Guutimut palligunniarit

‘Uummat peqqissimigaangat artorsaateqaraangallu’

2 SAMUELI 12:1-14

TAMATTA amerlaqisunik ajortulisarpugut. Qanorluunniit peqqissimissutigitigisaraluarutsigit immaqa ima eqqarsartarpugut: ‘Guutip qamannga pisumik peqqissimillunga qinnutikka tusartarpai? Isumakkeerfigissavaanga?’ Biibilimi tuppallernartoq manna ajoqersuutigineqarpoq: Jehovap ajortuliortoqartarnera akuerinngikkaluarlugu ajortuliorsimasoq peqqissimisoq isumakkeerfigiumasarpaa. Tamanna Samuelimik allakkat aappaanni kapitali 12-imi kunngimut Daavimut, itsaq Israelimut kunngiusumut, tunngatillugu erserpoq.

Pisimasoq takorlooriaruk. Daavi ingasattunik ajortuliaqarpoq. Batseba allasiorfigaa, ajortuliaminillu tamatuminnga isertuiniarnini iluatsinngimmat Batsebap uia toqutaatinniarlugu iliuuseqarpoq. Daavip ajortuliani tamanna allanut oqaatiginngilaa qaammaterpaalunnilu pinngitsuusaarluni. Jehovalli pisimasut tamaasa ilisimavai. Daavip ajortuliai nalunngilai. Aamma takusinnaavaa Daavip uummataa ima manngertissimatiginngitsoq peqqissimisinnaanani. (Ussatit 17:3) Jehova qanoq pissava?

Jehovap pruffiiti Natani Daavimut aallartippaa. (Versi 1) Anersaamit illernartumit siulersorneqarluni Natanip kunngi periaaserilluni saaffigaa, nalunagu oqaatsini mianersuuttariaqarlugit. Natanip qanoq ililluni Daavi paasitissavaa imminut salloqittartoq qanorlu ingasatsigisumik ajortuliortoq?

Natanip Daavi imminut illersorniapallannginniassammat periaaserilluni oqaluttuamik savanik paarsisuusimasup killinneqaatigissagunagaanik oqaluttuuppaa. Oqaluttuaraa anguteqartoq marlunnik, aappaa pisooq aappaa piitsoq. Pisooq “amerlasoorsuarnik savaateqarlunilu ussiuteqarpoq, piitsulli pigisatuaraa savaaraq.” Angut pisooq tikeraaqarpoq, tikeraartunilu sassaallerfigerusuppaa. Savaaraatimili ilaat sassaalliutiginagu angutip piitsup savaaraatituaa sassaalliutigaa. Daavi oqaluttuamik piviusuusorinnikkunartoq kamangaalerpoq oqarlunilu: ‘Angut taamaaliortoq toqutassaavoq!’ Sooq? Daavi ima nassuiaavoq: ‘Taama naakkittaatsigisumik iliorami.’ * — Versit 2-6.

Natanip assersuusiaa sunniuteqarluarpoq. Daavi imminut eqqartuupporlusooq. Natanip taanna toqqarlugu ima oqarfigaa: “Illinuna pineqartutit!” (Versi 7) Natani Guuti sinnerlugu oqaluppoq, tamatumanilu erseqqippoq Jehova Daavip iliuuserisimasai pillugit qanoq misiginersoq. Daavip Guutip inatsisaanik unioqqutitsinermigut inatsisinik taakkuninnga tunniussisoq ataqqinngilaa. Guuti ima oqarpoq: ‘Asissorparma’. (Versi 10) Sukannersumik naqqinneqarnini eqqortissutigalugu Daavi ima nassuerpoq: “[Jehovamut] ajortuliorsimavunga.” Natanip Daavi uppernarsaavigaa Jehovap isumakkeerfigigaa, iliuuserisimasamili kingunipilui naammagalugit atortariaqarpai. — Versit 13, 14.

Ajortuliani qulaarneqareersoq Daavip tussiaat, nalitsinni Tussiaat 51-imik taaneqartartoq, allappaa. Tussiaammi tamatumani uummammiugisani aniatippai, qanoq peqqissimitiginini ersersillugu. Daavi ajortuliamigut Jehovamik asissuisimavoq. Kunngili peqqissimisoq Guutip isumakkeerfiginningaartuunera misigereerlugu Jehovamut ima oqarsinnaasimavoq: “Uummat peqqissimisoq artorsaateqangaartorlu itigartittarinngilat, Guuti.” (Tussiaat 51:19) Takorlooruminarpoq oqaatsit taakku ajortuliortumut peqqissimisumut Jehovamit nallittorneqarusuttumut qanoq eqqissiallannartigisimassasut. (wp10 05/01-E)

[Quppernerup ataani ilanngussaq]