D sẽn tõe n sõng d zoa sẽn bẽed to-to

YÃMB zoe n zĩnda ne y zoa sẽn bẽed n pa mi y sẽn na n gom ne-a to-to bɩ? Bãng-y tɩ y tõe n tõoga yel-kãngã. Wãn to? Rẽ wɛɛngẽ, noy takɩ ka be ye. Yãmb babgẽ wã neb sẽn minim n maand bũmb ninsã kẽeda sʋka. Nebã me manesem yaa toor-toore. Woto kɩtame tɩ bũmb sẽn noom bãad ning tõeeme n pa noom bãad a to ye. Sẽn paase, a soabã yɛl ne a tagsg sẽn yaa to-to rũndã wã tõe n toeema beoogo.

Woto yĩnga, bũmb ning y sẽn tõe n maan tɩ sõng n yɩɩd yaa y sẽn na n modg n ning y meng a soabã zĩigẽ, n bao n bãng bũmb nins a sẽn sɩd ratã, la bũmb nins sẽn yaa tɩlae tɩ y maan n kõ-a wã. Wãn to la y tõe n maan dẽ? Ad sagls a wãn sẽn yit Biiblã pʋgẽ n tõe n sõng-yã.

D kelg a soabã neere

BIIBLÃ SẼN YETE:

“Bɩ ned kam fãa wɩng ne kelgre, la a maag ne goama.”—ZAK 1:19.

“Sĩndg wakat beeme, la goam wakat me beeme.”—KOƐƐG SOABA 3:1, 7.

▪ Yãmb sã n wa kẽng n na n tɩ ges y zoa sẽn bẽede, kelg-y-yã-a neere, n wilg tɩ y nong-a lame. Ra yɩ-y yãg-yãg n sagl-a, wall y tags tɩ wakat fãa, yaa tɩlae tɩ y wilg-a a sẽn segd n maaneg ye. Yãmb sã n yãg n gome, y tõe n wa yeela bũmb sẽn tõe n sãam a sũur n pa bãng ye. Tõe tɩ y zoa wã pa gũud tɩ y leokd a sogsgã fãa ye. A rata ned sẽn na n sak n kelg-a sõma bala.

Basd-y y zoa wã t’a togsd a tagsgo. Ra kʋʋgd-y a goamã, wall y togsd-a goam nins nebã fãa la bal sẽn nong n yet neb nins sẽn ka laafɩ wã n yɩlemdẽ ye. Rao a ye yʋʋr sẽn boond t’a Emílio * yeela woto: “Minizit n yõk maam n kɩt tɩ m lebg zoanga. Wakat ninga, m sũurã mi n sãama hal wʋsgo, la m zo-rãmbã kẽer wat n  belsda maam n yetẽ: ‘Pa foom f yembr n tar zu-loees ye. Kẽer meng zu-loees yɩɩda fo rẽndã.’ La b ra pa mi tɩ woto pa sõngd maam baa bilfu, bala kɩtdame tɩ m tagsdẽ tɩ b getame tɩ m yellã pa kɛgeng ye. Pʋd n komsda m raoodo.”

Ra maan-y bũmb baa a ye sẽn na n kɩt tɩ y zoa wã wa yɛɛsdẽ n pa rat n togs a tagsgo, a sẽn zoet y na wa n wɩd-a yĩng ye. A sã n yeel yãmb t’a bãagã kẽesd-a-la rabeem, bɩ y sak n deeg t’a bee bʋʋm, la y ra yeel-a bal t’a ra zoe rabeem ye. A Eliana sẽn tar kãnsɛɛrã yeela woto: “Mam sã n wa tags m bãagã yell tɩ m sũurã sãam tɩ m yãbda, pa rat n yeel tɩ m pa le kɩs sɩd ne Wẽnnaam ye.” Modg-y n ges-y y zoa wã wala a sẽn yaa to-to wã, la y ra bao t’a yɩ wa yãmb sẽn datã ye. Tẽeg-y tɩ y goamã wall y sẽn maand bũmb ningã tõe n sãama a sũurã nana-nana n yɩɩd pĩndã. Yɩ-y sũ-mar soaba. Baa a sã n gomd bõn-yɛng yell n yɩlemdẽ, bɩ y kelg-a. (1 Rĩm dãmba 19:9, 10, 13, 14) Tõe t’a ratame bal tɩ y bãng a bãagã sẽn namsd-a to-to wã.

D yɩ wʋmdb la d wilg tɩ d waoogda a soabã

BIIBLÃ SẼN YETE:

“Bɩ y maan sũ-noog ne neb nins sẽn maand sũ-noogã, la y yãb ne neb nins sẽn yãbdã.”—ROM DÃMBA 12:15.

“Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.”—MATƖE 7:12.

▪ Mi n ningd-y y meng y zoa wã zĩigẽ. A sã n segd n maana woperasɩõ, a sã n vend tɩto, pa rẽ bɩ a maana ɛgzame n gũud tɩ b wa togs-a a bãagã sẽn yaa to-to, a yamã tõeeme n pa gõe bãane, tɩ kɩt tɩ bũmb bilf tõe n sãam a sũuri. Modg-y n ning-y woto y yamẽ, n gũusd n get a sũurã sã n noomẽ wall pa noomẽ, la y maandẽ tɩ zemsd ne rẽ. Pa wakat kãng la y segd n sogsd-a sogsg wʋsgo, sẽn yɩɩd fãa n dat n bãng yɛl sẽn pak yẽ bal ye.

A Ana Katalifós sẽn yaa logtorã yeela woto: “Basd-y bãad rãmbã tɩ b yãkd yam b toor n gomd b bãasã yelle, b sẽn wat n dat wakat ningã, la baa b sã n gomda maas-maasga. B sã n wa rat n sõse, baa sẽn yaa bũmb ning yell la b gomd bɩ y sõs ne-ba. La b yamã sã n pa be goam wakate, yãmb me segd n sĩndame. Wakat ninga, y sã n gãd bãadã nug bala, tõe n kenga a raood wʋsgo. Sasa ning me, tõe tɩ yaa ned sẽn na n be a sɛɛgẽ n belsd-a bal la a rata.”

Gũus-y n da kẽed y zoa wã vɩɩmã yɛl pʋgẽ ye. Seb-gʋlsd a Rosanne Kalick kãnsɛɛr sẽn yõk naoor a yiib t’a põsã yeela woto: “Y sã n dat tɩ ned sẽn bẽed sõng-y tɩ y bãng y sẽn segd n sõng-a to-to, bɩ y tẽeg t’a sẽn yet yãmb bũmb ningã segd n paa yãmb y yiibã sʋka. Sã n pa b kosa yãmb tɩ y gom zakã fãa yʋʋr yĩnga, y pa segd n togs ned ye. Sok-y bãadã n bãng kibar ning a sẽn dat tɩ y togs nebã.” A Edson sẽn paam kãnsɛɛr n põsã yeela woto: “Mam zoa a ye saag n togsa nebã tɩ mam tara kãnsɛɛre, la tɩ m pa na n vɩɩmd n kaoos ye. Sasa kãng tɩ mam da maana woperasɩõ paalem. Mam da miime tɩ m tara kãnsɛɛre, la m da maana ɛgzame n gũudẽ tɩ b wa togs maam sẽn yaa to-to. Logtorã wa n yeelame tɩ kãnsɛɛrã pa long zĩis a taab ye. La rẽ tɩ kibarã paam yelgame. Nebã sẽn da gomd goam ninsã, la b sokd sogsg ninsã sãama m pagã sũur wʋsgo.”

Yãmb zoa wã sã n segd n yãk tɩbsg ning a sẽn na n sake, bɩ y ra yɩ tao-tao n togs-a bũmb ning y sẽn da na n maane, sã n da yaa yãmb n da segd n yãk tɩbsgã ye. Seb-gʋlsd a Lori Hope kãnsɛɛr sẽn yõk t’a põsã yeela woto: “Nand tɩ yãmb tool ned sẽn bẽed kãnsɛɛr bɩ ned kãnsɛɛr sẽn yõk t’a põs sebr bɩ kibare, sok-y y meng n ges a soabã sã n sɩd rata kiba-kãense. Sã n pa rẽ, baa yãmb sẽn dat a neerã, y tõe n sãama a sũur n pa bãng ye.” Pa nebã fãa n dat tɩ b toond-b kibay wʋsg sẽn gomd tɩbsg buud toor-toor yell ye.

Yãmb sã n tɩ ges y zoa sẽn bẽede, bɩ y ra pa be n kaoos tɩ loog noor ye. Yãmb sẽn kẽngã nafd-a-la wʋsgo, la tõe tɩ sõsg yamleoog ka y zoa wã ye. Tõe t’a yaame, pa rẽ bɩ a pa tar pãng wʋsg n na n gom ne yãmb wall a kelg-y n kaoos ye. La y segd n gũusame tɩ ra yɩ wa y yãgdame n na n loog ye. Segdame tɩ y zoa wã yã tɩ y tagsda a yell wʋsgo.

 Yãmb sã n dat n wilg tɩ y nanda y zoa wã, segdame tɩ y tall yam la y gũusd wakat fãa. Wala makre, nand tɩ y segl rɩɩb n tɩ kõ ned sẽn bẽede, y segd n sok-a lame n ges rɩ-bʋg la a tõe n dɩ? Bãag ning sã n tar yãmba, wala makre, meoogo, bũmb y sẽn na n maan n wilg tɩ y nonga y zoa wã, yaa y sẽn na n gũ tɩ y meoogã sa tɩ y yaool n tɩ ges-a.

D kengd b raoodo

BIIBLÃ SẼN YETE:

“Yam soab goam wata ne laafɩ.”—YELBŨNA 12:18.

“Bɩ y kɩt tɩ yãmb goamã zĩnd bark wakat fãa n paam yamsem noom.”—KOLOS RÃMBA 4:6.

▪ Yãmb sã n tara tagsg sẽn zems y zoa sẽn bẽed zugu, y no-goamã la y manesmã na n wilga rẽ. Ning-y y yamẽ tɩ y zoa wã pa toeeme, la t’a ket n tara zʋg-sõma nins sẽn kɩt tɩ yãmb bao a zoodã. Ra bas-y tɩ bãagã kɩt tɩ y yĩm a sẽn yaa ned ning buudã ye. Yãmb sã n sõsd ne y zoa wã wa y sẽn gomd ne ned sẽn dat sõngr bala, tõe n kɩtame t’a sɩd wa get a mengã woto. A Roberta sẽn yaa pag sẽn tar kõab bãag a sẽn dog ne wã yeela woto: “Ges-y maam wa ned sẽn ka bãad ye. Yaa sɩd tɩ m yaa koamsa, la ma-me tara m tagsg la m sẽn nonge. Ra ges-y maam wa nimbãan-ned ye. Ra gom-y ne maam wa m yamã paoodame ye.”

Tẽeg-y tɩ pa yãmb sẽn yet bũmb ningã la yell ye. Yaa y sẽn yet-a to-to wã. Baa y koe-zomã sẽn yaa to-to wã tõe n kenga ned raood wall koms a raoodo. B sẽn wilg rao a ye yʋʋr sẽn boond t’a Ernesto tɩ kãnsɛɛr n yõk-a wã poore, a zoa n zĩnd tẽn-zẽng n bool-a telefõnnẽ n yeel-a woto: “Pa sɩd ye, foo n wa n tar kãnsɛɛre!” A Ernesto mengã yeela woto: “Mam zoa wã sẽn yeel “foo” la “kãnsɛɛrã” to-to wã kɩtame tɩ m gĩinã fãa maage.”

Seb-gʋlsd a Lori Hope me yeela woto: “Y sã n sok bãad tɩ ‘maana wãna,’ a tõeeme n pa wʋm-a wa d sẽn datã ye. Rẽ bee ne d koe-zomã, d manesmã, tõnd ne bãadã zems-n-taarã, d zoodã pãng sẽn ta zĩig ninga, la sẽn paase, sẽn yaa wakat ning la d yeel woto wã. Woto tõe n kenga bãadã raoodo, wall sãam a sũur bɩ paas-a rabeem.”

Yãmb zoa yĩns sã n zabdẽ, a ratame n neẽ tɩ y geta a yelle, n wʋmd a manesem kẽer võore, la y nand-a. Wilg-y-yã-a t’a yell sɩd pak-y lame, la tɩ y na n zĩnda a sɛɛgẽ wakat fãa n sõng-a. A Rosemary bẽeda kalkõt bãaga. A yeela woto: “Bũmb ning sẽn kengd mam raood n yɩɩd yaa m zo-rãmbã sẽn yet maam tɩ b nong-m lame wã, la tɩ sẽn wa n yaa a soab fãa, b na n sõnga maamã.”—Yelbũna 15:23; 25:11.

D maan bũmb vẽeneg n sõng-ba

BIIBLÃ SẼN YETE:

“D ra nong taab ne nonoom la gom vɩɩd ye. Bɩ d nong taab ne tʋʋma, la ne sɩda.”—1 ZÃ 3:18.

▪ Logtor sã n wa vaeesd n dat n bãng bãag ning y zoa sẽn bẽede, y zoa wã sẽn dat yãmb sõngr to-to wã pa yembr ne b sã n wa sɩng a tɩbsg ye. La wakat kãens fãa, a rata yãmb sõngre. Wall tɩ y yeel-a bal t’a sã n wa rat bũmb bɩ a bool-yã, maan-y bũmb takɩ n sõng-a. Bũmb wʋsg n be y sẽn tõe n maan t’a bãng t’a yell pak-y lame. Wala makre, y tõe n sõngd-a lame n segendẽ, n pɩɩsd a roogã, n pɛgd a futã la y repaasdẽ, n kẽnd a kẽnã, n kẽnd n daad bũmb nins a sẽn datã n wat n kõt-a, wall y rɩkd-a n kẽnd logtorã yiri. Wilg-y-yã-a t’a tõe n kɩsa sɩd ne yãmba, la y tat a nengẽ lɛɛr ning a sẽn kõ-yã. Modg-y n maand-y bũmb nins y sẽn pʋlem-a tɩ y na n maandame wã.—Matɩe 5:37.

Seb-gʋlsd a Rosanne Kalick yeela woto: “Sẽn yaa bũmb ning fãa la y maan-yã, baa yaa bilf bɩ kãsenga, sã n tõe n sõng bãadã t’a kell n tõog toogo, sõngda wʋsgo.” A Sílvia kãnsɛɛr sẽn yõk naoor a yiib t’a põsã me yeela woto: “Mam sẽn tar zo-rãmb toor-toor sẽn wat daar fãa n dɩkd maam ne mobil n kẽnd logtorã yirã kengda m daood la kõt-m belsg wʋsgo! Sorã zugu, d gomda bũmb wʋsg yelle, la d sã n wa lebgdẽ, d mi n yals n dɩka maasga. Woto kɩtame tɩ yaa wa m pa bẽed ye.”

Ra tags-y tɩ y tõe n bãnga bũmb nins fãa y zoa  wã sẽn datã ye. A Rosanne Kalick yeela woto: “Mi n sokd-y-yã.” A paasa woto: “Baa y sẽn dat n sõng-a wã, ra bao-y n maan-y bũmb fãa ye. Woto tõeeme n pa naf-a ye. Y sã n pa rat tɩ m maan baa fʋɩ, rat n yeelame tɩ m sɩd pa tõe n maan baa fʋɩ ye. M datame n neẽ tɩ m ket n tõe n maana bũmbu. Mam datame tɩ wõnd wa m pa bẽed ye. Sõng-y maam tɩ m maan m sẽn tõe fãa.”

Yãmb zoa wã sẽn bẽedã me ratame tɩ b get-a wa ned sẽn ket n tõe n maan bũmbu. Rao a ye b sẽn boond t’a Adilson sẽn bẽed SIDA wã yeela woto: “F sã n ka laafɩ, f pa rat tɩ nebã zãag b mens ne-fo, tɩ yaa wa f pa le tar yõodo, wall f pa le tõe m maan baa fʋɩ f toor ye. F mi n datame n sõng f taabã, baa yaa tʋʋm-bõoneg la f na n tʋme. F sã n neẽ tɩ f ket n tõe n maana bũmbu, noogda f sũur wʋsgo! Woto kɩtdame tɩ f yamã ket n be vɩɩmã. Mam datame tɩ nebã basd maam tɩ m yãkd yam m toore, la b wilgdẽ tɩ b nanda m sẽn yãk yam n na n maan bũmb ninsã. F sã n ka laafɩ, pa rat n yeel tɩ f pa le tõe n tʋm tʋʋm nins f sẽn segd n tʋmã, f sẽn yaa ba, ma, bɩ n tʋm tʋʋm a taab ye.”

D ra zãag d meng ne d zoa wã ye

BIIBLÃ SẼN YETE:

“Ned tũud-n-ta-sõng nong-a-la wakat fãa, la a yaa ba-biig sẽn dog toog wakat yĩnga.”—YELBŨNA 17:17, NW.

▪ Yãmb sã n pa tõe n tɩ ges y zoa wã, y sẽn zãr ne-a yĩng wall bũmb a to yĩnga, y tõe n bool-a-la telefõnnẽ n sõs ne-a, bɩ n gʋls lɛtr wall mesaaz n tool-a. Bõe la y tõe n yeel-a? A Alan Wolfelt sẽn yaa logtorã yeela woto: “Tẽeg-y-yã-a yɛl kẽer yãmb sẽn naag taab n maan tɩ yɩ noog yelle. Pʋlem-y-yã-a tɩ y pa na n bas tɩ kaoos la y le gʋls lɛtr n tool-a ye. La rẽ poore bɩ y sɩd gʋlse.”

Y zoa sã n ka laafɩ, y pa segd n bas n pa tɩ keng a raoodo, y sẽn yɛɛsd y na n wa yeel bũmb wall y tudg n maan bũmb sẽn pa zems yĩng ye. Naoor wʋsgo, yãmb kẽngrã bal nafd-a lame. A Lori Hope gʋlsa woto a sebr a ye pʋgẽ: “Tõnd ned kam fãa tõe n yeelame wall a maan bũmb tɩ pa zemse, pa rẽ bɩ sãam a to sũuri. La pa rẽ la yellã ye. Yellã yaa y sẽn na n yɛɛsd y na n wa tudgi, tɩ kɩt tɩ y zãag y meng ne ned sẽn segd ne y sõngre.”

Yãmb zoa sẽn ka laafɩ ratame tɩ y sõng-a n yɩɩd pĩndã. Wilg-y tɩ y yaa “tũud-n-ta-sõngo.” Yãmb sẽn modgd n maand bũmb nins n na n sõng-a wã pa na n kɩt t’a bãagã sãoog ye. La y sã n maand woto, tõe n sõnga ned y sẽn nong sẽn be toog pʋgẽ t’a tõog a toogã.

[Tẽngr note]