Ndị Ikom, Ùnu Na-edo Onwe Unu n’Okpuru Kraịst?

“Kraịst bụ isi nke nwoke ọ bụla.”—1 KOR. 11:3.

1. Gịnị na-egosi na Jehova abụghị Chineke aghara?

MKPUGHE isi anọ amaokwu iri na otu kwuru, sị: “I kwesịrị ekwesị, Jehova, bụ́ Chineke anyị, ịnata otuto na nsọpụrụ na ike, n’ihi na ọ bụ gị kere ihe niile, ọ bụkwa n’ihi uche gị ka ha ji dịrị, ọ bụkwa ya mere e ji kee ha.” Jehova Chineke bụ Ọkaakaa eluigwe na ụwa n’ihi na ọ bụ ya kere ihe niile, ọ kakwa ihe niile o kere. Otú Jehova si hazie ndị mmụọ ozi ya na-egosi na ọ ‘bụghị Chineke nke aghara, kama nke udo.’—1 Kọr. 14:33; Aịza. 6:1-3; Hib. 12:22, 23.

2, 3. (a) Ònye bụ onye mbụ Jehova kere? (b) Olee ihe bụ́ ọkwá Ọkpara ahụ n’ebe Nna ya nọ?

² Naanị Chineke nọrọ ọtụtụ afọ a na-enweghị ike ịgụta ọnụ tupu ya ekee ihe ọ bụla ọzọ. Ihe mbụ o kere bụ mmụọ nke a na-akpọ “Okwu ahụ” n’ihi na ọ bụ Ọnụ Na-ekwuru ya. Chineke si n’aka Okwu ahụ kee ihe ọzọ niile. Okwu ahụ mechara bịa n’ụwa ghọọ mmadụ zuru okè, onye a kpọrọ Jizọs Kraịst.—Gụọ Jọn 1:1-3, 14.

³ Gịnị ka Akwụkwọ Nsọ kwuru banyere ọkwá Chineke na nke Ọkpara ya? Mmụọ nsọ kpaliri Pọl onyeozi ịgwa anyị, sị: “Ma achọrọ m ka unu mara na Kraịst bụ isi nke nwoke ọ bụla; nwoke bụkwa isi nke nwaanyị; Chineke bụkwa isi nke Kraịst.” (1 Kọr. 11:3) Kraịst nọ n’okpuru Nna ya. E kwesịrị inwe onye nọ n’isi n’etiti ndị e kere eke nwere ọgụgụ isi, nweekwa ndị ga-anọ n’okpuru, ka udo wee dị, ihe ana-agakwa n’usoro. Ọbụna onye “e si n’aka ya kee ihe ndị ọzọ niile” kwesịrị ido onwe ya n’okpuru Chineke.—Kọl. 1:16.

4, 5. Olee otú Jizọs si lee ido onwe ya n’okpuru Jehova anya?

⁴ Olee otú Jizọs si lee ido onwe ya n’okpuru Jehova na ịbịa n’ụwa anya? Akwụkwọ Nsọ kwuru, sị: “Kraịst Jizọs . . . dịrị n’ụdị Chineke, ma o cheghị echiche ịnara ọkwá n’ike, ya bụ, ka ọ hara ka Chineke. Ee e, kama o mere onwe ya ihe efu ma were ọdịdị onye ohu, wee dịrị n’oyiyi mmadụ. Mgbe ọ hụrụ onwe ya n’ụdị mmadụ, o wedara onwe ya ala wee rube isi ruo ọnwụ, ee, ọnwụ n’osisi ịta ahụhụ.”—Fil. 2:5-8.

⁵ Jizọs mere uche Nna ya mgbe niile. Ọ sịrị: “Apụghị m ime otu mkpụrụ ihe n’uche nke aka m; . . . ihe m na-ekpe n’ikpe zikwara ezi, n’ihi na ihe m na-achọ ime abụghị uche nke m, kama ọ bụ uche onye zitere m.” (Jọn 5:30) O kwukwara, sị: “M na-eme ihe dị [Nna m] mma mgbe niile.” (Jọn 8:29) Ka oge ọnwụ Jizọs na-eru nso, ọ gwara Nna ya n’ekpere, sị: “Emewo m ka ị dị ebube n’ụwa, ebe ọ bụ na arụchaala m ọrụ i nyere m ka m rụọ.” (Jọn 17:4) O doro anya na o sighịrị Jizọs ike ido onwe ya n’okpuru Chineke.

Ọkpara Chineke Ritere Uru n’Ihi na O Doro Onwe Ya n’Okpuru Nna Ya

6. Olee àgwà ọma ndị Jizọs nwere?

⁶ Mgbe Jizọs nọ n’ụwa, o gosiri na ya nwere ọtụtụ àgwà mara mma. Otu n’ime ha bụ na ọ hụrụ Nna ya n’anya nke ukwuu. Ọ sịrị: “M hụrụ Nna m n’anya.” (Jọn 14:31) O gosikwara na ya hụrụ ndị mmadụ n’anya nke ukwuu. (Gụọ Matiu 22:35-40.) Jizọs nwere obiọma, ọ dịghị aka ike, ọ dịghịkwa mpako. O kwuru, sị: “Bịakwutenụ m, unu niile ndị  na-adọgbu onwe unu n’ọrụ na ndị e boro ibu dị arọ, m ga-emekwa ka unu nweta ume. Nyaranụ yok m, mụtakwanụ ihe n’aka m, n’ihi na m dị nwayọọ, dịkwa umeala n’obi, mkpụrụ obi unu ga-enweta ume. N’ihi na yok m adịghị egbu mgbu, ibu m dịkwa mfe.” (Mat. 11:28-30) Àgwà ọma Jizọs na ozi ọma na-akasi obi o ziri ndị mmadụ, mere ka obi ruo ndị niile yiri atụrụ ala, ma ndị ukwu ma ndị nta, karịchaa, ndị nke a na-emegbu emegbu.

7, 8. Olee ihe Iwu Mozis kwuru na nwaanyị ahụ na-arịa ọrịa oruru ọbara ekwesịghị ime, ma, olee otú Jizọs si meso ya omume?

⁷ Tụlee otú Jizọs si mesoo ndị inyom ihe. Kemgbe ụwa, ọtụtụ ụmụ nwoke na-emeso ụmụ nwaanyị mmeso ọjọọ. Otú a ka ndị ndú okpukpe mere n’Izrel oge ochie. Ma, Jizọs kwanyeere ụmụ nwaanyị ùgwù. Otú o si mesoo otu nwaanyị nke rịara ọrịa oruru ọbara afọ iri na abụọ ihe gosiri na nke a bụ eziokwu. “Ọ tawo ahụhụ nke ukwu” n’aka ọtụtụ ndị ọgwọ ọrịa, o mefuokwala ego buru ibu ebe ọ na-achọ ka a gwọọ ya. N’agbanyeghị ihe a niile, ọnọdụ ya “kara njọ.” Dị ka Iwu Mozis kwuru, ọ bụ onye na-adịghị ọcha. Onye ọ bụla metụrụ ya aka ga-aghọkwa onye na-adịghị ọcha.—Lev. 15:19, 25.

⁸ Mgbe nwaanyị ahụ nụrụ na Jizọs na-agwọ ndị ọrịa, o sooro ìgwè mmadụ gbara Jizọs gburugburu ma kwuo, sị: “Ọ bụrụ na m bitụ naanị uwe elu ya aka, m ga-agbake.” Ọ gbakekwara ozugbo o metụrụ Jizọs aka. Jizọs ma na nwaanyị ahụ ekwesịghị ibitụ uwe ya aka. N’agbanyeghị nke a, ọ baghịrị ya mba. Kama ịbara ya mba, o meteere ya ebere. Ọ ma otú ọ dị ya kemgbe afọ niile ahụ ọrịa ahụ na-arịa ya, ghọtakwa na ọ na-agụsi ya agụụ ike ka a gwọọ ya. Jizọs ji obi ọmịiko gwa ya, sị: “Nwa m nwaanyị, okwukwe gị emewo ka ahụ́ dị gị mma. Laa n’udo, gbakee n’ọrịa ọjọọ nke na-arịa gị.”—Mak 5:25-34.

9. Gịnị ka Jizọs mere mgbe ndị na-eso ụzọ ya gbalịrị igbochi ụmụaka chọrọ ịbịakwute ya?

⁹ Ahụ́ na-erudị ụmụaka ala ma ha na Jizọs nọrọ. E nwere mgbe ndị na-eso ụzọ ya baara ndị kpọtaara ya ụmụaka mba, ikekwe n’ihi na ha chere na ọ gaghị achọ ka ụmụaka nye ya nsogbu. Ma, ọ bụghị otú ahụ ka Jizọs si lee ya anya. Akwụkwọ Nsọ sịrị: “Mgbe Jizọs hụrụ nke a, o were iwe wee sị [ndị na-eso ụzọ ya]: ‘Hapụnụ ụmụntakịrị ka ha bịakwute m; unu anwala igbochi ha, n’ihi na alaeze Chineke bụ nke ndị dị otú ahụ.’ . . . O kukwaara ụmụaka ahụ wee malite ịgọzi ha, na-ebikwasị ha aka n’isi.” Ihe Jizọs ji nabata ụmụaka abụghị n’ihi na ọ maghị otú ọ ga-esi chụpụ ha; kama, o ji obi ya dum nabata ha.—Mak 10:13-16.

10. Olee otú Jizọs si mụta àgwà ndị ọ kpara?

¹⁰ Olee otú Jizọs si mụta àgwà ndị ọ kpara mgbe ọ bịara n’ụwa? Tupu ya abịa n’ụwa, ya na Nna ya nke eluigwe nọrọ ọtụtụ afọ a na-enweghị ike ịgụta ọnụ, ọ mụtakwara àgwà ya. (Gụọ Ilu 8:22, 23, 30.) Mgbe ọ nọ n’eluigwe, ọ hụrụ otú Jehova si jiri ịhụnanya na-achị ihe ndị o kere, ọ mụtakwara nke a. A sị na Jizọs edoghị onwe ya n’okpuru Nna ya, ọ̀ gaara amụta ihe ndị a? Ọ tọrọ ya ụtọ ido onwe ya n’okpuru Nna ya, obi dịkwa Jehova ụtọ inwe Ọkpara dị otú a. Mgbe Jizọs nọ n’ụwa, ọ kpara nnọọ àgwà ọma ndị Nna ya nke eluigwe na-akpa. N’ezie, ọ bụ nnọọ ihe ùgwù ido onwe anyị n’okpuru Kraịst, bụ́ onye Chineke họpụtara ka ọ bụrụ Onye Ọchịchị nke Alaeze eluigwe.

Ṅomie Àgwà Kraịst

11. (a) Ònye ka anyị kwesịrị ịgbasi mbọ ike na-eṅomi? (b) Olee ihe mere o ji bụrụ ndị nwoke nọ n’ọgbakọ kacha kwesị ịgbalị iṅomi Jizọs?

¹¹ Ndị niile nọ n’ọgbakọ, karịchaa ndị nwoke, kwesịrị ịgbasi mbọ ike ka ha na-eme ka Kraịst. Dị ka anyị kwuru ná mmalite, Baịbụl sịrị: “Kraịst bụ isi nke nwoke ọ bụla.” Dị nnọọ ka Kraịst ṅomiri onye bụ́ Isi ya, bụ́ ezi Chineke anyị, ndị nwoke bụ́ Ndị Kraịst  kwesịrị ịgba mbọ na-eṅomi onyeisi ha, bụ́ Kraịst. Pọl onyeozi mere otú a mgbe ọ ghọrọ Onye Kraịst. Ọ gwara Ndị Kraịst ibe ya, sị: “Bụrụnụ ndị na-eṅomi m, ọbụna dị ka m bụ onye na-eṅomi Kraịst.” (1 Kọr. 11:1) Pita onyeozi kwukwara, sị: “A kpọrọ unu ka unu soro ụzọ a, n’ihi na ọbụna Kraịst tara ahụhụ n’ihi unu, wee hapụrụ unu ihe nlereanya ka unu wee sochie nzọụkwụ ya anya.” (1 Pita 2:21) E nwere ihe ọzọ mere ndụmọdụ a e nyere ka anyị na-eṅomi Kraịst ji kacha gbasa ndị nwoke. Ọ bụ hanwa ka a na-eme ndị okenye na ndị ohu na-eje ozi. Dị nnọọ ka iṅomi Jehova nyere Jizọs ọṅụ, iṅomi Kraịst kwesịrị inye ndị nwoke bụ́ Ndị Kraịst ọṅụ.

12, 13. Olee otú ndị okenye kwesịrị isi na-emeso atụrụ e nyere ha ka ha na-elekọta?

¹² Iwu ji ndị okenye ọgbakọ ịdị ka Kraịst. Pita nyere ndị okenye ndụmọdụ, sị: “Na-azụnụ ìgwè atụrụ Chineke nke unu na-elekọta, ọ bụghị ná mmanye, kama jirinụ obi unu na-azụ ha; ọ bụghị n’ihi na unu hụrụ uru aghụghọ n’anya, kama n’ịnụ ọkụ n’obi; ọ bụghịkwa ime ndị bụ́ ihe nketa nke Chineke dị ka ọ̀ bụ unu nwe ha, kama ghọọrọnụ ìgwè atụrụ ahụ ihe nlereanya.” (1 Pita 5:1-3) Ndị okenye ọgbakọ ekwesịghị ịdị aka ike ma ọ bụ bụrụ eze onye agwala m. Iji gosi na ha na-eṅomi Kraịst, ha kwesịrị ịgbasi mbọ ike hụ atụrụ e nyere ha ka ha na-elekọta n’anya, dịrị umeala n’obi, ma jiri obiọma na-emeso ha ihe.

¹³ Ndị na-edu ndú n’ọgbakọ ezughị okè, ha ekwesịghịkwa ichefu nke a. (Rom 3:23) N’ihi ya, ha kwesịrị ịgbasi mbọ ike na-amụ  banyere Jizọs ma na-ahụ ndị ọzọ n’anya ka Jizọs. Ha kwesịrị ịmụta otú Chineke na Kraịst si emeso ndị ọzọ ihe ma na-eṅomi ha. Pita dụrụ anyị ọdụ, sị: “Unu niile, werenụ ịdị nwayọọ n’obi kee onwe unu n’otú unu si emeso ibe unu, n’ihi na Chineke na-emegide ndị mpako, ma ọ na-egosi ndị dị umeala n’obi obiọma na-erughịrị mmadụ.”—1 Pita 5:5.

14. Olee otú ndị okenye kwesịrị isi na-asọpụrụ ndị ọzọ?

¹⁴ Ndị okenye ọgbakọ kwesịrị ịna-akpa àgwà dị mma mgbe ha na-emeso atụrụ Chineke ihe. Ndị Rom 12:10 kwuru, sị: “N’ịhụnanya ụmụnna, na-enwenụ obi ọmịiko n’ebe ibe unu nọ. N’inye ibe unu nsọpụrụ, na-ebutenụ ụzọ.” Ndị okenye na ndị ohu na-eje ozi kwesịrị ịna-asọpụrụ ndị ọzọ. Dị ka Ndị Kraịst niile kwesịrị ime, ha ekwesịghị “ime ihe ọ bụla n’ihi esemokwu ma ọ bụ n’ihi ịbụ ndị onwe ha na-ebu isi, kama n’ịdị nwayọọ n’obi na-ewere na ndị ọzọ ka [ha].” (Fil. 2:3) Ndị na-edu ndú n’ọgbakọ kwesịrị iwere ya na ndị ọzọ ka ha. Ọ bụrụ na ha emee otú a, ha na-eme ihe Pọl dụrụ n’ọdụ, mgbe ọ sịrị: “Ma anyị ndị siri ike kwesịrị iburu adịghị ike nke ndị na-esighị ike, ọ bụghịkwa ịdị na-eme ihe na-amasị anyị onwe anyị. Ka onye ọ bụla n’ime anyị na-eme ihe na-amasị onye agbata obi ya n’ihe dị mma maka iwuli ya elu. N’ihi na ọbụna Kraịst emeghị ihe masịrị onwe ya.”—Rom 15:1-3.

‘Na-enyenụ Ndị Bụ́ Nwunye Nsọpụrụ’

15. Olee otú ndị bụ́ di kwesịrị isi na-emeso ndị nwunye ha?

¹⁵ Ugbu a, ka anyị tụlee ndụmọdụ Pita nyere ndị lụrụ nwaanyị. O dere, sị: “Unu ndị bụ́ di, ka unu na ndị nwunye unu na-ebi otú ahụ dị ka ihe ọmụma si dị, na-enyenụ nwaanyị nsọpụrụ dị ka arịa na-esighị ike.” (1 Pita 3:7) Ịsọpụrụ mmadụ pụtara iji onye ahụ akpọrọ ihe. Ya bụ, i kwesịrị ichebara aro onye ahụ tụrụ, mkpa ya, na ihe ndị na-amasị ya echiche, ma mee ihe onye ahụ chọrọ, ma ọ bụrụ na e nweghị ihe nke ahụ ga-emebi. Otú a ka ndị bụ́ di kwesịrị isi na-emeso ndị nwunye ha.

16. Olee ihe Okwu Chineke gwara ndị bụ́ di banyere ịsọpụrụ ndị nwunye ha?

¹⁶ Mgbe Pita na-agwa ndị bụ́ di ka ha sọpụrụ ndị nwunye ha, o kwukwara, sị: “Ka e wee ghara igbochi ekpere unu.” (1 Pita 3:7) Nke a na-egosi na Jehova ejighị otú nwoke si emeso nwunye ya egwuri egwu. Ọ bụrụ na ọ sọpụrụghị ya, nke a nwere ike ime ka Chineke ghara ịza ekpere ya. Ihe ọzọkwa bụ na ndị bụ́ nwunye na-akpaso di ha àgwà ọma ma ọ bụrụ na di ha na-asọpụrụ ha.

17. Olee otú ịhụnanya onye bụ́ di hụrụ nwunye ya kwesịrị ịha?

¹⁷ A bịa n’ihe banyere mmadụ ịhụ nwunye ya n’anya, Okwu Chineke dụrụ anyị ọdụ, sị: “Ndị bụ́ di kwesịrị ịdị na-ahụ nwunye ha n’anya dị ka ahụ́ nke ha. . . . N’ihi na ọ dịghị onye kpọtụworo anụ ahụ́ ya asị; kama ọ na-azụ ya, na-elekọtakwa ya, dị ka Kraịst na-emekwara ọgbakọ ya . . . Ka onye ọ bụla n’ime unu hụ nwunye ya n’anya dị ka ọ hụrụ onwe ya n’anya.” (Efe. 5:28, 29, 33) Olee otú ịhụnanya ndị bụ́ di hụrụ nwunye ha kwesịrị ịha? Pọl dere, sị: “Ndị bụ́ di, na-ahụnụ nwunye unu n’anya, dị nnọọ ka Kraịst hụkwara ọgbakọ ahụ n’anya ma nyefee onwe ya maka ya.” (Efe. 5:25) N’eziokwu, onye bụ́ di kwesịrị ịdị  njikere ịnwụ n’ihi nwunye ya, dị nnọọ ka Kraịst meere ndị ọzọ. Ọ bụrụ na di bụ́ Onye Kraịst na-emeso nwunye ya ihe n’ụzọ dị nro, hụ ya n’anya, ma jiri obiọma na-emeso ya ihe, ọ ga-adịrị nwunye ya mfe ido onwe ya n’okpuru ya.

18. Olee ihe nwere ike inyere ndị bụ́ di aka ịrụ ọrụ dịịrị ha n’ezinụlọ?

¹⁸ Inye ndị bụ́ nwunye nsọpụrụ ọ̀ bụ ọrụ dị ike nke ndị bụ́ di na-agaghị arụli? Ee e, Jehova enweghị ike ịgwa ha ka ha mee ihe ha na-agaghị emeli. E wezụga nke a, Jehova na-enye ndị na-efe ya ike kacha ike niile n’eluigwe nakwa n’ụwa, ya bụ, mmụọ nsọ. Jizọs sịrị: “Ya mere, ọ bụrụ na unu maara otú e si enye ụmụ unu ezi onyinye, ọ bụ ezie na unu bụ ndị ajọ omume, lee ka Nna unu nke nọ n’eluigwe ga-esi nye ndị na-arịọ ya mmụọ nsọ karị!” (Luk 11:13) Mgbe ndị bụ́ di na-ekpe ekpere naanị ha, ha nwere ike ịrịọ Jehova ka o nye ha mmụọ nsọ ya ka o wee nyere ha aka ịma otú ha ga-esi na-emeso ndị ọzọ, gụnyere ndị nwunye ha.—Gụọ Ọrụ 5:32.

19. Olee ihe anyị ga-atụle n’isiokwu na-eso nke a?

¹⁹ N’eziokwu, ụmụ nwoke nwere ọrụ dị ukwuu ha ga-arụ ka ha wee nwee ike ido onwe ha n’okpuru Kraịst ma na-eṅomi ya. Oleekwanụ banyere ụmụ nwaanyị, karịchaa, ndị bụ́ nwunye? Isiokwu na-eso nke a ga-egosi otú ha ga-esi na-eme ihe Jehova chọrọ ha n’aka.

Ì Chetara?

• Olee àgwà Jizọs ndị anyị kwesịrị iṅomi?

• Olee otú ndị okenye kwesịrị isi na-emeso atụrụ Chineke?

• Olee otú onye bụ́ di kwesịrị isi na-emeso nwunye ya?

[Ajụjụ Nke Paragraf Ndị a Na-amụ Amụ]

[Foto ndị dị na peeji nke 10]

Na-asọpụrụ ndị ọzọ dị ka Jizọs mere