‘Meqqida Wozanay’ Maarotaa Koyiyo Wode
Xoossaakko Shiiqa
‘Meqqida Wozanay’ Maarotaa Koyiyo Wode
NUUNI ubbay darotoo nagaraa oottoos. Nuuni ay keena azzaniyaaba gidikkonne, “Taani nagaraappe simmanau wozanappe woossido woosaa Xoossay siyanee? I tau atto gaanee?” yaagidi qoppana danddayoos. Yihooway nagaran mule ufayttennaba gidikkokka, ba nagaraappe simmanau koyiya uraa i atto giyoogaa yootiyoogan, Geeshsha Maxaafay minttettees. Beni Israaˈeela Kawuwaa Daawitaara gayttidaagan, 2 Sameela shemppo 12y he tumaa loyttidi qonccissees.
Ane hanettidabaa qoppa. Daawiti issi gita nagaraa oottiis. I Berssaabiira wodiraa laammidi, ba nagaraa genttanau oottidobay hanennan ixxin, i keettaawaa worissiis. Daawiti ba nagaraa paaxennan, daro aginau suure asa milatidi deˈiis. SHin Yihooway he ubbabaa beˈiis. Qassi Daawiti oottido nagaraanne nagaraappe simmanau a wozanan koshshay deˈanaagaakka Yihooway beˈiis. (Leemiso 17:3) Yaatin, Yihooway ay oottanee?
Yihooway hananabaa yootiya Naataana Daawitakko kiittiis. (Paydo 1) Naataani haasayiyo qaalaa akeekan doorana bessiyoogaa eridi, geeshsha ayyaanaa kaaletuwan kawuwaa hiillan haasayissiis. Daawiti ba huuphiyaa cimmiiddi deˈidoogaanne keehi gita nagaraa oottidoogaa akeekanaadan Naataani waati maaddana danddayii?
Kase dorssa henttancha gidida Daawiti ayba gaasonne shiishshenna mala, i keehi azzananaadan oottiya issi taarikiyaa Naataani yootiis. Hegee issi dure bitaniyaanne issi manqqo bitaniyaa taarike. Dure bitaniyaassi “daro dorssainne miizzai de7ees”; shin manqqo bitaniyau “issi dorssa mareeppe harabi aibinne baawa.” Dure bitanee ba soo yiida imattaa imattanau koyiis. I ba dorssatuppe issuwaa shukkiyoogaappe, he manqqo bitaniyau deˈiya issi dorssiyo shukkiis. Daawiti he taarikee tuma giidi qoppennan aggenna, hanqquwaa eexxi kiyidi: “Hagaa oottida bitanee haiqqanau bessees” yaagiis. Aybissi? Daawiti: “Aissi giikko, qaretaa xayidi i hegaa oottiis” yaagiis. *—Paydo 2-6.
Naataani yootido leemisoy halchidobaa poliis. Daawiti haasayidobay ba bolli pirddidoogaa mala. Naataani qoncciyan ayyo: “He bitanee nena!” yaagiis. (Paydo 7) Naataani Xoossaa kalˈˈatidi haasayiyo gishshau, Daawiti nagaraa oottidoy Yihoowa bollaana gidiyoogaa yootiis. Xoossaa higgiyaa kanttiyoogan, Daawiti Higgiyaa Immiyaagaa karidoogaa bessiis. Xoossay: ‘Neeni tana karadasa’ yaagiis. (Paydo 10) Seeray wozanappe zilˈˈettanaadan oottin, Daawiti: “GODAA bolli nagaraa oottarggaas” yaagidi ba nagaraa paaxiis. Naataani Daawita Yihooway ayyo atto giidoogaa yootidi minttettiis; shin Daawita nagaray kaalettidobay appe qaarettenna.—Paydo 13, 14.
Ba nagaray qoncciyaa kiyi simmin, Daawiti Mazamure 51n deˈiyaagaa xaafiis. Daawiti nagaraappe simmidoy ay keenakko qonccissanau, ba wozanan deˈiyaabaa aynne ashshennan yootiis. Daawiti nagaraa oottidoogan Yihoowa kariis. SHin nagaraappe simmida kawoy Xoossaa maarotay loˈˈo gidiyoogaa akeekidi Yihoowayyo: “Abeet Xoossau, . . . meqqida wozanaa neeni karaka” yaagiis. (Mazamure 51:17) Yihoowa maarotaa koyiya, ba nagaraappe simmida uraa keehippe minttettiya qaalatuppe hagee issuwaa.
[Tohossa qofata]
^ MENT. 7 Imattau dorssaa shukkiyoogee imatuwaa mokkiyo oge. SHin dorssaa wuuqqiyoogee qixaatiyau oyddu kushe zaarana bessiyo nagara. (Kessaabaa 22:1) Daawita xeelan, dure bitanee he dorssa mariyo ekkiyoogan atto geetettenna nagaraa oottiis. I hegaa oottiyoogan, he manqqo bitaneenne a soo asay maattaanne suufiyaa demmiyooba gidida, qassi dorssa wudee ippe yelettana danddayiyo dorssiyo ekkiis.