¿Tuku wamputun nalakgapasaw xtukuwani Dios?

KMAKGAPITSI kachikinin, xkamanan latamanin wilinikgo akgtum tukuwani nema wi tuku wamputun. Tukuwani nema kalaksaknikan limasiya tuku kanajlakgo chu tuku kamasiyanikanit o tuku lakaskinkgo pi natlawakgo kamanan akxni nastakkgo.

Pero uma talismanin ni xasasti. Makgasa akxni xtsokgmaka Biblia nachuna xtlawakgo latamanin. Xmin kilhtamaku, tukuwani nema xkawilinikan xlimasiya tuku xʼama tlawakgo kilhtamaku nema xmima. Kalichuwinaw xlakata Salomón. Xtukuwani xwamputun «takaksni», xlimasiya tuku xʼama tlawa. Jehová wanilh David: «Salomón nawanikan chu naʼanan takaksni chu ni katianalh taʼakglhuwit kʼIsrael akxni namapakgsinan» (1 Crónicas 22:9).

Xmin kilhtamaku, Jehová wi tiku xlakgpalini xtukuwani xlakata atanu taskujut xʼama maxki. Chuna lakgpalinilh xtukuwani xpuskat Abrahán tiku nila xkgalhi kamanan, limapakuwilh Sara chu xtukuwani wamputun «Princesa». ¿Tuku xlakata wilinilh uma tukuwani? Chuna la wan Génesis 17:16 Jehová wanilh Abrahán: «Naksikulunatlawa chu nakmaxki chatum skgata; chu xlikana naksikulunatlawa chu xkamanan laklanka kachikin nawankgo; xkamanan mapakgsinanin nawankgo». Xlakata xkatsika tuku xʼama litaxtu Sara; pulana xlikatsitkan xwanit tuku xwamputun xasasti xtukuwani.

Chu la uku kalichuwinaw tukuwani nema tlakg xlakaskinka: Jehová. ¿Wi tuku wamputun? Akxni Moisés kgalhskilh xtukuwani Dios xla wa: «Akit nakwan tuku akit nakwamputun» (Éxodo 3:14). Akxni kinkawaniyan tuku wamputun xtukuwani, Dios kinkawaniyan pi pulaklhuwa tuku tlan nalitaxtu. Xlakata tlakg naʼakgateksaw o namakgachakgxiya kawiliw xaliʼakxilhtit: ¿la pulaklit taskujut tlan tlawa chatum tse akgtum kilhtamaku? Lata tuku namaklakaskinkgo xkamanan, tlan makuchina nalitaxtu, tiku tlawa liwat o makgalhtawakgana chu atanu. Nachuna Jehová nalitaxtu tuku xla nalitaxtuputun. Pero Jehová tlan nalitaxtu chuna la natalakaskin xlakata natlawa tuku xla lakpuwanit. Chuna, katsinikan xtukuwani Dios wamputun pi naʼakgatekgsaw chu xlakaskinka naʼakxilhaw pulaklhuwa tuku Jehová litaxtu, xlakata namakgantaxti tuku lu tlan lakpuwanit natlawa xpalakata latamanin.

Lu nitlan, wantiku ni lakgapaskgo tuku kilhchani xtukuwani Dios na nila lakgapaskgo xalakwan xtayat. Pero xlakata Biblia chuna wan, katsiyaw pi xla xaskgalala Stakyawana, tliwakga Lakgmaxtuna chu chatum Tlat tiku lhuwa tuku masta, uma kaj makgapitsi tuku litaxtu Jehová. ¿Ni xlikana pi kaks kinkamalakawaniyan akxni katsiyaw putum tuku wamputun xtukuwani Dios?

Maski chuna ni putum latamanin lakaskinkgo pi nalakgapasaw xtukuwani Dios. Kaʼakxilhwi tuku xlakata.

[Epígrafe xla página 4]

Santuario del Libro, foto © The Israel Museum (Jerusalén)