Mwaane, Kam Aantaeka Nakon Ana Waaki Ni Kairiri Kristo?

“Atuia mwaane nako bon te Kristo.”​—1 I-KORINTO 11:3.

1. Tera ae kaotaki iai bwa Iehova bon tiaki te Atua ae te tia karekea te mangaongao?

 E TAEKINAKI ae kangai n Te Kaotioti 4:11: “Ko riai n anganaki te neboaki ma te karineaki ma te mwaaka, ngkoe ae Iehova ae Atuara, bwa ko karikii bwaai ni kabane, ao ibukin nanom, ao a a riki baikai bwa ko karikii.” E riki Iehova ae te Atua bwa te tia Tautaeka ae Moan te Rietata n te iuniweeti, ibukina bwa bon te tia Karikiriki ao iai mwaakana i aon ana karikibwai nako. E kona n noraki Iehova bwa bon ‘tiaki te Atua ae te tia karekea te mangaongao . . . , ma te tia karekea te rau,’ n arona ni baireiia kaain ana utu aika anera.​—1 I-Korinto 14:33; Itaia 6:1-3; I-Ebera 12:22, 23.

2, 3. (a) Antai are e moani karikaki iroun Iehova? (b) Tera nakoan te Nati are te moanibung ni kaineti ma Tamana?

² Imwaini karikan te bwai teuana, ao bon iai mangkoa te Atua i nanon ririki aika aki kona ni warekaki. Ana moani karikibwai bon te anera ae ataaki n arana ae “te Taeka,” kioina ngkai te tia Taetae ibukin Iehova. A riki bwaai nako rinanon te Taeka. Rimwi riki, e roko i aon te aba ao n riki bwa te mwaane ae kororaoi are e a kinaaki bwa Iesu Kristo.​—Wareka Ioane 1:1-3, 14.

³ Tera ae taekinaki n te Baibara ibukin reitakin nakoan te Atua ma Natina ae te moanibung? I aani kairan te abotoro Bauro n te taamnei, e a tuangira ni kangai: “I tangiringkami bwa kam na ataia bwa atuia mwaane nako bon te Kristo, ao atun te aine te mwaane, ao atun te Kristo te Atua.” (1 I-Korinto 11:3) E mena te Kristo i aan ana waaki ni kairiri Tamana. E rangi ni kakawaki te waaki ni kairiri ao te aantaeka, bwa e aonga n taabangaki reken te rau ma te riai i buakoia ana karikibwai aika wanawana. E riai naba teuare ‘a karikaki bwaai ni kabane rinanona’ n aantaeka nakon ana waaki ni kairiri te Atua.​—I-Korote 1:16.

4, 5. Tera ae e namakinna Iesu ibukin nakoana ni kaineti ma Iehova?

⁴ Tera ae e namakinna Iesu ni kaineti ma arona n aantaeka nakon ana waaki ni kairiri Iehova ao rokona i aon te aba? E taekinaki ae kangai n te Baibara: “E aki iangoa ae e na taua te nakoa [Kristo Iesu] ae e na boraoi iai ma te Atua, e ngae ngke ai aron te Atua ngaia. Eng, e kaaki oin arona ao e arona aron te toro ao e riki bwa ai aroia aomata. Ao irarikina, ngke e ataia bwa e a riki bwa aroia aomata, ao e kananorinanoa ao e ongeaba ni kataua matena, eng, ae te mate i aon te kai ni kammaraki.”​—I-Biribi 2:5-8.

⁵ E nanorinano n aantaeka Iesu n taai nako ni karaoa nanon Tamana. E taku: “Akea te bwai teuana ae I kona ni karaoia i bon irou, . . . e eti au motikitaeka, ibukina bwa I aki ukoukora karaoan nanou, ma I ukoukora karaoan nanon teuare kanakomaiai.” (Ioane 5:30) E taku: ‘I kakaraoi baike a kakukureia Tamau.’ (Ioane 8:29) Ngke e a kaan tokini maiun Iesu i aon te aba ao e tataro nakon Tamana ni kangai: “I a tia n neboiko i aon te aba, ni katiaan te mwakuri are ko anganai bwa N na karaoia.” (Ioane 17:4) E teretere raoi bwa akea ana kangaanga Iesu n ataakin ao ni butimwaean ana waaki ni kairiri te Atua nakoina.

E Karekei Kakabwaiaana te Nati n Ana Aantaeka Nakon te Tama

6. Baikara aroaro aika rangi n tamaroa ake e kaotiotii Iesu?

⁶ E kaotiotii aroaro aika bati aika rangi n tamaroa Iesu ni menana i aon te aba. Mai buakon aroarona akanne, bon ana tangira ae korakora are e kaotiotia ibukin Tamana. E taku: “I tangira te Tama.” (Ioane 14:31) E kaotiota naba ana tangira ae korakora ibukia aomata. (Wareka Mataio 22:35-​40.) E akoi Iesu ao e atataiaomata, e aki iowawa ke ni kairimatoa. E taku: “‘Nakomai  nakoiu ngkami akana kam korakai ma n rawawata, ao N na motiki rawami. Amoa amou i aomi ao reirei irou bwa I nimamannei ao I nanorinano, ao e na kabebeteaki nanomi iai. Bwa e kamaiu amou ao e bebete uotau.’” (Mataio 11:28-30) A bane aomata aika kakaokoro aia ririki aika ai aroia tiibu, ni karekea raun nanoia ae korakora n aroaron Iesu aika kakukurei ma ana rongorongo ae kaungaunga, ai moarara riki aomata ake a karawawataaki.

7, 8. E kanga n tiatianaki i aan te Tua te aine ae nraraa, ma tera ae e karaoia Iesu nakoina?

⁷ Iangoa te bwai ae karaoia Iesu nakoia aine. Mangkekei ni karokoa ngkai, a bati mwaane aika a rangi n iowawa nakoia aine. Eng, a boni karaoa naba anne mataniwin Aaro ake i Iteraera rimoa. Ma e karineia aine Iesu. E noraki koauan aei n arona nakon te aine are e nraraa i nanon 12 te ririki. “E bati rawawatana” irouia taokita ao e a tia ni kabanei kaubwaina nako bwa e aonga ni marurung. N aki ongei ana kakorakora akanne ni kabane, e a “kakaiaki riki.” I aan te Tua, e iangoaki neiei bwa e aki itiaki, ao ane e ringnga e na riki naba n aki itiaki.​—Nakoaia Ibonga 15:19, 25.

⁸ Ngke e ongo te aine aei taekan Iesu ni kamaiuia aoraki, ao e a iriia aomata aika bati ake a katobibia Iesu ao e taku: “Ngkana I bon ringa ana kauaatao, ao I a marurung naba.” E ringa Iesu ao e a rina naba ni marurung. E ataia Iesu bwa e aki riai n ringa ana kauaatao neiei. Ma e ngae n anne e aki un nakon neiei. Ni kaitaraana, e akoia. E oota n ana namakin neiei i nanon ririki ake e aoraki iai, ao e ataia bwa e rangi ni kainnanoa te ibuobuoki. E nanoangaia Iesu ao e taku: “Natiu, e kamarurungko am onimaki. Naako ma te rau, ao ko na marurung.”​—Mareko 5:25-34.

9. Tera aron Iesu nakoia taan rimwina ngke a kataia n tukiia ataei mairouna?

⁹ A kona naba n namakina te mwengaraoi ataei i rarikin Iesu. N te taina ngke a uotaki ataei irouia aomata nakon Iesu, ao a boaiia taan rimwina, are e teretere n aia namakin bwa e na bon aki kani katabeaki Iesu irouia ataei. Ma bon tiaki anne ana namakin Iesu. Ti tuangaki ae kangai n te rongorongo man te Baibara: “Ngke e nora aei Iesu ao e aki kukurei irouia [taan rimwina] ao e taku: ‘A aoriia ni kawarai, tai tukiia, bwa aia bwai akana ai aroia, ana tautaeka n uea te Atua.’” Imwina riki ao “e anaiia ataei ni mwanokaia, ao e kakabwaiaia ao e kaaki baina i aoia.” E aki tii kukurei Iesu irouia ataei, ma e boni butimwaeiia naba ma te tangira.​—Mareko 10:13-16.

10. E kanga Iesu ni karekei aroarona ake e kaotiotii?

¹⁰ E kanga Iesu ni karekei aroarona ake e kaotiotii ni maiuna i aon te aba? Imwain rikina n aomata, e matakuakina Tamana are i karawa n te tai ae rangi ni maan, ao n reiakin arona nako. (Wareka Taeka N Rabakau 8:22, 23, 30.) E a tia n nora Iehova ni waakinan ana kairiri ma te tatangira i aoia Ana karikibwai nako, ngaia are e a manga kakairi iai. E na kona Iesu ni karaoa anne ngke arona bwa e aki bwaina te aantaeka? E boni kimwareirei n aantaeka iroun Tamana, ao e kukurei Iehova n reken Natina ae aekan aei. Ni menan Iesu i aon te aba, e kororaoi kaotiotan aroaron Tamana are i karawa aika moan raraoi irouna. Ai boni kabwaiara ngaira ngkai ti aantaeka irouni Kristo, are e rineaki bwa te tia Tautaeka iroun te Atua n te Tautaeka n Uea i Karawa!

Kakairi n Aroaroni Kristo

11. (a) Antai ae ti riai ni kakorakoraira ni kakairi irouna? (b) E aera bwa a riai mwaane n te ekaretia ni kakorakoraia ni kakairi iroun Iesu?

¹¹ A riai aomata nako n te ekaretia ni Kristian, ai moarara riki mwaane, n teimatoa ni kakorakoraia ni kakairi n aroaroni Kristo. N aron ae e a kaman ataaki, e taekinaki ae kangai n te Baibara: “Atuia mwaane nako bon te Kristo.” N aroni Kristo ni kakairi iroun Atuna ae te Atua ae koaua, a riai naba mwaane aika Kristian ni kakorakoraia ni kakairi iroun atuia ae Kristo. E karaoa naba anne te abotoro Bauro ngke e riki bwa te Kristian. E kaumakiia raona ni Kristian ni kangai: “Riiki bwa taani kakairi irou, n ai arou ngkai I kakairi irouni Kristo.” (1 I-Korinto 11:1) Ao e taku te abotoro Betero: “Aei aromi ae kam weteaki nako iai, bwa e kammarakaki naba Kristo ibukimi, ao e katuka te banna ni katoto nakoimi bwa kam na toua raoi mwini mwanekana.” (1 Betero 2:21) Iai riki bukina teuana ngkai a  kaumakaki mwaane bwa a na kakairi irouni Kristo. Boni ngaiia ake a riki bwa unimwaane ao tabonibai n te ekaretia. N aron Iesu ni kimwareirei ngke e kakairi iroun Iehova, a riai naba mwaane aika Kristian ni kimwareirei ngkai a kakairi irouni Kristo ao aroarona.

12, 13. Tera aroia unimwaane n te ekaretia ae riai nakoia tiibu ake a tararuaiia?

¹² A kabaeaki unimwaane aika Kristian n te ekaretia bwa a na reiakina te aro ae a na kakairi iai irouni Kristo. E kaungaia mwaane aika ikawai riki ke unimwaane n te ekaretia Betero ni kangai: “Kam na kawakina ana nanai te Atua ane kam tararuaia, tiaki ibukina bwa kam kairoroaki, ma kam na tararuaia ma kukurein nanomi, ao tiaki ibukin te kani karekearo n te babakanikawai, ma ibukin ingaingami, ao tiaki n ai aroia taan taui aroia te koraki ake ana bwai te Atua, ma kam na riki bwa te katoto nakon te nanai.” (1 Betero 5:1-3) A aki riai unimwaane aika Kristian ni karawawataia ao n ribuaka nakon te nanai, ke n inanonano ao n iowawa. A kakairi n ana katoto Kristo n aroia ni kakorakoraia ni bwaina te tatangira, te atataiaomata, te nanorinano ao te akoi nakoia tiibu ake a mwiokoaki ibukin tararuaaia.

¹³ Boni mwaane aika a aki kororaoi te koraki ake a kairiri n te ekaretia, ao a riai n ururingnga tian aia konabwai anne n taai nako. (I-Rom 3:23) Ai ngaia are a riai n ingainga n reiakina taekan Iesu ao ni kakairi n ana tangira. A riai naba n iaiangoi aron te Atua ao Kristo nakoia aomata, ao ni kakorakoraia ni kakairi irouia. E kaungaira Betero ni kangai: “Kam na bane ni kabaei nukami n te nanorinano temanna nakon temanna, ibukina bwa e kaaitaraia akana kainikatonga te Atua, ma e anga te akoi ae rianako nakoia akana nanorinano.”​—1 Betero 5:5.

14. Tera aron raababan te karinerine ae a riai ni kaotiotia unimwaane n te ekaretia nakoia aomata nako?

 ¹⁴ A riai mwaane ake a mwiokoaki n te ekaretia ni kaotiotii aroaro aika raraoi n tararuaaia ana nanai te Atua. E taekinaki ae kangai n I-Rom 12:10: “Kam na itangitangiri i marenami n aia itangitangiri taari. Biririmoa ni kaotiota te ikarinerine.” A kaotiota te karinerine unimwaane ao tabonibai n te ekaretia nakoia aomata nako. N aroia angia Kristian, a riai mwaane aikai ‘n aki karaoa te bwai teuana n te nano ni kaiangatoa ke ni kainikatonga, ma a na nanorinano n iangoia bwa a kakawaki riki tabemwaang nakoia.’ (I-Biribi 2:3) A riai taani kairiri akanne n iangoiia aeka n aomata akanne bwa a kakawaki riki nakoia. Bwa ni karaoan anne a a toua iai mwin ana reirei Bauro mwaane aika mwiokoaki aikai, ae kangai: “Ngaira ake ti korakora n te onimaki, ti riai ni buokiia ake a aki korakora, ni mamaaraia, ao ti aki riai ni kakukureira i bon iroura. Ti bia bane ni kakukureiia raora n aomata n te bwai ae raoiroi, ae a na kateimatoaaki iai. Bwa e aki naba kakukureia te Kristo i bon irouna.”​—I-Rom 15:1-3.

‘Angania Buuaine Karineaia’

15. Tera aroia buumwane ae riai nakoia buuia?

¹⁵ Iangoa ngkai ana reirei Betero nakoia mwaane aika a mareaki. E korea ae kangai: “Ngkami buumwaane, kam na teimatoa ni maeka ma buumi n te aro naba anne ma te atatai, n angania aine karineaia bwa kaanga te mwangko ae mamaara riki.” (1 Betero 3:7) Karinean temanna e nanonaki iai iangoan raoiroin te aomata anne. Ngaia are ko na mwannanoa ana iango, kainnanona, ao baike e tangiri te aomata anne ao ko na bae n nanoraoi nakoina ni bwaai nako, ngkana akea bukina ae riai bwa ko na aki karaoi baikai. Anne aron te buu te mwaane ae riai nakoni buuna.

16. Tera te kauring n Ana Taeka te Atua nakoia buumwaane ibukini karineaia buuia?

¹⁶ Ngke e tuangia buumwaane Betero bwa a na karineia buuia e kauringia riki ni kangai: “Bwa e aonga n aki tutukaki ami tataro.” (1 Betero 3:7) E kaotaki raoi n anne kakawakin aron te buu te mwaane nakoni buuna n ana taratara Iehova. E kona n tutukaki ana tataro ni kabwakana ni kaotiota karineani buuna. Ma irarikin anne, tiaki te koaua bwa a kakaraoa ae kakukurei riki buuaine ngkana a karineaki irouia buuia?

17. Tera aron raababan ana tangira te buu te mwaane nakoni buuna?

¹⁷ E kaotaki n Ana Taeka te Atua te reirei ni kaineti ma aroia buumwaane n tangiriia buuia: “A riai naba buumwaane n tangiriia buuia n aron tangiran oin rabwataia. . . . bwa akea te aomata ae ribaa oin rabwatana, ma e wantongaia ma n nabeia, n aron naba ae e karaoia te Kristo nakon te ekaretia, . . . ke e tangira oini buuna temanna ma temanna n arona n tangiria i bon irouna.” (I-Ebeto 5:28, 29, 33) Tera aron raababan aia tangira buumwaane nakoia buuia? E korea ae kangai Bauro: “Buumwaane, teimatoa n tangiriia buumi, n aron naba te Kristo ngkai e tangira te ekaretia ao e anga boni ngaia ibukina.” (I-Ebeto 5:25) Eng, e riai te buu te mwaane ni kukurei ni kabuaa maiuna ibukini buuna, n aron are e karaoia Kristo ibukia aomata nako. Ngkana te buu te mwaane ae te Kristian e mwamwannanoa buuna, e tabeakinna, e kakauongo raoi nakoina ao n aki bangaomata, e na bebete riki iai irouni buuna te aantaeka nakon ana waaki ni kairiri.

18. Tera te ibuobuoki are a karekea mwaane ni kaineti ma mwiokoaia n aia mare?

¹⁸ Te koaua bwa karineaia buuaine, boni kantaningaan te bwai ae rangi n riao mairouia buumwane? Tiaki ngaia anne, bwa e bon aki kona Iehova n tuangia karaoan te bwai ae riaon aia kona. Irarikin anne, a a tia taan taromauria Iehova ni karekea te mwaaka ae te kabanea ni korakora n te iuniweeti aei ae te taamnei ae raoiroi mairoun te Atua. E taku Iesu: “E ngae ngke kam  buakaka ma kam ataa te angania natimi bwaintangira aika raraoi, ao ai batira riki ngkanne nanon te Tama are i karawa ni kan anga te taamnei ae raoiroi nakoia akana butiia!” (Ruka 11:13) E na buokiia Iehova buumwaane ni baike a karaoi nakoia aomata nako ao buuia, ngkana a tataro ni bubutii rinanon taamneina.​—Wareka Mwakuri 5:32.

19. Tera ae na rinanoaki n ara kaongora ae imwina?

¹⁹ Ni koauana, iai mwiokoaia mwaane ae a na boni kaekaa iai bukinaia ni kaineti ma reiakinan te aantaeka nakoni Kristo ao te kakairi n ana waaki ni kairiri. Ma tera aroia aine, ao moamoa riki buuaine? E na maroroakinaki n te kaongora ae imwina, aroia ae riai n iangoa tabeia n ana babaire Iehova.

Ko Uringnga?

• Baikara aroaron Iesu aika ti riai ni kakairi iai?

• Tera aroia ae riai unimwaane n te ekaretia nakoia tiibu?

• Tera ae e riai ni karaoia te buu te mwaane nakoni buuna?

[Titiraki Ibukin te Reirei]

[Taamnei n iteraniba 15]

Kakairi iroun Iesu ni kaotiota te karinerine nakoia aomata nako