NA LEINA la gago le na le seo le se bolelago? Dikarolong tše dingwe tša lefase, go tlwaelegile go rea ngwana leina leo le nago le seo le se bolelago. Leina leo le kgethwago le ka bontšha ditumelo tša batswadi le seo ba se tšeelago godimo goba dikholofelo le ditoro tša bona bakeng sa bokamoso bja ngwana.

Motlwae wa go rea maina ao a nago le seo a se bolelago ga se o mofsa. Mehleng ya Beibele, maina a be a rewa ka baka la seo a bego a se bolela. Maina a be a ka hlalosa seo motho a bego a letetšwe gore a se phethe bophelong. Ka mohlala, ge Jehofa a be a botša Dafida ka bokamoso bja morwa wa gagwe Salomo goba Solomone, O ile a re: “Leina la xaxwe e tlo ba Salomo (Rakhutšô), xobane mehleng ya xaxwe ke tlo ba ke neile Isiraele khutšô le leaxô.”—1 Koronika 22:9.

Ka dinako tše dingwe Jehofa o be a rea motho yo a bego a newa boikarabelo leina le lefsa. Mosadi wa moopa wa Aborahama o ile a newa leina la Sara, leo le bolelago “Kgošigatšana.” Ka baka la’ng? Jehofa o ile a hlalosa gore: “Ke tlo mo šexofatša; le ka yêna ke tlo Xo nea morwa; ke tlo mo šexofatša a ba mma-xo-dithšaba; xo yêna xo tlo tšwa maxoši a dithšaba.” (Genesi 17:16) Go ba gona, go kwešiša gore ke ka baka la eng Sara a ile a rewa leina le lefsa go be go tla akaretša go kwešiša karolo ya gagwe e mpsha.

Go thwe’ng ka leina le bohlokwa go maina ka moka—Jehofa? Le ra go re’ng? Ge Moše a be a botšiša Modimo mabapi le leina la Gagwe, Jehofa o ile a araba ka gore: “Ke tla ipontšha ke le yo ke tlago go ipontšha ke le yena.” (Ekisodo 3:14, NW) Phetolelo ya Rotherham e fetoletše temana ye ka gore: “Ke Tla Ba se sengwe le se sengwe seo ke nyakago go ba sona.” Leina la Jehofa le utolla gore ke Modimo yo a phethago mediro e fapa-fapanego. Re diriša seswantšho se sekopana: Mma a ka swanelwa ke go phetha mediro e mentši letšatši le lengwe le le lengwe go hlokomela bana ba gagwe—e le mooki, moapei le morutiši—go ithekgile ka maemo. Go bjalo le ka Jehofa, eupša maemong a phagamego kudu. E le gore a phethe morero wa gagwe bakeng sa batho, a ka ba selo se sengwe le se sengwe seo a nyakago go ba sona, a phetha modiro o mongwe le o mongwe o nyakegago. Ka gona, go tseba Jehofa ka leina go akaretša go kwešiša le go leboga mediro ya gagwe e mentši.

Ka manyami, bobotse bja dika tša Jehofa bo utegile go bao ba sa mo tsebego ka leina. Lega go le bjalo, ka go ithuta Beibele o ka leboga mediro ya Jehofa e bjalo ka Moeletši yo bohlale, Mophološi yo matla le Monei yo a nago le letsogo le le bulegilego, ge re bala feela e mmalwa. Ka kgonthe, seo se bolelwago ke leina la Jehofa ruri se dira gore re mmoife.

Lega go le bjalo, go tseba Modimo ka leina ga se ka mehla go lego bonolo. Sehlogo se se latelago se tla bontšha lebaka.