Ämi Mwän Kana, Oua Älleasochisi Kraist, Möküremi We?

“Kraist möküren mwän meinisin.”​—1 KOR. 11:3.

1. Met a pwäri pwe Jiowa esap i emön Koten fitikoko?

 “ACH Samol me ach Kot, en ka fich ngeni om kopwe angei ling o iteuöch me manaman. Pun ka föri mettoch meinisin, nge ren letipom ra fis o manau.” Ina alon Pwarata 4:11. Jiowa Kot, i ewe Sou Nemenem mi Lapalap me a tekia seni förian kewe meinisin pun a föratä mettoch meinisin. A pwälo pwe “esap i emon Koten fitikoko, pwe Koten kinamwe,” ren napanapen an akkota ekkewe chonläng.​—1 Kor. 14:33; Ais. 6:1-3; Ipru 12:22, 23.

2, 3. (a) Iö mwänichien förien Jiowa kewe? (b) Ifa tettelin wisen Nöün Kot we mwänichi me ewe Sam?

² Kot a chök äläemön ren langattam fansoun me mwen an föratä mettoch meinisin. Äemönün förien Kot, ina i emön ngün itan “ewe Kapas” pun i chon aweni awan. Mettoch meinisin a fförütä ren ewe Kapas. Mwirin, a feitiw fönüfan, a wiliti emön aramas mi unusöch, me a iteni Jises Kraist.​—Älleani Jon 1:1-3, 14.

³ Met ewe Paipel a apasa usun tettelin wisen Kot me nöün we mwänichi? Iei makkeien ewe aposel Paul fän emmwenien ewe ngün mi fel: “Üa mochen oupwe weweiti pwe Kraist möküren mwän meinisin, nge mwän möküren fefin, nge Kot möküren Kraist.” (1 Kor. 11:3) Ewe Kraist a nom fän möküran, ina i Seman we. Älleasochis ngeni nemenem a fokkun lamot fän iten an epwe wor kinamwe me kokkotöch lein förien Kot kewe mi mirit. Ikaamwo “Kot a föri mettoch meinisin lon läng me won fanüfan” ren i, nge a chüen älleasochisi möküran we, Kot.​—Kol. 1:16.

4, 5. Met meefien Jises usun tettelin wiser me Jiowa?

⁴ Met meefien Jises usun an epwe älleasochisi Jiowa, möküran we, le feitiw fönüfan? Ewe Paipel a apasa: “Oupwe chok napanapeni ewe sokkun napanap Christ Jesus a ääni: Fansoun meinisin a napanapeni napanapen God, nge ese mo ekieki pwe ren an pochokun epwe ne anönnö pwisin i ngeni God. Iwe nge, seni pwisin an mefata non netipan a pönuku mettoch meinisin, iwe a angei napanapen emon chon angang. A winiti emon aramas o a pwäto non napanapen aramas. A pwisin atekisonatiw o a anneasosich ngeni God tori mano.”​—Fil. 2:5-8, Ewe Kapasen God.

⁵ Jises a tipetekison le älleasochisi letipen Kot fansoun meinisin. A apasa: “Üsap tongeni föri och ren püsin inisi. . . . Ai apwüng a let, pun üsap föri letipei, pwe letipen ewe mi tiniei.” (Jon 5:30) A apasa: “Üa föri mine [Semei] a pwapwa ren fansoun meinisin.” (Jon 8:29) Le sopwoloon manauen Jises woon fönüfan, iei met a apasa lon an we iotek ngeni seman we, “Üa fen alingok won fanüfan o awesala ewe angang ka ngeniei pwe üpwe föri.” (Jon 17:4) A ffat pwe ese weires än Jises esilla me etiwa än Kot nemenem woon.

Älleasochis ngeni ewe Sam A Atoto Feiöch ngeni ewe Nau

6. Ikkefa ekkewe napanap mi amwarar Jises a pwäri?

⁶ Atun Jises a nonnom woon fönüfan, a pwäri chommong napanap mi amwarar. Eü me leir, a pwäri an tong mi lapalap ngeni  Seman we. A apasa: “Üa echeni Semei.” (Jon 14:31) A pwal pwäratä watteen an tong ngeni aramas. (Älleani Mattu 22:35-40.) Jises a kirekiröch me äfänni meefien aramas, nge ese arochongaw are lamalam tekia. A apasa: “Oupwe feito rei ämi meinisin mi weiresikis o uwochou, ngang üpwe asösökemi. Oupwe ämwäralong womi ai we waas o kaiö seniei, pun ngang üa lukpwetete o tipetekison, iwe, oupwe küna söön ngünümi. Pun ai we waas üpwe anomu womi a mecheres, nge wosemi we üpwe ngenikemi a pän.” (Mt. 11:28-30) Napanapen Jises mi mürinnö me an pworaus mi apöchökkül a aururu aramas mi nikinikin siip, ese lifilifil ieriir, nge äkkäeüin chokkewe mi äpilükülüküngaw.

7, 8. Me ren ewe Allük, met a pinepin seni ewe fefin mi pwu seni chcha, nge ifa föfförün Jises ngeni?

⁷ Sipwe ppii föfförün Jises ngeni ekkewe fefin. Seni loom tori ikenäi, chommong mwän ra fokkun föfföringaw ngeni fefin. A ina usun ekkewe nöüwisin lamalam lon Israel loom. Nge Jises a süföliti fefin. A pwälo ren föfförün ngeni emön fefin mi samau ren an pwu seni chcha lon ükükün 12 ier. “A fokun riaföü” ren chommong sou säfei, me a pwal fangolo meinisin minne a wor ren fän iten an epwe pöchökkül. Inaamwo ika a fokkun achocho “nge an samau a chök wattela.” Me ren ewe allük, a limengaw. Emön mi attapa  epwe pwal limengaw ren.​—Lif. 15:19, 25.

⁸ Lupwen ewe fefin a rong pwe Jises a kan echikaratä ekkewe mi samau, a fiti ewe mwichen aramas mi rongelo Jises, iwe, a apasa: “Are  üpwe chök atapa üfan, üpwe pöchökülsefäl.” Iwe, a attapa Jises, me a mwittir pöchökkülsefäl. Jises a silei pwe ese pwüng än neminna attapa üfan we. Iwe nge, ese lal ngeni neminna, nge a kirekiröch ngeni. A weweiti meefien neminna ren an sessemwen fite ier, me a mirititi pwe a fokkun osupwangen älillis. Jises a ereni fän tong: “Nei fefin, om lükülük a apöchökülokotä. Kopwe feila fän kinamwe pwe ka chikar seni om samau.”​—Mark 5:25-34.

9. Met Jises a ereni nöün kewe chon käeö atun ra eppeti än ekkewe semirit etto ren?

⁹ Ekkewe mwo semirit ra meefi kinamwe ren ar nonnom ren Jises. Atun aramas ra uweato semirit ren Jises, nöün kewe chon käeö ra apwüngüür pun ra meefi pwe repwe aosukosuka Jises. Nge esap ina meefien Jises. Ewe Paipel a erä: “Lupwen Jises a nengeni, a chok lingeringer, o a apasa [ngeni nöün kewe chon käeö], ‘Oupwe mut ngeni ekkewe semirit pwe repwe feito rei, nge ousap pinei ir, pun chon usuni usur repwe muuni ewe muun Kot.’” Iwe, a pwal “foropachei ir, a iseta poun wor, o a afeiochur.” Jises a wesewesen etiwaöchü me sani semirit.​—Mark 10:13-16, TF.

10. Ifa usun Jises a tongeni napanapeni napanapan kewe mi mürinnö?

¹⁰ Ifa usun Jises a tongeni napanapeni ekkena napanap a pwäri atun a nonnom fönüfan? Atun a nonnom ren Seman we langattam fansoun, a kan nennengeni me käkkäeö seni napanapan kewe. (Älleani Än Salomon Fos 8:22, 23, 30.) Lon läng, a kan akkattola napanapen än Jiowa nemenem woon förian kewe fän tong, iwe, a pwal äkkäppirü. Ika pwe Jises ese älleasochis, esap tufichin föri ena. A fokkun pwapwa le nom fän nemenien Seman we, iwe, Jiowa a pwapwa le nöüni ena sokkun nau mi älleasochis. Jises a unusen mwirifichi Seman we atun a nonnom woon fönüfan. A ifa me feiöchüch le nom fän nemenien Kraist, ewe Sou Nemenemen Mwuun läng mi kefilitä me ren Kot!

Äppirü Napanapen Kraist Kewe

11. (a) Iö we sipwe fokkun achocho le äppirü? (b) Pwata a äkkäeüin lamot ngeni ekkewe mwän lon ewe mwichefel ar repwe äppirü Jises?

¹¹ Chon Kraist meinisin, nge äkkäeüin ekkewe mwän, repwe akkachocho le äppirü napanapen Kraist kewe. A fen affat lon ewe Paipel pwe “Kraist möküren mwän meinisin.” Kraist a äkkäppirü Möküran we, iwe, Chon Kraist mwän repwe pwal achocho le äppirü mökürer we, ewe Kraist. Paul a pwal föri ena lupwen a wiliti emön chon Kraist. A pwal pesei chiechian kewe Chon Kraist: “Oupwe apirüei usun ngang üa apirü Kraist.” (1 Kor. 11:1) Iwe, ewe aposel Piter a apasa: “Pun iei mine Kot a körikemi ren, pun Kraist a pwal riaföü fänäsengesimi o likiti ngenikemi eu lenien apirü, pwe oupwe tapwela mürin lon ipwan.” (1 Pit. 2:21) A pwal lamot ngeni ekkewe mwän ewe kapasen fön pwe repwe äppirü Kraist pun iir repwe wisen elter me ministerial servant. Jises a pwapwa le äkkäppirü Jiowa, iwe, epwe ina usun ekkewe mwän Chon Kraist repwe pwal pwapwa le äkkäppirü Kraist me napanapeni napanapan kewe.

12, 13. Epwe ifa föfförün ekkewe elter ngeni ekkewe siip mi nom fän ar tümün?

¹² Ekkewe elter lon ewe mwichefelin Chon Kraist repwe käeö pwe repwe usun Jises. Iei än Piter fön ngeni ekkewe elter: “Oupwe tümwünü ewe mwichen sip Kot a ngenikemi, pwe oupwe foleniir ren unusen letipemi, pun iei usun met Kot a mochen pwe oupwe föri, nge esap me lükitipemi. Oupwe föri ämi angang, sap fänäsengesin ämi chök mochen angei liwin, nge seni wesewesen ämi mochen föri ewe angang. Ousap nemenemengau ngeni chokewe mi nom fän ämi tümwün, nge oupwe eu lenien apirü ngeni ewe mwich.” (1 Pit. 5:1-3) Ekkewe Chon Kraist elter resap nemenemengaw, nikinikin meilap, isetiw chommong allük mi äweiresi aramas, are arochongaw. Repwe achocho le äppirü Kraist, eäni tong, äfänni meefien chon  ewe mwichefel, tipetekison, me kirekiröch lon föfförür ngeni ekkewe siip mi nom fän ar tümün.

¹³ Chokkewe mi ekkemmweni ewe mwichefel rese unusöch, iwe, repwe chechchemeni pwe mi chök aükük tufichir. (Rom 3:23) Ina minne, repwe fokkun mwötöres le käeö usun Jises me äppirü an tong. A lamot repwe ekilonei me äppirü än Kot me Kraist föfför ngeni aramas. Piter a pesekich: “Ami meinisin oupwe pwilitalong tipetekison lefilemi, pun ‘Kot a u ngeni ir mi lamalam tekia, nge a fangelo chen ngeni ir mi tipetekison.’”​—1 Pit. 5:5, TF.

14. Ifa ükükün än ekkewe elter repwe pwäri ar süföliti ekkewe ekkoch?

¹⁴ Ekkewe mwän mi kefilitä lon ewe mwichefel repwe pwäri napanap mi mürinnö ngeni nöün Kot kewe siip. Rom 12:10 a apasa: “Tongen pwipwi lon Kraist epwe pwichikar lefilemi. Oupwe fokun asamolufengenikemi lefilemi.” Ekkewe elter me ministerial servant repwe süföliti ekkewe ekkoch. Usun chök Chon Kraist meinisin, ‘resap föri föförün apangau are föri och ekiekin sikesik, nge repwe tipetekisonfengen lefiler, resap ekieki pwe ra mürina seni ekewe ekoch.’ (Fil. 2:3) Ekkewe elter repwe ekieki pwe ekkewe ekkoch ra mürinnö seniir. Ren ar föri ena, repwe apwönüetä än Paul we kapasen emmwen, a erä: “Oukich kewe mi pöchökül lon ach lükülük sipwe alisi ekewe mi apwangapwang lon ar lükülük, pwe repwe tipeppos lon ar lükülük, nge sisap föri chök mine sipwe pwapwa ren. Kich meinisin sipwe föri mine pwiich kewe souläng repwe pwapwa o feiöch ren, pwe repwe fefeitä lon ar lükülük. Pun Kraist esap chök kütta mine epwe püsin pwapwa ren.”​—Rom 15:1-3.

‘Mwän Kana, Oupwe Asamolu Pwülüwemi’

15. Itä ürürün epwe ifa föfförün ewe mwän ngeni pwülüwan we?

¹⁵ Sipwele etittina än Piter kapasen emmwen ngeni mwän pwüpwülü. A makkeei: “Ami mwan kena, oupwe nonnom ren puluemi ren ach tipatchemen Soulang; oupwe asamolu ir, pun fefin mi apwangapwang senikemi.” (1 Pit. 3:7, TF) Ach asamolu emön a wewe ngeni ach süföliti. Weween, sipwe äfänni ekiekin, osupwangan, me mochenin, me eli sipwe mut ngeni tipan ika esor popun mi lamot sipwe pinei. Itä ürürün epwe ina usun föfförün ewe mwän ngeni pwülüwan we.

16. Ifa än Paipel öüröür ngeni ekkewe mwän usun ar repwe asamolu pwülüwer kewe?

¹⁶ Lupwen Piter a ereni ekkewe mwän pwe repwe asamolu pwülüwer kewe, a pwal öüröürer: “Pwe esap wor och epwe pinei ami kewe iotek.” (1 Pit. 3:7) A affata ükükün watteen än Jiowa ekieki föfförün emön mwän ngeni pwülüwan. Ika ese asamolu pwülüwan, an iotek epwe pinepin. Iwe, itä ekkewe fefin resap meefi pwapwa ika pwülüwer kewe ra süfölitiir?

17. Ürürün epwe ifa ükükün än ekkewe mwän tongei pwülüwer?

¹⁷ Än Kot we Kapas a fönöü ekkewe mwän pwe repwe tongei pwülüwer, a erä: “Epwe chok pwal iei usun ren mwan, pwe repwe tongei puluer usun chok pwisin inisir.” . . . Esor emon mi oput pwisin fitukan, pwe a chok foleniochu o aucheani, usun Kraist ren ewe mwichefel . . . Ami mwan kena, oupwe chok tongei en me puluan usun chok pwisin ami.” (Ef. 5:28, 29, 33, TF) Ürürün epwe ifa ükükün än ekkewe mwän tongei pwülüwer? Paul a makkeei: “Ami mwan kena, oupwe tongei  puluemi, usun chok Kraist a pwal tongei ewe mwichefel, o a pwisin fangelo manauan fan asengesin i.” (Ef. 5:25, TF) Pwüngün, emön mwän epwe tipemecheres le pwal mwo nge fangolo manauan fän iten pwülüwan we, usun chök met Kraist a föri fän itach. Ika emön Chon Kraist mwän a tongei, äfänni, ekieki, kisäseü ngeni pwülüwan we, iwe, epwe mecheres ngeni neminna an epwe älleasochisi möküran we.

18. Met epwe älisi ekkewe mwän le asamolu pwülüwer?

¹⁸ Epwe kon weires ngeni ekkewe mwän ar repwe ina usun le asamolu pwülüwer? Aapw, Jiowa esap awisa ngeniir och mettoch esap pwäk ngeniir. Pwal eü, Jiowa a ngeni chon fel ngeni an manaman mi pöchökkül seni meinisin, ina an we ngün mi fel. Jises a apasa: “Iwe, are mwo ämi aramas mi ngau oua silei ämi oupwe fang ngeni nöümi lifang mi mürina, epwe fen ifa me watten än Sememi lon läng fangela Ngünmifel ngeni chokewe mi tüngorei!” (Luk 11:13) Lon ar kewe iotek, ekkewe mwän ra tongeni tingor pwe Jiowa epwe älisiir ren än we ngün mi fel pwe repwe föfföröch ngeni ekkewe ekkoch, kapachelong pwülüwer kewe.—Älleani Fofor 5:32.

19. Met sipwe käeö lon en lesen mwirin?

¹⁹ Pwüngün, a chou wisen ekkewe mwän le käeö ar repwe älleasochisi me äppirü Kraist lon an apwönüetä wisan, wisen möküren ewe mwichefel. Nge ifa wisen ekkewe fefin, äkkäeüin, ekkewe mi pwüpwülü? Ewe lesen mwirin ei epwe äiti ngenikich ifa usun ekkewe fefin repwe ekieki wiser lon än Jiowa kokkot.

Ka Chechchemeni?

• Ikkefa napanapen Jises kewe sipwe äppirüür?

• Ürürün epwe ifa föfförün ekkewe elter ngeni ekkewe siip?

• Ürürün epwe ifa föfförün emön mwän ngeni pwülüwan?

[Ekkewe Kapas Eis Fan Iten Ewe Lesen]

[Ekkewe sasing lón pekin taropwe 16]

Äppirü Jises ren om asamolu ekkewe ekkoch