Dahme Esehla Mwaren Koht Kin Pidada?

MIE wehwehn edomwen? Nan ekei wasa, e kin wia tiahk ehu en kihong seri men ahd ehu me mie wehwe. Ahdo kin kak kasalehda dahme pahpa oh nohno kin kamehlele oh kesempwalki de dahme ira kin koapworopworki me neira serio pahn wiahla ehu rahn.

Doadoahngki ahd kan me mie wehwe ong seri kan kaidehn mehkot kapw. Ni ahnsou me Paipel ntingdi, eden aramas kin kalapw mie wehwe. Ahd kan kak kasalehda dahme aramas men pahn anahne wia nan eh mour. Karasepe, ni en Siohwa eh mahsanihong Depit duwen pwukoa en nah pwutak Solomon, e mahsanih: “E pahn mwarenki Solomon [ahd wet kohsang lepin lokaia “Popohl”], pwehki erein eh mwehi I pahn mweidohng Israel en popohl oh meleilei.”—1 Kronikel 22:9.

Ekei pak, Siohwa kin ketikihong emen ehu ahd kapw pwehki e pahn ahneki pwukoa kapw ehu. En Eipraam pwoud me depwen adanekihla Sara me wehwehki “Nein nanmwarki serepein.” Dahme kahrehda? Siohwa mahsanih: “I pahn kapaiahda oh e pahn wiahla inen wehi tohto, oh sang rehn kadaudoke kan nanmwarki kei pahn pwarada.” (Senesis 17:16) E sansal me kahrepen Sara eh alehdi ahd kapw wet kin pid eh pahn anahne wehwehki eh pwukoa kapwo.

Ahpw ia duwen mwaro me keieu kesempwal me iei Siohwa? Ia wehwehn met? Ni en Moses idek rehn Koht duwen mwareo, Siohwa mahsanih: “Ngehi iei uhdahn ngehi.” (Eksodus 3:14) Nan ehu kawehwehn Paipel me adaneki Rotherham, e kawehwe nin duwen met: “I Pahn wiahla soahng sohte lipilipil nin duwen kupwurei.” Mwaren Siohwa kin kasalehda me e kak ketin wia soahng tohto. Pwehn karasahda ni mengei: Nohno men ele kin anahne wia soahng tohto nan ehuehu rahn pwehn apwalih nah seri kan. Soahng kan me duwehte nurse, sounkuk de sounpadahk men ong anahn en nah seri kan me pwarada. E pil duwehte Siohwa, ihte Siohwa kak ketin wia laudsang met. Pwehn kak kapwaiada kupwure ong aramas akan koaros, e kak ketin wiahla soahng sohte lipilipil. En esehla mwaren Siohwa kin pid atail wehwehkihla, wauneki oh kalahnganki sapwellime pwukoa tohto kan.

E me kansensuwed pwe lingan en sapwellimen Koht irair kan sohte kin sansal ong irail kan me sohte ese mwareo. Ahpw ni omw pahn onopki Paipel, ke kak wehwehkihla oh kalahnganki sapwellimen Koht pwukoa kan me duwehte Sounkaweid erpit, Sounkomour manaman, oh Sounketikihda me kadek oh pil sapwellime pwukoa teikan. Wehwe kesempwal wet en mwaren Siohwa uhdahn kin kamwakid kitail.

Ahpw, en esehla laud duwen Koht sohte kin kalapw wia mehkot mengei. Iren mwuri pahn kasalehda dahme kahrehda.