ ကျွန်တော်တို့ကို ဟောပြောခွင့်ပေးလိုက်တယ်။ အဲဒီနောက် ပါရူမာကျွန်းကို ဆက်သွားပြီး အဲဒီမှာလည်း ကျွန်တော်တို့ ဟောပြောခွင့်ရခဲ့ကြတယ်။ ကျွန်းသူကျွန်းသားတွေက အရမ်းဖော်ရွေပြီး ကျွန်တော်တို့ရဲ့ စာပေတွေကို စိတ်ဝင်တစား ဖတ်ကြတယ်။ ကျွန်တော်တို့ ကျမ်းစာသင်အံမှု အများကြီး စခဲ့ကြတယ်။

၂၀၀၈၊ ဧပြီ- အဝေးဆုံးကျွန်းသုံးကျွန်းဆီကို ခရီးဆက်ဖို့ စီစဉ်တယ်။ အဲဒီကျွန်းတွေက ပါပူဝါနယူးဂီနီအနားမှာရှိတယ်။ ရာသီဥတု အရမ်းဆိုးလာတဲ့အတွက် အဲဒီကျွန်းတွေဆီ မသွားဘဲ မာဘီအော့ကျွန်းဘက်ကို ဦးတည်လိုက်ကြတယ်။ မာဘီအော့ကျွန်းက ကျွန်တော်တို့ အခြေချခဲ့တဲ့ကျွန်းကနေ ၄၃ မိုင်ပဲဝေးပေမဲ့ ကျောက်တန်းအတော်များများကို ကွေ့ပတ်မောင်းရတဲ့အတွက် ၈၆ မိုင်ခရီး ဖြစ်သွားတယ်။

 လှိုင်းလုံးကြီး ပုတ်လိုက်တဲ့အတွက် သင်္ဘောနဲ့တွဲချည်ထားတဲ့ လှေငယ်လေးက ပြုတ်ထွက်သွားတယ်။ ဒါနဲ့ လှိုင်းလုံးကြီးတွေကြားမှာ သင်္ဘောကို ပြန်ကွေ့လိုက်ပြီး လှေငယ်လေးကို ပြန်ဆယ်တယ်။ အဲဒါကြောင့် သင်္ဘောမှာပါတဲ့ လူအများစုက လှိုင်းမူးကုန်တယ်။

မာဘီအော့ကျွန်းမှာ ဟောပြောခွင့်ရပြီး ဒေသခံတွေကလည်း လှိုက်လှိုက်လှဲလှဲ ကြိုဆိုတဲ့အတွက် ကျွန်တော်တို့ ပင်ပန်းခဲ့တာတွေကို မေ့သွားကြတယ်။ ကျွန်းသူတစ်ယောက်က ကျွန်တော်တို့ရဲ့ သတင်းတရားကို အရမ်းနှစ်သက်ပြီး စာပေအတော်များများကိုလည်း ယူထားလိုက်တယ်။ သူအလုပ်လုပ်တဲ့ စာကြည့်တိုက်မှာ အဲဒီစာပေတွေကို ပြသထားတယ်။

၂၀၀၈၊ မေမှ အောက်တိုဘာအထိ- ရာသီဥတုအခြေအနေကြောင့် တခြားကျွန်းတွေဆီ မသွားနိုင်ခဲ့ဘူး။ အချိန်တွေ အလဟဿမဖြစ်အောင် အဲဒီကျွန်းပေါ်မှာပဲ ဆက်ဟောပြောပြီး အလုပ်လုပ်တယ်။ သင်္ဘောကို ပြုပြင်စရာရှိတာတွေ ပြုပြင်တယ်။

သင်္ဘောကို ပြုပြင်စရာတွေ အများကြီးကျန်သေးတဲ့အတွက် ဝီပါဆိပ်ကမ်းမြို့ကို ကမ်းကပ်ပြီး သင်္ဘောကို နောက်တွဲယာဉ်ကြီးတစ်ခုပေါ်မှာ ဆွဲတင်ကြတယ်။ ပြောရတာလွယ်သလောက် လုပ်ရတာ အရမ်းခက်တယ်။ အဲဒီမှာရှိတဲ့သက်သေခံတွေက ကျွန်တော်တို့ကို လာကူညီပေးကြတယ်။ သူတို့က ပိုက်ပြင်ပေးကြတယ်။ ဆေးသုတ်ပေးကြတယ်။ သစ်တွေကို ရွေပေါ်ထိုးပေးကြတယ်။ တချို့က အစားအသောက်တွေ ချက်ပြုတ်ပေးကြတယ်။ တချို့က ကျွန်တော်တို့ရဲ့ နောက်ခရီးစဉ်အတွက် လိုအပ်ရာတွေကို လာပို့ပေးကြတယ်။ သူတို့ရဲ့ ဧည့်ဝတ်ကျေပွန်မှုနဲ့ အကူအညီတွေကို ကျွန်တော်တို့ ဘယ်တော့မှမေ့မှာမဟုတ်ဘူး။

၂၀၀၈၊ ဒီဇင်ဘာ- ဒွမ်၊ ဆိုင်ဘိုင်နဲ့ ဘွိုင်ဂူဆိုတဲ့ ကျွန်းသုံးကျွန်းဆီကို သွားဖို့ ကျွန်တော်တို့ စီစဉ်ကြတယ်။ ရေဒါကို အသုံးပြုပြီး အပူပိုင်းမုန်တိုင်းတွေကို ရှောင်နိုင်ခဲ့တယ်။ ဒါ့ပြင် ရေကြောင်းပြကိရိယာကို အသုံးပြုပြီး ကျောက်တန်းတွေကို ကွေ့ဝိုက်ရှောင်နိုင်ခဲ့ကြတယ်။ ဒွမ်ကျွန်းကိုရောက်ဖို့ ၁၂ နာရီကြာပေမဲ့ အဲဒီကျွန်းက ကျွန်တော်တို့ရောက်ခဲ့ဖူးသမျှမှာ အလှဆုံးကျွန်း ဖြစ်နေတယ်။ မြင့်မားတဲ့ကျောက်ဆောင်တွေကို တိမ်တွေ ဖုံးထားတယ်။ ကျွန်းသူကျွန်းသားတွေက ကျွန်တော်တို့ရဲ့သတင်းစကားကို စိတ်ဝင်စားတဲ့အတွက် ကျွန်တော်တို့နေရပ်ကို ပြန်ရောက်တဲ့အခါ တယ်လီဖုန်းနဲ့ ကျမ်းစာအကြောင်း ဆက်ဆွေးနွေးဖို့ စီစဉ်ခဲ့ကြတယ်။

လက်တီလို့ခေါ်တဲ့ ကျွန်းသူတစ်ယောက်က ကျွန်တော်တို့ရဲ့ စာပေတွေကို တစ်နည်းနည်းနဲ့ ရရှိထားတယ်။ နောက်ထပ်စာပေတွေ ရချင်တဲ့အတွက် ကူပွန်ပေးပို့လိုက်တယ်။ ဩစတြေးလျဌာနခွဲရုံးက သူတောင်းခံတဲ့စာပေတွေကို ပို့ပေးတဲ့အပြင် ဖြစ်နိုင်ရင် သူနဲ့ အမြန်ဆုံးဆက်သွယ်ဖို့ တောင်းဆိုတဲ့ စာတစ်စောင်ကိုလည်း ကျွန်တော်တို့ရဲ့ အသင်းတော်ဆီ ပေးပို့ခဲ့တယ်။ နောက်ဆုံး လက်တီကို ရှာတွေ့ပြီး သူသိချင်တဲ့ကျမ်းစာအကြောင်းကို ပြောပြခွင့်ရခဲ့ကြတယ်။

ဆိုင်ဘိုင်ကျွန်းမှာ ဒေသခံအာဏာပိုင်က ကျွန်တော်တို့ကို ဟောပြောခွင့်မပေးဘူး။ ဒါပေမဲ့ အဲဒီကျွန်းမှာရှိတဲ့ ဆွေမျိုးသားချင်းတွေဆီ သွားလည်ပြီး စကားပြောခွင့်တော့ ပေးတယ်။ ဆိုင်ဘိုင်ကျွန်းက အိမ်တွေကို ဆေးသုတ်ပေးဖို့ အာဏာပိုင်တွေနဲ့ စာချုပ်ချုပ်လိုက်တယ်။ အဲဒီအလုပ်က ကျွန်တော်တို့ကုန်ကျစရိတ်တချို့ကို ကာမိစေတယ်။

ဆိုင်ဘိုင်ကျွန်းမှာ တက်စီလို့ခေါ်တဲ့ ညီအစ်မတစ်ယောက်ရှိတယ်။ သူက ပါပူဝါနယူးဂီနီမှာရှိတဲ့ ရွာတစ်ရွာကနေ ရောက်လာတာ။ အဲဒီရွာက ဆိုင်ဘိုင်ကျွန်းနဲ့ နှစ်မိုင်ခွဲပဲဝေးတယ်။ ပါပူဝါနယူးဂီနီကလူတွေဟာ ဩစတြေးလျအာဏာပိုင်တွေနဲ့ အရောင်းအဝယ်စာချုပ်ချုပ်ထားတဲ့အတွက် ဆိုင်ဘိုင်ကျွန်းကိုရောက်လာပြီး အရောင်းအဝယ်လုပ်ကြတယ်။ တက်စီက သူ့ရွာသားအတော်များများနဲ့ တွေ့ဆုံပြီး သူတို့တွေကို ဝေငှဖို့ စာပေတွေ အလုံအလောက်မရှိဘူး။ တက်စီဟာ ယေဟောဝါသက်သေတစ်ယောက် ဖြစ်လာပြီးကတည်းက သူ့ရွာသားတွေနဲ့ တွေ့ဆုံရတာ ဒါက ပထမဆုံးအကြိမ်ဖြစ်တယ်။ ကျွန်တော်တို့ သင်္ဘောဆီ ပြန်သွားပြီး သူ့အတွက် စာအုပ်ပုံးတစ်ပုံး ယူလာပေးတယ်။ ပုံးထဲကစာပေအများစုကို တော့ခ်ပီဆန်စကားနဲ့ ပြန်ဆိုထားတယ်။ ပါပူဝါနယူးဂီနီကရောက်လာတဲ့ လူ ၃၀  ကျော်ကို တက်စီက ကျမ်းစာသတင်းတရားရှင်းပြတဲ့အတွက် လူတွေ စိတ်ဝင်စားလာပြီး ပုံးထဲကစာပေတွေအားလုံး ယူသွားကြတယ်။ သူတို့နေတဲ့ရွာကို လှေနဲ့ပဲ သွားလို့ရတယ်။ သူတို့ဆီကို ယေဟောဝါသက်သေတွေ တစ်ခါမှမရောက်ဖူးသေးဘူး။

နောက်ဆုံးသွားရတဲ့ကျွန်းဖြစ်တဲ့ ဘွိုင်ဂူကိုရောက်တော့ အခက်အခဲတွေ့ခဲ့ရတယ်။ ကျွန်တော်တို့ ကမ်းကပ်ဖို့ နှစ်မိုင်ခွဲလောက်မှာရှိနေပြီး ရေအနက်က ရှစ်ပေပဲ ရှိတော့တယ်။ သင်္ဘောအောက်ခြေကနေကြည့်ရင် ခြောက်ပေပဲရှိတယ်။ အဖွဲ့သားတစ်ယောက်နဲ့ ကျွန်တော် လှေငယ်လေးစီးပြီး အဲဒီကျွန်းကို သွားနိုင်ဖို့ လမ်းကြောင်းရှာထွက်ခဲ့တယ်။ မိုးရွာနေတဲ့အတွက် ကျွန်တော်တို့ ရေတွေစိုကုန်တယ်။ လမ်းကြောင်းရှာတွေ့ဖို့ နှစ်နာရီတောင် ကြာတယ်။

ကျွန်းကို ကျွန်တော်တို့ရောက်သွားတော့ ကျွန်းသားတွေက အံ့ဩသွားကြတယ်။ ဘာဖြစ်လို့လဲဆိုတော့ ကျွန်တော်တို့ရဲ့ ရေကြောင်းပြမြေပုံက မတိကျတဲ့အပြင် ကမ်းခြေစောင့်တပ် ဒါမှမဟုတ် ရေတပ်ကတောင် မဝင်နိုင်တဲ့ကျွန်းကို ကျွန်တော်တို့ ရောက်လာတဲ့အတွက်လို့ သူတို့ ပြောပြကြတာ။ ဒေသခံအာဏာပိုင်က ကျွန်တော်တို့ကို ဟောပြောခွင့်မပေးပေမဲ့ အဖွဲ့သားတချို့ကိုတော့ သူတို့ရဲ့ဆွေမျိုးတွေဆီ သွားလည်ပြီး ဟောပြောခွင့်ပေးတယ်။ ဒေသခံအာဏာပိုင်ရဲ့ ဆန္ဒကို ကျွန်တော်တို့လေးစားတဲ့အနေနဲ့ ဆွေမျိုးတွေဆီကိုပဲ သွားလည်ကြတယ်။ လူတစ်ယောက်က သမ္မာကျမ်းစာ အမှန်တကယ် သွန်သင်ရာမှာ အဘယ်နည်း * စာအုပ်ကို လက်ခံပြီး ချက်ချင်းစဖတ်လေရော။ နောက်တော့ သူ့ရဲ့ကျမ်းစာအုပ် ကျောဘက်မှာ မေးခွန်းတွေ ချရေးလိုက်တယ်။ နောက်ပိုင်း အဲဒီလူက သားစတေးကျွန်းကို လာလည်ပတ်ပြီး ကျွန်တော်တို့ကို ပြန်ဆက်သွယ်ခဲ့တယ်။

၂၀၀၉၊ ဇန်နဝါရီ- မာဘီအော့ကျွန်းနဲ့ မိုအာကျွန်းဆီ ကျွန်တော်တို့ ပြန်သွားကြပြီး အဲဒီက ကျမ်းစာသတင်းတရား စိတ်ဝင်စားတဲ့သူတွေဆီကို လည်ပတ်ကြတယ်။ အဲဒီကျွန်းသားတွေက ကျွန်တော်တို့ကို လှိုက်လှိုက်လှဲလှဲ ကြိုဆိုလက်ခံကြတယ်။ မိုအာကျွန်းပေါ်မှာရှိတဲ့ စိန့်ပေါလ်ရွာသားတွေက သူတို့ဆီ နောက်တစ်ခေါက် မြန်မြန်ပြန်လာစေချင်တယ်လို့ ကျွန်တော်တို့ကို ပြောကြတယ်။ ဒေသခံအာဏာပိုင်ကလည်း အချိန်မရွေး လာဟောပြောပါလို့ ပြောတယ်။

တောရစ်စတရိတ်ရေလက်ကြားမှာ လူနေထိုင်တဲ့ကျွန်းပေါင်း ၁၇ ခုရှိတယ်။ အဲဒီကျွန်းတွေပေါ်က လူဘယ်နှယောက်ကို အဆက်အသွယ်လုပ်နိုင်မယ်ဆိုတာ ကျွန်တော်တို့ မသိဘူး။ ဒါပေမဲ့ ဩစတြေးလျမြောက်ဖျားပိုင်းက ကျွန်းတွေမှာ ကျွန်တော်တို့ရဲ့ ဖန်ဆင်းရှင် ယေဟောဝါကို ကျွန်တော်တို့အားလုံး အတတ်နိုင်ဆုံး ချီးမွမ်းခွင့်ရလို့ ဝမ်းသာခဲ့ကြတယ်။

[အောက်ခြေမှတ်ချက်]

[စာမျက်နှာ ၂၃ ပါမြေပုံ]

(ကားချပ်အပြည့်အစုံများကို စာစောင်တွင်ကြည့်ပါ)

ဩစတြေးလျ

ဝီပါ

ဘာမာဂါ

တောရစ်စတရိတ် ရေလက်ကြားရှိ ကျွန်းများ

ပါပူဝါနယူးဂီနီ

[Credit Line]

Based on NASA/Visible Earth imagery

[စာမျက်နှာ ၂၄၊ ၂၅ ပါမြေပုံ]

ဘာမာဂါ

သားစတေးကျွန်း

မိုအာကျွန်း

ဝါရာဘာကျွန်း

ပါရူမာကျွန်း

မာဘီအော့ကျွန်း

ဆိုင်ဘိုင်ကျွန်း

ဒွမ်ကျွန်း

ဘွိုင်ဂူကျွန်း

ပါပူဝါနယူးဂီနီ

[Credit Line]

Based on NASA/Visible Earth imagery

[စာမျက်နှာ ၂၄ ပါပုံစာ]

သားစတေးကျွန်းကို ရောက်ရှိခြင်း

[စာမျက်နှာ ၂၄ ပါပုံစာ]

ဆိုင်ဘိုင်ကျွန်းသားတွေထံလည်ပတ်ရန် လမ်းလျှောက်သွားခြင်း

[စာမျက်နှာ ၂၅ ပါပုံစာ]

တော့ခ်ပီဆန်စကားဖြင့် သတင်းကောင်းဟောပြောခြင်း