Man Ro, Komij ke Kõtãik Kom ñõn tel eo an Kraist?

“Bõran jabrewõt man Kraist.”​—1 KOR. 11:3.

1. Ta eo ej kalikar bwe Jeova ej juõn Anij in karõk?

 REVELES̃ÕN 4:​11 ej ba, “Ekar ñõn Kwe, O Iroij im am Anij, bwe kwon bõk aibujuij im nebar im kajur; bwe kw’ar kõmõnmõn men ko otemjej, im kin ankil am r’ar ber im emwij kõmõnmõni.” Kinke ear kõmõnmõn men otemjej, Jeova Anij ej Iroij Potata eo ijoko otemjej im eor an maroñ ion aolep menin kõmõnmõn ko an. Im kinke Jeova “e jab Anij in airwaro, a in ainemõn,” emaroñ alikar ilo wãwen an kar karõk enjel ro nejin.​—1 Kor. 14:33; Ais. 6:​1-3; Hib. 12:22, 23.

2, 3. (a) Wõn eo kar menin kõmõnmõn eo moktata an Jeova? (b) Ta karkar eo an Nejin iben Jemen?

² Mokta jen an kar kõmõnmõn jabrewõt men, Anij ear mõke ber iomin juõn ien elukkun aitok me jejaje ewi joñõn. Kar naetan menin kõmõnmõn eo an moktata “Nan eo,” kinke ear dri Konono eo an Jeova. Ikijen Nan eo, kar kõmõnmõn aolep menin kõmõnmõn ko jet. Tokelik, ear itok ñõn lõl einwõt juõn armij ewãppen im kar jela kajen einwõt Jisõs Kraist.​—Riit Jon 1:​1-3, 14. *

³ Ta eo Baibel eo ej ba kin karkar eo an Anij iben manje eo Nejin? Kar kakõrmol dri jilik Paul ñõn an je: “A I kõnan bwe komin jela bwe bõran jabrewõt man Kraist; im bõran kõra man; im bõran Kraist Anij.” (1 Kor. 11:3) Kraist ej ber iomin bõr ak tel eo an Jemen. Bwe en or ainemõn ibwiljin menin kõmõnmõn ko remeletlet an Anij, ej aikwij or ro rej tel im ro rej kõtãik ir. Bareinwõt Eo im Anij ear kajerbale ñõn “kõmõn men ko otemjej,” ej aikwij kõtãik e ñõn tel eo an Anij.​—Kol. 1:​16.

4, 5. Ewi kar iñjake eo an Jisõs kin karkar eo an iben Jeova?

⁴ Ewi kar iñjake eo an Jisõs kin aikwij eo ñõn an kõtãik e ñõn tel eo an Jeova im an itok ñõn lõl? Baibel eo ej ba: “Kraist Jisõs: Eo, ke Ej ilo wãwen Anij, E ar jab lemnok An einwõt Anij men in nibiji, a E ar mõke kejeramel E, im bõk wãwen korijer, im erom nememen armij; Im ke E ar walok im einwõt armij, E ar mõke kõtãik E, im E ar bokake ñõn mij, aet, mij eo ion [“alal in iñtan eo,” NW].”​—Pil. 2:​5-8.

⁵ Ien otemjej, Jisõs ear kõtãik e ñõn ankilan Jemen. Ear ba: “I jab mõke maroñ in kõmõnmõn men eo jabrewõt; . . . im Aõ ekajet ewãnik: bwe I jab bukot ankil Aõ wõt, a ankil an Jema eo E ar jilkintok Iõ.” (Jon 5:​30) Im ear ba: “Ien otemjej Ij kõmõn men ko rej kabuñburuen [Jema].” (Jon 8:​29) Ke ear ebakelok jemlokõn mour eo an ion lõl, Jisõs ear jar im ba ñõn Jemen: “I ar kaibujuij Yuk ion lõl: I ar kamwijlok jerbal eo Kw’ar letok ñõn Iõ bwe In kõmõne.” (Jon 17:4) Alikar, ear jab juõn abañ iben Jisõs ñõn an kõtãik e iomin tel eo an Anij.

Nejin Ej Bõk Tokjen ko Remõn ilo An Kõtãik E ñõn Jemen

6. Ta karkar ko raibujuij Jisõs ear kwaloki?

⁶ Ke Jisõs ear ber ion lõl, ear kwalok elõñ karkar ko raibujuij. Juõn iair kar yokwe eo elap ear kwalok ñõn Jemen. Ear ba, “Ij yokwe Jema.” (Jon 14:31) Jisõs ear bareinwõt lap an kwalok yokwe ñõn armij ro. (Riit Matu  22:35-​40.) Ear jab lej ak iune armij ro ñõn air kõmõni men ko ekõnan, jen men in ear joij im ear lemnok kin ro jet. Ear ba, “Komin itok ñõn iba, kom otemjej rej jerbal im ban, im I naj kakijeik kom. Komin bõk Aõ ine im likite i aerami, im katak iba; bwe Ij inemõn im etã buruõ: im kom naj lo an ami kakije. Bwe Aõ ine ej emõn, im men eo Ij inek e emera.” (Matu 11:28-​30) Armij ro rej einwõt s̃ip, elaptata ro rar iñtan iomin kajur eo an ro relej, rar bõk elap kainemõn jen karkar ko remõn karkarin Jisõs im jen ennan eo elap an kõkãtõk me ear kwaloke.

7, 8. Iomin Kien Moses, etke kõra eo me ear or nañinmij in torlok iben ear jab maroñ ber ibwiljin armij ro, ak ewi wãwen an kar Jisõs jerbal iben?

⁷ Lemnok kin wãwen an kar Jisõs jerbal iben kõra ro. Ilo aolepen bwebwenato ko an armij, elõñ man ro rar jerbal iben kõra ro ilo juõn wãwen enana im jab joij. Men in ear mol iben dri tel in kabuñ ro ilo Israel eo etto. Ak, Jisõs ear koutiej kõra ro. Men in ej alikar ilo wãwen an kar jerbal iben kõra eo me ear nañinmij iomin 12 yiõ ko kin an torlok bõtõktõkin. “Elap an iñtan” kin taktõ ro im ear kajerbal aolepen jããn ko an bwe en maroñ ejmourlok. Jekron ewi joñõn an kar kate, ak ear “drorlõllok” wõt. Iomin Kien eo, kar watõk e bwe etton. Im jabrewõt eo ej uñire enaj bareinwõt etton.​—Liv. 15:19, 25.

⁸ Ke kõra in ear roñ bwe Jisõs ej kejmour dri nañinmij ro, ear kobalok iben jar in armij ro rej ber ibelakin Jisõs, im ej ba: “Elañe I naj uñir wõt jirik nuknuk ko An, I naj mour.” Inem ke ear kõmõne men in, ilo mõkõj ear ejmour. Jisõs ear jela bwe kõra in en kar jab uñir nuknuk ko an. Mekarta, ear jab koweik e ak ear kwalok joij ñõn e. Ear melele kin iñjake eo an kin an kar to an nañinmij im ear kile bwe ear lukkun aikwij jibõñ. Ilo tiriamokake, Jisõs ear jiroñ e: “Nejiõ, am tõmak e ar kemour yuk; kwon ilok im ainemõn, im mour.”​—Mark 5:​25-​34.

9. Ke dri kalor ro an Jisõs rar kajeoñ in bõprae an ajiri ro etal ñõn iben, ewi wãwen an kar Jisõs emakõt?

⁹ Ajiri ro bareinwõt rar mõnõnõ in kebak Jisõs. Juõn ien ke armij ro rar bõktok ro nejir ñõn iben Jisõs, dri kalor ro an rar koweik ir kin air lemnok bwe Jisõs ejjab kõnan bwe ajiri ro ren kabnõnõik e. Bõtab ear jab eindrein lemnok eo an Jisõs. Bwebwenato eo ilo Baibel ej jiroñ kij: “A ke Jisõs ej loe, elap An illu, im E ba ñõn [dri kalor ro], Komin likit ajiri rõn bwe ren itok ñõn iba; komin jab boprae ir; bwe ro eirwõt, air ailiñ in Anij.” Bareinwõt “Ej jiburlep ir, im likit pein ioir, im jar kin ir.” Alikar Jisõs ear mõnõnõ in karuwaineneiktok ir.​—Mark 10:13-​16.

10. Ewi wãwen Jisõs ear ejaak karkar ko me ear kwaloki?

¹⁰ Ewi wãwen Jisõs ear ejaak karkar ko me ear kwaloki ke ear mour ion lõl? Ke Jisõs ear mour ilõñ mokta jen an kar itok ñõn lõl, ear lo wãwen an kar Jemen kõmõni men ko iomin elõñ yiõ ko im ear katak kin wãwen ko An. (Riit Jabõn Kennan Ko 8:​22, 23, 30.) Ilo lõñ, Jisõs ear lo wãwen an Jeova jerbale maroñ eo an ion aolepen menin kõmõnmõn ko An ilo yokwe im ear lor e. Jisõs emaroñ ke kar kõmõne men in elañe ear jab kõtãik e? Ear mõnõnõ in kõtãik e ñõn Jemen, im Jeova ear buñburuen kake Nejin. Ke ear ber ion lõl, Jisõs ear kwalok ilo wãppen karkar ko raibujuij karkarin Jemen ilõñ. Ej juõn jerammõn elap ñõn ar kõtãik kij ñõn Kraist, eo Anij ear kãlete bwe en Iroij in Ailiñ eo ilõñ!

Kajeoñwe Karkar ko an Kraist

11. (a) Jej aikwij kate kij ñõn ar kajeoñwe wõn? (b) Etke elaplok an aurõk ñõn an man ro ilo congregation eo kate ir ñõn kajeoñwe Jisõs?

¹¹ Aolep ro ilo congregation ko, elaptata man ro, rej aikwij kate wõt ir ñõn kajeoñwe karkar ko karkarin Kraist. Einwõt emwij kar kalikare, Baibel eo ej ba: “Bõran jabrewõt man Kraist.” Einwõt an Kraist kajeoñwe Bõr eo an, Anij eo emol, Kristian man ro  rej aikwij kate ir ñõn kajeoñwe Bõr eo air, Kraist. Eñin men eo dri jilik Paul ear kõmõne ke ear erom juõn dri Kristian. Ear rejañ dri Kristian ro mõtõn, “Komin dri kajeoñwe ña, einwõt ña ij bareinwõt dri kajeoñwe Kraist.” (1 Kor. 11:1) Dri jilik Piter ear ba: “Emwij kir kom ñõn men in: bwe Kraist e ar iñtan kin kom, im likit joñok ñõn kom, bwe komin anõke jenkwõn ne ko neen.” (1 Pit. 2:​21) Eor bar juõn un eaurõk ñõn an man ro lor nan in kakabilek in ñõn kajeoñwe Kraist. Un eo ej kinke ir eo rej erom elder im ministerial servant ro. Einwõt an kar Jisõs lo lõñliñ ilo an kajeoñwe Jeova, Kristian man ro rej aikwij bareinwõt lo lõñliñ ilo air kajeoñwe Kraist im karkar ko karkarin.

12, 13. Ewi wãwen elder ro rej aikwij jerbal iben s̃ip ro me rej ber iomin tel eo air?

¹² Elder ro ilo congregation ko rej aikwij katak bwe ren einwõt Kraist. Piter ear lelok nan in rejañ in ñõn ir: “Komin s̃eperd bwijin Anij ej ber ibemi, im lale e, jab ilo makoko, a kin ami kõnan, ekar ñõn ankil an Anij; jab kin wõnan dala, a kin ami yokwe; Im komin jab iroij ion men eo emwij likite na ibemi, a komin mõke joñok ñõn bwij eo.” (1 Pit. 5:​1-3) Kristian elder ro rej aikwij kejbãrok bwe ren jab kõbboojoj, lej, ak likjõp in lali aikwij ko an armij ro. Ilo air kajeoñwe joñok eo an Kraist, rej kate ir ñõn kwalok yokwe, etã buru, im joij ilo wãwen air jerbal iben s̃ip ro me kar likit ir iomin tel eo air.

¹³ Man ro rej tel congregation eo rejjab wãppen, im ien otemjej rej aikwij kememej kin likjõp in eor  ibeir. (Rom 3:​23) Kin men in, rej aikwij mõnõnõ in katak kin Jisõs im kajeoñwe yokwe eo an. Rej aikwij kalomõnlokjen kin wãwen an Anij im Kraist jerbal iben armij ro inem kate ir ñõn kajeoñwe ir. Piter ej rejañ kij: “Kom otemjej komin etã buruemi, im korijer ñõn dron: bwe Anij ej jumae ro dri jua, a Ej lelok joij ñõn ro dri etã burueir.”​—1 Pit. 5:5.

14. Ñõn joñõn it eo elder ro rej aikwij kwalok air koutiej ro jet?

¹⁴ Man ro kar jitõñ ir ilo congregation eo rej kwalok karkar ko remõn ilo wãwen air jerbal iben bwij eo an Anij. Ilo Dri Rom 12:10, (UBS) ej ba: “Komin kanuij yokwe dron einwõt ro jimjen jimjatin ilo Christ, im komin kwalok ami mõnõnõ in kautiej dron.” Elder im ministerial servant ro rej aikwij kwalok koutiej ñõn ro jet. Einwõt dri Kristian ro, man rein rejjab ‘kõmõn jabrewõt ilo wãlok ak aibujuij jekron, a kin etã buru jabrewõt en lemnok ro jet remõn jen ir.’ (Pil. 2:3) Ro rej bõk erro eo ñõn tel rej aikwij bõk lemnok eo bwe ro jet reutiejlok jen ir. Ilo an rein kõmõne men in, rej kalikar bwe rej lor nan in kakabilek eo an Paul: “Inem emõn bwe kij je kajur jen bõk mõjino ko an ro re jab kajur, im jab mõke kabuñburuer. Kij otemjej jen kabuñburuen dron ilo emõn, ñõn kalek ir. Bwe Kraist bareinwõt E ar jab mõke kabuñburuen.”​—Rom 15:​1-3.

“Koutiej Kõra Rõn”

15. Ewi wãwen lõmaro rej aikwij jerbal iben limaro beleir?

¹⁵ Jen etale kiõ nan in kakabilek eo an Piter ñõn lõmaro dri belele. Ear je: “Ein drein, lõmaro, komin jokwe iben belemi kin jelalokjen, im koutiej kõra rõn, einwõt jãbi remõjino jen kom.” (1 Pit. 3:7) Ñõn koutiej juõn armij ej melelen bwe kwoj lemnok kin aikwij, kõnan, im lemnok ko an im kwoj lor kõnan ko an elañe rejjab nae kien ko ilo Baibel. Eñin wãwen eo me leo ej aikwij jerbal iben lio belen.

16. Ta nan in kakkil eo Baibel eo ej lelok ñõn lõmaro ikijen air kwalok koutiej ñõn limaro beleir?

¹⁶ Ke Piter ear jiroñ lõmaro ñõn air koutiej limaro beleir, ear kobaik juõn nan in kakkil: “Bwe en ejelok men in boprae jar ko ami.” (1 Pit. 3:7) Men in ej kalikar bwe wãwen an leo jerbal iben lio belen eaurõk iben Jeova. Ilo an leo likjõp in kwalok koutiej ñõn lio men in emaroñ bõprae an Jeova roñjake jar ko an. Bareinwõt, ekkã an naj limaro emakõt ilo juõn wãwen emõn elañe lõmaro beleir rej koutiej ir.

17. Ewi joñõn an leo aikwij yokwe lio belen?

¹⁷ Ikijen an leo yokwe lio belen, Nan in Anij ej kakabilek: “Lõmaro ren bareinwõt yokwe limaro beleir im einwõt enbwiniir. . . . Bwe ejelok en e ar mõke kijirãte kõniekin; a ej kakajiririik e, im kaurõk e, einwõt an Kraist bareinwõt kõmõn ñõn eklisia; . . . Jabrewõt iami en yokwe lio belen im einwõt e.” (Ep. 5:​28, 29, 33) Ewi joñõn an lõmaro aikwij yokwe limaro beleir? Paul ear je, “Man ro, komin yokwe limaro belemi, einwõt Kraist e ar bareinwõt yokwe eklisia, im mõke lelok E kin e.” (Ep. 5:​25) Aet, leo ej aikwij mõnõnõ in lelok mour eo an kin lio belen, einwõt an kar Kraist kõmõne ñõn ro jet. Ñe juõn dri Kristian man ej jerbal iben lio belen ilo yokwe, lemnok kin aikwij ko an, roñjake ta ko ej ba, im jab lemnok kin  kõnan ko an mõke, enaj birurulok ñõn an lio belen kõtãik e ñõn e.

18. Ta jibõñ eo kar lelok ñõn lõmaro bwe ren maroñ jerbal iben limaro beleir ilo koutiej?

¹⁸ An Jeova kajitõk iben lõmaro ñõn koutiej limaro beleir ej ke juõn men elap an bin ñõn air kõmõne? Jaab, Jeova ejamin naj kar kajitõk ibeir ñõn kõmõne juõn men me elap jen joñõn maroñ ko air. Ijellokin men in, dri kabuñ ro an Jeova remaroñ bõk jibõñ jen kajur eo elaptata iaolepen lõñ im lõl: Jitõb kwojarjar eo an Anij. Jisõs ear ba: “Elañe komeo dri nana, kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?” (Luk 11:13) Ilo jar ko air, lõmaro remaroñ kajitõk bwe ikijen jitõb kwojarjar eo, Jeova en jibõñ ir ilo wãwen air jerbal iben ro jet, ekoba limaro beleir.​—Riit Jerbal 5:​32.

19. Ta eo jenaj etale ilo katak eo tok juõn?

¹⁹ Emol, eor iben man ro juõn erro elap ñõn air katak kin ewi wãwen remaroñ kõtãik ir ñõn Kraist im kajeoñwe tel eo an. Ak ta kin kõra ro, elaptata limaro dri belele? Katak in tok juõn enaj kemelele kin wãwen eo rej aikwij watõke ijo kwonair ilo karõk eo an Jeova.

Kwoj Kememej Ke?

• Ta karkar ko karkarin Jisõs jej aikwij kajeoñwe?

• Ewi wãwen an elder ro aikwij jerbal iben ro rej einwõt s̃ip?

• Ewi wãwen an leo aikwij jerbal iben lio belen?

[Kamelele eo itulõl]

[Kajitõk ko ñan katak]

[Pija ilo peij 10]

Kajeoñwe Jisõs ilo am kwalok koutiej ñõn ro jet