Mga Lalaki, Nagapasakop Bala Kamo sa Pagkaulo ni Cristo?

“Ang ulo sang tagsa ka lalaki amo ang Cristo.”—1 COR. 11:3.

1. Ngaa makasiling kita nga si Jehova isa ka Dios sang kahimusan?

“TAKUS ka, Jehova, nga amon Dios, nga magbaton sang himaya kag dungog kag gahom,” siling sang Bugna 4:11, “bangod gintuga mo ang tanan nga butang, kag bangod sang imo kabubut-on nagluntad sila kag natuga.” Bangod si Jehova ang nagtuga sang tanan nga butang, sia ang Supremo nga Soberano sang uniberso kag amo ang may awtoridad sa tanan niya nga mga tinuga. Ang paagi sang pag-organisar niya sa mga anghel nagapakita nga si Jehova “isa ka Dios, indi sang kagamo, kundi sang paghidait.”—1 Cor. 14:33; Isa. 6:1-3; Heb. 12:22, 23.

2, 3. (a) Sin-o ang una nga gintuga ni Jehova? (b) Ano ang posisyon sang panganay nga Anak kon ipaanggid sa iya Amay?

² Antes sia nagpanuga, ang Dios nagluntad na sa indi maisip nga kalawigon sang tion. Ang pinakauna niya nga gintuga amo ang espiritu nga tinuga nga ginatawag “ang Pulong,” kay sia ang nangin Humalambal ni Jehova. Paagi sa Pulong, nagluntad ang tanan iban pa nga butang. Sang ulihi, nagkari sia sa duta subong himpit nga tawo kag nakilal-an nga si Jesucristo.—Basaha ang Juan 1:1-3, 14.

³ Ano ang ginasiling sang Kasulatan tuhoy sa posisyon sang Dios kon ipaanggid sa iya panganay nga Anak? Si apostol Pablo gin-inspirar sa pagsulat: “Luyag ko nga mahibaluan ninyo nga ang ulo sang tagsa ka lalaki amo ang Cristo; ang ulo naman sang babayi amo ang lalaki; ang ulo naman sang Cristo amo ang Dios.” (1 Cor. 11:3) Si Cristo napaidalom sa pagkaulo sang iya Amay. Ang pagkaulo kag ang pagpasakop importante agod mahuptan ang paghidait kag kahim-ong sang intelihente nga mga tinuga. Bisan ang isa nga “paagi sa iya gintuga ang tanan iban pa nga butang” kinahanglan magpasakop sa pagkaulo sang Dios.—Col. 1:16.

4, 5. Ano ang reaksion ni Jesus tuhoy sa iya posisyon nga napaidalom kay Jehova?

⁴ Ano ang reaksion ni Jesus tuhoy sa pagpasakop sa pagkaulo ni Jehova kag sa sugo nga magkari sia sa duta? Ang Kasulatan nagasiling: “Bisan pa nagluntad [si Cristo Jesus] sa dagway sang Dios, wala sia maghunahuna nga mang-agaw, buot silingon, nga mangin tupong sia sa Dios. Wala, kundi gin-uba niya ini nga dagway kag nagsuklob sang dagway sang ulipon kag nangin kaanggid sa mga tawo. Labaw pa sa sina, sang nakita niya ang iya kaugalingon sa dagway sang tawo, nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.”—Fil. 2:5-8.

⁵ Mapainubuson nga nagpasakop si Jesus sa kabubut-on sang iya Amay sa tanan nga tion. Sia nagsiling: “Indi ako makahimo sang bisan ano sa akon lamang kaugalingon; . . . ang akon paghukom matarong, bangod ginatinguhaan ko nga himuon, indi ang akon kabubut-on, kundi ang kabubut-on niya nga nagpadala sa akon.” (Juan 5:30) “Pirme ko ginahimo ang mga butang nga kalahamut-an sa [akon Amay],” siling niya. (Juan 8:29) Sang malapit na lang sia mapatay, si Jesus nangamuyo sa iya Amay: “Ginhimaya ko ikaw sa duta, kay natapos ko ang buluhaton nga ginhatag mo sa akon nga himuon.” (Juan 17:4) Maathag nga wala nabudlayan si Jesus nga kilalahon ang pagkaulo sang Dios kag magpasakop sa sini.

Nakabenepisyo ang Anak sa Pagpasakop sa Amay

6. Anong maayo nga mga kinaiya ang ginpakita ni Jesus?

⁶ Sang si Jesus yari sa duta, madamo sia sing ginpakita  nga maayo nga kinaiya. Isa sa sini amo ang iya daku nga gugma sa iya Amay. “Ginahigugma ko ang Amay,” siling niya. (Juan 14:31) Nagpakita man sia sang daku nga gugma sa katawhan. (Basaha ang Mateo 22:35-40.) Si Jesus mainayuhon kag makonsiderasyon, indi matigdas ukon dominante. “Kari sa akon, kamo tanan nga ginabudlayan kag ginabug-atan,” siling niya, “kag paumpawan ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sang kaumpawan sa inyo kaugalingon. Kay ang akon gota mahapos pas-anon kag ang akon lulan mamag-an.” (Mat. 11:28-30) Ang tanan nga tulad-karnero nga katawhan, ilabi na ang mga ginapigos kag ginabudlayan, nakasapo sang kaumpawan sa maayo nga kinaiya kag makapalig-on nga mensahe ni Jesus.

7, 8. Sa idalom sang Kasuguan, ano ang dapat likawan sang babayi nga ginatagasan sang dugo, apang paano sia ginpakig-angutan ni Jesus?

⁷ Binagbinaga kon paano ginpakig-angutan ni Jesus ang mga babayi. Ginapakita sang kasaysayan nga indi maayo ang pagtratar sang madamo nga lalaki sa mga babayi. Ginahimo ini bisan sang relihioso nga mga lider sang dumaan nga Israel. Apang ginatahod ni Jesus ang mga babayi. Makita ini sa iya pagpakig-angot sa babayi nga 12 ka tuig na nga ginatagasan sang dugo. “Nag-antos sia sang daku nga kasakit” sa mga manugbulong kag naubos ang tanan niya nga manggad sa pagpabulong. Walay sapayan sang iya mga panikasog, “naglubha pa gid” ang iya kahimtangan. Sa idalom sang Kasuguan, ginakabig sia nga indi matinlo. Ang bisan sin-o nga makatandog sa iya mangin di-matinlo man.—Lev. 15:19, 25.

⁸ Sang nabatian sining babayi nga nagapang-ayo si Jesus, nagpanagil-ot sia sa kadam-an kag nagsiling: “Kon matandog ko lamang ang iya mga panapton magaayo ako.” Gintandog niya si Jesus kag nag-ayo sia gilayon. Nahibaluan ni Jesus nga indi dapat pagtandugon sining babayi ang iya panapton. Apang, wala niya gin-akigan ang babayi. Sa baylo, ginpakitaan niya ini sing kaluoy. Nahangpan gid niya ang kasakit nga gin-antos sining babayi sa sulod sang mga tinuig kag kon ano nga mga panikasog ang ginhimo sini agod mag-ayo. Maluluy-on nga nagsiling si Jesus sa iya: “Anak, ang imo pagtuo nag-ayo sa imo. Lakat ka sa paghidait, kag magaayo ka na.”—Mar. 5:25-34.

9. Sang ginpunggan sang mga disipulo ni Jesus ang mga kabataan nga magpalapit sa iya, ano ang iya reaksion?

⁹ Bisan gani ang mga kabataan wala natahap kay Jesus. Isa ka bes sang gindala sang mga tawo ang kabataan kay Jesus, ginsaway sila sang iya mga disipulo bangod nagahunahuna sila nga wala sia sing panahon sa mga kabataan. Apang indi amo sina ang ginbatyag ni Jesus sa mga bata. Ang Kasulatan nagasugid sa aton: “Sang nakita ini wala nahamuot si Jesus kag nagsiling sia sa [mga disipulo]: ‘Pabay-i ang mga bata nga magpalapit sa akon; indi sila pagpunggi, kay ang ginharian sang Dios ila sang mga kaangay nila.’” Dugang pa, “ginhakos niya ang mga bata kag ginpakamaayo sila, kag gintungtong niya ang iya mga kamot sa ila.” Wala lamang ginpasugtan ni Jesus nga magpalapit sa iya ang mga bata; mainit pa niya sila nga gin-abiabi.—Mar. 10:13-16.

10. Paano natigayon ni Jesus ang maayo nga mga kinaiya?

¹⁰ Paano natigayon ni Jesus ang maayo nga mga kinaiya nga ginpakita niya sang yari sia sa duta? Antes sia nangin tawo, nakaupod ni Jesus ang iya langitnon nga Amay sa tuman kalawig nga tion kag nakatuon sia sa Iya mga dalanon. (Basaha ang Hulubaton 8:22, 23, 30.) Nakita niya ang mahigugmaon nga paagi ni Jehova sa pagpanguna sa tanan Niya nga tinuga kag gin-ilog niya ini. Kon indi nangin mapinasakupon si Jesus, mahimo nga wala niya nailog si Jehova. Nalipay gid sia nga magpasakop sa iya Amay, kag nahamuot si Jehova nga may amo sia sina nga Anak. Sang yari sia sa duta, himpit nga ginpakita ni Jesus ang dalayawon nga mga kinaiya sang iya langitnon nga Amay. Gani, daw ano nga pribilehiyo nga magpasakop kita kay Cristo, ang gintangdo sang Dios nga Gumalahom sa langitnon nga Ginharian!

Iluga ang mga Kinaiya ni Cristo

11. (a) Sin-o ang dapat naton tinguhaan nga ilugon? (b) Ngaa dapat tinguhaan ilabi na sang mga lalaki sa kongregasyon nga ilugon si Jesus?

¹¹ Ang tanan sa Cristianong kongregasyon, ilabi na ang mga lalaki, dapat manikasog nga padayon nga ilugon ang mga kinaiya ni Cristo. Subong sang  mabasa naton, ang Biblia nagasiling: “Ang ulo sang tagsa ka lalaki amo ang Cristo.” Subong nga ang Cristo nagailog sa iya Ulo, ang matuod nga Dios, ang Cristianong mga lalaki dapat man magtinguha nga ilugon ang ila ulo—ang Cristo. Sang nangin Cristiano na si apostol Pablo amo sina ang iya ginhimo. “Mangin manug-ilog kamo sa akon,” laygay niya sa iya mga masigka-Cristiano, “subong nga ako man kay Cristo.” (1 Cor. 11:1) Si apostol Pedro nagsiling: “Sa katunayan, gintawag kamo sa sini nga dalanon, bangod si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing maayo ang iya mga tikang.” (1 Ped. 2:21) Ang isa pa ka rason kon ngaa dapat mangin interesado ang mga lalaki sa laygay nga ilugon si Cristo amo nga sila ang ginapili nga mangin mga gulang kag mga ministeryal nga alagad. Kon si Jesus nalipay sa pag-ilog kay Jehova, dapat ang Cristianong mga lalaki malipay man nga ilugon si Cristo kag ang iya mga kinaiya.

12, 13. Paano dapat pakig-angutan sang mga gulang ang mga karnero nga gintugyan sa ila?

¹² Ang mga gulang sa Cristianong kongregasyon obligado gid nga ilugon si Cristo. Si Pedro naghatag sing laygay sa tigulang nga mga lalaki, ukon mga gulang: “Bantayi ninyo ang panong sang Dios nga yara sa inyo pag-atipan, indi nga napilitan, kundi sing kinabubut-on; indi tungod sa gugma sa di-bunayag nga pagganar, kundi sing malangkagon; indi subong nagapakaginuo sa mga palanublion gikan sa Dios, kundi mangin mga halimbawa sa panong.” (1 Ped. 5:1-3) Ang Cristianong mga gulang indi dapat mangin diktador, dominante, wala sing konsiderasyon, ukon matigdas. Bangod luyag nila ilugon si Cristo, ginatinguhaan nila nga mangin mahigugmaon, makonsiderasyon, mapainubuson, kag mainayuhon sa pagpakig-angot sa mga karnero nga gintugyan sa ila.

 ¹³ Dapat pirme dumdumon sang mga lalaki nga nagapanguna sa kongregasyon nga indi sila himpit. (Roma 3:23) Gani, dapat sila mangin handa sa pagtuon tuhoy kay Jesus kag ilugon ang iya gugma. Dapat nila pamalandungan ang paagi sang Dios kag ni Cristo sa pagpakig-angot sa mga tawo kag tinguhaan nila nga ilugon ini. Si Pedro nagalaygay sa aton: “Wagkusi ninyo tanan ang inyo kaugalingon sang pagpaubos sang hunahuna sa pagpakig-angot sa isa kag isa, bangod ginapamatukan sang Dios ang mga matinaastaason, apang nagahatag sia sang wala tupong nga kaayo sa mga mapainubuson.”—1 Ped. 5:5.

14. Paano mapakita sang mga gulang ang pagpadungog sa iban?

¹⁴ Ang gintangdo nga mga lalaki sa kongregasyon dapat magpakita sang maayo nga mga kinaiya sa ila pagpakig-angot sa panong sang Dios. Ang Roma 12:10 nagasiling: “Sa utudnon nga gugma magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.” Ang mga gulang kag mga ministeryal nga alagad nagapadungog sa iban. Kaangay sang iban nga Cristiano, ining mga lalaki ‘wala nagahimo sang bisan ano bangod sa huyog nga makigbais ukon bangod sa sobra nga pagpaimportante sang kaugalingon, kundi may pagpaubos sang hunahuna nga nagakabig sa iban nga labaw sa ila.’ (Fil. 2:3) Dapat tamdon sang mga nagapanguna nga mas labaw ang iban sangsa ila. Paagi sa paghimo sini, masunod sang gintangdo nga mga lalaki ang laygay ni Pablo: “Apang, kita nga mabakod dapat magdala sang mga kaluyahon sang mga indi mabakod, kag indi magpahamuot sa aton kaugalingon. Pahamut-an sang kada isa sa aton ang iya isigkatawo sa kon ano ang maayo sa pagpabakod sa iya. Kay bisan ang Cristo wala magpahamuot sa iya kaugalingon.”—Roma 15:1-3.

‘Paghatag sing Dungog sa Asawa’

15. Paano dapat pakig-angutan sang mga bana ang ila asawa?

¹⁵ Binagbinaga ang laygay ni Pedro sa mga lalaki nga may asawa. Nagsulat sia: “Kamo nga mga bana, padayon kamo nga magpuyo kaupod [sang inyo asawa] sa kaanggid nga paagi suno sa ihibalo, nga nagahatag sa ila sang dungog subong nga sa isa ka mas maluya nga suludlan, ang isa nga babayi.” (1 Ped. 3:7) Ang pagpadungog sa isa, nagapahangop nga ginapabaloran mo sia. Ginabinagbinag mo ang iya mga opinyon, kinahanglanon, kag mga gusto kag ginapasugtan sia kon wala man lang sing malapas nga prinsipio. Dapat nga amo sina ang pagpakig-angot sang bana sa iya asawa.

16. Ano nga paandam ang ginahatag sang Pulong sang Dios sa mga bana tuhoy sa pagpadungog sa ila asawa?

¹⁶ Sang ginsilingan ni Pedro nga padunggan sang mga bana ang ila asawa, nagdugang sia sing paandam: “Agod indi masablagan ang inyo mga pangamuyo.” (1 Ped. 3:7) Maathag nga ginapakita sini kon daw ano ka serioso ang pagtamod ni Jehova sa pagpakig-angot sang lalaki sa iya asawa. Kon indi pagpadunggan sang mga lalaki ang ila asawa, masablagan ang ila mga pangamuyo. Indi bala nga mas mahapos para sa asawa nga tahuron ang iya bana kon ginapadunggan sia sini?

17. Tubtob diin dapat ipakita sang bana ang iya gugma sa iya asawa?

¹⁷ Tuhoy sa paghigugma sa asawa, ang Pulong sang Dios nagalaygay: “Ang mga bana dapat maghigugma sang ila asawa subong sang ila kaugalingon nga lawas. . . . Kay wala sing tawo nga nagadumot sang iya kaugalingon nga unod; kundi ginapakaon kag ginapalangga niya ini, subong sang ginahimo ni Cristo sa kongregasyon . . . Ang kada isa sa inyo maghigugma man sang iya asawa subong sang paghigugma niya sa iya kaugalingon.” (Efe. 5:28, 29, 33) Tubtob diin dapat ipakita sang bana ang iya gugma sa iya asawa? “Mga bana,” sulat ni Pablo, “padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya  kaugalingon tungod sa sini.” (Efe. 5:25) Huo, dapat nga ang bana handa nga mapatay para sa iya asawa, kaangay sang ginhimo ni Cristo para sa iban. Kon ginapakig-angutan sang Cristianong bana ang iya asawa sing mapinalanggaon, makonsiderasyon, matinahuron, kag masinakripisyuhon, mangin mahapos para sa iya asawa ang pagpasakop sa iya pagkaulo.

18. Ano ang makabulig sa mga lalaki nga matungdan ang ila mga responsibilidad sa pag-asawahay?

¹⁸ Mabudlay gid bala ang ginapatuman sa mga bana nga padunggan ang ila asawa? Indi. Si Jehova wala gid nagapatuman sang butang nga indi nila masarangan. Dugang, pa ang mga sumilimba ni Jehova sarang makatigayon sang pinakagamhanan nga puersa sa uniberso—ang balaan nga espiritu sang Dios. Si Jesus nagsiling: “Kon kamo bisan malaut makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!” (Luc. 11:13) Sa ila mga pangamuyo, ang mga bana mahimo makapangabay nga buligan sila sang espiritu ni Jehova sa ila pagpakig-angot sa iban pati na sa ila asawa.—Basaha ang Binuhatan 5:32.

19. Ano ang aton binagbinagon sa masunod nga artikulo?

¹⁹ Sa pagkamatuod, ang mga lalaki may daku nga responsibilidad nga magtuon kon paano magpasakop kay Cristo kag ilugon ang iya pagkaulo. Apang kamusta naman ang mga babayi, ilabi na ang mga asawa? Ang masunod nga artikulo magabinagbinag kon paano nila dapat tamdon ang ila papel sa kahimusan ni Jehova.

Nadumduman Mo Bala?

• Ano nga mga kinaiya ni Jesus ang dapat naton ilugon?

• Paano dapat pakig-angutan sang mga gulang ang mga karnero?

• Paano dapat pakig-angutan sang mga bana ang ila asawa?

[Mga Pamangkot sa Pagtinuon]

[Mga Retrato sa pahina 10]

Iluga si Jesus paagi sa pagpadungog sa iban