Hlâwkpui Tûra Bible Chhiar Dân Kawng Sarihte

“Bible hi lehkhabu hralh tla ber a nih mai bâkah, kum tinin kum khat chhûnga lehkhabu hralh tam ber a ni ziah bawk a ni.”—TIME MAGAZINE.

“Bible chhiar châng chu ka nei ve ṭhîn a; mahse, a ninawm ka ti râpthlâk.”—KEITH-A, ENGLAND RAMA MUSICIAN LAR TAK.

MI TAM takin Bible hi nei mah se, a thu chhiar aṭanga hlâwkna hmu erawh an tlêm hmêl hle si hi thil mak tak a ni. Mi ṭhenkhat erawh chuan Bible aṭanga an thu chhiarte chu an hlut hle thung. Entîr nân, nu pakhat Nancy chuan heti hian a sawi: “Zîng tin Bible ka chhiar a, ka chhût ngun ṭhin avângin, chhûn lamah engpawh tawng mah ila ka inring thlap. Chutianga Bible chhiar ziahna chuan kum 35 kal ta chhûnga ka lo tihchhin tawh thil engpawh aiin ka rilru beidawnna a chhâwk zângkhai zâwk a ni,” tiin.

Bible chu i la chhiar ngai lo a nih pawhin, ṭhenkhatin an ṭangkaipui tih i hriat chuan mak i ti hle lo maw? I chhiar ṭhîn a nih chuan, i thil chhiarte hlâwkpui chu i duh em? I duh chuan, he thu ziaka târ lan rahbi sarihte hi zawh tum ang che.

KAWNG 1: Chhiar chhan dik nei rawh

▪ Bible chu thu leh hla ngaihnawm tak ang emaw, chhiar tûr a nih avângin emaw, a nih loh leh he khawvêl buai tak kâra kaihhruaina pe theitu tûr thute hmuh inbeisei vângin emaw i chhiar thei a. Mahse, Pathian chungchâng thutak zir tum rân chunga i chhiar chuan i hlâwkpui lehzual dâwn a ni. Chu bâkah, Bible thu kente’n i nun a nghawng theih dân hmuh tum rân chunga i chhiar chuan lâwmman ropui tak i hmu ang.

Pathian Lehkha Thu chuan Bible chu dârthlalang nêna khaikhinin, chhiar chhan dik neih a pawimawhzia a târ lang a. Heti hian a sawi: “Tupawh thu ngaithlatu nia zâwmtu ni si lo chu mi,  dârthlalanga a pianpui hmai ngun taka inen ang chu a ni, a kal bo va, mi eng ang nge a nih a intheihnghilh nghâl si ṭhîn. Amaherawhchu tupawh dân famkim, zalênna dân hi bih a, chutianga awm reng a, ngaithla a, theihnghilh leh mai ṭhintu ni lo va, zâwma hna thawk fo ṭhîntu ni zâwk chu, chu mi chu a thil tihah malsâwmin a awm ang,” tiin.—Jakoba 1:23-25.

He Bible chânga târ lan mi pakhat hian dârthlalangah a hmêl a en a; mahse, a lan dân chu a siam ṭha chuang lo va ni. A inen thuak chauh pawh a ni mahna, a nih loh leh insiam ṭhat duhna a nei lo pawh a ni thei bawk. Chutiang bawkin, Bible chu kan chhiar thuak ringawt emaw, kan chhiarte kan zawm loh emaw chuan kan hlâwkpui vak lo vang. Kawng leh lamah chuan, kan ngaihtuahna leh thiltihte chu Pathian ngaihtuahna thununtîr a, ‘zâwmtu’ nih tum rân chunga kan chhiar erawh chuan hlimna dik tak kan nei thei a ni.

KAWNG 2: Bible lehlin dik thlang rawh

▪ In ṭawng pawhin Bible lehlin hrang tam tak thlan tûr in nei mai thei a. Pathian Thu lehlin engpawh chu i hlâwkpui theih tho laiin, lehlin ṭhenkhat chuan ṭawngkam un tak takte emaw, ṭawngkam sâng hriat thiam harsa takte emaw an hmang a. (Tirhkohte 4:13) Lehlin ṭhenkhat phei chuan an thorochhiah ring zâwkin Bible thu pawh an thlâkthleng hial a ni. Entîr nân, he magazine thuziak hmasa berte aṭanga kan hmuh tawh angin, lehlin ṭhenkhat chuan Pathian hming Jehova chu a nihna “Pathian” tiin emaw, “Lalpa” tiin emaw an thlâk a ni. Chuvângin, Bible chhiar tûr i thlanin, chhiar zawm zêl duhna pe thei che, hriatthiam awlsam tûra dik taka lehlin chu thlang ang che.

Khawvêl puma Bible chhiartu mi maktaduai têlte chuan New World Translation hi chhiar nuam an tiin, hriatthiam awlsam an ti a. * Bulgaria rama pa pakhat chungchâng hi han ngaihtuah teh. Jehova Thuhretute inkhâwmnaa a va inkhâwm chuan New World Translation Bible chu an lo pe a. A hnuah, chu pa chuan, “Bible-hi kum tam tak ka lo chhiar tawh ṭhîn a; mahse, hetiang khawpa hriatthiam awlsam leh thinlung khawih thei Bible lehlin hi ka la chhiar ngai lo,” a ti.

KAWNG 3: Ṭawngṭai rawh

▪ Fakna hla phuahtuin: “I dân thu aṭanga thilmak ka hmuh theih nân, ka mitte hi mi tihvârsak ang che,” tia a dîl anga i dîl ve chuan Bible hriatthiam lehzualna i nei thei a ni. (Sâm 119:18) Bible i chhiar apiangin a thu hre thiam tûra ṭanpui tûr chein Pathian hnênah ṭawngṭai ang che. Bible min pêk avânga i lâwmzia pawh i hrilh thei bawk; awm lo ta sela chuan Pathian kan hre thei dâwn si lo va.—Sâm 119:62.

Ṭanpui tûra ṭawngṭaina chu Pathianin a ngaithla em? Uruguay rama unau piang hmun tleirâwl pahnihte chunga thil thleng hi han ngaihtuah teh. Anni chuan Daniela 2:44 thu hi hriatthiam harsa an ti hle a, anmahni rawn hrilhfiah tûra tuemaw rawn tîr tûrin Pathian hnênah an ṭawngṭai a ni. Chutianga Bible an la keu lai mêk chuan Jehova Thuhretute pahnih an ina lo kalin, Pathian hnêna hriatthiam an dîl Bible châng ngei mai chu an rawn chhiar a, Pathian ramin mihring sawrkârna a rawn thlâk tûr thu sawina a nihzia an hrilhfiah bawk a ni. * Chûng tleirâwl pahnihte chuan ṭanpui an dîlna Pathianin a chhâng ngei a ni tih an ring thlap a ni.

KAWNG 4: Nî tin chhiar rawh

▪ September 11, 2001-a firfiakte’n United States an beih hnu khân “Bible leitu an pung thut” tih lehkhabu chhuahtu pakhat chuan a sawi. Mi tam tak chuan an hrehawm hunah chauh Pathian Thu lam an hawi a. Mahse, Bible chuan: “He dân bu hian i kâ chu chhuahsan hlek suh se; chu mi thu ziak zawng zawng chu i zawm tlat theih nân chhûn leh zân i ngaihtuah zâwk tûr a ni: tichuan i kawngte chu i lo titluang zêl ang a, i lo hmuingîl  zêl dâwn nia,” tia sawiin, nî tina chhiar tûrin min fuih a ni.—Josua 1:8.

Bible chhiar ziah a hlutna chu lung natna nei pakhat, chaw ṭha zâwk ei tum nên a tehkhin theih ang. Chûng chaw ṭha chu a lung nâ a chhuah hunah chauh ei ta se a sâwt ang em? Sâwt lo vang. A nih ang tûr taka a ei zawm zêl chauhvin a sâwtpui ang. Chutiang bawkin, nî tina Bible chhiarna i neih chuan “i kawngte chu i lo titluang zêl ang.”

KAWNG 5: I chhiarnaah tih dân chi hrang hrang hmang rawh

▪ Genesis aṭanga Thu Puan thleng chhiar chu a ṭha ngei mai; mahse, tih dân chi hrang hman i duh zâwk pawh a ni thei. Rawtna ṭhenkhat kan han târ lang e.

Bible-a mi tuemaw chungchâng chhiar rawh. Pathian betu tuemaw chanchin sawina lai bîk Bible-a a bu têtê emaw, a bungte emaw chu chhiar rawh. A hnuaiah hian entîrna târ lan a ni:

• Josefa: Genesis 37-50.

• Ruthi: Ruthi 1-3.

• Isua: Matthaia 1-28; Marka 1-16; Luka 1-24; Johana 1-21. *

Zir bîk nei rawh. I thu zir bîk nêna inkûngkaihna nei Bible chângte chhiar rawh. Entîr nân, ṭawngṭaina chungchâng zir bîkna i neih chuan chu mi chungchânga Bible fuihna leh Bible-a chhinchhiah ṭawngṭaina ṭhenkhat te chhiar leh ang che. *

A riin chhiar rawh. Bible a ria chhiar chu i hlâwkpui hle thei a ni. (Thu Puan 1:3, C.L. Re-edited, ftn.) Chhûngkua pawhin a riin in chhiar thei a, paragraph inchhiar chhâwkin emaw, Bible-a mite lema changa an chan tûr chhiar zêlin emaw in ti thei a ni. Ṭhenkhat chuan Bible chhiar record sa ngaihthlâk chu nuam an ti hle. Nu pakhat chuan: “Han chhiar ṭan mai chu harsa ka ti hle a; mahse, Bible chhiar record sa chu ka ngaithla ṭan ta a. Tûnah chuan Bible chu lehkhabu dang aiin a ngaihnawm ka ti tawh zâwk a ni,” tiin a sawi.

KAWNG 6: Chhût ngun rawh

▪ Tûn lai nun buai tak leh mi la pêng thei tak hian thil chhût ngun a tiharsa a. Mahse, kan chak theih nâna kan chaw ei pai ṭawih a ngai ang bawkin, Bible aṭanga kan thu chhiarte hlâwkpui tûr chuan kan chhût ngun a ngai a ni. Chu chu kan thil chhiarte rilrua ngaihtuahnawnna leh hêng zawhna: ‘Pathian Jehova chungchâng eng nge ka zir? Ka thil chhiarte hi engtin nge ka nunpui theih ang? Engtin nge mi dangte ṭanpui nân ka hman theih ang?’ tih zawhna inzâwtin kan ti a ni.

Chutiang ngaihtuahna chuan Bible thutak chu kan thinlung a khawihtîr theiin, Pathian Thu chhiar nuam min tihtîr sawt thei a ni. Sâm 119:97 chuan: “I dân hi ka va ngaina êm! Nilênga ka ngaihtuah ṭhin a ni,” tiin a sawi. Fakna hla phuahtu chuan Pathian Lehkha Thu chu chhûtngunin, nilêngin a ngaihtuah ṭhîn a. Chu chuan a thu zirte ngainatna thûk tak nei tûrin a ṭanpui a ni.

KAWNG 7: Hriatthiam nân ṭanpuina la rawh

▪ Pathian chuan keimahni mai chuan a Thu kan hriatthiam vek a beisei lo. Bible ngei pawhin Bible-ah chuan “thu hriat har takte” a chuang tih a sawi a ni. (2 Petera 3:16) Tirhkohte bu chuan Ethiopia mi lian pakhatin a Bible châng chhiar lai hriatthiam harsa a tih thu a sawi a. Amah ṭanpui tûrin Pathianin A chhiahhlawh a tîr a, chuvângin, Ethiopia mi chu ‘hlim takin a kal ta zêl’ a ni.—Tirhkohte 8:26-39.

Nang pawhin i thil chhiarte hre thiam tûra ṭanpuina lain, Bible chhiar chu i hlâwkpui ve thei a ni. A thlâwna in lama Bible zirpuina neih nân, in vêng chhûnga Jehova Thuhretute be pawp la, a nih loh leh he magazine phêk 4-naa address-ah hian lehkha thawn ang che. (w10-E 07/01)

[Footnote-te]