Mansma, unu e saka unsrefi na ondro Krestes, un edeman?
Mansma, unu e saka unsrefi na ondro Krestes, un edeman?
„Krestes na a ede fu ibri man.”—1 KOR. 11:3.
1. San e sori taki Yehovah a no wan Gado fu bruya?
„NA YU, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani.” Den wortu disi skrifi na Openbaring 4:11. Fu di Yehovah Gado na a Mekiman fu ala sani, meki en na a Moro Hei Tiriman fu ala sani na hemel èn na grontapu. Te wi e luku a fasi fa den engel na hemel orga, dan wi kan si taki Yehovah „a no wan Gado fu bruya, ma fu vrede”.—1 Kor. 14:33; Yes. 6:1-3; Hebr. 12:22, 23.
2, 3. (a) Suma ben de a fosi sma di Yehovah meki? (b) Sortu posisi a fosi gebore Manpikin abi, èn sortu posisi a Tata abi?
2 Fosi Gado bigin meki den sani na hemel èn na grontapu, a ben de en wawan milyunmilyun yari langa. A fosi sma di a meki, na a yeye di wi sabi leki „a Wortu”, fu di a yeye dati ben de a Takiman fu Yehovah. Nanga yepi fu a Wortu dati, ala tra sani kon de. Baka dati, a kon na grontapu leki wan libisma di no abi sondu, èn wi kon sabi en leki Yesus Krestes.—Leisi Yohanes 1:1-3, 14.
3 San Bijbel e taki fu a posisi fu Gado èn fu a di fu en fosi gebore Manpikin? Nanga yepi fu a santa yeye, na apostel Paulus ben skrifi: „Mi wani fu unu sabi taki Krestes na a ede fu ibri man; a man na a ede fu na uma, èn Gado na a ede fu Krestes” (1 Kor. 11:3). A Krestes e saka ensrefi na ondro a tiri fu en Papa. Efu libisma nanga engel wani libi na ini vrede èn na wan orga fasi, dan a de prenspari taki den abi wan edeman èn taki den e saka densrefi na ondro na edeman dati. Srefi a wan ’di Gado gebroiki fu meki ala tra sani’, musu saka ensrefi na ondro Gado.—Kol. 1:16.
4, 5. Fa Yesus ben feni en taki a ben musu saka ensrefi na ondro Yehovah?
4 Fa Yesus ben feni en taki a ben musu saka ensrefi na ondro Yehovah èn taki a ben musu kon na grontapu? Bijbel e taki: „Aladi [Krestes Yesus] ben abi a srefi sortu skin leki Gado, toku a no prakseri fu teki sani abra nanga tranga, namku fu kan de a srefi leki Gado. Nôno, ma a gowe libi ala san a ben abi, a tron leki wan srafu èn a ben tron leki libisma. Ma a du moro leki dati srefi, bika di a ben de wan libisma, a saka ensrefi èn a gi yesi te na dede, iya, a dede na wan pina-postu.”—Fil. 2:5-8.
5 Ala ten Yesus sori sakafasi èn a ben de klariklari fu du a wani fu en Papa. A ben taki: „Mi no man du noti fu misrefi; . . . èn mi e krutu sma na wan regtfardiki fasi, bika mi no e du san misrefi wani, ma mi e du a wani fu a sma di seni mi kon” (Yoh. 5:30). Yesus ben taki: „Ala ten mi e du san e plisi [mi Tata]” (Yoh. 8:29). Na a kaba fu a libi fu en na grontapu, Yesus ben taigi en Papa na ini begi: „Mi gi yu glori na grontapu, fu di mi klari a wroko di yu gi mi fu du” (Yoh. 17:4). Soleki fa a sori, dan Yesus no ben abi problema fu saka ensrefi na ondro Gado.
A Manpikin e kisi wini fu di a e saka ensrefi na ondro a Tata
6. Sortu moi fasi Yesus ben abi?
6 Di Yesus ben de na grontapu, dan a ben abi furu moi fasi. Wan fu den fasi dati, na a bigi lobi di a ben abi gi en Papa. A ben taki: „Mi lobi a Tata” (Yoh. 14:31). A ben sori bigi lobi tu gi sma. (Leisi Mateyus 22:35-40.) Yesus ben abi switifasi, a ben e hori trawan na prakseri, a no ben e handri na wan ogri-ati fasi nanga sma, èn a no ben e dwengi sma fu du sani. A ben taki: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti” (Mat. 11:28-30). Den moi fasi fu Yesus èn a moi boskopu fu en ben de wan bigi trowstu gi yonguwan nanga owruwan, spesrutu gi den wan di trawan ben e wisiwasi èn ben e kwinsi.
7, 8. Na sortu komando fu a Wet na uma di ben e lasi brudu ben musu hori ensrefi? Fa Yesus handri nanga na uma disi?
7 Luku fa Yesus ben handri nanga umasma. Na ini den hondrohondro yari di pasa, furu mansma handri bun takru nanga umasma. Na dati den kerki fesiman fu owruten Israel ben du. Ma Yesus ben e handri na wan lespeki fasi nanga umasma. Wi kan si dati te wi e luku fa a handri nanga wan uma di ben e siki 12 yari langa fu di a ben e lasi brudu. Wan lo datra „ben pina” na uma disi èn a ben gebroiki ala en gudu fu feni wan dresi gi a siki fu en. Ma toku „sani ben kon moro ogri gi en”. Soleki fa a Wet ben e sori, dan na uma disi no ben de krin. Èn iniwan sma di ben fasi en, no ben o de krin moro.—Lef. 15:19, 25.
8 Di na uma yere taki Yesus ben e dresi sikisma, dan a go na mindri den ipi-ipi sma di ben e lontu Yesus, èn a taki: „Efu mi man fasi en dyakti nomo, dan mi o kon betre.” Na uma fasi Yesus, èn wantewante a kon betre baka. Yesus ben sabi taki na uma no ben mag fasi den krosi fu en. Ma toku a no bari en. Tra fasi leki dati, a sori switifasi gi en. A ben frustan fa na uma disi ben musu firi fu di a ben e siki someni yari langa. Yesus kon si tu taki na uma ben abi yepi tranga fanowdu. Na wan switi fasi Yesus taigi en: „Mi umapikin, na a bribi fu yu meki yu kon betre. Meki sani waka bun gi yu; tan abi wan bun gosontu.”—Mark. 5:25-34.
9. Di den disipel fu Yesus pruberi fu tapu den pikin fu kon na en, dan san Yesus du?
9 Srefi pikin ben e firi switi te den ben de makandra nanga Yesus. Wan leisi, di sma tyari pikin gi Yesus, dan den disipel fu en bari den sma dati, fu di den ben feni taki Yesus no ben abi ten gi pikin-nengre. Ma Yesus no ben e denki so. Bijbel e taki: „Di Yesus si disi, a mandi srefisrefi èn a taigi den: ’Meki den pikin-nengre kon na mi; no pruberi fu tapu den fu kon na mi, bika den sma di de leki den pikin disi sa kisi a kownukondre fu Gado.’” Ne „a brasa den pikin-nengre hori, a blesi den, èn a poti en anu na den tapu”. Te Yesus ben abi demakandra nanga pikin, dan a no ben e du dati fu sma ai, ma a ben e du dati nanga en heri ati.—Mark. 10:13-16.
10. Fa a du kon taki Yesus ben abi den fasi di a sori?
10 Fa a du kon taki Yesus ben abi den fasi di a ben sori na a ten di a ben de na grontapu? Fosi Yesus ben kon na grontapu, dan milyunmilyun yari langa a ben e luku fa en Papa na hemel ben e du sani, èn a teki leri fu en. (Leisi Odo 8:22, 23, 30.) Di Yesus ben de na hemel, dan a ben si a lobi-ati fasi fa en Papa ben e tiri ala den sani di A meki, èn a teki na eksempre fu en Papa. Yu denki taki Yesus ben o man du dati efu a no ben abi sakafasi? A ben gi en prisiri fu saka ensrefi na ondro en Papa, èn a ben gi Yehovah prisiri tu fu abi so wan Manpikin. Di Yesus ben de na grontapu, dan a sori den srefi moi fasi fu en hemel Tata. A de wan grani trutru taki wi man saka wisrefi na ondro Krestes, a Sma di Gado poti leki Tiriman fu a hemel Kownukondre!
Sori den fasi fu Krestes
11. (a) Na eksempre fu suma wi musu pruberi fu teki? (b) Fu san ede spesrutu den mansma na ini a gemeente musu du muiti fu teki na eksempre fu Yesus?
11 Ala sma na ini a Kresten gemeente, spesrutu den mansma, musu du muiti doronomo fu sori den fasi fu Krestes. Soleki fa wi si kaba, Bijbel e taki: „Krestes na a ede fu ibri man.” Neleki fa Krestes ben teki na eksempre fu en Edeman, a tru Gado, na so Kresten mansma musu du muiti fu teki na eksempre fu na edeman fu den, namku a Krestes. Na dati na apostel Paulus du di a tron wan Kresten. A ben gi den Kresten brada nanga sisa fu en a rai disi: „Waka baka na eksempre fu mi, neleki fa mi e waka baka na eksempre fu Krestes” (1 Kor. 11:1). Èn na apostel Petrus ben taki: „Gado kari unu fu tyari unsrefi na a fasi disi, bika srefi Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petr. 2:21). Ete wan reide de fu san ede mansma spesrutu musu teki na eksempre fu Krestes. Na den e tron owruman nanga dinari ini a diniwroko. Neleki fa Yesus ben e prisiri fu teki na eksempre fu Yehovah, na so Kresten mansma musu prisiri fu teki na eksempre fu Krestes èn fu sori den fasi fu en.
12, 13. Fa owruman musu handri nanga den skapu di den musu sorgu?
12 Den owruman na ini a Kresten gemeente abi a frantwortu fu leri fu de leki Krestes. Petrus ben gi den owruman a rai disi: „Luku den skapu fu Gado di a gi unu fu sorgu, èn no du dati neleki na dwengi wan sma dwengi unu, ma du dati nanga prisiri; no du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan; un no musu prei basi tu gi den wan di de wan gudu fu Gado, ma un musu tron eksempre gi den skapu” (1 Petr. 5:1-3). Kresten owruman no musu prei basi gi trawan, èn den no musu handri na wan ogri-ati fasi tu nanga trawan. Fu di den e teki na eksempre fu Krestes, meki den e du muiti fu sori lobi gi trawan, den e hori den firi fu trawan na prakseri, den abi sakafasi, èn den e handri na wan switi fasi nanga den skapu di den musu sorgu.
13 Den wan di e teki fesi na ini a gemeente na mansma di abi sondu, èn den musu hori dati na prakseri doronomo (Rom. 3:23). Sobun, den musu angri fu kon leri sabi Yesus, èn den musu sori lobi gi trawan neleki fa en ben du dati. Den musu denki dipi fu a fasi fa Gado nanga Krestes e handri nanga sma, èn baka dati den musu du muiti fu teki na eksempre fu den. Petrus ben gi wi a rai disi: „Un alamala musu abi sakafasi, iya, tai en leki wan banti na un mindribere te unu e handri nanga makandra, bika Gado no lobi den sma di abi heimemre, ma a e sori no-frudini bun-ati na den sma di abi sakafasi.”—1 Petr. 5:5.
14. Fa owruman musu gi grani na trawan?
14 Den wan di e teki fesi na ini a gemeente, musu sori moi fasi te den e handri nanga trawan. Romesma 12:10 e taki: „Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki.” Owruman nanga dinari ini a diniwroko musu gi grani na trawan. Neleki fa a musu de nanga ala Kresten, na so den mansma disi no musu ’strei nanga makandra èn den no musu prakseri tumusi furu fu densrefi, ma nanga sakafasi den musu si trawan moro hei leki densrefi’ (Fil. 2:3). A no de fu taki, dati den wan di e teki fesi musu si trawan moro hei leki densrefi. Te den wan di abi frantwortu na ini a gemeente e du dati, dan den e gi yesi na a rai disi fu Paulus: „Ma wi di tranga, musu tyari den swakifasi fu den wan di no de so tranga, èn wi no musu plisi wisrefi. Meki ibriwan fu wi plisi tra sma nanga sani di bun, so taki dati kan gi den deki-ati. Bika srefi Krestes no ben plisi ensrefi.”—Rom. 15:1-3.
’Gi grani na a wefi fu yu’
15. Fa masra musu handri nanga a wefi fu den?
15 Wi sa poti prakseri now na a rai di Petrus ben gi mansma di trow. A ben skrifi: „Un masra, na so un musu tan libi tu nanga un wefi na wan fasi di e sori taki unu abi sabi, aladi unu e gi na uma grani fu di a de wan moro swaki prapi” (1 Petr. 3:7). Wan sma di e gi grani na trawan e sori bigi lespeki gi den. Sobun, yu musu poti prakseri na a fasi fa sma e denki, na den sani di den abi fanowdu, na den sani di den wani, èn yu musu fiti yusrefi na den te dati kan. Na so wan masra musu handri nanga a wefi fu en.
16. Te Gado Wortu e taigi masra fu gi grani na a wefi fu den, dan sortu warskow a e gi den tu?
16 Te Petrus e taigi masra fu gi grani na a wefi fu den, dan a e gi den a warskow disi: „So taki nowan sani e tapu den begi fu unu” (1 Petr. 3:7). A sani disi e sori krin taki Yehovah e si a fasi fa wan man e handri nanga en wefi, leki wan seryusu sani. Te wan man no e gi grani na a wefi fu en, dan dati kan tapu pasi gi den begi fu en. Boiti dati, te masra e gi grani na a wefi fu den, dan nofo tron a wefi de klariklari fu saka ensrefi na den ondro, a no so?
17. Fa wan masra musu sori lobi gi en wefi?
17 Gado Wortu e gi masra a rai fu lobi a wefi fu den. Bijbel e taki: „Den masra musu lobi den wefi leki den eigi skin. . . . Bika nowan man abi bita-ati gi en eigi skin; ma a e sorgu a skin èn a e luku en bun, neleki fa Krestes e du nanga a gemeente . . . Meki ibriwan fu unu sosrefi lobi en wefi leki fa a lobi ensrefi” (Ef. 5:28, 29, 33). Fa masra musu sori lobi gi a wefi fu den? Paulus ben skrifi: „Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente” (Ef. 5:25). Iya, wan masra musu de klariklari fu gi en libi gi a wefi fu en, neleki fa Yesus ben du dati gi trawan. Te a Kresten masra e handri na wan switi fasi nanga a wefi fu en, te a e hori den firi fu en na prakseri, te a e poti prakseri na en, èn te a no e denki ensrefi nomo, dan a moro makriki gi a wefi fu en fu saka ensrefi na en ondro.
18. Sortu yepi mansma kan kisi fu tyari den frantwortu di den abi na ini a trowlibi?
18 A de so taki Yehovah e fruwakti tumusi furu fu masra te a e taigi den fu gi grani na a wefi fu den na a fasi dati? Nôno, Yehovah noiti no ben o aksi masra fu du wan sani di den no man du. Boiti dati, den anbegiman fu Yehovah kan kisi yepi fu a moro bigi krakti na hemel èn na grontapu, namku Gado en santa yeye. Yesus ben taki: „Efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!”( Luk. 11:13) Te masra e begi, dan den kan aksi Yehovah fu gi den en santa yeye so taki den kan handri na wan yoisti fasi nanga trawan èn nanga a wefi fu den.—Leisi Tori fu den Apostel 5:32.
19. San a tra artikel o tyari kon na krin?
19 Iya, mansma abi bigi frantwortu, fu di den musu leri fa fu saka densrefi na ondro Krestes, èn den musu leri tu fu teki na eksempre fu en. Ma fa a de nanga umasma, spesrutu den wefi? Na ini a tra artikel wi sa luku fa den musu tyari den frantwortu di den abi na ini a seti fu Yehovah.
Yu e memre disi ete?
• Sortu fasi di Yesus ben abi, wi musu sori tu?
• Fa owruman musu handri nanga den skapu?
• Fa wan masra musu handri nanga a wefi fu en?
[Aksi fu a tori disi]
[Prenki na tapu bladzijde 10]
Sori grani gi trawan neleki fa Yesus ben e du dati