Xoossaa Sunttaa Eriyoogee Ay Ay Gujjii?

NE SUNTTAU birshshetti deˈii? Alamiyan issi issi heeran naata daro birshshettay deˈiyo sunttaa sunttiyoogee meeze gididaba. Sunttiyo sunttay yelidaageeti ammaniyoobaanne xoqqu oottidi xeelliyoobaa woykko naˈau eti amottiyoobaanne hidootiyoobaa qonccissana danddayees.

Daro birshshettay deˈiyo sunttaa sunttiyoogee oorattaba gidenna. Beni wode, darotoo issi ura sunttiyoy he sunttaa birshshettaa gishshataassa. Issi uri ba deˈuwan oottanaadan koyettiyaabaa sunttay malaatana danddayees. Leemisuwau, Yihooway Daawitassi a naˈaa Solomoni sinttappe oottanabaa yootido wode, “A sunttai Solomona [“Sarotettaa” giya qaalaappe yiidaagaa]; taani i kawotido laittan Israa7⁠eela asaayyo sarotettaanne woppaa immana” yaagiis.—1 Odi. 22:9.

Issi issitoo Yihooway ooratta aawatettaa immiyo urau ooratta sunttaa sunttiis. Abrahaama machiyaa mayniyaa Saaro geetettaasu; hegee “Kawo biyyiyo” giyoogaa. Aybissi hegaadan geetettadee? Yihooway, “Taani o anjjana; taani ippe neeyyo attuma na7a tumu immana. O taani anjjana; a kawotettatuyyo aayo gidana; asaa kawoti ippe yaana” yaagiis. (Doo. 17:16) Saariyyo ooratta sunttaa sunttidoy aybissakko akeekiyoogee iyyo imettida ooratta maataa akeekiyoogaa gujjiyoogee qoncce.

Ubbaappe aadhidi koshshiya Yihoowa giya sunttaa xeelliyaagan shin? Hegau birshshettay aybee? Muusee a sunttaabaa Xoossaa oychido wode, Yihooway, “Taani tanattennee” yaagidi zaariis. (Kes. 3:14) Geeshsha Maxaafaa daro birshshettati Yihooway giidoogaa hegaadan birshshidosona. SHin Roterhams birshshettay, “Taani koyiyo ubbabaa hanana” yaagidi birshshiis. Hegaa leemisuwan qonccissanau: Issi aayyiyaa hanotaadan, naata naagiyaaro, qumaa kattiyaaro, tamaarissiyaaro gidada galla galla ba naatussi koshshiya darobaa oottiyoogee koshshana danddayees. Hegaappe keehi aadhiya hanotaana gidikkokka, Yihoowa xeelliyaagankka hegaara issi mala. Asaa naatuyyo deˈiya ba siiqo halchuwaa polanau, Yihooway oottana koshshiya ubbabaa oottiyoogan, ba koyiyo ubbabaa hanana danddayees. Yaatiyo gishshau, Yihoowa a sunttan eriyoogee i oottiyo darobaa akeekiyoogaa, bonchiyoogaanne hegau galatiyoogaa gujjees.

Xoossaa a sunttan erennaageetuyyo a loˈˈo eeshshay geemmidoogee azzanttiyaaba. Gidikkokka, Geeshsha Maxaafaa xannaˈiyoogan, Yihooway aadhida eratettan Zoriyaagaa, Ashshiyaagaa Wolqqaamaa, palahissidi Immiyaagaa gididi oottiyoobaa akeekana danddayaasa; hageeti i oottiyoobatuppe amaridaageeta. Yihoowa sunttau deˈiya daro birshshettay keehippe maalaalissees.

Gidikkokka, Xoossaa a sunttan eriyoogee ubbatoo metennaba gidenna. Hegaadan hanidoy aybissakko kaalliya huuphe yohuwan beˈana.