Met A Kapachelong lon Ach Silei Iten Kot

MEI wor weween itom? Eörenien ekkoch fönü ra kan eita ngeni nöür eü it mei wor watteen weween. Ewe it ekkewe sam me in ra fili a tongeni pwäralo ar lükü, met ra aücheani, are ar äneän me äpilükülük fän iten nöür kewe lon mwachkkan.

Ei eöreni a minen loom. Lon Paipel, aramas ra kan eita ngeni emön eü it pokiten weween. Ekkewe it ra tongeni pwäratä met emön epwe föri are napanapeni lon mwachkkan. Äwewe chök, lupwen Jiowa a ereni Tafit usun wisen Salomon we lon fansoun epwe feito, a erä: “Epwe iteni Salomon [weween “Kinamwe”], nge ngang üpwe awora kinamwe me mosonoson lon Israel lon fansoun an nemenem.”​—1 Kronika 22:9.

Fän ekkoch, Jiowa a eita ngeni emön eü mineföön it pun epwe eäni eü mineföön wis. Pwülüwen Eperiam we mi rit a iteni eü mineföön it Sara, weween “Princess.” Pwata? Jiowa a äweweei: “Üpwe afeiöchü Sara, nge üpwe ngonuk eman ät me ren. Ewer, üpwe afeiöchü pwe epwe inelapen chomong ainang, epwe pwal wor king me lein mwirimwirin kana.” (Keneses 17:16) Ach weweiti wisen Sara we na a älisikich le weweiti ewe popun a iteni ewe mineföön it.

Nge ifa usun ewe it Jiowa, ewe mi lamot seni meinisin? Met weween itan na? Lupwen Moses a eisini Kot usun Itan, Jiowa a pölüweni: “Ngang upwe wiliti met ua pwisin filatä.” (Ekistos 3:14, NW) Rotherham a wisen afföüni eü Paipel, iwe, a erä: “Upwe Wiliti minne chök ua tipeni.” Iten Jiowa we a pwäralo pwe a wiseni chommong wis. Äwewe chök, lon chök eü rän, emön inelap a tongeni wiseni wisen kangof, kuk, sense, are met chök a lamot fän iten osupwangen nöün kewe. A pwal ina usun ren Jiowa. A tongeni wiliti minne chök a lamot fän iten an epwe apwönüetä met a fen aotalo fän iten aramas. Ach weweiti me aücheani wisen Jiowa kewe a älisikich le silei Jiowa ren itan.

Nge solapan pwe mürinnöön napanapen Kot kewe ra monolo seni chokkewe rese silei itan. Iwe nge, ren om käkkäeö ewe Paipel, ka tongeni aücheani wisen Jiowa kewe, äwewe chök ren Sou Fön, Chon Amanau mi manaman, me Sou Awora mi fangafangöch. A ifa me amwararen weween iten Jiowa.

Iwe nge, ese mecheres ach sipwe silei Kot ren itan. Ewe pworaus mwirin ei epwe äweweei ika pwata.