Kuimbaʼekuéra, peñemoĩpahína Cristo poguýpe?
Kuimbaʼekuéra, peñemoĩpahína Cristo poguýpe?
‘Pe kuimbaʼe akã haʼehína Cristo.’ (1 COR. 11:3)
1. Mbaʼérepa jaʼekuaa Ñandejára ndojapoiha mbaʼeve sarambikuépe?
JEHOVÁ ningo opa mbaʼe apohare, opaite mbaʼe oĩ ipoguýpe ha ndaipóri haʼeichagua. Revelación 4:11 heʼi: ‘Ore Jára Jehová, ndéve añoite opavave nemombaʼeguasu ha nembotuichavaʼerã, nde haʼégui opa mbaʼe apohare, ha nde reipotáguinte oĩ ha ojejapo opa mbaʼe’. La Biblia heʼi avei ‘Ñandejára ndojapoiha mbaʼeve sarambikuépe, omoĩ guei pyʼaguapy’. Upévare haʼe odesidi mávapa omoakãta anhelkuérape ha mbaʼe tembiapópa ojapóta hikuái (1 Cor. 14:33; Isa. 6:1-3; Heb. 12:22, 23).
2, 3. a) Mávapa Jehová rembiapo ypykue? b) Mávapa omoakã Jesúspe?
2 Hetaiterei tiémpore Jehová oikovaʼekue haʼeño. Péro upéi odesidi ojapo peteĩ ánhel, upéva hína Jesús oñehenóiva avei “Pe Ñeʼẽ”, oñeʼẽ rupi Jehová rérape. Ñandejára ojevale Jesús rehe ojapo hag̃ua opaite mbaʼe. Upéi ombou chupe ko yvy ape ári oiko hag̃ua peteĩ kuimbaʼéicha (jaleemína Juan 1:1-3, 14).
3 Heʼípa Ñandejára Ñeʼẽ Jehová ohejaha itaʼýrape ojapo ojaposéva avave omoakãʼỹre chupe? Apóstol Pablo ohaivaʼekue: ‘Aipota peikuaa pe kuimbaʼe akã haʼeha Cristo, pe kuimbaʼe katu pe kuña akã, ha Ñandejára hína Cristo akã’ (1 Cor. 11:3). Upéicharõ Cristo oĩhína Itúva poguýpe. Ha enterove jaiko hag̃ua pyʼaguapy ha vyʼápe jarrespetavaʼerã umi ñanemoakãvape. Jahecha haguéicha Jesús ‘rupive ojejapovaʼekue opaite mbaʼe’ (Col. 1:16, BNP). Upéicharõ jepe haʼe oñemoĩ tapiaite Ñandejára poguýpe.
4, 5. Mbaʼérepa ikatu jaʼe Jesús vyʼapópe oñemoĩ hague Jehová poguýpe?
4 Opuʼãparaʼe Jesús Itúvare? Mbaʼépa heʼi omboútarõ guare chupe ko yvy ape ári? La Biblia heʼi: ‘Cristo Jesús oikóramo jepe yvágape Ñandejáraicha, haʼe noñembotuichái ha noñembojojái Ñandejárare. Ohejapa guei orekomíva, ha ou oiko tembiguáiramo. Hiʼarive oikórõ guare kuimbaʼéicha, oñemomichĩ ha iñeʼẽrendu omano meve, ha omano peteĩ yvyráre’ (Fili. 2:5-8).
5 Jesús arakaʼeve noñembotuichái, ha akóinte ojapo Itúva rembipota. Upévare heʼivaʼekue: ‘Chejehegui reínte ndaikatúi ajapo mbaʼeve. Aporohusga hekopete, ndahekáigui che rembipotánte, aheka guei pe chembouvaʼekue rembipota’ (Juan 5:30). Heʼi avei: ‘Ajapo opa ára Ñandejára oipotáva’ (Juan 8:29, JMP). Ha hiʼag̃uívo pe ára omano hag̃ua Jesús heʼi Itúvape: ‘Che ningo rombotuicha ko yvy ári ha amog̃uahẽ huʼãme pe tembiapo remeʼẽvaʼekue chéve’ (Juan 17:4). Péicha jahecha porãiterei Jesús vyʼapópe oñemoĩ hague Jehová poguýpe.
Jesús osẽ porã oñemoĩgui Itúva poguýpe
6. Mbaʼéichapa Jesús ohechaukavaʼekue imbaʼeporãha?
6 Oikove aja ko yvy ape ári Jesús ohechauka meme vaʼekue imbaʼeporã ha ohayhuetereiha Jehovápe. Haʼe heʼi: ‘Che ahayhu che Rúpe’ (Juan 14:31). Umi mbaʼe ojapóvare Jesús ohechauka avei ohayhuha hapichakuérape (jaleemína Mateo 22:35-40). Haʼe ndoikói omanda guasu térã ijarhél, upéva rangue imbaʼeporã ha imbaʼerechakuaa. Upévare heʼi umi héntepe: ‘Peju cherendápe peẽ penekaneʼõ ha pembaʼapo pohýiva, ha che pomombytuʼúta. Peñemoĩ chendive che júgo guýpe ha che pomboʼéta. Che chepyʼaporã ha nañembotuichái, upévare pombopiroʼýta. Che júgo ningo napendejopymoʼãi ha ivevýi pe kárga perahátava chendive’ (Mat. 11:28-30, NM). Opaichagua tapicha ha koʼýte umi ohasa asýva, tuicha ipiroʼy oikuaávo Crístope. Avei omokyreʼỹ chupekuéra pe marandu porãite haʼe omombeʼúva.
7, 8. a) Mbaʼépa ndovaléiraʼe ojapo pe kuña hasýva? b) Mbaʼéichapa Jesús otrata pe kuñáme?
7 Ymaite guive hetaiterei kuimbaʼe ojahéi kuñanguérare. Pór ehémplo Israélpe umi rrelihión omoakãva ojapovaʼekue upéicha. Péro Jesús ndahaʼeiete haʼekuéraicha, haʼe omombaʼe kuñanguérape. Jahechami mbaʼéichapa otrata peteĩ kuñáme 12 áñorema oikóva huguyháre. Haʼe ningo ‘hetáma ohasa asy’ ojapóvo umi tratamiénto omeʼẽva chupe umi doktór ha ogastapáma orekomíva péro ndokuerái, ‘oho vaive guei chupe’. Ha hiʼarive pe Léi heʼi umi péicha hasýva ikyʼaha, ha oimeraẽ opokóva hesekuéra ikyʼaha avei (Lev. 15:19, 25).
8 Upe kuña oikuaávo Jesús omongueraha umi hasývape ou oike umi henteita apytépe, ha heʼi: ‘Apokóramo ijaóre jepe akuerámane’. Ha ojapóvo upéva upepete okuera. Jesús oikuaa ndovaleiha pe kuña opoko hese, péro ndahaʼéi upe haguére ojeréva omongavaju chupe. Upéva rangue otrata porãnte pe kuñáme oikuaágui haʼe hetaitereíma ohasa asy hague. Jesús heʼi chupe: ‘Che rajy, rejerovia rupi ningo rekuera. Tereho katu pyʼaguapýpe’ (Mar. 5:25-34, NM).
9. Mbaʼépa ojapo Jesús, hemimboʼekuéra ojokosérõ guare umi mitãme?
9 Umi mitã mimi jepe ovyʼavaʼekue Jesús ndive. Peteĩ jey umi hénte ogueru hendápe heta mitãme, hemimboʼekuéra katu oñemoĩ ojaʼo umi héntepe oimoʼãgui umi mitã ostorvaha Jesúspe. Péro tuichaiterei ojavy hikuái. La Biblia omombeʼu mbaʼépa oiko upe rire: ‘Ohechávo upéva Jesús ipochy ha heʼi chupekuéra: “Pehejána koʼã mitã mimíme tou che rendápe, ha ani pejokosétei. Ñandejára rréino ningo oñemeʼẽta koʼãichaguápe”’. Ha ndahaʼéi upévante ojapóva, Jesús ‘ohupi ijyva ári umi mitãme, omoĩ ipo hiʼarikuéra, ha ojerure Ñandejárape tohovasa chupekuéra’. Ndahaʼéi ningo ohejánteva umi mitãme oĩ hendive, haʼe oguerohory ha vyʼápe oĩ hendivekuéra (Mar. 10:13-16, NM).
10. Mbaʼéicha rupípa Jesús imbaʼeporãitevaʼekue?
10 Mbaʼéicha rupípa Jesús imbaʼeporãite oĩrõ guare ko yvy ape ári? Haʼe oikovaʼekue Itúvandi hetaiterei tiémpo yvágape, ha upe aja ohecha mbaʼeichaitépa Jehová imbaʼeporã ha avei mbaʼéichapa omoakã mborayhúpe umi ánhel ha yvyporakuérape. Jesús oñehaʼãvaʼekue ohaʼanga Ñandejárape, upéicha rupínte imbaʼeporã enterovéndi (jaleemína Proverbios 8:22, 23, 30). Jesús osẽ porã iñeʼẽrendu rupi, haʼe vyʼapópe oñemoĩ Jehová poguýpe, ha katuete upéva ombovyʼaiterei Itúvape. Upévare oúrõ guare ko yvy ape ári Jesús akóinte imbaʼeporã Itúvaicha. Ajépa javyʼaite Ñandejára omoĩ haguére chupe Rréiramo yvágape ha péicha haʼe ikatu haguére ñanesãmbyhy.
Ñahaʼangákena Crístope
11. a) Máva ehémplopa jasegivaʼerã enterove? b) Mbaʼérepa koʼýte umi kuimbaʼe oñehaʼãvaʼerã ojogua Jesúspe?
11 Kongregasiónpe ningo enterove jasegivaʼerã Jesús ehémplo koʼẽ koʼẽre, péro koʼýte umi kuimbaʼe oñehaʼãvaʼerã ojapo upéva. Mbaʼérepa? Jahechámakuri la Biblia heʼiha ‘kuimbaʼe akã haʼeha Cristo’. Ha Jesús osegi haguéicha Itúva ehémplo, umi ermáno oñehaʼãvaʼerã avei ojogua Jesúspe. Upéicha ojapovaʼekue Pablo oikórõ guare chugui Jesús remimboʼe. Upévare oñemoñeʼẽ iñermanokuérape: ‘Peñehaʼã peiko che aikoháicha, che añehaʼãgui aiko Jesucristo oiko haguéicha’ (1 Cor. 11:1, ÑÑB). Apóstol Pedro heʼi avei: ‘Upearã Ñandejára penerenói, ha Cristo voi ohasa asy vaʼekue penderehehápe, ohechauka hag̃ua peẽme mbaʼéichapa peikovaʼerã ipyporére’ (1 Ped. 2:21, BNP). Umi kuimbaʼe añoite ikatu oservi ansiáno ha siérvo ministeriálramo, upévare tekotevẽ osegi Jesús ehémplo. Haʼe ningo vyʼápe ohaʼangavaʼekue Jehovápe, ha upéicha vaʼerã avei umi kuimbaʼe oguatávo Jesús pyporére.
12, 13. Mbaʼéichapa umi ansiáno otratavaʼerã ermanokuérape?
12 Umi ansiáno katuete imbaʼeporãvaʼerã Cristo imbaʼeporã haguéicha. Upéicha añoite ojapóta hikuái Pedro heʼíva: ‘Peñangarekóke Ñandejára ovechakuérare oĩva pende poguýpe. Pejapókena upéva kyreʼỹme ha ani peneateʼỹ, peñehaʼãmbaite ha ani pehaʼarõ ojehepymeʼẽ peẽme upévare. Ndovaléi peñemombaʼe Ñandejára ovechakuérare, pehechauka guei chupekuéra pene ehémplo rupive mbaʼéichapa oikovaʼerã hikuái’ (1 Ped. 5:1-3). Umi ansiáno ndoikoivaʼerã peteĩ kasíkeicha mbaretépe oipota ojejapo haʼekuéra heʼívante. Upéva rangue imbaʼerechakuaa ha noñembotuichaivaʼerã. Avei mborayhúpe oñatendevaʼerã Jehová ovechakuérare Cristo ojapo haguéicha.
13 Umi omoakãva kongregasión imanduʼavaʼerã haʼekuéra iñimperfektoha (Rom. 3:23). Upévare oñehaʼãmbaitevaʼerã oikuaa porã Jesúspe ha imbaʼeporã haʼéicha. Tekotevẽ ohecha hikuái mbaʼéichapa Jehová ha Jesús otrata porã isiervokuérape ha osegi iñehémplo. Imanduʼavaʼerã avei apóstol Pedro heʼivaʼekuére: ‘Aníkena peñembotuicha, cháke Ñandejára ndaijaʼéi umi oñemombaʼeguasúva rehe, péro haʼe ohayhu umi oñemomirĩvape’ (1 Ped. 5:5).
14. Mbaʼépa opensavaʼerã umi ansiáno ha siérvo ministeriál ambue ermanokuérare?
14 Umi kuimbaʼe oñangarekóva kongregasión rehe ojapovaʼerã Romanos 12:10 heʼíva: “Pejoayhúkena oñopehẽnguéicha, peñombojerovia ha peñomombaʼe”. Upéicharõ umi ansiáno ha siérvo ministeriál raẽve omombaʼevaʼerã hapichakuérape. Tekotevẽ avei osegi ko konsého: ‘Ani pejapo mbaʼeve peñembotuichaségui térã peñorairõségui, pehechakuaavaʼerã guei ambuekuéra tuichaveha pendehegui’ (Fili. 2:3). Umi ansiáno ha siérvo ministeriál opensavaʼerã ambue ermáno iñimportanteveha chuguikuéra, ha upévare omombaʼevaʼerã chupekuéra. Péicha ojapóta hikuái Pablo heʼivaʼekue: ‘Ñande ñanembaretéva jagueropuʼakavaʼerã umi ikangyvévape, ndovaléi ñapensa ñandejehénte. Jaguerohory ha ñaipytyvõ guei chupekuéra okakuaa hag̃ua ijeroviápe. Cristo jepeve nopensaivaʼekue ijehénte’ (Rom. 15:1-3).
‘Pemombaʼékena’ pene rembirekópe
15. Mbaʼéichapa menakuéra otratavaʼerã hembirekópe?
15 Koʼág̃a jahechami mbaʼépa heʼi apóstol Pedro, menakuérape: ‘Tekotevẽ penearandu petrata porã hag̃ua pene rembirekópe. Pemombaʼékena chupekuéra ha pehechakuaa haʼekuéra ikangyveha’ (1 Ped. 3:7). Mbaʼépa heʼise ñamombaʼe ñande rapichápe? Heʼise jarrespetaha haʼe opensáva, jahechakuaa mbaʼépa oipota ha oikotevẽ, ha ñameʼẽ chupe gústo ikatúma guive. Péicha menakuéra otratavaʼerã hembirekópe.
16. Mbaʼépa oikóta pe ména nomombaʼéiramo hembirekópe?
16 Apóstol Pedro ndahaʼéi heʼínteva menakuérape omombaʼe hag̃ua hembirekópe. Heʼi voi chupekuéra ndojapóiramo upéva, ‘iñemboʼe opyta reitaha’ (1 Ped. 3:7). Péicha jahecha Jehovápe g̃uarã iñimportantetereiha pe ména otrata porã hembirekópe. Ndojapóiramo upéva Haʼe ikatu nohendúi iñemboʼe. Avei hembireko ovyʼáta iména ohechaukáramo omombaʼeha chupe.
17. Mbaʼeichaite pevépa ohayhuvaʼerã ména hembirekópe?
17 Pablo heʼi avei: ‘Menakuéra ohayhuvaʼerã hembirekópe haʼekuéra ojehayhuháicha ijupe voi. Ndaipóri ningo avave ojahéiva hetére, omongaru ha omokunuʼũ guei, Cristo ojapoháicha kongregasiónre. Upévare enterovete pehayhúkena pene rembirekópe peẽ voi pejehayhuháicha’ (Efe. 5:28, 29, 33). Mbaʼeichaite pevépa ohayhuvaʼerã ména hembirekópe? Pablo ombohovái: ‘Pehayhúkena pene rembirekópe, Cristo ohayhu haguéicha pe kongregasiónpe, ha omeʼẽ hekove hesehápe’ (Efe. 5:25, BNP). Jesús omano haguéicha enterove rehehápe, upéicha avei pe ména, tekotevẽramo omanovaʼerã hembireko rehehápe. Omokunuʼũramo chupe, imbaʼerechakuaa ha omotenonde haʼe oikotevẽva, ndahasymoʼãi hembirekópe oñemoĩ hag̃ua ipoguýpe.
18. Mbaʼépa oipytyvõta pe ménape ojapo hag̃ua Jehová ojeruréva?
18 Mbaʼérepa jaʼekuaa menakuéra ikatuha omombaʼe hembirekópe Jehová oipotaháicha? Jehová ningo arakaʼeve ndojeruremoʼãi peteĩ mbaʼe ikatuʼỹva jajapo. Avei omeʼẽ ñandéve ijespíritu sánto ha upéva hína pe puʼaka imbaretevéva. Jesús heʼivaʼekue: ‘Peẽ peneñañáramo jepe, pemeʼẽ heta mbaʼe porã pende raʼykuérape. Mbaʼégui piko upéicharõ, ñande Ru yvagapegua nomeʼẽmoʼãi espíritu sánto umi ojerurévape chupe’ (Luc. 11:13, NM). Upévare pe ména ojerurekuaa Jehovápe toipytyvõ chupe otrata porã hag̃ua hapichakuérape ha koʼýte hembirekópe (jaleemína Hechos 5:32).
19. Mbaʼépa jahecháta pe artíkulo oúvape?
19 Ajépa ndahaʼeiete vyrorei kuimbaʼekuéra ojapóva! Oñemoĩvaʼerã Cristo poguýpe ha osegivaʼerã iñehémplo omoakãvo kongregasión ha hogapy. Péro iporã avei jaikuaa mbaʼépa ojapovaʼerã kuñanguéra, ha koʼýte umi omendáva oñemoĩ hag̃ua umi omoakãva poguýpe. Péva jahecháta pe artíkulo oúvape.
Ñanemanduʼápa?
• Mbaʼépepa ñahaʼangavaʼerã Jesúspe?
• Mbaʼéichapa umi ansiáno otratavaʼerã ermanokuérape?
• Mbaʼéichapa ména otratavaʼerã hembirekópe?
[Porandu ñahesaʼỹijóva]
[Nóta oĩva taʼanga ndive páhina 10]
Ñamombaʼékena ñande rapichakuérape Jesús ojapo haguéicha