?I Minim Wanem Blong Save Gud God Mo Nem Blong Hem?

?NEM blong yu i gat mining blong hem? Long sam ples long wol, ol man oli gat kastom ya blong putum nem long wan pikinini, we nem ya i minim wan tok long lanwis blong olgeta. Maet papa mama i jusum wan nem folem bilif blong tufala mo ol fasin we tufala i tinghae long olgeta. Maet nem ya i minim samting we tufala i wantem long saed blong fiuja blong pikinini ya.

Ol man oli folem kastom ya longtaem finis i kam. Long Baebol, ol man oli putum nem long wan man from we mining blong nem ya i stret long man ya. Maet oli putum nem long wan man folem spesel wok we man ya bambae i mekem long laef blong hem. Jeova i mekem olsem long Solomon. Taem hem i toktok wetem Deved we i Papa blong Solomon, hem i tokbaot wok we Solomon bambae i mekem biaen. Mo hem i talem long Deved se: ‘Bambae yu putum nem blong hem se Solomon, we i min se “I stap gud long pis.” Bambae i gat pis, from we mi bambae mi mekem we hem i gat pis wetem ol enemi blong hem, mo mi bambae mi givim pis long kantri ya, mi mekem ol man blong hem oli stap gud, oli sef.’—1 Kronikel 22:9.

Samtaem Jeova i putum wan niufala nem long wan man we i kasem wan niu wok. Hem i putum nem ya Sera long woman blong Ebraham, we i minim “Gel blong King.” ?From wanem Jeova i putum nem ya long hem? Jeova i talem se: “Mi bambae mi blesem hem, mi mekem we hem bambae i bonem wan pikinini boe blong yu. Mo from we mi mi blesem hem, bambae mi mi mekem hem i kam stamba blong ol man blong plante ples. Mo long olgeta ya, bambae i gat ol king tu oli stap.” (Jenesis 17:16) I klia se taem yumi kasem save from wanem Jeova i putum nem ya long hem, bambae yumi kasem save tu, wanem ol niufala samting we God bambae i yusum hem blong mekem.

?Olsem wanem long nem ya Jeova? Nem ya i impoten moa long olgeta narafala nem. ?Wanem mining blong nem ya? Taem Moses i askem kwestin long God long saed blong nem blong Hem, God i ansa long hem se: “Mi Stap We Mi Stap.” (Eksodas 3:14) Baebol blong Rotherham i tanem vas ya se: “Bambae mi jenis i kam olsem samting we mi wantem.” Nem ya Jeova i soemaot se God i mekem plante plante wok. Blong kasem save long saed ya, tingbaot wan mama. Long wan dei nomo, wan mama i save mekem plante defren wok blong lukaot gud long pikinini blong hem. Maet hem i mekem wok olsem wan nes, wan woman blong kukum kakae, mo wan tija, i dipen nomo long nid blong pikinini. Jeova i mekem sem samting be long wan fasin we i bigwan moa. Jeova i save kam eni samting we hem i wantem mo i save mekem eni wok we hem i nidim, blong mekem stamba tingting blong hem i kamtru. Taswe man we i save gud God mo nem blong hem, hem i luksave ol wok we Jeova i mekem mo i leftemap Hem from.

Be sore tumas, plante man oli no save nem blong God. Mo from samting ya, oli no luksave ol nambawan fasin blong hem. Be sipos yu stadi Baebol bambae yu luksave ol wok we Jeova i mekem olsem nambawan God blong givim advaes, strongfala God ya we i sevem man, mo hem i God we i givim plante samting long gladhat blong hem. Mo hem i mekem plante narafala wok bakegen. Yes, mining blong nem blong Jeova i gat bigfala paoa long yumi, i mekem se yumi wantem ona long hem.

Samtaem i no isi blong save nem blong God. Nekis haf bambae i eksplenem from wanem i olsem.