Anto Ni Nakaukolan Pian Nakabkabat Moy Dios?

WALA ta’y labay ya ibaga na ngaran mo? Diad arum a bansa, kustombre na totoo ya ikdan so ugaw na makabkabaliksan a ngaran. Diad satan a ngaran et napatnagan no antoy sisisiaen na atateng, no antoy importante’d sikara, odino no antoy labay dan pansumpalan na anak da.

Dati la ’yan kustombre. Diad bansan Israel nensaman, say ingangaran ed ugaw et base ed kabaliksan na samay ngaran. Nayarin napatnagan ed ngaran na sakey ya ugaw no antoy magmaliw a papel to ed bilay. Singa bilang, oniay inkuan nen Jehova ed si David nipaakar ed magmaliw a papel na anak ton si Solomon: “Say ngaran to sikato naani Solomon [ya inala’d salita a mankabaliksay “Kareenan”], tan iter ko so kapaknaan tan kareenan ed Israel dia ed saray agew to.”​—1 Awaran 22:9.

Walaray totoon sinalatan nen Jehova so ngaran da lapud walay balon papel da ed bilay. Singa bilang, say asawa nen Abraham ya agmakaanak et nginaranan Toy Sara, a mankabaliksay “Prinsesa.” Akin? Oniay imbaga nen Jehova ed si Abraham: “Bendisyonan ko tan makaanak ka’d sikato na sakey a laki. Bendisyonan ko, et magmaliw ya ina na saray bansa, tan walaray magmaliw ya arari ed saray kabiangay boleg to.” (Genesis 17:16, Maung a Balita) Kanian, pian natalosan tayo no akin ya inikdan nen Jehova na balon ngaran si Sara, kaukolan tayon talosan no anto so balon betang to.

Antoy kabaliksan balet na samay sankaimportantian ed amin a ngaran, say ngaran a Jehova? Sanen tinepetan nen Moises so Dios nipaakar ed ngaran To, oniay inyebat nen Jehova: “Siak so Siak.” (Exodo 3:14) Diad dakel a bersion na Biblia et ontan so impangipatalos ed sayan bersikulo. Diad samay Biblian impatalos nen Rotherham et oniay impangipatalos ed satan: “Magmaliw ak ya antokaman a labay kon pagmaliwan.” On, napatnagan ed ngaran nen Jehova a dakel so betang odino papel to. Nia ay so alimbawa to ’tan: Pian niiter na ina so pankaukolan na ananak to ed inagew-agew, dakel so betang to, alimbawa bilang manag-asikaso, managluto, odino managbangat, depende ed pankaukolan. Ontan met nen Jehova, ’atan labat ta nagkalalon importante iray betang to. Pian nasumpal toy maaron gagala to parad totoo, sarag toy magmaliw ya antokaman a labay ton pagmaliwan, a gawaen toy anggan anton betang. Kanian, nibagan kabkabat tayoy Jehova no natatalosan, rerespetoen, tan papablien tayoy dakel a betang a gagawaen to.

Makapaermen ta say alay-abig a personalidad na Dios et ag-amta na saramay agda kabat a maong so Dios. Balet no aralen moy Biblia, ditan mo naapresya so betang nen Jehova bilang marundunong a Mananimbawa, makapanyarin Manangilaban, tan maiter a Manangitarya na pankaukolan tayo, tan say arum ni ran betang to. On, talagan makapadinayew so marakdakep a kabaliksan na ngaran nen Jehova.

Anggaman ontan, say pakapikabat a maong ed Dios et aliwan mainomay parad arum. Nabasa ed onsublay ya artikulo so rason.