YU LOBI fu leisi sani fu Yesus?— * Son sma e fruwondru te den e kon sabi taki Yesus no skrifi nowan enkri pisi fu Bijbel. Ma toku, aiti Bijbel skrifiman e fruteri wi furu sani fu Yesus. Ala den skrifiman disi ben e libi na ini a ten fu Yesus, èn den e fruteri wi san a ben e leri sma. Yu man kari den nen fu den aiti skrifiman disi?— Den nen na Mateyus, Markus, Lukas, nanga Yohanes. Den tra fo skrifiman na Petrus, Yakobus, Yudas nanga Paulus. San yu sabi fu den skrifiman disi?—

Meki wi taki fosi fu den dri skrifiman di ben de sosrefi dri fu den 12 apostel fu Yesus. Yu sabi den nen?— Den ben nen Petrus, Yohanes, nanga Mateyus. Petrus skrifi tu brifi gi den Kresten brada nanga sisa fu en. A ben fruteri den fu den sani di Yesus ben taki èn du. Iya, a ben taki fu sani di ensrefi ben sabi. Suku 2 Petrus 1:16-18 na ini yu Bijbel, èn leisi drape san Petrus e fruteri di a yere Yehovah Gado taki komoto fu hemel nanga Yesus.—Mateyus 17:5.

Na apostel Yohanes skrifi feifi buku fu Bijbel. A ben sidon sei Yesus di den disipel ben e nyan makandra nanga den Masra fu a lasti leisi. Yohanes ben de makandra nanga Yesus tu di A dede (Yohanes 13:23-26; 19:26). Yohanes skrifi wán fu den fo Bijbel tori di e taki fu a libi fu Yesus. Sma e kari den tori disi den Evangelietori. Yohanes skrifi sosrefi na Openbaring di Yesus ben gi en, èn den dri brifi na ini Bijbel di abi a nen fu en (Openbaring 1:1). A di fu dri Bijbel skrifiman di tron wan apostel fu Yesus ben de Mateyus. Fosi, a man disi ben e teki belasting moni gi lanti.

Tu tra Bijbel skrifiman ben sabi Yesus na wan spesrutu fasi. Den ben de afu-brada fu Yesus di ben yongu moro en, èn den ben de pikin tu fu Yosef nanga Maria (Mateyus 13:55). Na a bigin, den no ben de disipel fu Yesus ete. Den ben e denki srefi taki Yesus ben law pikinso fu di a ben e preiki fayafaya (Markus 3:21). Suma ben de den brada disi?— Wan fu den ben de Yakobus. Na en skrifi a Bijbel buku di nen Yakobus. A tra brada ben de Yudas. En skrifi a Bijbel buku Yudas.—Yudas 1.

Tu tra Bijbel skrifiman di skrifi fu a libi fu Yesus, na Markus nanga Lukas. A mama fu Markus ben abi wan bigi oso na ini Yerusalem pe den fosi Kresten ben kon makandra, èn sosrefi na apostel Petrus (Tori fu den Apostel 12:11, 12). Wan tu yari na fesi, na tapu a neti di Yesus ben hori en lasti Paskafesa nanga den apostel fu en, dan soleki fa a sori Markus waka na den baka di den ben go na ini a dyari fu Getseimanei. Di sma grabu Yesus, dan srudati grabu Markus tu, ma a libi a krosi fu en na baka èn a lon gowe.—Markus 14:51, 52.

Lukas ben de wan datra di ben kisi bun skoroleri, èn soleki fa a sori, dan a tron wan disipel baka di Yesus dede. A ondrosuku a libi fu Yesus finifini, èn a skrifi krin fa sani waka na ini a libi fu Yesus. Baka  ten, Lukas ben e teki waka makandra nanga na apostel Paulus, èn a skrifi sosrefi a Bijbel buku Tori fu den Apostel.—Lukas 1:1-3; Tori fu den Apostel 1:1.

Paulus na a di fu aiti Bijbel skrifiman di skrifi fu a libi fu Yesus. A ben kisi leri fu Gamalièl, wan lespeki leriman fu Wet. Paulus, di sma ben kari Saulus, ben kweki na ini a bribi fu den Fariseiman èn a kisi leri fu den. Dati meki a no ben lobi den disipel fu Yesus kwetikweti, èn a yepi sma fu kiri den (Tori fu den Apostel 7:58–8:3; 22:1-5; 26:4, 5). Yu sabi fa Paulus kon sabi den tru tori fu Yesus?—

We, Paulus ben de na pasi fu go na Damaskus fu grabu den disipel fu Yesus drape. Ne wantronso wan faya koti fu hemel èn a breni en. A yere wan sten aksi en: „Saulus, Saulus, fu san ede yu e frufolgu mi?” Na Yesus ben e taki nanga en! A taigi Paulus fu go na Damaskus. Dan Yesus seni Ananias, wan disipel fu en, fu go taki nanga Paulus, èn baka dati Paulus tron wan disipel fu Yesus (Tori fu den Apostel 9:1-18). Paulus skrifi 14 buku fu Bijbel, bigin fu Romesma te go miti Hebrewsma.

Yu bigin leisi den Bijbel buku di e taki fu Yesus, noso yu e meki wan sma leisi den gi yu?— Wan fu den moro bun sani di yu kan du na ini yu libi aladi yu yongu ete, na fu bigin leri now san Bijbel e taki fu Yesus.