Tshinela Eka Xikwembu

Loko “Mbilu Leyi Tshovekeke Yi Tlhela Yi Pfotloseka” Yi Lava Ndzivalelo

2 SAMUWELE 12:1-14

HINKWERHU ha dyoha minkarhi yo tala. Ku nga khathariseki ndlela leyi hi tisolaka ha yona, hi nga ha tivutisa: ‘Xana Xikwembu xa swi twa swikhongelo swa mina swa ku hundzuka leswi humaka embilwini? Xana xi ta ndzi rivalela?’ Bibele yi dyondzisa ntiyiso lowu, lowu chavelelaka: Hambileswi Yehovha a nga xi amukeliki xidyoho, u tiyimiserile ku rivalela mudyohi la hundzukaka. Ntiyiso lowu wu vonake kahle emhakeni ya Hosi Davhida wa le Israyele wa khale, hilaha swi nga hakona eka Samuwele wa vumbirhi ndzima 12.

Vona xiendlakalo xa kona hi mahlo ya mianakanyo. Davhida u tivona nandzu hikwalaho ka swidyoho leswikulu leswi a swi endleke. U endle vuoswi na Bati-xeba naswona loko matshalatshala yakwe yo tumbeta leswi a swi endleke ma ve nyuku wa mbyana, u hlele leswaku nuna wakwe a dlayiwa. Kutani Davhida a nga swi paluxanga swidyoho swakwe, u tiendle onge a nga tivi nchumu ku ringana tin’hweti to hlayanyana. Hambiswiritano, Yehovha a a n’wi langutile. U swi vonile swidyoho swakwe. Kambe u tlhele a swi vona leswaku Davhida a a tisola embilwini yakwe. (Swivuriso 17:3) Xana Yehovha a a ta endla yini?

Yehovha u rhumele muprofeta Natani eka Davhida. (Ndzimana 1) Hi ku kongomisiwa hi moya lowo kwetsima, Natani u ye eka hosi hi vuxiyaxiya naswona a a swi tiva leswaku u fanele a ma hlawula hi vukheta marito yakwe. Xana a a ta n’wi kombisa njhani Davhida leswaku wa tixisa kutani a n’wi pfuna a twisisa ndlela leyi swidyoho swakwe a swi bihe ha yona?

Leswaku a sivela Davhida leswaku a nga tiyimeleli, Natani u rungule xitori lexi a xi ta fikelela mbilu ya Davhida loyi a a ri murisi. Xitori xa kona a xi vulavula hi vavanuna vambirhi, loyi un’wana a a fuwile kasi loyi un’wana a a pfumala. Wanuna la fuweke a a ri ni “tinyimpfu to tala ngopfu ni tihomu” kambe wanuna la pfumalaka a a ri ni “xinyimpfana xin’we xa ntswele.” Wanuna la fuweke u ve ni muendzi naswona a a lava ku n’wi lunghiselela swakudya. Ematshan’weni yo teka yin’wana ya tinyimpfu takwe, u teke xinyimpfana xa wanuna la pfumalaka. Hi ku ehleketa leswaku xitori xexo a ku ri ntiyiso, Davhida u hlundzukile kutani a ku: “Wanuna la endlaka leswi u faneriwa hi ku fa!” Ha yini? Davhida u te: “Hikwalaho ka leswi a nga vangiki na ntsetselelo.” *—Tindzimana 2-6.

Xifaniso xa Natani xi fikelele mbilu ya Davhida. Xisweswo, Davhida u tivone nandzu. Natani u byele Davhida hi ku kongoma a ku: “Wanuna loyi hi wena!” (Ndzimana 7) Leswi Natani a a yimela Xikwembu, swi le rivaleni leswaku Xikwembu xi vone swi antswa leswaku xi tamela mhaka leyi hi xoxe. Hi ku tlula milawu ya Xikwembu, Davhida u kombise leswaku a nga n’wi xiximi Munyiki wa milawu. Xikwembu xi te: “U ndzi [langutele] ehansi.” (Ndzimana 10) Leswi mbilu ya Davhida a yi twa ku vava u te: “Ndzi dyohele Yehovha.” Natani u tiyisekise Davhida leswaku Yehovha u n’wi rivalerile, kambe Davhida a a fanele a tshovela leswi a swi byaleke.—Tindzimana 13, 14.

Endzhaku ka loko xidyoho xakwe xi paluxiwile, Davhida u tsale marito lawa sweswi ma nga eka Pisalema 51. Eka ndzima yoleyo Davhida u phofule leswi nga embilwini yakwe, a kombisa ndlela leyi a tisolaka ha yona. Hikwalaho ka swidyoho swakwe, Davhida a a n’wi langutele ehansi Yehovha. Kambe endzhaku ka loko hosi yi hundzukile kutani yi rivaleriwa, a swi fanerile ku va yi byela Yehovha yi ku: “Oho Xikwembu, mbilu leyi tshovekeke yi tlhela yi pfotloseka a wu nge yi languteli ehansi.” (Pisalema 51:17) Hakunene marito lawa ma nga chavelela mudyohi un’wana ni un’wana la hundzukeke naswona a lavaka tintswalo ta Yehovha.

[Nhlamuselo ya le hansi]