Pitong Lakdang sa Kapakipakinabang na Pagbasa kan Biblia

“An Biblia bako sanang an pinakamabentang libro kasuarin man; iyan an pinakamabentang libro kan taon sa kada taon.”—MAGASIN NA TIME.

“Kun beses binabasa ko an Biblia, alagad iyan bako nanggad interesante.”—KEITH, SARONG POPULAR NA MUSIKERO NA TAGA INGLATERA.

DAKOL na tawo an may Biblia, alagad kabaliktaran sa linalaoman, garo baga dikit an nakukua nindang pakinabang sa pagbasa kaiyan. Pero, talagang pinapahalagahan nin iba an saindang binabasa sa Biblia. Halimbawa, an sarong babae na an ngaran Nancy nagsaysay: “Poon kan ako magbasa asin maghorophorop sa Biblia kada amay na aga, an pagmate ko andam kong atubangon an ano man na problemang tibaad maglataw sa aldaw na iyan. Mas nakatabang an rutinang ini na maginhawahan ako sa mga atake nin depresyon kisa sa ano pa man na paaging naprobaran ko sa nakaaging 35 taon.”

Dawa kun dai pa lamang nindo nabasa an Biblia, napupukaw daw an saindong interes na may nagkapirang natabangan kaiyan? Kun kamo dati nang parabasa kan Biblia, gusto daw nindong orog pang makinabang sa pagbasa kaiyan? Kun iyo, probaran an pitong lakdang na ipinapaliwanag sa artikulong ini.

Lakdang 1​—Basahon Iyan na May Tamang Motibo

▪ Puede nindong basahon an Biblia bilang saro sanang magayon na babasahon o huli sa pakamate nin obligasyon o na iniisip na makakakua kamo dian nin paggiya sa maribok na kinaban na ini. Pero, lubos kamong makikinabang kun an saindong katuyohan iyo na manodan an katotoohan manongod sa Dios. Dugang pa, mag-aako kamo nin mayaman na balos kun an motibo nindo iyo na maheling an puedeng magin epekto kan mensahe nin Biblia sa buhay nindo.

Idinodoon kan Kasuratan an halaga nin pagbasa na may tamang motibo paagi sa pagkomparar kan Biblia sa sarong salming: “Kun an siisay man paradangog kan tataramon, asin bakong paraotob, an sarong ini nakakaagid sa tawo na nagheheling sa saiyang natural na lalawgon sa salming. Huli ta  hineheling nia an saiyang sadiri, asin sia minahale asin nalilingawan tolos kun anong klase siang tawo. Alagad an nag-aaninaw sa sangkap na ley para sa katalingkasan asin nagdadanay dian, an tawong ini, huli ta sia nagin, bakong malilingawon na paradangog, kundi paraotob kan gibohon, maoogma sa paggibo nia kaiyan.”—Santiago 1:23-25.

Sa halimbawang ini, hineling kan tawo an saiyang lalawgon sa salming alagad dai nia pinakarhay an saiyang itsura. Madalion sana gayod niang hineling an saiyang sadiri, o tibaad mayo siang pagmawot na gumibo nin ano man na pagbabago. Siring man, dikit an magigin pakinabang niato kun basta sana niato babasahon an Biblia paminsanminsan o dai iaaplikar an satong binabasa. Sa kabaliktaran, kita magigin tunay na maogma kun aaninawon niato an Biblia na may katuyohan na magin “paraotob,” na tinotogotan an kaisipan nin Dios na moldehon an satong mga pag-iisip asin paggawe.

Lakdang 2​—Pumili nin Masasarigan na Traduksion

▪ Tibaad dakol kamong mapagpipilian na traduksion nin Biblia sa saindong lenguahe. Minsan ngani puede kamong makinabang sa arin man na traduksion kan Tataramon nin Dios, an nagkapira kaiyan naggagamit nin mga tataramon na lihis na sa panahon o pang-intelektuwal na tibaad masakit saboton. (Gibo 4:13) May mga traduksion na binago pa ngani an dalisay na mensahe kan Biblia paagi sa pagsarig sa mga tradisyon. Halimbawa, siring sa sinambit sa naenot na mga artikulo kan magasin na ini, an nagkapirang traduksion sinalidahan an ngaran nin Dios, an Jehova, nin mga titulo na siring baga nin “Dios” o “Kagurangnan.” Kaya kun nagpipili nin traduksion, hanapon an saro na eksaktong trinadusir an Biblia sa mga tataramon na madaling masabotan na nakakaengganyar pagbasahon.

Nadiskobre nin minilyon na parabasa sa bilog na kinaban na iyan mismo an ginibo kan New World Translation. * Isip-isipa an nangyari sa sarong may edad nang lalaki sa Bulgaria. Nag-atender sia sa sarong pagtiripon kan Mga Saksi ni Jehova asin tinawan sia nin kopya kan New World Translation. Paghaloyhaloy, sinabi nia, “Dakol na taon ko nang binabasa an Biblia, alagad dai pa ako noarin man nakabasa nin traduksion na mas madaling saboton asin na nakakataros na marhay sa puso.”

Lakdang 3​—Mamibi

▪ Puede kamong magkaigwa nin dugang pang pakasabot sa Biblia paagi sa paghagad nin tabang sa Autor kaiyan, siring kan ginibo kan salmista na nagsabi: “Haleon mo an takop sa sakong mga mata, tangani na maheling ko an makangangalas na mga bagay gikan sa saimong ley.” (Salmo 119:18) Mamibi sa Dios sa kada pagbasa nindo kan Kasuratan, na naghahagad sa saiya nin tabang tanganing masabotan nindo an saiyang Tataramon. Puede man nindong ipahayag an saindong pasasalamat para sa Biblia, huli ta kun mayo iyan dai niato mamimidbid an Dios.—Salmo 119:62.

Dinadangog daw nin Dios an siring na mga pamibi para sa tabang? Isip-isipa an nangyari sa magtugang na daragita sa Uruguay. Dai ninda nasasabotan an sinasabi kan Biblia sa Daniel 2:44 asin namibi sinda na magsugo an Dios nin matabang sa sainda na masabotan iyan. Mantang nakabukas pa an Biblia kan mga daragita, duwang Saksi ni Jehova an nagduman sa saindang harong, binasa an eksaktong teksto na ipinamibi kan mga daragita, asin ipinaliwanag na sinasabi kaiyan na an mga gobyerno nin tawo sasalidahan kan Kahadean nin Dios. * Kombensido an magtugang na daragita na sinimbag nin Dios an saindang pamibi para sa tabang.

Lakdang 4​—Basahon Iyan Aroaldaw

▪ Sarong publikador nin libro an nagsabi na “biglang nagdakol an mga nagbabakal nin Biblia” pagkatapos na umatake an mga terorista sa Estados Unidos kan Setyembre 11, 2001. An dakol minakonsulta sana sa Tataramon nin Dios kun sinda napupurisaw. Minsan siring, dinadagka kita kan Biblia na basahon iyan sa kada aldaw, huling sinasabi kaiyan: “An librong ini kan ley dai dapat sumuhay sa saimong ngoso, asin basahon mo iyan nin pahinghing aldaw asin banggi, tanganing ika makapag-ingat na gibohon an segun sa  gabos na nasusurat dian; huli ta paagi kaiyan gigibohon mong mapanggana an saimong dalan asin paagi kaiyan mahiro ka na may kadonongan.”—Josue 1:8.

An halaga nin regular na pagbasa kan Biblia puedeng iilustrar paagi sa sarong tawo na inatake sa puso asin nagdesisyon na magkakan nin mas masustansiang mga kakanon. Makakatabang daw sa saiya an dietang ini kun susunodon nia sana iyan sa panahon na biglang minakolog nin grabe an saiyang daghan? Dai. Kaipuhan na pirme niang sunodon an tamang dieta tanganing sia lubos na makinabang. Kaagid kaiyan, an pagbasa kan Biblia aroaldaw makakatabang sa saindo na ‘gibohon na mapanggana an saindong dalan.’

Lakdang 5​—Gumamit nin Laen-Laen na Pamamaagi

▪ An pagbasa kan Biblia poon Genesis sagkod Kapahayagan puedeng magin marahay an resulta, alagad tibaad madiskobre nindo na nakakarepresko an ibang mga pamamaagi. Uya an nagkapirang suhestion.

Subaybayan an sarong karakter. Basahon an gabos na kapitulo o libro na nagtatao nin detalye dapit sa sarong partikular na parasamba sa Dios, siring kan minasunod:

• Jose: Genesis 37-50.

• Rut: Rut 1-3.

• Jesus: Mateo 1-28; Marcos 1-16; Lucas 1-24; Juan 1-21. *

Magpokus sa sarong tema. Basahon an mga tekstong konektado dian. Halimbawa, magsiyasat sa tema na pamibi, dangan basahon an hatol kan Biblia dapit sa pamibi saka an nagkapira sa dakol na pamibi na nakasurat sa Biblia. *

Magbasa nin makosog. Makikinabang kamo nin dakula paagi sa makosog na pagbasa kan Biblia. (Kapahayagan 1:3) Puede pa ngani kamong magbasa nin makosog bilang pamilya, na nagsasarosalida sa pagbasa nin mga parapo o inaasignar sa laen-laen na miembro kan pamilya an mga karakter sa Biblia. An nagkapira naoogmang magdangog sa rekording kan Biblia. “Nasakitan akong ponan an pagbasa kan Biblia,” an sabi nin sarong babae, “kaya pinonan kong magdangog sa nakarekord na pagbasa kan Biblia. Ngonyan nadiskobre ko na an Biblia mas nakakaogmang basahon kisa sa magayon na nobela.”

Lakdang 6​—Maghorophorop

▪ An rikas asin mga pandisturbo kan buhay sa modernong panahon dai nakakatabang sa paghorophorop. Minsan siring, kun paanong kaipuhan niatong tunawon an satong kakanon tanganing masusteniran an hawak niato, kaipuhan niatong horophoropon an satong binabasa sa Biblia tanganing makinabang kita. Ginigibo niato iyan paagi sa pagrepaso sa isip kan satong binabasa asin paghapot sa sadiri nin siring kaini: ‘Ano an nanodan ko manongod ki Jehova Dios? Paano ini minaaplikar sa sako? Paano ko ini puedeng gamiton tanganing tabangan an iba?’

An siring na kaisipan minatogot sa mensahe kan Biblia na makapahiro sa puso niato asin dinudugangan an satong kagayagayahan sa pagbasa kan Tataramon nin Dios. An Salmo 119:97 nagsasabi: “Kanigoan an sakong pagkamoot sa saimong ley! Sa bilog na aldaw iyan an sakong inaatoman.” Paagi sa paghorophorop, an salmista nagtatao nin atension sa Kasuratan sa bilog na aldaw. An paggibo kaiyan nakatabang sa saiya na makapatalubo nin hararom na pagkamoot sa saiyang nanodan.

Lakdang 7​—Magpatabang Tanganing Masabotan Iyan

▪ Dai inaasahan nin Dios na lubos niatong masasabotan an saiyang Tataramon na kita sana. Dawa an Biblia nagsasabi na igwa iyan nin “nagkapirang bagay na depisil saboton.” (2 Pedro 3:16) Isinasaysay kan libro nin Gibo an dapit sa opisyal na Etiope na nariribaraw sa sarong kabtang kan Biblia na binabasa nia. Isinugo nin Dios an saro sa mga lingkod Nia tanganing tabangan sia, asin an resulta iyo na an lalaking Etiope ‘nagpadagos na naggagayagaya.’—Gibo 8:26-39.

Puede man kamong orog na makinabang sa pagbasa kan Biblia paagi sa paghagad nin tabang na masabotan an binabasa nindo. Kontakon an Mga Saksi ni Jehova sa saindong komunidad, o sumurat sa adres na yaon sa pahina 4 kan magasin na ini para sa daing bayad na pag-adal sa Biblia.

[Mga Nota sa Ibaba]