Kunjamanakatsa Bibliat jukʼamp sum yatxatsna

“Janipuniw kuna libros Bibljam aljaskiti, marpachan taqi libronakax aljaski ukanakat sipansa Bibliakipuniw jukʼamp aljataxa.” (TIME SAT REVISTA)

“Awisakiw Biblia liytʼta, ukampis liytʼasax janipuniw kuns amuykti.” (KEITH, INGLATERRA MARKANKIR MÚSICO)

BIBLIAX Uraqpachan wali uñtʼat librükchisa, jaqinakax janiw liytʼapkiti. ¡Ukax wali llakkañapuniwa! Ukampis yaqhipax Biblia liytʼasax wali askinakwa jikxatapxaraki. Amuytʼañataki, Nancy sat mä warmix akham siwa: “Wali llakinakan jikxatasisax kunjamsa uka llakinakar atipirista ukxa, kimsa tunka phisqani maranakaw yanaptʼa thaqta, ukampis Biblia sapa alwa liytʼaña ukat uka tuqinakat lupʼiñaw llakinakar saykatañatakix wal sum yanaptʼawayitu” sasa.

Jumatï Biblia janipun liytʼiriksta ukhaxa, ¿kunatsa uka librox yaqhip jaqinakarux wal yanaptʼawaypacha uk jisktʼasirïtati? Ukat jumatï Biblia liytʼapunirïstaxa, ¿kunjamatsa jukʼamp askinak jikxatasma? Aka paqallqu iwxtʼanakaw wal yanaptʼiristamxa.

1 Suma chuymampiw liytʼañama

◼ Yaqhipax Bibliarux mä suma librorjam uñjasakiw liytʼapxi, yaqhipasti wali suma iwxtʼanak jikxatañ laykuw liytʼapxi ukat yaqhipax Bibliax liyiñapunïkaspas ukhamwa amuyapxi, ukatwa liyipxaraki. Ukampisa, Diosar uñtʼañataki ukat yatichäwipax kunjamsa yanaptʼistaspa uk yatxatañatakiw Biblia liytʼañasa.

Kunatsa suma chuymampi liytʼañasa ukxa Biblia pachpaw akham sasin amuytʼayistu: “Khititix aliqaki uka arunak ischʼuki, ukatsti janiraki phuqkiti ukaxa, kunjämtix mä jaqix ajanup espejot uñkataskixa ukhamakiwa. Ukapachax uñkattʼasiwa kunjämäkitix uka, ukatsti sarxasinxa armtʼasxiwa kunjämäkäntix ukxa. Ukampis khititix jan armtʼaski kuntix istʼki ukxa, jan ukasti  sum Diosan leyipatxa amuytʼasi, kawkïr leyitix qhispiyat sarnaqasiñ churkistu ukarjam sum sarnaqasa, phuqasaraki, uka jaqixa kusisiñaniwa” sasa (Santiago 1:23-25).

Uka qillqatan parlki uka jaqixa, uñkattʼasisax janiw kuns askichtʼasiwaykänti. ¿Kunatsa? Inas jupax espejot ratuk uñkattʼasiwaychi, jan ukax inas jan kun askichtʼasiñatak uñkatasirakchïna. Niya ukhamarakiwa khititï Biblia liyki ukat janirak iwxanakaparjam sarnaqki ukaxa, liyitapax inamayakiwa. Ukampisa jumatï wali amuyumpi Biblia liyïta ukat ukarjam sarnaqäta ukat lupʼirakïta ukhaxa, wali kusisitapuniw jikxatasïta.

2 Qhana arunakampi qillqtʼat Bibliatwa liytʼañama

◼ Español arutxa, walja Biblianakaw utji. Ukanakatxa kawkïris jumatakix askïspawa, ukampis jumatï sum yatxatañ munsta ukhaxa, kunjam qillqtʼatasa uk sum uñakipañamawa. Yaqhip Biblianakax jan amuytʼkaya chʼama arunakampi qillqtʼatawa, ukxa jan suma yatxattʼatäpki uka jaqinakax janiw amuyapkaspati (Hechos 4:13). Yaqhip Biblianakaxa, jaqin sarnaqäwiparjamakiw Biblian chiqa yatichäwinakap mayjtʼayatäpxi. Amuytʼañataki, yaqhip Biblianakanxa Jehová Diosan sutipa uchañat sipansa, “Tatitu” ukat “Dios” sasakiw uchapxi. Ukhamasti kawkïr Bibliatï amuytʼañjamäki ukat chiqa yatichäwinakap jan mayjtʼayatäki uka Biblwa liytʼañamataki thaqhañama.

Traducción del Nuevo Mundo sat Bibliaw ukhamaxa sasaw millón millón jaqinakax sapxi. * Bulgaria markan jakasiri chuymankipstat mä chachax akham siwa: “Nayax mara maraw Biblia liyta ukampis Traducción del Nuevo Mundo sat Bibliakiw wali amuytʼkaña ukat chuymar purtʼkir arunakampi jaqukipataxa” sasa. Jehová Diosan Qhanañchirinakapan tantachäwipar sarasaw uka Biblia mayisiniwayatayna.

3 Diosatwa mayisiñama

◼ Qillqayki ukar sapa kuti Biblia liytʼañatak yanap mayïtaxa, kuntï liykta uk sumwa amuytʼäta. Salmonak qillqir mä jaqix akham sasaw Jehová Diosat mayisïna: “Nayranakaxay jistʼarita, muspharkañ arunakam uñxatañataki” sasa (Salmo 119:18). Diosat mayisisax Biblia churatapat yuspärañasawa, kunattix Arup liytʼasaw Jupar uñtʼtanxa (Salmo 119:62).

Ukampisa, Jehová Diosax mayisitanakas istʼpachati janicha ukxa, ¿kunjamsa yatxatsna? Uk yatiñatakixa, Uruguay markan jakasir pä tawaqitanakat amuytʼañäni. Kuntï Daniel 2:44 qillqatan siski uk janiw amuyapkänti ukatwa uka tuqit qhanañchtʼañapatak mä yanaptʼir khitaniñapatak Diosat mayisipxäna. ¿Diosax istʼpachänti? Janïr Biblia jistʼantkasaxa Jehová Diosan pä Qhanañchirinakapaw punk liqtʼapxäna, ukat uka pachpa qillqatwa liytʼarapipxäna ukat akapachan utjki uka apnaqäwinak lantix Diosan Apnaqäwipaw uttʼayasxani sasaw qhanañchtʼapxäna. * Ukhamatwa uka pä tawaqitanakax Diosan istʼatäpxatap amuyasipxäna.

4 Sapüruw liytʼañama

◼ Jan walin jikxatasipki jan ukax kuna jan waltʼäwi utji ukhakiw walja jaqinakax Biblia liyipxi. Amuytʼañataki, libronak lurapki uka utan pʼiqtʼir mä jaqixa, kuntï 2001 septiembre 11 urunak saraqatar paskatayna uka qhipatxa, akham sataynawa: “Walja Biblianakpunwa aljasiwayi” sasa. Ukat Dios pachpaw Biblia sapüru liyiñasatak akham sasin iwxtʼistu: “Amtasipunïtaw kuntï Diosan leyi libropanxa siski uka, ukhamaraki uruy arumarakiw [liyïta, NM] lupʼirakïta kuntix librox siski uka lurañamataki. Ukhamatwa taqi luräwinakamax sumaru sarani” sasa (Josué 1:8).

¿Kunatsa Biblia sapüru liyiñax wali wakiskirïpacha? Amuytʼañätaki, mä chachan chuymapax saytʼxaspa jan ukax jan waltʼxaspa ukhaxa, kuna  manqʼanaktï jan waltʼayki ukanak jan manqʼañatakiw amti. Ukampis jan waltʼkaspa ukhak uka manqʼanakat amuyasispaxa inamayakïspawa. Sapüru ukham luraspa ukhakiw jupatakix askïspa. Ukhamarakiwa ‘luräwinakasax sumar sarañapatakix’ ukat yatiqatasarjam suma amuyumpi sarnaqañatakix sapüruw Biblia liyiñasa.

5 Kunayman tuqit liytʼañ yantʼam

◼ Qalltat tukuykam Biblia liytʼañax wali askïkchispasa, inas jumatakix akhamanakat liytʼañax askirakïchispa:

Biblian qillqatäki uka jaqinakat yatxatasma. Biblian kawkïr libropasa jan ukax kawkïr jaljapasa Jehová Diosan luqtirinakapat parli uk thaqtasaw liytʼarakisma. Akanakaw mä qhawqha uñachtʼäwixa:

• José: Génesis 37-50.

• Rut: Rut 1-3.

• Jesús: Mateo 1-28; Marcos 1-16; Lucas 1-24; Juan 1-21. *

May may yatichäwinakat yatxatasma. Mä tuqitak parlki uka qillqatanakatwa Bibliat thaqtasax liytʼasma. Sañäni, Diosar mayisiñ tuqit kunsa yatichi ukat kawkïr mayisïwinakatï Biblian utjki ukanakat liytʼarakisma. *

Jachʼatwa liytʼañama. Jachʼat liytʼañax wali askipuniwa sasaw Bibliax sistu (Apocalipsis 1:3, NM). Ukhamaxa, familpachaw Biblia jachʼat liytʼapxaspa; sapa mayniw maya jan ukax walja jiskʼa tʼaqanaka liytʼapxaspa, jan ukasti Biblian qillqatäki uka jaqinakan arupäkaspas ukhamwa liytʼanipxarakispa. Maysa tuqitxa, Bibliat grabacionanakax utjki ukanakwa istʼapxarakispa. Mä warmix akham sasaw qhanañchi: “Nayatakix Bibliat liyiñax chʼamänwa, ukampis grabacionanakap istʼañwa amtawayta. Jichhaxa, novelanakat sipansa Biblian grabacionanakap istʼañaw nätakix wali askixa” sasa.

6 Liytʼasax lupʼiñamapuniwa

◼ Sapürus jan tiemponikiw jikxatastanxa, ukatwa Biblia liytʼas lupʼiñatak tiempo apstʼasiñax chʼamäspa. Ukampis wali askinak jikxatañatakix lupʼiñasapuniwa. Kunjamtix cuerposatakix manqʼax purakasan alimentor tukuñapax wali askixa, ukhamarakiw Biblia liytʼas lupʼiñax jiwasatakix wali askirakixa. Ukatakix kuntï liyktan ukwa amtañasa ukat akham jisktʼasiñasa: “¿Liykta ukax kunsa Jehová Diosat yatichitu? ¿Kunjamsa jakäwijan yanaptʼitaspa? ¿Kunjamsa ukampix mayninakar yanaptʼiristxa?” sasa.

Diosan arunakap chuymasar purtʼañapatakix lupʼiñaw wali wakiskirixa. Ukhamatwa Biblia liyisax salmonak qillqirjam wali kusisit jikxatasiñäni, jupax akham sänwa: “Yatichäwimarux walpun munasta: ¡Sapüruw ukxat lupʼiskta!” sasa (Salmo 119:97). ¿Kunatsa jupatakix Qullan Qillqatanakat sapüru lupʼiñax wali wakiskirïnxa? Kunattix ukham lupʼisaw kuntï Diosan arunakapat yatiqkäna ukar wal munasïna.

7 Mayniw yanaptʼiristamxa

◼ Diosax janiw Bibliat liyktan ukxa taqpach jiwas pachpa amuyañas suykiti. Chiqpachansa, Diosan arunakapax yaqhip chiqax ‘janiw amuytʼañjamäkiti’, ukxa Biblia pachpaw qhanañchi (2 Pedro 3:16). ¿Khitis yanaptʼistaspa? Etiopía markankir gobiernon irnaqir mä jaqitwa Bibliax parli, jupax Qullan Qillqatanakat liytʼasax janiw mä chiq amuykänti. Ukatwa, Diosax mä serviripar jupar qhanañchtʼañapatak khitäna. Ukatsti “kʼuchikiw sarawayxäna” (Hechos 8:26-39).

Jumatï Bibliat sum amuytʼañ munstaxa, Bibliat yatxattʼat maynïriw yanaptʼarakiristamxa. Ukatakixa kawkhantï jakta uka chiqankir Jehová Diosan Qhanañchirinakapampiw parltʼasma jan ukax aka revista lurapki ukanakaruw qillqasma, (direccionanakx 4 jananwa jikxatäta) ukat jan kun mayisakiw Bibliat yatichapxätam. Uka paqallq amuytʼäwinakaxa, Bibliat sapür liytʼañamataki ukat sum amuytʼañamatak yanaptʼiristam ukwa munapxta.

[Qhanañchäwinaka]