Sikayoran Lalaki, Kasin Manpapasakop Kayo ed Inkaulo nen Kristo?

“Say ulo na balang laki et say Kristo.”​—1 COR. 11:3.

1. Anto so mangipapanengneng a si Jehova et Dios na kareenan?

“SIKA so makanepegan, Jehova a Dios mi, a mangawat na gloria tan galang tan pakayari,” so inkuan na Apocalipsis 4:11, “lapud sika so amalsa ed amin a bengatla, tan lapud linawam et niwala tan apalsa iratan.” Lapud pinalsa to so amin a bengatla, si Jehova a Dios so Soberano ed uniberso tan sankatagyan ed amin. Si Jehova et “sakey a Dios na kareenan, aliwan gulo” tan nanengneng iya diad inkaorganisa na saray anghel to.​—1 Cor. 14:33; Isa. 6:1-3; Heb. 12:22, 23.

2, 3. (a) Siopa so sankaunaan a pinalsa nen Jehova? (b) Anto so posisyon na panguloan ya Anak no nipaakar ed Ama to?

² Diad loob na agnabilang a panaon antis na panamalsa et wala la si Jehova. Say sankaunaan a pinalsa to et samay espiritu a tinawag a “say Salita” lapud sikatoy inusar nen Jehova a Pinagkasangiyan To. Amin a bengatla et apalsa diad panamegley na Salita. Diad saginonor, sikatoy linma diad dalin bilang ayadyarin too tan akabkabat bilang si Jesu-Kristo.​—Basaen so Juan 1:1-3, 14.

³ Unong ed Kasulatan, anto so posisyon na Dios no nipaakar ed panguloan ya Anak to? Oniay ibabaga nen apostol Pablo sanen pinuyanan a mangisulat: “Labay kon naamtaan yo a say ulo na balang laki et say Kristo; tan say ulo na bii et say laki; tan say ulo na Kristo et say Dios.” (1 Cor. 11:3) Say ulo nen Kristo et say Ama to. Diad tua, nakaukolan so uksoyan na inkaulo tan panagpasakop pian mansiansiay kareenan ed limog na saray intelihentin pinalsa. Anggan samay “diad panamegley to et apalsa so amin niran bengatla” et nakaukolan a manpasakop ed inkaulo na Dios.​—Col. 1:16.

4, 5. Anto so alikna nen Jesus nipaakar ed panagpasakop to’d inkaulo nen Jehova?

⁴ Anto so alikna nen Jesus nipaakar ed panagpasakop to’d inkaulo nen Jehova tan say inyakar to diad dalin? Oniay kuan na Kasulatan: “Si Kristo Jesus, ya anggaman kaparpara toy Dios, [et] agto ninonot so panamsam, salanti, pian makapipara ed Dios. Andi, noagta tinaynan to so amin a walad sikato tan inawat toy kipapasen na sakey ya aripen tan nagmaliw a too. Nagkalalo ni, sanen sikatoy walad kipapasen na sakey a too, sikatoy nampaabeba tan nagmaliw a matulok anggad ipapatey, on, ipapatey ed panamairapan a kiew.”​—Fil. 2:5-8.

⁵ Diad amin a panaon et mapaabeban tinmulok si Jesus ed linawa nen Ama to. Inkuan to: “Agak makapanggawa na anggan sakey a bengatla unong ed dilin panlabayan ko; . . . say panangukom ko et matunong, ta say aanapen ko et aliwan say dilin linawak, noag say linawa na samay angibaki ed siak.” (Juan 5:30) “Gagawaen kon naynay iray makapaliket ed [Amak],” so inkuan to. (Juan 8:29) Sanen manampot lay bilay to ed dalin, oniay impikasi nen Jesus ed Ama to: “Inggloria ta ka diad dalin, a sinumpal koy kimey ya impagawam ed siak.” (Juan 17:4) Sirin, aliwan mairap ed si Jesus so pamidbir tan pangawat ed inkaulo na Dios.

 Agunggonaan so Anak Diad Panagpasakop To’d Ama To

6. Antoran alay abig a kualidad so impatnag nen Jesus?

⁶ Sanen wadiad dalin si Jesus, impatnag toy dakdakel ya alay abig iran kualidad. Sakey ed saratan et say baleg a panangaro to’d Ama to. “Inarok so Ama,” so inkuan to. (Juan 14:31) Impatnag to met so baleg a panangaro’d totoo. (Basaen so Mateo 22:35-40.) Si Jesus et mapangasi tan makonsidera, aliwan maruksa odino dominante. “Dago kayo ed siak, amin yon mansasagpot tan nabebelatan,” so inkuan to, “tan pampainawaen ta kayo. Sakbat yo so pakok tan manaral kayo ed siak, ta mauyamo ak tan mapaabeba ak, pian nainawaan iray kamarerwa yo. Ta mainomay a sakbaten so pakok tan anlemew so awit ko.” (Mat. 11:28-30) Saray kinmarneron totoo, matatken man odino ugaw ni, nagkalalo la ed saramay napapairap tan nalalames, so aligliwan maong ed makapasagyat a personalidad nen Jesus tan makapaligliwan mensahe to.

7, 8. Unong ed Ganggan, panon a nepeg ya ipasen imay sakey a biin manpaparala, balet panoy impideneng nen Jesus ed sikato?

⁷ Nonoten met so impideneng nen Jesus ed saray bibii. Manlapu la nensaman, maslak a lalaki et mauges so panagtrato ra ed saray bibii. Ontan met so ugali na saray lider na relihyon diad Israel. Balet si Jesus et marespeto ed saray bibii. Impatnag to iya diad impideneng to ed samay bii a 12 taon lan manpaparala. Sikatoy “nanirap lan maong” ed dakel a nampatambalan to tan naupot lay amin a kayarian to. Balet, “lalon linmoor” so sakit to. Unong ed Ganggan, sikatoy nepeg ya ipasen a marutak. Tan siopaman a maniwit ed sikato et magmaliw met a marutak.​—Lev. 15:19, 25.

⁸ Sanen abalitaan na sayan bii a papaabigen nen Jesus iray mansasakit, sikatoy akiseksekan ed saray totoo ya akapaliber ed si Jesus, ya inkuan to: “No nadiwit ko labat so kawes to, onabig ak la.” Diniwit toy kawes nen Jesus tan inmabig a tampol. Amta nen Jesus ya agnayarin diwiten na sayan bii so kawes to, balet agto nampasnokan noagta kinasian to. Atalosan met nen Jesus so nalilikna na sayan bii lapud pigay taon lan mansasakit, tan mankakkaukolan lay tulong. Oniay mapangasin inkuan nen Jesus: “Ana’ko, say pananisiam so amaabig ed sika. La ka ed kareenan, tan onabig ka la ed makapairap a sakit mo.”​—Mar. 5:25-34.

9. Panoy inkiwas nen Jesus sanen saray ugugaw et sinebelan na saray disipulo to ya onasingger ed sikato?

⁹ Anggan saray ugugaw et komportable met ed si Jesus. Sanen inyakar na totoo ed sikato iray ugugaw, binano ira na saray disipulo to lapud abaloan da ya agto labay so paisturbo ed saray ugugaw. Balet aliwan ontan so alikna nen Jesus. Oniay ibabaga na Kasulatan: “Sanen anengneng itan nen Jesus, agto agustoan itan tan inkuan to ed [saray disipulo to]: ‘Paulyan yo iray angkekelag ya ugugaw ya onasingger ed siak. Agyo ra aamperen, ta saray akankayarian na panarian na Dios et singa sarayan ugugaw.’” Insan, “nilalakap to iray ugugaw tan benebendisyonan to ra, ya intapew toy lima to ed sikara.” Agto labat inabuloyan iray ugugaw ya onasingger ed sikato, noagta impalikna to met a labalabay to ra.​—Mar. 10:13-16.

10. Panon a niwala’d si Jesus iray kualidad ya impatnag to sanen wadiad dalin?

¹⁰ Panon a niwala’d si Jesus iray kualidad ya impatnag to sanen wadiad dalin? Antis a nagmaliw a too, abaybayag a panaon a naobserbaan toy Ama to diad tawen tan naaralan to iray dalan To. (Basaen so Uliran 8:22, 23, 30.) Anengneng ton mismo so maaron impangusar nen Jehova ed autoridad To bilang Ulo na amin a pinalsa, tan inalig itan nen Jesus. Nagawaan kasi itan nen Jesus no aliwan mapasakop? Sikatoy maliket a nampasakop ed Ama to, tan maliket met si Jehova a nawalaay ontan ya Anak. Sanen wadiad dalin si Jesus, sigpot ton impatnag iray alay abig a kualidad nen Ama to. Talagan pribilehyo tayo so manpasakop ed Kristo, say tinuro na Dios a Manuley ed Panarian diad tawen!

Aligen Iray Kualidad nen Kristo

11. (a) Siopa so nepeg tayon panggunaetan ya aligen? (b) Akin et nepeg a nagkalalon panseetan na saray lalaki ed kongregasyon so pangalig ed si Jesus?

¹¹ Amin ya agagi ed kongregasyon, nagkalalo’d  saray lalaki et nepeg a mantultuloy a mansagpot pian naalig da iray kualidad nen Kristo. Singa nipabitar la, inkuan na Biblia: “Say ulo na balang laki et say Kristo.” No panon ya inalig nen Kristo so Ulo to, say tuan Dios, nepeg met a panseetan na saray Kristianon lalaki ya aligen so ulo ra​—say Kristo. Ontan so ginawa nen apostol Pablo sanen nagmaliw a Kristiano. Binilin to ray kapara ton Kristiano: “Alig yo ak komon a singa pangaalig ko ed si Kristo.” (1 Cor. 11:1) Onia met so inkuan nen apostol Pedro: “Atawag kayo ed saya, ta anggan si Kristo et nanirap parad sikayo, tan angitilak na ehemplo ed sikayo pian tumboken yon maapit iray bakat to.” (1 Ped. 2:21) Wala ni sananey a rason no akin a say panonot ya aligen so Kristo et nagkalautlan makapainteres ed saray lalaki. Sikara iramay napripribilehyoan a magmaliw a matatken tan ministeryal a lingkor. Lapud nanliketan nen Jesus so pangalig ed si Jehova, nepeg met a panliketan na saray Kristianon lalaki so pangalig ed si Kristo tan saray kualidad to.

12, 13. Panon a nepeg a pidenengan na mamatatken iray agagin walad panangasikaso ra?

¹² Nepeg ya aralen na saray mamatatken ed kongregasyon so pangalig ed Kristo. Oniay imbilin nen Pedro ed saray mamatatken: “Pastolan yo so pulok na Dios a walad panangasikaso yo, ya agkayo napapasootan, noagta mabulbulos kayo; tan agkayo manaanap na napinabangan yo, noagta akaparaan kayon naynay; tan agkayo pakakatawan ed saramay kayarian na Dios, noagta magmaliw kayon ehemplo ed pulok.” (1 Ped. 5:1-3) Nepeg ya agda abusoen so autoridad da, aliwa ran dominante, odino maruksa. Pian naalig day ehemplo nen Kristo, nepeg a panggunaetan day magmaliw a maaro,  makonsidera, mapaabeba, tan mapangasi diad pidedeneng da ed saray agagin inmatalek ed sikara.

¹³ Saramay mangidadaulo ed kongregasyon et ag-ayadyari, tan nepeg dan bidbiren itan a limitasyon da. (Roma 3:23) Kanian nepeg dan panggunaetan ya aralen so nipaakar ed si Jesus tan aligen so panangaro to. Kaukolan dan dalepdepen so pidedeneng na Dios tan si Kristo ed saray totoo tan panseetan dan aligen iratan. Oniay ipapaseseg nen Pablo: “Mapaabeba kayo komon ya amin diad pidedeneng yo ed sakey tan sakey, lapud kabusol na Dios iray mapaatagey, balet iiter toy agnaparaan a kaabigan ed saray mapaabeba.”​—1 Ped. 5:5.

14. Panon a lalon nipatnag na saray mamatatken so galang ed arum?

¹⁴ Diad pidedeneng da ed pulok na Dios, saray aturon lalaki ed kongregasyon so nepeg a mangipatnag na alay abig iran kualidad. Oniay ibabaga na Roma 12:10: “Diad aroan na sanaagi, ipatnag yoy aralem a panamabli ed balang sakey. Idaulo yoy pangipanengneng na galang ed balang sakey.” Ipapatnag na saray mamatatken tan ministeryal a lingkor so galang ed arum. Singa met say arum ya agagi, kaukolan a sarayan lalaki et ‘aliwan makolkol odino mapaatagey, noagta mapaabeba ed nonot, ya ipasen dan mas atagey so arum nen say sikara.’ (Fil. 2:3) Kanian, saramay mangidadaulo et nepeg ya ipasen day arum a mas atagey nen say sikara. No gagawaen da iya, tutumboken day simbawa nen Pablo: “Sikatayoran mabiskeg et nepeg tayon awiten iray kakapuyan na saramay aliwan mabiskeg, tan agtayo papaliketen so inkasikatayo. Komon ta paliketen na kada sakey ed sikatayo so kapara ton too ed no anto so maong, salanti, samay makapabiskeg ed sikato. Ta anggan say Kristo et agto pinaliket so inkasikato.”​—Roma 15:1-3.

‘Pagalangan Iray Asawan Bibii’

15. Panon so nepeg a pidedeneng na asawan lalaki ed kaasawaan da?

¹⁵ Nonoten pay simbawa nen Pedro ed saray asawan lalaki. Insulat to: “Sikayoran asawan lalaki, mantultuloy kayon miamong ed kaasawaan yo unong ed pikakabat, tan pagalangan yo ra a singa panaalwar yo ed mipipisit a pananginan.” (1 Ped. 3:7) Say kabaliksan na pagalangan so sakey ya indibidual et sikatoy ipasen a mabmabli. Kanian, ikonsideram so opinyon, pankaukolan, tan say labay to, tan nayarin palugaran mo no anggapo met so nalalanor ya ambelat a dedesisyonan. Ontan so nepeg a pidedeneng na asawan laki ed asawa to.

16. Diad Biblia, anto so pasakbay ed saray asawan lalaki nipaakar ed panamagalang ed kaasawaan da?

¹⁶ Sanen imbaga nen Pedro ed saray asawan lalaki a pagalangan day kaasawaan da, walay impasakbay to: “Ta pian agnaamper iray pikakasi yo.” (1 Ped. 3:7) Ipapabitar na satan ya im-importante ed si Jehova so panagtrato na laki ed asawa to. Naamper iray pikakasi to no agto pagalangan so asawa to. Ontan met, agta mas positiboy ikikiwas na asawan bibii no sikaray mapagalang a tratratoen na kaasawaan da?

17. Panon a lalon nipatnag na asawan laki so panangaro ed asawa to?

¹⁷ Oniay simbawa na Salitay Dios nipaakar ed panangaro ed asawan bii: “Nepeg ya aroen na asawan lalaki so kaasawaan da a singa laman dan dili. . . . ta anggapoy toon bubusolen toy laman ton dili; noag ingen papakanen tan papablien to itan, a singa met ed gagawaen na Kristo ed kongregasyon . . . Komon ta aroen a maong na kada sakey ed sikayo so asawa to a singa ed pangaaro to ed laman ton dili.” (Efe. 5:28, 29, 33) Panon a lalon nipatnag na asawan lalaki so panangaro ra ed kaasawaan da? “Asawan  lalaki,” so insulat nen Pablo, “itultuloy yon aroen so kaasawaan yo, no panon a say Kristo et inaro to met so kongregasyon tan inter toy inkasikato parad satan.” (Efe. 5:25) On, say asawan laki et nepeg a mabulos a mangisakripisyo ed bilay to parad asawa to, a singa ginawa nen Kristo parad arum. No say Kristianon asawan laki et maaro, makonsidera, maasikaso, tan agto labat nononoten so inkasikato, mas mainomay parad asawan bii so manpasakop ed inkaulo to.

18. Anto so makatulong ed saray lalaki pian nipatnag day panamagalang ed kaasawaan da?

¹⁸ Kasin say ontan a panamagalang ed asawan bibii a kekerewen ed asawan lalaki et alablabas? Andi, agbalot kerewen ed sikara nen Jehova so agda nasarag. Sakey ni, saray managdayew nen Jehova et sarag da met a nagamoran so sankabiskegan a puersa ed uniberso​—say masanton espiritu na Dios. Inkuan nen Jesus: “No sikayo et amta yoy mangiter na maong iran regalo ed saray anak yo anggano mauges kayo, say Ama ed tawen et mas lalon mangiter na masanton espiritu ed saramay onkekerew ed sikato!” (Luc. 11:13) On, saray asawan lalaki et sarag day onkerew ed si Jehova na espiritu to pian natulongan ira diad pidedeneng da ed arum, kaiba lay kaasawaan da.​—Basaen so Gawa 5:32.

19. Anto so pantongtongan tayo ed onsublay ya artikulo?

¹⁹ Sirin, ambelat so responsabilidad na saray lalaki lapud nepeg dan aralen so pagmaliw a mapasakop ed si Kristo tan aligen so alimbawa to bilang ulo. Komusta balet iray bibii, nagkalautla ed saray de-asawa? Pantongtongan tayo’d onsublay ya artikulo no antoy nepeg a panmoria ra ed betang da diad uksoyan nen Jehova.

Kasin Natandaan Mo?

• Antoray kualidad nen Jesus a nepeg tayon aligen?

• Panon a nepeg a pidenengan na mamatatken iray walad panangasikaso ra?

• Panon so nepeg a pantrato na asawan laki ed asawa to?

[Tepetepet Parad Panagaral]

[Saray litrato ed pahina 10]

Aligen si Jesus diad pangipatnag na galang ed arum