Ene Alume, Vu Kasi Hẽ Oku Pokola Kristu Utue Wene?
Ene Alume, Vu Kasi Hẽ Oku Pokola Kristu Utue Wene?
“Utue wulume Kristu.”—1 VA KOR. 11:3.
1. Nye ci lekisa okuti Yehova Suku ka sole ombuanja?
ELIVULU Liesituluilo 4:11 li popia ndoco: “A [Yehova], a Suku yetu, wa posokela oku muisua ulamba lesumbilo lunene. Momo ove wa sovola ovina viosi. Vi kasilili ocipango cove, haico via lulikiwa laco.” Ululiki wetu haeye Ombiali ya Velapo koluali luosi, Yehova Suku, wa sokiya ciwa oviluvo viaye viosi, momo eye “heyeko Suku yonjuela, puãi eye Suku yombembua.” Eci ci limbukiwila ndomo epata liaye kilu lia sokiyiwa.—1 Va Kor. 14:33; Isa. 6:1-3; Va Hev. 12:22, 23.
2, 3. (a) Helie uveli woviluvo via Yehova? (b) Ocikele cipi Omõla a kuete kovaso a Isia?
2 Osimbu oviluvo viosi ka via lulikiwile, Suku haiko a kala ale vokuenda kuotembo ka yi tendiwa. Ociluvo catete eye a lulika ca kũlĩhiwile okuti “Ndaka,” momo wa kala Kapitiya ka Yehova. Ovina viosi via lulukiwa vonduko ya Ndaka. Noke eye weya palo posi ndomunu wa lipua kuenda wa kũlĩhiwile londuko ya Yesu Kristu.—Tanga Yoano 1:1-3, 14.
3 Nye Ovisonehua vi popia kovikele via Suku levi Viomõlaye uveli? Upostolo Paulu o tu sapuila ndoco: “Njongola okuti vu limbuka okuti utue wulume Kristu; utue wukãi ulume waye; utue wa Kristu Suku.” (1 Va Kor. 11:3) Kristu o pokola ku Isiaye. Oco pokati koviluvo viosi pa kale ombembua, te pa kala u o songola kuenda ava va pokola. Eli olio esunga lieci una ‘ovina viosi via tokekisua vokuaye,’ a pokuilavo ku Suku.—Va Kol. 1:16.
4, 5. Yesu o tenda ndati ocikele a kuete kovaso a Yehova?
4 Yesu wa liyeva ndati poku tava konumbi ya Yehova yoku iya palo posi? Ovisonehua viti: “Upi ongangu ku Kristu Yesu. Kali lutima ndowu eye a kala lawo. Momo Kristu Yesu, ndaño wa kaile nda Suku, haimo ka sandele ulamba woku lisokisa la Suku. Puãi wa lipesela eye muẽle, wa linga ndupika, wa citiwa lesetahãlo liomunu. Kuenje, omo a citiwa ndomunu, oco wa liketisa, kuenje wa pokola toke kokufa, ndaño okufa [kuti].”—Va Fil. 2:5-8.
5 Olonjanja viosi, Yesu wa tava oku linga ocipango ca Isiaye. Eye wa popia hati: “Si tẽla oku linga cimue lika liange. . . . Onimbu yange yesunga, momo si sandi oku linga ocipango cange, te ocipango cu wa numa.” (Yoa. 5:30) Eye wa popiavo hati: ‘Ndingainga ño-o ovina vi sanjuisa Isiange.’ (Yoa. 8:29) Koloneke viaye via sulako palo posi, Yesu wa likutilila ku Isiaye hati: “Nda ku muisa ulamba kilu lieve, momo nda malusula upange wa nyihile oku u linga.” (Yoa. 17:4) Ocili okuti, Yesu ka kuatele ocitangi coku limbuka loku tava oku songuiwa la Suku.
Oku Pokola Isia Kua Nenela Omõla Asumũlũho
6. Ovituwa vipi Yesu a lekisa?
6 Yesu eci a kala palo posi, wa lekisa ovituwa vialua vi komohisa. Cimue pokati kovituwa viaco, ocisola a kuatela Isiaye. Eye wa popia hati: “Ame sole Isia.” (Yoa. 14:31) Wa kuatelavo ocisola omanu. (Tanga Mateo 22:35-40.) Yesu wa lekisa ohenda locikembe komanu, kuenda ka va kelõhaile. Eye wa popia hati: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene, momo okanga yange ya sunguluka, locitele cange ca leluka.” (Mat. 11:28-30) Omanu vosi va soka ndolomeme, la vana va lemelelua lovitangi, va lembelekiwa calua lovituwa via Yesu kuenda esapulo liaye.
7, 8. Ndomo ca lekisiwa Vocihandeleko, nye ukãi wa kala oku pita osonde ka sesamẽlele oku linga, kuenda Yesu wo tata ndati?
7 Kũlĩhisa ndomo Yesu a enda oku tata akãi. Ovolandu a lekisa okuti alume valua va tata tata lãvi akãi. Eci oco asongui vetavo ko Isareli va lingaile. Puãi, Yesu wa lekisa esumbilo kakãi. Tu limbuka ocili caco, poku konomuisa ndomo eye a tata ukãi umue wa kala oku pita osonde ci soka 12 kanyamo. Eye “wa tala ohali” peka liolondotolo kuenda wa pesela ukuasi waye wosi koku sanda uhayele. Ndaño lalikolisilo aco, “haimo lohise lakamue, te oku vokiya.” Ocihandeleko ca lekisile okuti ukãi waco wa vĩhĩsilue. Kuenje, wosi u lamba o vĩhĩsiwavo.—Ovis. 15:19, 25.
8 Eci ukãi a yeva okuti Yesu o kasi oku sakula olombeyi, eye wa iñila pokati kowiñi yu wa popia lutima waye hati: “Ndaño ndamba ño kuwalo waye ñaya.” Eye wa lamba Yesu, kuenje, vonjanja yaco haico a kaya. Ndaño Yesu wa kũlĩhile okuti ka ca tavele ukãi waco oku lamba kuwalo waye, haimo, ko kelõhãilele. Pole, wa lekisa ohenda kokuaye. Eye wa limbuka ndomo ukãi a liyevele omo lioku pita anyamo alua luvei waco kuenda wa kũlĩhile okuti wa sukilile ekuatiso. Lohenda yalua Yesu wo sapuila hati: “Amõlange, ekolelo liove lia ku popela. Kuende lombembua. Uvei wove wa ku tunda.”—Mar. 5:25-34.
9. Eci olondonge via tutuiya omãla oku iya ku Yesu, eye wa tambulula ndati?
9 Omãla lavovo va enda oku lianja la Yesu. Onjanja yimue, eci omanu va fetika oku nena omãla vavo ku Yesu, olondonge viaye via va tateka, momo via simile okuti eye ka yonguile oku sakalaisua lomãla. Puãi, eci haicoko ca kala ocisimĩlo ca Yesu. Ovisonehua vi tu sapuila hati: “Eci Yesu a ci mola oco wa tema, kuenje wa popia [lolondonge] hati, Omãla veye ño kokuange, ko ka va tutuiyi, momo usoma wa Suku wava va linga ndava.” Noke “wa va angata, kuenje oku va kapa ovaka aye, wa va sumũlũisa.” Yesu ka kaile lika lomãla, wa va yolelavo lesanju.—Mar. 10:13-16.
10. Yesu weya oku kuata ndati ovituwa a lekisa?
10 Yesu weya oku kuata ndati ovituwa a lekisa vokuenda kuotembo a kala palo posi? Eci a kala kilu, wa mola ovituwa via Isiaye vokuenda kuotembo yalua. (Tanga Olosapo 8:22, 23, 30.) Eye wa mola ocisola Yehova a lekisa poku songuila oviluvo Viaye kuenje wa vi setukula. Nda Yesu ka kaile ukuepokolo, nda wa tẽla hẽ oku setukula ovina viaco? Eye wa sanjukilile oku pokola ku Isiaye, kuenda Yehova wa sanjukililevo Omõlaye. Yesu eci a kala palo posi, wa lekisa ciwa ovituwa via Isiaye wo kilu. Hesumũlũhokuolio tu kuete lioku pokola Kristu, una Suku a nõla oku kala Ombiali Yusoma wo kilu!
Setukuli Ovituwa Via Kristu
11. (a) Helie tu sukila oku setukula? (b) Momo lie alume vekongelo va sukilila oku setukula Yesu?
11 Akristão vosi, enene vali alume, va sukila oku likolisila oku setukula ovituwa via Kristu. Ndomo ca lekisiwa ale, Embimbiliya li popia hati: “Utue wulume Kristu.” Ndeci Kristu a setukula Utue waye, Suku yocili, alume Akristão va sukila oku setukula Kristu—utue wavo. Eci oco upostolo Paulu a linga, noke yoku linga Ukristão. Eye wa vetiya Akristão hati: “Lingi muele olosetukuli viange ndomo ame ndisetukuli ya Kristu.” (1 Va Kor. 11:1) Upostolo Petulu wa popia hati: “Momo oco wa kovongiwili. Kristu wo taleli ohali, kuenje wo sili ongangu yokuti vu kuama volomãi viaye.” (1 Pet. 2:21) Kuli vali esunga likuavo lieci alume va sukilila oku setukula Kristu. Momo ovo va nõliwa oku kala akulu vekongelo kuenda oloñuatisi viavo. Ndeci Yesu a sanjukilila oku setukula Yehova, alume Akristão va sangavo esanju poku setukula ovituwa via Kristu.
12, 13. Akulu vekongelo va sukila oku tata ndati olomeme via kundikiwa povaika avo?
12 Akulu vekongelo va kuete ocikundi coku setukula Kristu. Petulu wa eca kakulu vekongelo elungulo eli: “Lavi ocunda ca Suku co kundikilui, halocikukuiko, puãi momo vu kuete utima waco, hamekondako liocipululu conganyu, te lutima wombili ndeci Suku o yonguili, Haloku tulamelako ava va kundikiwa kokuene, te oku eca ongangu kocunda.” (1 Pet. 5:1-3) Akulu vekongelo te va yuvula oku tumĩla vakuavo kuenda oku vangula lukãlu. Pole, va setukula Kristu, poku likolisilako oku kala vakuacisola, ambombe kuenda va tata lohenda olomeme via kundikiwa povaka avo.
13 Omo vana va kuete ocikele coku songuila ekongelo ka va lipuile, va sukila oku limbuka okuti ka va tẽla oku linga ovina viosi. (Va Rom. 3:23) Ovo va sukila oku lilongisila ku Yesu kuenda oku setukula ocisola caye. Va sukilavo oku kũlĩhisa ndomo Suku la Kristu va tata omanu kuenda va likolisilako oku va setukula. Petulu o tu lungula hati: “Haico ene amalehe, pokoli kakulu. Vosi yene, okuliketisa ku linge uwalo wene, kuenje livumbi pokati, momo Suku o yaka la vakueyengu, puãi ava va liketisa o va linga ohenda.”—1 Pet. 5:5.
14. Akulu vekongelo va lekisa ndati esumbilo ku vakuavo?
14 Alume va nõliwa oku tata ocunda ca Suku te va lekisa ovituwa viwa. Elivulu lia va Roma 12:10 li popia hati: “Lisoli pokati ndomunu la manjaye. Koku sumbila, velisipo vakuẽle.” Akulu vekongelo loloñuatisi viavo va li sumbila pokati. Alume vaco va ‘yuvula ocipululu loku lipanda, va liketisa, kuenda va tenda vakuavo okuti va velapo, ovo va sule,’ ndeci Akristão vakuavo va lingainga. (Va Fil. 2:3) Vana va kuete ocikele coku songola, va sukila oku tenda vakuavo okuti va velapo. Poku ci linga alume vaco va kapako elungulo lia Paulu liokuti: “Etu tua pama, ca tu sesamela oku ambatisako ava va hongua okuleñela kuavo, haku lisokololako etu muẽle. Etu vosi omunu omunu a sokoluile ukuavo eci ciwa coku u kolisa. Momo Kristu ka lisokoluile eye muẽle.”—Va Rom. 15:1-3.
‘Sumbili Akãi Vene’
15. Alume va sukila oku tata ndati akãi vavo?
15 Kalieye tu konomuisi elungulo Petulu a eca kalume olohueli. Eye wa soneha hati: “Ene alume, kali lakãi vene lolondunge. Sumbili [akãi vene] ndocikuata ca leñela.” (1 Pet. 3:7) Oku sumbila omunu umue ci lomboloka okuti wo kapako calua. Kuenje o kapako ovisimĩlo, lolonjongole viaye kuenda o yuvula lika oku linga ovina viaco nda kuli cimue ci ku tateka. Eyi oyo onjila ulume a sukila oku kuama poku tata ukãi waye.
16. Embimbiliya lieca elungulo lipi kalume kondaka yoku sumbila akãi vavo?
16 Petulu poku sapuila alume oco va sumbile akãi vavo wamisako hati: “Nda ka vu ci lingi vu tatekiwa oku likutilila cocili.” (1 Pet. 3:7) Eci ci lekisa ciwa ndomo Yehova a tenda onjila ulume a kuama poku tata ukãi waye. Nda ulume ka sumbila ukãi waye, olohutililo viaye vi tatekiwa. Akãi ka va vetiyiwavo hẽ oku tambulula ciwa eci alume vavo va va lekisa esumbilo?
17. Toke petosi lipi alume va sukila oku sola akãi vavo?
17 Kondaka yoku sola akãi, Embimbiliya li tu lungula hati: “Ca sesamela alume oku sola akãi vavo ndatimba avo muẽle. . . . Lomue wa la suvuka etimba liaye muẽle, puãi o li tekula loku li lava ndeci Kristu o lava ekongelo liaye. . . . Ene vosi, omunu omunu a sole ukãi waye ndeci a lisole eye muẽle.” (Va Efe. 5:28, 29, 33) Alume va sola akãi vavo toke petosi lipi? Paulu wa soneha hati: “Soli akãi vene ndeci Kristu a sola ekongelo, kuenje wa li liecela.” (Va Efe. 5:25) Ulume te o sola ukãi waye toke petosi lioku u fila, ndeci Kristu a lingila vakuavo. Eci ulume Ukristão a tata ukãi waye locikembe, lesunguluko, lesumbilo, kuenda utate, ci ka leluka ukãi oku pokola kokuaye.
18. Ekuatiso lipi alume va kuete koku tata ovikele viavo vepata?
18 Anga ca tĩla hẽ calua kalume oku sumbila akãi vavo? Sio, momo Yehova ka va pingile ocina ka va tẽla oku linga. Handi vali, afendeli va Yehova va kuatisiwa longusu ya velapo vali, okuti espiritu lia Suku. Yesu wa popia hati: “Oco nda ene wa tuwi ale oku linga cĩvi, wa kũlĩhi oku eca oviali viwa komãla vene, Isiene ukuailu he, ka velipo oku avela espiritu sandu kuava vo pinga?” (Luka 11:13) Nda alume va pinga espiritu liaco volohutililo viavo, Yehova o ka va kuatisa oku tata ciwa vakuavo oku kongelamo akãi vavo.—Tanga Ovilinga 5:32.
19. Nye tu ka lilongisa kocipama ci kuaĩmo?
19 Ocili okuti, alume va kuete ocikele cinene coku lilongisa ndomo va pokola ku Kristu loku setukula oku songola kuaye. Oco hẽ, nye ci popiwa kakãi? Ocipama ci kuaĩmo ci ka lekisa ndomo akãi va sesamẽla oku tenda ocikele cavo veliangiliyo lia Yehova.
Ivaluka Eci Tua Lilongisa?
• Ovituwa vipi via Yesu tu sukila oku setukula?
• Akulu vekongelo va tata ndati olomeme?
• Ulume o tata ndati ukãi waye?
[Apulilo Elilongiso]
[Elitalatu kemẽla 10]
Setukuli Kristu poku sumbila vakuene