Valume, Okuti Mutavela Etumino Lia Kristu?

“Omutwe womulume o Kristu”—1 CORÍNTIOS 11:3.

1. Oityi tyilekesa okuti Jeova o Huku yeonganeko?

 REVELAÇÃO 4:11 yati: “Jeova Huku yetu, ove vala watokala okupewa enkhimano nehumbilo noutumini, mokonda ove watunga ovipuka aviho. Tyetyi viatungwa nokukahiko mokonda yehando liove.” Mokonda oe watunga ovipuka aviho, Jeova Huku oe Ohamba Omukulami wouye auho, ukahi kombanda yovipuka aviho atunga. Tyilekesa okuti Jeova “ha Huku ko yondyaya, anthi o Huku yombembwa,” tyitalelwa monkhalelo aonganeka ombunga yae onoandyu.—1 Coríntios 14:33; Isaías 6:1-3; Hebreus 12:22, 23.

2, 3. (a) Oityi Jeova atunga tete? (b) Omona wotyiveli velikahi ñgeni na Tate yae?

² Etyi nkhele ehenetunge natyike, Huku ankho oko ekahiale omanima omanyingi. Otyipuka tyotete atunga omunthu wopamphepo utiwa “Ondaka” mokonda Omutumwa-ndaka wa Jeova. Ovipuka aviho viaetuako menyina lio Ndaka. Konyima, eya pano pohi ngomunthu wopahitu uhena nkhali, aihanwa okuti Jesus Kristu.—Tanga João 1:1-3, 14.

³ Oityi ovihonekwa vipopia konthele yomphangu ya Huku no Yomona wae wotyiveli? Apostolu Paulu watumua okuhoneka okuti: “Ndyihanda munoñgonoke okuti omutwe womulume o Kristu, iya omutwe womukai omulume, iya omutwe wa Kristu o Huku.” (1 Coríntios 11:3) Kristu utuminwa na Tate yae. Okutumina nokutavela viakolela opo pokati ko noandyu novanthu pakale ombembwa neonganeko. Alo umwe ‘una waundapesua pala okutunga ovipuka aviho’ wesukisa okutavela etumino lia Huku.—Colossenses 1:16.

4, 5. Oñgeni Jesus ankho elitehelela konthele yonkhalelo velikahi na Jeova?

⁴ Oñgeni Jesus asoka konthele yokutavela etumino lia Jeova nokuya pano pohi? Ovihonekwa viati: “Jesus Kristu namphila ankho ekahi nga Huku, kaovolele okulipakako okupunda ounene, okuhanda okulifwa na Huku. Au, mahi welilula omuenyo wokeulu eya okukala ngomupika, okukala ngovanthu vopahitu. Haunene, etyi eya okukala omunthu wa pano pohi, weliola omutima oe muene akala omutaveli alo pononkhia, okunkhila momuti wemone.”—Filipenses 2:5-8.

⁵ Jesus apeho ankho utavela ehando lia Tate yae. Oe wati: “Hipondola okulinga otyipuka natyike kolusoke luange muene . . . ekoyeso ndyilinga liaviuka, mokonda hiovola okulinga etyi ame muene nahanda, mahi ndyilinga ehando lia una wanthuma.” (João 5:30) Tupu wati: “Ame apeho ndyilinga ovipuka vihambukiswa [Tate yange].” (João 8:29) Konthyulilo yomuenyo wae pano pohi, Jesus welikuambela ku Tate yae okuti: “Ame nekunkhimaneka kombanda yoohi, mokonda namanuhula ovilinga wanthuma okulinga.” (João 17:4) Tyotyili, Jesus ankho utupu otyitateka tyokuimbuka nokutavela Outumini wa Huku.

Okutavela ku He Tyietela Omona Ouwa

6. Ovituwa patyi oviwa Jesus alekesile?

⁶ Etyi ankho ekahi pano pohi, Jesus walekesile ovituwa ovinyingi oviwa. Otyituwa tyimwe otyiwa oe ankho ena, ohole na Tate yae. Oe wati: “Ame ndyihole Tate.” (João 14:31) Tupu ankho uhole unene ovanthu. (Tanga Mateus 22:35-40.) Jesus ankho una  oluembia nonthilo, ankho hamukalavi. Oe wati: “Endyuei kuame amuho mukahi nokututumba, nokualemenwa, iya ame mandyimupameka. Lipakei mokanga yange, amulilongesila kuame, mokonda omutima wange wapoleya nokueliola, iya mamuvasi epameko pala omienyo vienyi. Mokonda okanga yange ongwa iya omutengi wange wapepuka.” (Mateus 11:28-30) Ovanthu vokuelifwa nonongi, ovakulu novana, haunene vana vamoneswa emone, vavasa epameko enene mu Jesus no mondaka yae.

7, 8. Ngetyi ankho tyipopia Ovitumino, omukai uvela konohanyi ankho utalwa ñgeni? Mahi oñgeni Jesus apopile nae?

⁷ Tala Oñgeni Jesus ankho atekula ovakai. Mokueenda kuomanima, ovalume ovanyingi vatekula omapita unene ovakai. Ongotyo ankho tyilinga ononkhalamutwe mbonongeleya ko Isilayeli yo kohale. Mahi, Jesus ankho utekula ovakai nehumbilo. Otyo tyamoneka nawa monkhalelo apopia nomukai umwe ankho uvela konohanyi omanima 12 tyihatalama. Waenda pomavoko onondotolo ononyingi “aihamekwa unene” nokupesela atyiho ali natyo opo aveluke. Namphila alinga ononkhono ombo ononene, mahi “ankho ouvela wenda vala no komutwe.” Otyitumino ankho tyipopia okuti oe kasukukile. Kese umwe umuyama ukala tyahasukukile.—Levítico 15:19, 25.

⁸ Etyi omukai oo eiva okuti Jesus ukahi nokuvelula ovavei, oe wanyingila pokati kovanthu veliseta na Jesus, ati: “Inkha ndyikuata vala kotyikutu tyae, mandyiveluka.” Oe wayama Jesus iya aveluka liwa-liwa. Jesus ankho utyii okuti omukai oo kapondola okukuata kotyikutu tyae. Mahi, oe kemukandukilile. Anthi, wapopia nae noluembia. Oe ankho wanoñgonoka oñgeni omukai oo elitehelela, mokonda yomanima omanyingi avela, nokuimbuka okuti wesukisa unene ombatelo. Jesus wemupopila nokankhenda okuti: “Mona wange ekolelo liove liekuvelukisa. Enda nombembwa veluka ouvela wove.”—Marcos 5:25-34.

9. Etyi ovalongwa vahandele okutyilika ovana okuya ku Jesus, oñgeni oe evekumbulula?

⁹ Alo umwe ovana ankho velitehelela nawa tyina vekahi na Jesus. Nthiki imwe etyi ovanthu vemuetela ovana, ovalongwa vae avevetyilika, mokonda ankho vasoka okuti Jesus kamahande okutumbula ovana. Mahi, Jesus ankho kasoko ngotyo. Ovihonekwa vitupopila okuti: “Etyi Jesus etyimona, anumana iya evepopi [ovalongwa] okuti: ‘Yekei ovana veye kuame. Muhevetyilikei, mokonda ouhamba wa Huku o wavana vekahi ngovana. Tyotyili, ame ndyimupopila okuti: Una uhatambula ouhamba wa Huku ngomona, kamakanyingilamo.’” Tupu, “akuate ovana, iya eveumbakana evepe ononkhano onongwa.” Jesus kayekele vala ovana veye kwe, mahi weveyakulile nawa.—Marcos 10:13-16.

10. Oñgeni Jesus elilongesa okukala novituwa oviwa?

¹⁰ Oñgeni Jesus elilongesa okukala novituwa alekesile mokueenda kuomuenyo wae pano pohi? Etyi ekahi keulu, oe ankho utalela ku Tate yae mokueenda kuomanima omanyingi nokulilongesa onondyila mbae. (Tanga Provérbios 8:22, 23, 30.) Keulu, oe ankho utala onkhalelo Jeova atumina nohole ovipuka aviho Oe atunga iya emuhetekela. Okuti inkha Jesus ketavelele, ñgeno wetyivila okukala novituwa ovio? Oe ankho uhambukilwa okutavela ku Tate yae, iya Jeova ankho uhambukwa unene okukala nomona utavela. Etyi ankho ekahi pano pohi, Jesus walekesile nawa ovituwa vihuvisa via Tate yae. Tuna elao limwe enene liokutavela ku Kristu, waholovonua na Huku opo akale Ohamba Youhamba keulu!

Hetekela Ovituwa via Kristu

11. (a) Tuesukisa okulinga ononkhono mbokuhetekela lie? (b) Omokonda yatyi haunene ovalume mewaneno vesukisila okulinga ononkhono mbokuhetekela Jesus?

¹¹ Aveho mewaneno lio Vakristau, haunene  ovalume, vena okutualako nokuundapa unene pala okuhetekela ovituwa via Kristu. Ngetyi tuetyimona, Ombimbiliya ipopia okuti: “Omutwe womulume o Kristu.” Ngetyi Kristu ahetekela Omutwe wae, ovalume Ovakristau vena okulinga ononkhono pala okuhetekela omutwe wavo—Kristu. Etyi apostolu Paulu akala Omukristau nae otyo alinga. Oe walondola ovakuatate Ovakristau okuti: “Kalei ovahetekeli vange, ngetyi ame ndyimuhetekeli wa Kristu.” (1 Coríntios 11:1) Iya apostolu Petulu wati: “Etyi otyo muaihanenwa, tyetyi alo umwe Kristu wamuene ononkhumbi mokonda yenyi, emuhila ongeleka opo mulandule onomphai mbae.” (1 Pedro 2:21) Tupu, elondolo liokuhetekela Kristu liakolela haunene pala ovalume mokonda yehunga ekuavo. Ovo vakala ovakulu vewaneno novakuatesiko vovakulu vewaneno. Ngetyi Jesus akalele nehambu liokuhetekela Jeova, tupu ovalume Ovakristau vesukisa okuhambukilwa okuhetekela Kristu novituwa viae.

12, 13. Oñgeni ovakulu vewaneno vena okutekula onongi vatumwa okuyunga?

¹² Ovakulu vewaneno lio Vakristau vatumwa okulilongesa okukala nga Kristu. Petulu walondolele ovalume ovakulu ine ovakulu vewaneno okuti: “Lisei ohambo ya Huku muatumwa okuyunga, nehando liokulinga otyilinga otyo tyahakuluminyua, tupu hamokonda yokuhanda okufuninamo, mahi o nomutima wombili amuhalingi ngatyina mutumina epingo nohambo ya Huku, anthi kalei ongeleka yavo.” (1 Pedro 5:1-3) Ovakulu vewaneno Ovakristau, kavapondola okukala ngovatumini vavakuavo nokuvekolonyeka. Okuhetekela ongeleka ya  Kristu, ovo valinga ononkhono mbokukala nohole, nesuko, nokuliola omutima, nokutekula noluembia onongi vatumwa okuyunga.

¹³ Ovalume aveho vekahi komutwe mewaneno, ovakuankhali, iya ovo muene vesukisa okuimbuka okuti ovakuankhali. (Romanos 3:23) Moluotyo, ovo vesukisa okukala tyafuapo pala okulilongesila ku Jesus nokuhetekela ohole yae. Tupu vesukisa okusoka konkhalelo Huku na Kristu vatekula ovanthu nokulinga ononkhono mbokuvehetekela. Petulu waviyula okuti: “Onwe amuho, kalei nomutima weliola kese umwe na mukuavo. Mokonda Huku uyele vokulipakako, mahi wavela vomutima weliola okankhenda vahatokalele.”—1 Pedro 5:5.

14. Alo pi ovakulu vewaneno vesukisa okuhumba vakuavo?

¹⁴ Ovakulu vewaneno tyina vatekula otyunda tya Huku vesukisa okulekesa ovituwa oviwa. Romanos 12:10 yati: “Nohole youkuatate, kalei nohole kese umwe na mukuavo. Kalei ovatete kokulekesa ehumbilo kese umwe na mukuavo.” Ovakulu vewaneno novakuatesiko vovakulu vewaneno vahumba vakuavo. Ngetyi tyilinga Ovakristau aveho, ovalume ovo ‘kavalingi na tyimwe novilwa ine okulipakako. Mahi, vetyilinga nomutima weliola, okutala vakuavo ngatyina ovanene vali kuvo.’ (Filipenses 2:3) Tyotyili, vana vena otyilinga mewaneno vesukisa okutala vakuavo ngatyina ovanene vali kuvo. Okulinga ngotyo, ovalume ovo mavetyivili okulandula elondolo lia Paulu liati: “Onthue vokuapama, tuesukisa okukoleleya oviponyo via vana vahapamene, nokuhelihambukiswa onthue muene. Kese umwe puonthue ahambukiswe mukuavo ku tyina tyaviuka pala epameko liae. Mokonda alo umwe Kristu kelihambukisilwe oe muene.”—Romanos 15:1-3.

‘Okuavela Ehumbilo Ovakai’

15. Oñgeni ovalume vena okutekula ovakai vavo?

¹⁵ Pahe tutalei elondolo lia Petulu pala ovalume vokuanepa. Wahoneka okuti: “Onwe valume, tualeiko okukala novakai venyi nenoñgonoko, okuveavela ehumbilo ngonombiya mbahapamene.” (1 Pedro 3:7) Okuhumba omunthu tyihangununa okumupanda unene. Ngotyo, ove utavela etyi apopia, nomasuko ae, nokulinga etyi ahanda. Nkhuali kutyilingi vala tyina pena umwe ehunga liakolela. Ongotyo ovalume vesukisa okutekula ovakai vavo.

16. Elondolo patyi Ondaka ya Huku yavela ovalume konthele yokuhumba ovakai vavo?

¹⁶ Etyi Petulu apopila ovalume opo vahumbe ovakai vavo, wayauisako okuti: “Opo omalikuambelo enyi ahatyilikwe.” (1 Pedro 3:7) Otyo tyilekesa nawa okuti onkhalelo omulume atekula omukai wae ku Jeova yakolela. Inkha kavahumbu ovakai vavo omalikuambelo avo apondola okutyilikwa. Okuti ovakai kamavapande ovalume vavo inkha vevetekula nehumbilo?

17. Alo pi ovalume vena okukala nohole novakai vavo?

¹⁷ Konthele yokukala nohole novakai, Ondaka ya Huku ilondola okuti: “Ovalume vena okukala nohole novakai vavo, ngetyi vehole omalutu avo muene. . . . Mokonda kutupu omunthu wayalele olutu luae muene. Anthi, ulutekula nokuluyunga nawa, ngetyi Kristu ayunga ewaneno liae . . . Kese umwe puonwe, akale nohole nomukai wae, ngetyi oe muene elihole.” (Efésios 5:28, 29, 33) Alo pi ovalume vena okukala nohole novakai vavo? Petulu wahoneka okuti: “Valume, tualeiko  okukala nohole novakai venyi, ngetyi Kristu ehole ewaneno, iya elipakula mokonda yalio.” (Efésios 5:25) Tyotyili, omulume una okukala nehando liokuavela omuenyo wae pala omukai wae, ngetyi Kristu alingila vakuavo. Tyina omulume Omukristau atekula omukai wae nokankhenda, nehumbilo, nesuko, nokupaka komutwe omasuko ae, omukai tyimupepukila vali okutavela etumino liomulume wae.

18. Ombatelo patyi ovalume vena opo vetyivile okufuisapo ovilinga viavo motyinepo?

¹⁸ Okuti okulekesa ehumbilo monkhalelo oyo tyalema unene pala ovalume? Au, Jeova na lumwe aita omunthu okulinga etyi ehevili. Tupu, ovafendeli va Jeova vena ombatelo yononkhono ononene mouye auho—Ospilitu sandu ya Huku. Jesus wati: “Inkha onwe nondingavivi, mutyii okuavela ovana venyi ovipuka oviwa, iya Tate keulu wokuavilapo vali, maavela ononkhono mbae vana vemuita!” (Lucas 11:13) Tyina velikuambela, ovalume vapondola okuita opo Jeova evekuateseko nospilitu yae, opo vatekule nawa vakuavo okukutikinyamo ovakai vavo.—Tanga Atos 5:32.

19. Oityi matulilongesa monthele ilandulako?

¹⁹ Tyotyili, ovalume vena otyilinga otyinene tyokulilongesa oñgeni vapondola okutavela Kristu nokuhetekela outumini wae. Iya oityi ovakai vena okulinga, haunene vokuanepwa? Onthele ilandulako maipopi oñgeni ovakai vena okutala otyilinga tyavo mepongiyo lia Jeova.

Okuti Ove Utyihinangela?

• Ovituwa patyi via Jesus tuesukisa okuhetekela?

• Oñgeni ovakulu vewaneno vena okutekula onongi?

• Oñgeni omulume ena okutekula omukai wae?

[Omapuko Elongeso]

[Olutalatu pefo 16]

Hetekela Jesus okuhumba vakuenyi