Olketa Brata, Waswe, Iufala Stap Anda Long Christ?

“Christ hem hed bilong evri man.”​—⁠1 COR. 11:⁠3.

1. Wanem nao showimaot Jehovah hem God wea no duim samting olobaot?

 LONG Revelation 4:​11 hem sei: “Jehovah, iu nao God bilong mifala. Iu wakem evri samting bikos hem nao wanem iu laek for duim. So hem fitim for mifala praisem iu and mekhae long iu from bigfala paoa bilong iu.” From Jehovah God nao wakem evri samting, hem fit for rulim full universe and hem nao garem paoa ovarem evri samting wea hem wakem. Jehovah hem “God wea no duim samting olobaot, bat hem God bilong peace.” (1 Cor. 14:33) Iumi savve long datwan from wei wea hem markem olketa difren kaen waka for olketa angel duim.​—⁠Isa. 6:​1-3; Heb. 12:​22, 23.

2, 3. (a) Hu nao Jehovah wakem firstaem? (b) Wanem position nao firstborn Son garem?

² Bifor God wakem eni samting, hem stap finis. Firstfala samting wea hem wakem hem wanfala angel wea garem title “Word” bikos hem nao main wan for toktok for Jehovah. Jehovah iusim Word for wakem evri nara samting. Gogo hem kam long earth olsem perfect man, wea hem nao Jesus Christ.​—⁠Readim John 1:​1-3, 14.

³ Wanem nao Bible talem abaotem position bilong God and firstborn Son bilong hem? Holy spirit mekem aposol Paul for sei: “Mi laekem iufala for savve Christ hem hed bilong evri man, man hem hed bilong woman, and God hem hed bilong Christ.” (1 Cor. 11:⁠3) Christ hem stap anda long Dadi bilong hem. Evri man and angel mas garem samwan wea hed long olketa and olketa mas stap anda long hed bilong olketa mekem olketa stap gud. Nomata God ‘iusim Jesus for wakem evri nara samting,’ Jesus tu mas stap anda long God from God nao hed bilong hem.​—⁠Col. 1:​16.

4, 5. Wanem nao tingting bilong Jesus abaotem wei for stap anda long Jehovah?

⁴ Wanem nao tingting bilong Jesus abaotem wei for stap anda long Jehovah and for kam long earth? Bible sei: “Christ Jesus hem wanfala spirit olsem God, bat hem nating ting for trae semsem witim God. Hem lusim hae position bilong hem and kamap wanfala wakaman nomoa. Taem hem kamap man, hem hambol and hem obeyim God gogo hem dae taem olketa nilam hem long wanfala post.”​—⁠Phil. 2:​5-8.

⁵ Evritaem Jesus hambol and duim wanem Dadi bilong hem laekem. Hem sei: “Mi no savve duim eni samting followim tingting bilong miseleva. . . . Hao mi judgem [pipol] hem barava stret bikos mi no duim samting wea miseleva laekem bat mi duim samting wea Dadi wea sendem mi kam hem laekem.” (John 5:​30) Hem sei moa: “Mi evritaem duim samting wea [Dadi bilong mi] laekem.” (John 8:​29) Taem Jesus klosap for dae, hem prea olsem long Dadi bilong hem: “Olketa samting wea mi duim long earth hem mekhae long iu and mi finisim nao waka wea iu markem mi for duim.” (John 17:⁠4) Evri samting wea Jesus duim showimaot hem luksavve God hem hed bilong hem and hem hapi for stap anda long God.

Son Kasem Gud Samting From Hem Stap Anda Long Dadi

6. Olketa wanem gudfala wei nao Jesus showimaot?

⁶ Taem Jesus stap long earth, hem showimaot staka gudfala wei. Wanfala wei hia nao  hem barava lovem Dadi bilong hem. Hem sei: “Mi lovem Dadi.” (John 14:31) Hem barava lovem pipol tu. (Readim Matthew 22:​35-​40.) Jesus hem kaen and tingim pipol, hem no raf and no bossim man. Hem sei: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala. Bae hem no hard for iufala waka witim mi, and iufala savve karem samting wea mi askem iufala for karem.” (Matt. 11:​28-​30) Pipol wea hambol wea olketa narawan spoelem olketa kasem comfort from gudfala wei bilong Jesus. Message bilong hem strongim olketa tu.

7, 8. Long Law bilong Moses, wanem nao datfala woman wea garem sik mas no duim? Bat wanem nao Jesus duim?

⁷ Jesus ting hao long olketa woman? Long bifor yet kam kasem distaem, staka man savve duim nogud samting long olketa woman. Hem nao samting wea olketa bigman bilong religion long Israel duim bifor. Bat Jesus hem no olsem, hem respectim olketa woman. Iumi savve long diswan from wanem hem duim long woman wea garem sik wea blood hem ran olowe for 12 year finis. Disfala woman “go lukim staka doctor and spendem evri selen bilong hem finis, bat treatment wea olketa givim hem no finisim sik bat just mekem hem worse go moa.” Long Law bilong Moses, woman hia hem no klin. Eniwan wea tasim hem bae no klin tu.​—⁠Lev. 15:​19, 25.

⁸ Taem woman hia herem Jesus healim pipol wea sik, hem go midolwan long olketa pipol wea followim Jesus and hem sei: “Sapos mi tasim nomoa kaleko bilong hem bae mi gud bak nao.” Hem tasim Jesus and semtaem nomoa datfala nogud sik hem finis nao. Jesus savve woman hia shud no tasim kaleko bilong hem. Nomata olsem, Jesus no tok kros long hem bat hem kaen long datfala woman. Hem luksavve long feeling bilong woman hia from hem sik for staka year finis and hem luksavve woman hia laekem tumas for eniwan helpem hem. Jesus tok kaen olsem long hem: “Dota bilong mi, faith bilong iu mekem iu gud bak. Iu go and no wari moa, bikos sik hia hem finis nao.”​—⁠Mark 5:​25-​34.

9. Taem olketa disaepol trae for stopem olketa pikinini for no kam long Jesus, wanem nao hem duim?

⁹ Olketa pikinini tu no fraet for go long Jesus. Taem pipol tekem olketa pikinini kam long Jesus, olketa disaepol trae for stopem olketa bikos olketa tingse Jesus bae no laek for story witim olketa pikinini. Bat Jesus nating ting olsem. Bible sei: “Taem Jesus lukim diswan, hem feel nogud and hem sei long olketa [disaepol]: ‘Letem olketa smol pikinini for kam long mi. No stopem olketa bikos kingdom bilong God hem bilong olketa wea olsem olketa pikinini hia.’” Then “hem holem kam olketa pikinini hia and blessim olketa and putim hand bilong hem long olketa.” Jesus barava welkamim olketa.​—⁠Mark 10:​13-​16.

10. Wanem nao mekem Jesus garem olketa gudfala wei?

¹⁰ Wanem nao mekem Jesus garem olketa gudfala wei? Taem Jesus stap long heven witim Dadi bilong hem for staka million year, hem lane from Dadi bilong hem. (Readim Proverbs 8:​22, 23, 30.) Jesus lukim tu wei wea Jehovah showimaot love taem hem hed ovarem evri samting, so hem tu duim sem samting. Jesus bae no lanem wei hia sapos hem no willing for stap anda long Dadi bilong hem. Hem hapi tumas for duim olsem, and Jehovah hapi for garem Son olsem. Taem Jesus stap long earth, hem barava showimaot olketa wei olsem Dadi bilong hem long heven. Iumi hapi tumas for stap anda long Christ wea hem nao God chusim for rul long Kingdom long heven!

Followim Wei Bilong Christ

11. (a) Hu nao iumi mas waka hard for followim? (b) Why nao hem barava important for olketa brata followim wei bilong Jesus?

¹¹ Evriwan long Christian kongregeson shud trae hard for followim wei bilong Christ.  Olketa brata nao main wan for duim datwan. Olsem iumi storyim finis, Bible sei: “Christ hem hed bilong evri man.” From Christ followim wei bilong tru God wea hem nao hed bilong hem, olketa Christian brata tu mas trae hard for followim wei bilong Christ wea hem nao hed bilong olketa. Taem aposol Paul kamap Christian, hem duim sem samting tu. Hem sei: “Iufala followim wei bilong mi, olsem mi tu followim wei bilong Christ.” (1 Cor. 11:⁠1) Aposol Peter tu hem sei: “God hem chusim iufala finis for followim disfala wei, bikos Christ hem safa for iufala. Hem showim example bilong hem mekem iufala followim gud.” (1 Pet. 2:​21) Hem barava important for olketa brata followim Christ bikos datwan savve helpem olketa for kamap elder and ministerial servant. Jesus hapi tumas for followim wei bilong Jehovah, so olketa brata shud hapi tu for followim wei bilong Christ.

12, 13. Olketa elder mas lukaftarem olketa sheepsheep long wanem wei?

¹² Olketa elder insaed kongregeson mas lane for followim wei bilong Christ. Peter talem disfala kaonsel for olketa elder: “Iufala mas lukaftarem gud pipol bilong God wea stap long hand bilong iufala. Olketa olsem olketa sheepsheep for iufala lukaftarem. So iufala mas willing for duim diswan and no from eniwan forcem iufala. Hem nogud for iufala duim disfala waka for kasem selen bat iufala mas duim olsem bikos iufala barava willing for helpem olketa. Hem nogud for iufala bossim olketa wea God markem for iufala lukaftarem. Bat hem gud for iufala showimaot gudfala wei mekem olketa sheepsheep hia savve followim example bilong iufala.” (1 Pet. 5:​1-3)  Olketa elder mas no bossim olketa sheepsheep or raf long olketa bat olketa mas tingim need bilong olketa. From olketa elder followim Christ, olketa trae hard for showimaot love, hambol, kaen, and tingim feeling bilong olketa sheepsheep.

¹³ Olketa brata wea lukaftarem kongregeson no perfect, so olketa mas evritaem tingim datwan. (Rom. 3:​23) Dastawe olketa mas willing for lane abaotem Jesus and showimaot love olsem Jesus. Olketa mas ting raonem wei wea God and Christ lukaftarem pipol and followim wanem tufala duim. Peter encouragem iumi olsem: “Iufala evriwan mas no tingse iufala hae winim narawan, bikos God no laekem pipol wea praod, bat hem barava kaen tumas long pipol wea hambol.”​—⁠1 Pet. 5:⁠5.

14. Long wanem wei nao olketa elder mas respectim narawan?

¹⁴ Olketa elder and ministerial servant mas showimaot gudfala wei taem olketa lukaftarem sheepsheep bilong God. Romans 12:10 hem sei: “Iufala mas lovem olketa narawan wea biliv, olsem man lovem brata bilong hem. Showimaot gudfala example long wei for respectim narawan.” Olketa elder and ministerial servant witim evri Christian mas ‘no duim eni samting from olketa laek raoa or winim narawan, bat olketa mas hambol and tingim nara pipol nao gud winim olketa.’ (Phil. 2:⁠3) Olketa brata wea lukaftarem kongregeson mas no ting daonem narawan bat mas tingim olketa narawan nao gud winim olketa. Taem olketa duim olsem, olketa followim disfala kaonsel wea Paul talem: “Iumi wea garem strongfala faith mas helpem olketa wea no strong for no givap long olketa samting wea traem olketa, and iumi mas no duim samting wea mekem iumiseleva nomoa hapi. Iumi evriwan mas duim samting wea helpem and strongim narawan. Christ tu bat no duim nomoa wanem hemseleva laekem.”​—⁠Rom. 15:​1-3.

‘Respectim Waef’

15. Hasband mas ting hao long waef bilong hem?

¹⁵ Peter givim disfala kaonsel long olketa hasband. Hem sei: “Iufala hasband, gohed for stap long sem wei witim olketa [waef bilong iufala] fitim savve. Respectim olketa woman from olketa no strong olsem man.” (1 Pet. 3:⁠7) Man wea showimaot respect hem tinghae long narawan. Hem minim hasband mas herem tingting bilong waef, luksavve wanem waef needim, wanem hem laekem, and hapi for duim samting wea waef laekem sapos datwan no mekem problem kamap. Hem nao wanem hasband shud duim for waef bilong hem.

16. Why nao Bible sei hem important for hasband respectim waef bilong hem?

¹⁶ Taem Peter talem olketa hasband for respectim waef bilong olketa, hem talem disfala warning tu: “Mekem diswan no stopem prea bilong iufala.” (1 Pet. 3:⁠7) Datwan showimaot Jehovah tingim hem barava important for hasband respectim waef bilong hem. Sapos hasband no respectim waef, datwan savve mekem Jehovah no herem prea bilong hem. Tru tumas, taem hasband respectim waef, datwan savve mekem waef bilong hem hapi.

17. Long wanem wei nao hasband mas lovem waef bilong hem?

¹⁷ Bible givim kaonsel olsem: “Olketa hasband mas lovem waef bilong olketa olsem olketa lovem body bilong olketa seleva. . . . From no eni man heitim body bilong hemseleva, bat hem feedim and lukaftarem, olsem Christ hem duim long kongregeson . . . Man wanwan mas lovem waef bilong hem olsem hem lovem hemseleva.” (Eph. 5:​28, 29, 33) Long wanem wei nao hasband mas lovem waef bilong  hem? Paul sei: “Olketa hasband, gohed for lovem waef bilong iufala, long sem wei wea Christ tu hem lovem kongregeson and givim laef bilong hem for datwan.” (Eph. 5:​25) Tru tumas, hasband mas willing for dae for waef bilong hem, olsem Christ hem dae for olketa narawan tu. Taem Christian hasband hem isi long waef and tingim feeling bilong hem, lisin long hem, and no duim wanem hemseleva laekem, datwan bae helpem waef for stap anda long hasband bilong hem.

18. Wanem nao savve helpem hasband for lukaftarem gud waef bilong hem?

¹⁸ Waswe, hem big samting tumas for hasband respectim waef? Nomoa, hard tumas for Jehovah askem hasband for duim samting wea hem no fit for duim. Pipol wea worshipim Jehovah savve askem holy spirit bilong hem wea strong tumas for helpem olketa. Jesus sei: “Iufala olketa man wea sin bat iufala givim olketa gudfala samting long olketa pikinini bilong iufala, iaman? Sapos olsem, Dadi bilong iufala long heven bae barava givim holy spirit long olketa wea askem hem tu!” (Luke 11:13) Olketa hasband savve askem Jehovah tu for holy spirit for helpem olketa respectim narawan and waef bilong olketa.​—⁠Readim Acts 5:​32.

19. Wanem nao study bihaen diswan bae storyim?

¹⁹ Tru tumas, olketa brata mas waka hard for lane hao for stap anda long Christ and followim wei bilong hem. Bat waswe long olketa waef and olketa nara sista? Study bihaen diswan bae storyim wanem olketa sista shud duim insaed arrangement bilong Jehovah.

Waswe, Iu Tingim Yet?

• Olketa wanem wei nao Jesus showimaot wea iumi shud followim?

• Olketa elder mas lukaftarem olketa sheepsheep long wanem wei?

• Hasband mas ting hao long waef bilong hem?

[Olketa Study Kwestin]

[Piksa long page 10]

Followim wei bilong Jesus for respectim narawan