Zonm, eski ou soumet avek lotorite Kris konman ou Sef?

“Kris i sef tou zonm.”—1 KOR. 11:3.

1. Kwa ki montre ki Zeova i en Bondye annord?

REVELASYON 4:11 i dir: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” Vi ki i’n kree tou keksoz, Zeova i Souvren parlao tou keksoz dan liniver e i annan lotorite lo tou sa ki i’n kree. Zeova i “pa en Bondye dezord, me en Bondye lape,” sa i evidan dan lafason ki bann lanz i ganny organize.—1 Kor. 14:33; Iza. 6:1-3; Ebr. 12:22, 23.

2, 3. (a) Lekel Zeova ti kree premye? (b) Ki pozisyon sa Garson premye ne konpare avek son Papa?

² Avan okenn lezot keksoz ti ganny kree, Bondye ti’n egziste li tousel pour en kantite lannen ki nou menm nou pa ni pou kapab konte. Premye keksoz ki i ti kree i sa lanz ki osi ganny apele “Laparol” akoz i ti Portparol Zeova. Tou lezot keksoz ti vin an egzistans atraver Laparol. Pli tar Laparol ti vin lo later konman en imen parfe e i ti ganny apele Zezi Kri.—Lir Zan 1:1-3, 14.

³ Ki Labib i dir konsernan pozisyon ant Bondye ek son Garson premye ne? Letan i ti pe ekrir anba lenspirasyon, zapot Pol ti dir: “Sepandan, mon oule ki zot konpran ki Kris i sef tou zonm, ki en mari i sef son madanm e Bondye i sef Kris.” (1 Kor. 11:3) Kris i anba lotorite son Papa. Lotorite ek soumisyon i vreman enportan pour ki i annan lape ek lord parmi bann imen ek lanz. Menm sa enn par ki “Bondye in kre tou sa ki egziste” i merit soumet avek lotorite Bondye konman son Sef.—Kol. 1:16.

4, 5. Ki mannyer Zezi ti santi an rapor avek soumet anba lotorite son Papa?

⁴ Ki mannyer Zezi ti santi an rapor avek soumet anba lotorite Zeova konman son Sef e vin lo later? Lekritir i dir: “Menm ki [Kris Zezi] ti posed natir Bondye i pa ti [“anvi,” NW] ran egal avek Bondye. Me, okontrer, par son prop volonte, i ti renons tou sa ki i posede pour pran kondisyon lesklav. I ti pran natir imen, konman en zonm, i ti aksepte viv dan limilite e montre li obeisan ziska lanmor, menm lanmor lo [“en poto martir,” NW].”—Fili. 2:5-8.

⁵ Avek limilite Zezi ti touzour soumet avek lavolonte son Papa. I ti dir: “Mon pa kapab fer nanryen par mwan menm. . . . [M]on zizman i zis akoz mon pa pe esey fer sa ki mwan mon oule, me sa ki sa enn ki’n anvoy mwan i oule.” (Zan 5:30) I ti osi dir: “Mon touzour fer sa ki fer [mon Papa] plezir.” (Zan 8:29) Dan en lapriyer ki Zezi ti fer avek son Papa ver lafen son lavi lo later, i ti dir: “Mon’n glorifye ou lo later. Mon’n fini sa travay ki ou’n donn mwan pour fer.” (Zan 17:4) I evidan ki i pa ti en problenm pour Zezi rekonnet e aksepte ki Zeova i son Sef.

Soumet avek son Papa in anmenn byenfe pour Garson

6. Ki bann zoli kalite Zezi ti demontre?

⁶ Kan Zezi ti lo later, i ti demontre plizyer zoli kalite. Sa gran lanmour ki i ti annan pour son Papa ti enn parmi. I ti dir: “Mon kontan mon Papa.” (Zan 14:31) I ti osi demontre en gran lanmour pour bann dimoun. (Lir Matye 22:35-40.) Zezi ti zantiy e enterese avek lezot,  i pa ti brit ouswa dominer. I ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.” (Mat. 11:28-30) Bann dimoun tou laz ki resanble mouton, sirtou sa bann ki ti pe ganny martirize e ganny abize ti ganny rekonforte en kantite avek personnalite agreab ki Zezi ti annan e son mesaz ankourazan.

7, 8. Dapre Lalwa, ki sa madanm ki ti ganny lemorazi pa ti devret fer, me ki mannyer Zezi ti tret li?

⁷ Egzamin lafason ki Zezi ti tret bann madanm. Tou dilon listwar, plizyer zonm in tret bann madanm dan en move fason. Bann sef relizye dan letan lontan Izrael ti fer sanmenm zot osi. Me Zezi li i ti tret bann madanm avek respe. Sa ti evidan dan lafason i ti tret en madanm ki pour 12 an ti pe soufer avek en lemorazi. “I ti’n soufer bokou” avek bann dokter e i ti’n depans tou son resours pour esey vin byen. Malgre tou sa zefor ki i ti fer, “son leta ti’n vin pli pir.” Dapre Lalwa, i ti ganny konsidere konman enpir. Nenport ki ki ti tous li ti pou vin enpir.—Lev. 15:19, 25.

⁸ Kan sa madanm ti tande ki Zezi ti pe geri bann malad, i ti al parmi lafoul ki ti otour Zezi an dizan: “Si zis mon arive tous son lenz mon pou geri.” I ti tous Zezi e deswit i ti geri. Zezi ti konnen ki sa madanm pa ti’n devret tous son lenz, me kantmenm sa i pa ti dispit avek li. Plito, i ti zantiy avek li. Zezi ti konpran santiman ki sa madanm ti’n kapab annan pandan tou sa lannen ki i ti’n malad e rekonnet ki i ti dezespere, i ti anvi ganny ede. Ranpli avek konpasyon, Zezi ti dir sa madanm: “Ma-fiy ou lafwa in sov ou, al an-pe, e ganny delivre avek ou maladi.”—Mark 5:25-34.

9. Kan bann disip Zezi ti esey anpes bann zanfan vin kot li, ki mannyer Zezi ti reazir?

⁹ Menm bann zanfan ti kapab santi zot alez dan prezans Zezi. En fwa, kan bann dimoun ti anmenn bann zanfan kot li, son bann disip ti reprimann zot, petet zot ti panse ki Zezi pa ti anvi ganny distrer avek sa bann manrmay. Me pa koumsa ki Zezi ti santi. Sa resi dan Lekritir i dir: “Kan Zezi ti war sa i pa ti kontan, e i ti dir avek son bann disip, ‘Les bann zanfan vin kot mwan, pa anpes zot, akoz Rwayonm Bondye i pour sa ki resanble zot.’” Apre sa “i ti pran bann zanfan dan son lebra, enpoz lanmen lo zot e beni zot.” Zezi pa ti les sa bann zanfan vin kot li ki ou a fer, me i ti kontan pour akey zot byen.—Mark 10:13-16.

10. Kote Zezi ti aprann sa bann kalite ki i ti annan?

¹⁰ Kote Zezi ti ganny sa bann kalite ki i ti demontre ler i ti lo later? Pandan ki i ti pe viv dan lesyel avan vin lo later, Zezi ti’n obzerv son Papa pour en bon pe letan e aprann bokou avek li. (Lir Proverb 8:22, 23, 30. *) Dan lesyel i ti’n vwar lafason ki Zeova ti egzers son lotorite lo tou Son kreasyon e li osi i ti fer parey. Eski Zezi ti pou’n kapab fer sa si i pa ti soumet avek son Papa? I ti en plezir pour li soumet avek son Papa e i ti osi en plezir pour Zeova annan en Garson parey li. Kan i ti lo later, Zezi ti reflekte bann zoli kalite son Papa ki dan lesyel dan en fason parfe. Pa i vreman en privilez pour nou soumet avek Kris, sa Dirizan ki Bondye in swazir pour diriz son Rwayonm ki dan lesyel!

Imit bann kalite Kris

11. (a) Lekel nou devret fer bokou zefor pour imite? (b) Akoz bann zonm dan kongregasyon i sirtou bezwen fer zefor pour imit Zezi?

¹¹ Tou dimoun dan kongregasyon, sirtou bann zonm i devret kontinyen travay dir pour imit bann kalite ki Kris i annan. Parey nou’n vwar pli boner, Labib i dir ki “Kris i sef  tou zonm.” Parey Kris i imit son Sef, setadir sa vre Bondye, bann zonm Kretyen i devret fer bokou zefor pour imit Kris, zot Sef. Ler i ti vin en Kretyen, sanmenm ki zapot Pol ti fer. I ti sipliy bann Kretyen: “Imit mwan parey mwan mon imit Kris.” (1 Kor. 11:1) Pyer li i ti dir: “Se pour sanmenm, annefe, ki Bondye in apel zot, parski Kris limenm in soufer pour zot, an lesan pour zot en legzanp pour zot swiv.” (1 Pyer 2:21) I annan ankor en lot rezon akoz sa konsey pour imit Kris i devret enteres bann zonm. Parski se zot ki vin bann ansyen ek asistan ministeryel. Parey Zezi ti trouv lazwa ler i ti imit Zeova, bann zonm Kretyen osi i devret trouv lazwa kan zot imit Kris ek son bann kalite.

12, 13. Konman bann ansyen i devret tret bann mouton ki zot in ganny konfye?

¹² Bann ansyen dan kongregasyon i oblize aprann pour vin parey Kris. Pyer ti konsey bann ansyen: “Pran byen swen troupo Bondye ki’n ganny konfye avek zot konman berze; pa fer li kontre-ker me avek bonn volonte, konman Bondye i oule. Pa fer li pour ganny larzan me avek devouman. Pa bezwen domin lo bann ki’n ganny konfye dan zot responsabilite, me zotmenm, zot devre vin en model pour troupo.” (1 Pyer 5:1-3) Bann ansyen pa devret azir konman bann diktater, ni dominer, otoriter ouswa azir brit avek lezot. Lefet ki zot pe imit legzanp Kris, zot devret fer bokou zefor pour annan lanmour, pran konsiderasyon pour lezot, annan limilite e zantiy dan lafason zot tret troupo ki zot in ganny konfye pour pran swen avek.

 ¹³ Sa bann frer ki annan responsabilite dan kongregasyon i enparfe e zot devret touzour konsyan zot lenperfeksyon. (Rom. 3:23) Alor, zot devret vreman anvi aprann lo Zezi e imit son lanmour. Zot devret osi egzamin byen lafason ki Bondye ek Kris i tret bann dimoun e fer bokou zefor pour fer parey zot osi. Pol i ankouraz nou: “Montre bokou limilite dan zot relasyon avek kanmarad parski Lekritir i dir: ‘Bondye i opoz sa ki annan lorgey, me i donn son lagras sa ki annan limilite.’”—1 Pyer 5:5.

14. Ziska ki degre bann ansyen i devret tret lezot avek respe?

¹⁴ Bann ansyen ek asistan ministeryel dan kongregasyon i devret demontre bann bon kalite dan lafason zot tret troupo Bondye. Romen 12:10 i dir: “Annan en gran lafeksyon pour kanmarad parey bann frer, e setaki montre plis respe pour kanmarad.” Bann ansyen ek asistan ministeryel i devret annan respe pour lezot. Parey lezot Kretyen an zeneral, sa bann zonm pa devret ‘fer nanryen par lespri egois e vantar, me avek limilite konsider lezot pli enportan ki zot.’ (Fili. 2:3) Sa bann ki annan responsabilite dan kongregasyon i devret konsider lezot pli siperyer ki zot. Si bann ansyen i fer sa, zot pe swiv konsey Pol ki dir: “Nou ki for nou devre siport febles bann ki feb, non pa rod nou prop plezir. Sakenn antre nou i devre esey fer plezir son prosen pour fer li vin pli for dan lafwa. Kris li pa ti esey rod sa ki ti fer li plezir.”—Rom. 15:1-3.

‘Tret ou madanm avek respe’

15. Ki mannyer bann msye marye i devret tret zot madanm?

¹⁵ Aprezan egzamin konsey ki Pyer i donn bann msye marye. I ti ekrir: “Zot osi bann msye, zot devre viv dan larmoni sakenn avek son madanm e rekonnet ki bann madanm i annan en natir pli feb. Tret zot avek respe.” (1 Pyer 3:7) Tret en dimoun avek respe oubyen donn li loner i vedir ki ou rekonnet son valer e pa abes li. Savedir ou pou pran an konsiderasyon lopinyon, bezwen ek lanvi sa dimoun e ou pou menm kapab pare pour sede amwen ki i annan en bon rezon pour ou pa fer li. Koumsa ki en msye i devret tret son madanm.

16. Ki lavertisman Labib i donn bann msye an rapor avek lafason zot tret zot madanm?

¹⁶ Ler Pyer ti pe konsey bann msye marye pour tret zot madanm avek respe, i ti osi fer zot konnen ki si zot ti fer sa “zot lapriyer pa [ti] pou ganny okenn lobstak.” (1 Pyer 3:7) Sa i montre klerman ki lafason en msye i tret son madanm i en keksoz vreman serye pour Zeova. Si en msye pa tret son madanm byen sa i kapab en lobstak pour son lapriyer. An plis ki sa, eski an zeneral pa bann madanm i azir dan en bon fason kan zot msye i tret zot avek respe?

17. Ziska ki degre en msye marye i devret kontan son madanm?

¹⁷ Konsernan kontan zot madanm, Labib i donn sa konsey: “Bann zonm devre alor, kontan zot madanm parey zot kontan zot prop lekor. . . . Annefe napa personn ki’n deza ay son prop lekor, okontrer, i nouri li e pran byen swen avek li, parey Kris i fer pour [“kongregasyon,” NW]. . . . Fodre ki sak mari i kontan son madanm parey son prop lekor.” (Efe. 5:28, 29, 33) Ziska ki degre en zonm i devret kontan son madanm? Pol ti  ekrir: “Zot, bann mari, kontan zot madanm parey Kris in kontan [“kongregasyon,” NW] e in donn son lavi pour li.” (Efe. 5:25) Wi, en msye i devret menm pare pour donn son lavi pour son madanm, zis parey Kris ti fer pour lezot. Kan en mari Kretyen i tret son madanm avek tandres, i respekte li, ekout li e i pa egois, i fasil pour sa madanm soumet avek son lotorite konman sef.

18. Ki led bann msye i gannyen pour ki zot desarz zot responsabilite dan maryaz?

¹⁸ Eski tret zot madanm avek respe dan sa fason i tro bokou pour demann bann msye marye pour fer? Non, Zeova pa pou zanmen demann zot pour fer en keksoz ki plis ki sa ki zot kapab fer. Deplis, bann adorater Zeova i kapab ganny led lespri sen Bondye, sa lafors pli pwisan dan liniver. Zezi ti dir: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:13) Dan zot lapriyer, bann msye marye i kapab demann Zeova led son lespri sen e Zeova pou ed zot dan lafason zot tret lezot, enkli zot madanm.—Lir Akt 5:32.

19. Ki pou ganny egzaminen dan lot lartik?

¹⁹ Vreman alor, bann msye i annan en gro responsabilite pour aprann lo konman pour soumet avek Kris e imit son lotorite konman zot Sef. Me ki pour dir lo bann madanm, sirtou bann madanm marye? Lot lartik pou diskit lo konman bann madanm marye i devret konsider zot rol dan laranzman Zeova.

[Not anba lo paz]

Eski ou rapel?

• Ki bann kalite Zezi nou merit imite?

• Ki mannyer bann ansyen i devret tret troupo?

• Konman en msye i devret tret son madanm?

[Kestyon]

[Portre lo paz 16]

Imit Zezi par tret lezot avek respe