“Mahungu Lamanene” Ma Chumayeriwa eSwihlaleni Swa Le Kule Leswi Nga En’walungwini Wa Australia

YESU u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke.” (Matewu 24:14) Timbhoni ta Yehovha ti yingisa xileriso lexi xa Yesu naswona ti tikarhatela ku byela vanhu hinkwavo rungula ra Bibele, ku nga khathariseki leswaku va tshama kwihi. (Matewu 28:19, 20) Ntirho lowu wu endliwa hi vatirhi va ku tirhandzela, hambileswi minkarhi yin’wana va bohekaka ku rhurhela etindhawini leti swi nga oloviki ku tshama eka tona naswona va tirhisa timali ta vona.

Hi xikombiso, Nathan na Carly, va olovise vutomi bya vona leswaku va ta ya chumayela vanhu lava tshamaka eSwihlaleni leswi nga ekule swa Torres Strait. Hi 2003, rhavi ra Timbhoni ta Yehovha ra le Australia ri va kombele leswaku va rhurhela eXihlaleni xa Thursday leswaku va ya tirha ni vandlha ra kwalaho. Xihlala xexo i xin’wana xa swihlala leswi nga endhawini yin’we naswona swi languteka ku fana ni tindzalama ta rihlaza leti nga elwandle ra Pacific exikarhi ka Australia na New Guinea.

Hi 2007, mpatswa lowu wu xave xikepe xa khale lexi nga endliwa hi mapulanga lexi ku rhwaleriwaka ha xona tiperela naswona xi vitaniwa Teisan-Y. Wu tirhise mali ya wona ku xi pfuxeta kutani wu xi tirhisa ku famba ha xona loko wu ya chumayela vanhu lava nga eswihlaleni leswi nga ekule, kambe wona a wu tshama eXihlaleni xa Thursday. Kambe a wu fanele wu swi tsala ehansi swin’wana swa swilo leswi endlekaka siku ni siku loko wu teka maendzo ya wona.

January 2008: Nathan u ri: Ndzi fambe hi xikepe ndzi ya eBamaga, laha ku ya ni ku vuya ku nga 80 wa tikhilomitara, leswaku ndzi landza Timbhoni ta tsevu ta kwalaho. Ku suka kona hi kongome eswihlaleni swa Warraber na Poruma. Mathanki ya xona ya petirolo lama endlaka tilitara ta 5 500 a ma tele hinkwawo naswona litara yin’wana ni yin’wana a yi durha tidolara timbirhi ($2 00). Xikepe a xi famba katsongo naswona a xi hlanganisa tikhilomitara ta khume hi awara. Kambe maxelo a ma ri manene, a ko va ni magandlati lama vangiwaka hi xikepe lexi a hi famba ha xona.

Loko hi fika eribuweni hi bohe xikepe xa hina leswaku xi nga famba-fambi, hi khandziyisa vanhu van’wana lava tirhaka na hina lava nga ni maxaka eWarraber, kutani hi ya hlangana ni ndhuna ya le xihlaleni xexo leswaku hi kuma mpfumelelo wo chumayela. Ndhuna yoleyo a yi ri mufundhisi wa kereke ya kwalaho kambe yi hi pfumelerile ku vulavula ni vaaki. Loko hi fika ePoruma hi endle leswi fanaka naswona hi wu kumile mpfumelelo wo chumayela. Vanhu va kona a va ri ni xinghana naswona a va hisekela ku hlaya minkandziyiso ya hina. Hi sungule tidyondzo to tala ta Bibele.

April 2008: Hi hlele riendzo ro ya eDauan, Saibai ni le Boigu, ku nga swihlala swinharhu leswi nga ekule, ekusuhi ni ndzilakano wa Papua New Guinea (PNG). Maxelo ma sungule ku biha hiloko hi ya eXihlaleni xa Mabuiag. Ku suka laha hi tshamaka kona hi ya eMabuiag a swi ta hi tekela tikhilomitara ta 70, kambe hi fambe tikhilomitara ta 140 hikuva a hi jikajika ni ku tsemakanya exikarhi ka maribye lama nga ematini.

 Xikepe lexi a hi famba ha xona xa Teisan-Y xi biwe hi gandlati lerikulu kutani xi nga ha languti kona laha hi yaka kona. Hi xi hundzuluxile leswaku hi xi vuyisa endleleni. Vunyingi bya vanhu lava a hi ri na vona a va khomiwe hi rhumbyana.

Loko hi fika eMabuiag, hi nyikiwe mpfumelelo wo chumayela exihlaleni xexo naswona vaaki va kona va hi amukele hi mandla mambirhi lerova hi rivala ni maxangu lawa hi langutaneke na wona. Wansati un’wana u tsakisiwe hi rungula leri hi n’wi byeleke rona lerova a kombela minkandziyiso leyi engetelekeke leswaku yin’wana ya yona a ta yi veka elayiburari ya kwalaho, laha a tirhaka kona.

May ku ya eka October 2008: Hikwalaho ka maxelo, a hi nga swi koti ku fikelela swihlala swin’wana. Kutani hi vone swi antswa leswaku hi chumayela kwala hi nga kona, hi lava ntirho wo tihanyisa ni ku lunghisa leswi nga vaka swi onhakile exikepeni xa hina.

A ku ri ni ntirho lowukulu lowu a wu fanele wu endliwa exikepeni, kutani hi suke kwalaho hi ya ehlalukweni ra Weipa, laha hi nga fika hi xi koka hi movha lowu kotaka ku koka golonyi leswaku xi huma endzeni ka mati. Ntirho wolowo a ku nga ri matlangwana! Timbhoni ta le vandlheni ra kwalaho ti tirhise nkarhi wa tona leswaku ti ta hi pfuna hi mintirho yo tanihi ku hoxa tiphayiphi, ku penda ni ku lunghisa mapulanga. Tin’wana ti hi tisele swakudya. Tin’wana ti hi nyike swilo swin’wana leswi hi nga ta swi tirhisa loko hi ya emahlweni ni maendzo ya hina yo chumayela. Hi wu tlangele swinene mpfuno ni malwandla ya tona.

December 2008: Hi tlhele hi hlela riendzo ro ya eDauan, Saibai ni le Boigu. Hi papalate mimoya leyi humaka etindhawini leti hisaka hi ku vulavula ni vanhu lava nga etindhawini teto hi tirhisa xiya-ni-moya xa le xikepeni (radar), kutani hi fambisa sweswo hi ku pfuniwa hi xona. Swi hi tekele tiawara ta 12 ku ya fika eXihlaleni xa Dauan, naswona hi xona xo saseka ku tlula hinkwaswo leswi hi nga tshama hi ya eka swona. Tintshava ta kona leti nga ni maribye a ti funengetiwe hi mapapa. Vanhu va kona a va tsakela swinene naswona hi va tshembise leswaku loko hi tlhelela ekaya hi ta yisa mabulo ya hina ya Bibele emahlweni hi ku tirhisa riqingho.

Wansati un’wana loyi vito rakwe ku nga Lettie, u tshame a amukela timagazini ta hina kutani a tsalela rhavi leswaku ri n’wi rhumela minkandziyiso yin’wana. Rhavi ra le Australia ri n’wi rhumele yona ri tlhela ri rhumela papila evandlheni ra hina ri kombela leswaku loko swi koteka hi n’wi endzela. Hi hetelele hi n’wi kumile naswona ha tsaka leswi hi hoxaka xandla eku n’wi pfuneni leswaku a enerisa xilaveko xakwe xa moya.

Loko hi fika exihlaleni xa Saibai, ndhuna ya kona yi arile leswaku hi chumayela vaaki va kwalaho. Kambe yi pfumelele lava nga ni maxaka kwalaho leswaku va ma endzela. Loko ha ha ri kwalaho, ndzi kume ntirho wo penda tiyindlu eka mfumo naswona ntirho lowu a wu hi pfuna ku hakela swilo swin’wana.

Makwerhu un’wana wa xisati loyi hi nga hlangana na yena i Tassie la humaka eximutanini xa PNG, lexi nga eka mpfhuka lowu endlaka tikhilomitara ta kwalomu ka mune ku suka eSaibai. Endzhaku ka ntwanano lowu PNG ri wu endleke ni mfumo wa Australia, vaaki va le PNG a va pfumeleriwa ku ya eSaibai hambi ku ri ku ya endla mabindzu kona. Tassie a a hlangana ni vanhu vo tala vo huma eximutanini xa ka vona naswona a nga ri na minkandziyiso leyi eneleke yo va nyika. A ku ri ro sungula a hlangana ni Timbhoni leti humaka eximutanini xa ka vona hi mpfhuka a va Mbhoni ya Yehovha. Hi ye exikepeni hi ya n’wi tekela bokisi ra minkandziyiso leyi yo tala ya yona a yi ri hi ririmi ra le PNG, leri vuriwaka Tok Pisin. Tassie u chumayele rungula ra Bibele eka vanhu  vo tlula 30 va le PNG naswona lava tsakelaka va teke minkandziyiso hinkwayo leyi a yi ri ebokisini rero. Munhu a nga kota ku ya eximutanini xexo hi xikepe ntsena naswona swi nga ha endleka leswaku vunyingi bya vaaki va kwalaho a byi si tshama byi endzeriwa hi Timbhoni ta Yehovha.

Xihlala xo hetelela lexi a hi fanele hi ya eka xona i xa Boigu, a swi nga olovi ku xi fikelela. A hi saleriwe hi tikhilomitara ta kwalomu ka mune ku ya fika eribuweni naswona mati ya kona a ma ente hi timitara timbirhi ni hafu. Xikepe a xi ri endzeni ka mati hi timitara leti endlaka 1,8. Mina swin’we ni un’wana wa vanhu lava a hi famba na vona hi tirhise xikepe leswaku hi lava ndlela yo ya exihlaleni lexi. Mpfula a yi ri eku neni naswona yi hi tsakamisile! Swi hi tekele tiawara timbirhi leswaku hi kuma ndlela ya kona.

Loko hi fika hi hlamarile loko vaaki va kwalaho va hi byela leswaku mepe lowu a hi ri na wona a wu nga ha tirhi naswona hambi ku ri murindzi wa ribuwa kumbe mavuthu ya le matini a ma si tshama ma fika exihlaleni xexo. Ndhuna ya kwalaho a yi hi pfumelelanga leswaku hi chumayela, kambe yi pfumelele lava nga ni maxaka kwalaho leswaku va ma endzela ni ku ma chumayela. Hi endle hilaha ndhuna yi hi leriseke hakona. Wanuna un’wana u amukele buku leyi nge Xana Bibele Yi Dyondzisa Yini Hakunene?, * kutani a namba a sungula ku yi hlaya ni ku tsala swivutiso leswi a nga na swona eka matluka yo hetelela ya Bibele yakwe. Wanuna yoloye u tlhele a hlangana ni Timbhoni loko a ri eXihlaleni xa Thursday.

January 2009: Hi tlhelele exihlaleni xa Moa na Mabuiag leswaku hi ya vulavula ni vanhu lava kombiseke ku tsakela rungula ra Bibele. Eswihlaleni leswi haswimbirhi, hi amukeriwe hi mandla mambirhi. Vanhu vo tala lava tshamaka eximutanini xa St. Paul le Xihlaleni xa Moa, va hi byele leswaku hi nga heti nkarhi wo leha hi nga si tlhela hi va endzela. Ndhuna ya kwalaho yi hi byele leswaku hi amukelekile ku ta hi ta chumayela exihlaleni xexo nkarhi wun’wana ni wun’wana.

Ku ni swihlala swa 17 eTorres Strait. A hi swi tivi leswaku hi ta endzela swingani leswaku hi chumayela vanhu hinkwavo lava tshamaka kwalaho. Kambe hinkwerhu ka hina evandlheni leri nga eswihlaleni swa le kule leswi nga en’walungwini wa Australia, ha tsaka leswi hi endlaka leswi nga ematimbeni ya hina leswaku hi dzunisa Muvumbi wa hina Lonkulu, ku nga Yehovha.

[Nhlamuselo ya le hansi]

[Mepe lowu nga eka tluka 23]

(Leswaku u vona rungula leri hleriweke hi ku helela, vona nkandziyiso wa kona)

AUSTRALIA

Weipa

Bamaga

TORRES STRAIT ISLANDS

PAPUA NEW GUINEA

[Xihlovo Xa Kona]

Based on NASA/​Visible Earth imagery

[Mepe lowu nga eka tluka 24, 25]

Bamaga

Thursday Island

Moa Island

Warraber Island

Poruma Island

Mabuiag Island

Saibai Island

Dauan Island

Boigu Island

PAPUA NEW GUINEA

[Xihlovo Xa Kona]

Based on NASA/​Visible Earth imagery

[Xifaniso lexi nga eka tluka 24]

Hi fika eXihlaleni xa Thursday

[Xifaniso lexi nga eka tluka 24]

Hi ri endleleni yo endzela vanhu lava tshamaka eXihlaleni xa Saibai

[Xifaniso lexi nga eka tluka 25]

Hi chumayela mahungu lamanene hi ririmi leri vuriwaka Tok Pisin