Fitu e Lakaaga ke he Totou Tohi Tapu kua Aoga

“Nakai ni ko e tohi ne mua atu e fakatau e Tohi Tapu he fakamauaga tuai, ka ko e tohi ne mua atu e fakatau he tau tau oti.”—MEKASINI TIME.

“Totou e au e Tohi Tapu he falu mogo, ka e ahumate lahi mahaki ki a au.”—KEITH, KO E TAGATA TĀ KOFE TALAHAUA MAI IGILANI.

KUA matakehe ai he tokologa e tagata ne fai Tohi Tapu ka kua tuga kua tote e aoga he totou ai. Ka e tokiofa he falu e tau mena ne totou e lautolu he Tohi Tapu. Ma e fakatai, ko e fifine ne higoa ko Nancy ne pehē: “Tali mai he kamata au ke totou mo e manamanatu fakahokulo ke he Tohi Tapu he tau pogipogi kī oti, kua mautali au ke fehagai mo e tau mena tutupu he aho. Lahi e mena ne taute he fakaholoaga nei ke fakatotoka e tau mogo fakaatukehe haaku ne kua molea tuai e 35 e tau he lali au.”

Pete foki ka nakaila totou e koe e Tohi Tapu, nakai kia ofoofogia a koe kua moua he falu e lagomatai mai i ai? Ka fitā a koe he totou e Tohi Tapu, manako nakai a koe ke aoga lahi mai he totouaga haau? Ka pihia, fakaaoga e tau lakaaga fitu ne fakamaama he vala tala nei.

Puhala 1—Totou mo e fatuakiloto hako

◼ Maeke a koe ke totou e Tohi Tapu ha ko e tohi fulufuluola po ke matagahua kua lata po ke manatu to moua e koe e takitakiaga he lalolagi kelea nei. To aoga lahi ki a koe ka foli a koe ke fakaako e kupu mooli hagaao ke he Atua. Lafi ki ai, to helehele e koe e tau palepale loga kaeke ko e fatuakiloto haau ke kitia e puhala ka lauia e moui haau he fekau he Tohi Tapu.

Kua fakamaama he tau Tohiaga Tapu e aoga he totou mo e fatuakiloto hako he fakatatai e Tohi Tapu ke he fakaata: “Ka fanogonogo taha ke he kupu ka e nakai oma ki ai, kua lata e tagata ia mo e tagata kua kitekite ke he hana mata ni ke he fakaata, Ha ko e mena kua kitekite atu a ia  kia ia, ti fano kehe ai mo e nimo agataha ia ia po ke fefe e mata hana; ka ko ia kua kikite ke he fakatufono kua katoatoa e mitaki ha i ai e tokanoaaga, mo e tumau ki ai, kua nakai fanogonogo fakanimonimo e tagata ia, ka kua eke e ia e gahua, to monuina e ia ke he hana omaoma.”—Iakopo 1:23-25.

Ko e tagata he fakataiaga nei ne kitekite ke he haana mata he fakaata ka e kaumahala ke hiki e foliga haana. Liga kua fakahela noa ni a ia ke he fakaata, po ke liga nakai manako a ia ke taute ha hikiaga. Pihia foki, to nakai aoga lahi ki a tautolu ka totou holo e Tohi Tapu po ke kaumahala ke fakagahua e mena ne totou e tautolu. Kehe mamao ai, maeke ia tautolu ke moua e fiafia mooli ka kitekite ke he Tohi Tapu mo e manatu ke eke mo ‘tagata kua oma,’ he fakaatā e puhala manamanatu he Atua ke fakahakohako e tau manatu mo e tau gahua ha tautolu.

Puhala 2—Fifili e fakaliliuagakua tonutika

◼ Liga loga e Tohi Tapu kua fakaliliu ke he vagahau haau ka fifili ai e koe. Ha kua aoga e tau fakaliliuaga kehekehe he Kupu he Atua ki a koe, kua fakaaoga he falu e vagahau tuai po ke vagahau fakaako ka uka ke maama. (Gahua 4:13) Falu fakaliliuaga kua hiki foki e fekau meā he Tohi Tapu he fakavē ke he tau aga fakamotu. Ne hukui he falu e higoa he Atua, Iehova, aki e tau mataulu tuga e “Atua” po ke “Iki.” Ti ka fifili e fakaliliuaga, kumi e fufuta ne hako e liliuaga he Tohi Tapu he vagahau ne mukamuka ke maama ti fakaohooho ke totou.

Toko miliona e tagata totou he lalolagi katoa kua talahau na pihia tonu e New World Translation. a Manamanatu ke he mena ne tupu ke he tagata taane motua i Bulgaria. Ne fina atu a ia ke he feleveiaaga he Tau Fakamoli a Iehova, kua age ki a ia e lagaki he New World Translation. Fakamui, ne pehē a ia, “Loga e tau ne totou e au e Tohi Tapu, ka e nakaila totou ia au he fakaliliuaga kua mukamuka lahi ke maama mo e fano loa ke he loto.”

Puhala 3—Liogi

◼ Maeke ia koe ke moua lahi e maamaaga he Tohi Tapu he ole ke he Tohia ma e lagomatai haana, tuga ne taute he salamo ne pehē: “Kia fakamaama e koe haku tau mata, kia kitia ai e au e tau mena ke ofo ai ke he hāu a fakatufono.” (Salamo 119:18) Liogi ke he Atua he tau magaaho takitaha kua totou e koe e tau Tohiaga Tapu, ole ki a ia ke lagomatai a koe ke maama haana Kupu. Maeke foki ia koe ke fakakite e fakaaue ma e Tohi Tapu, ha ko e mena ka nakai fai ai to nakai iloa e tautolu e Atua.—Salamo 119:62.

Logona nakai he Atua e tau liogi pihia ma e lagomatai? Manamanatu ke he tokoua e lafu ikiiki i Uruguay. Ne tuahā a laua ke he mena ne talahau he Tohi Tapu ia Tanielu 2:44 ti liogi ke fakafano mai he Atua taha ke lagomatai a laua ke maama ai. He hafagi agaia e Tohi Tapu he tau tama fifine nei, tokoua e Tau Fakamoli a Iehova ne o mai ke he gutuhala ha laua, ti totou e kupu tohi taha ia ne liogi e tau tama fifine hagaao ki ai, mo e fakamaama ko e tau fakatufono ne taute he tagata to hukui he Kautu he Atua. b Ne talitonu e lafu tokoua nei kua tali he Atua e liogi ha laua ma e lagomatai.

Puhala 4—Totou he tau aho oti

◼ Taha e kau tohi fakailoa ne mailoga kua “amanaki e tau tagata ti fakatau loga e Tohi Tapu” he mole e fakamatakutakuina i Amerika ia Sepetema 11, 2001. Tokologa ne fuluhi ke he Kupu he Atua he tau magaaho fakatupetupe hokoia. Ka e fakamafana he Tohi Tapu ki a tautolu ke totou ai he tau aho oti, ha kua pehē: “Nakai uta kehe mo e gutu hau e tohi he fakatufono nai, ka kia manamanatu ai a koe ke he aho katoa mo e po, kia taofi e koe ke eke ai ke lata mo e tau mena oti kua tohi ai; ti monuina a koe ke he tau puhala oti ke fano ai a koe, ti monuina ai ni.”—Iosua 1:8.

 Ko e aoga he totou tumau e Tohi Tapu ka fakatai ke he tagata ne oho e ate ti fifili ke kai e tau mena kai kua huhua mitaki. To lagomatai nakai he fakaholoaga nei a ia ka muitua ni a ia ki ai ka logona e ia e tuina he mamahi he fatafata haana? Nakai. Kua lata ke muitua tumau a ia ke he fuafuaaga kai malolō tino ke moua e lagomatai lahi. Pihia foki, ko e totou e Tohi Tapu he tau aho oti ka lagomatai a koe ke “monuina a koe ke he tau puhala oti ke fano ai a koe.”

Puhala 5—Fakakehekehee totouaga haau

◼ Ko e totou e Tohi Tapu mai ia Kenese ke he Fakakiteaga ka mitaki, ka e liga moua e koe e falu puhala foki kua atihake. Hanei falu puhala.

Totou hagaao ke he tagata he Tohi Tapu. Totou e tau veveheaga oti po ke tau tohi kua fakatutala pauaki ke he tagata tapuaki he Atua, tuga a nā:

• Iosefa: Kenese 37-50.

• Ruta: Ruta 1-3.

• Iesu: Mataio 1-28; Mareko 1-16; Luka 1-24; Ioane 1-21. c

Hagaaki ke he matakupu. Totou e tau kupu tohi ne hagaao ki ai. Ma e fakatai, kumikumi e matakupu he liogi, ti totou e fakatonuaga he Tohi Tapu ke he liogi, pihia mo e falu liogi he tau liogi loga ne fakamau he Tohi Tapu. d

Totou fakaleolahi. Maeke ia koe ke aoga lahi he totou fakaleolahi e Tohi Tapu. (Fakakiteaga 1:3) Liga totou fakaleolahi foki e mutolu ko e magafaoa, he fakafetokaki ke totou e tau paratafa po ke kotofa e tau tagata he Tohi Tapu ke he tau tagata kehekehe he magafaoa. Falu ne fiafia he fanogonogo ke he tapakiaga he Tohi Tapu. “Uka au ke kamata ke totou,” he talahau he taha fifine, “ti kamata au ke fanogonogo ke he tau totouaga he Tohi Tapu ne tapaki. Mogonei kua moua e au e Tohi Tapu ke atihake lahi ka e nakai ko e pepa mitaki noa ni.”

Puhala 6—Manamanatu fakahokulo

◼ Ko e mafiti mo e tau fakatauhele he moui he vahā nei kua nakai lagomatai e manamanatu fakahokulo. Pete ia, tuga ni he lata ia tautolu ke tavili e tau mena kai ke huhua mitaki, kua lata ia tautolu ke manamanatu fakahokulo ke he mena ne totou e tautolu mai he Tohi Tapu ke maeke ke aoga. Taute e tautolu e mena nei he liu manamanatu e mena ne totou e tautolu mo e hūhū hifo ki a tautolu e tau hūhū tuga anei: ‘Ko e heigoa kua fakaako e au hagaao ki a Iehova ko e Atua? Aoga fēfē e mena nei ki a au? Liga fakaaoga fēfē ai e au ke lagomatai e falu?’

Ko e manamanatu pihia ka hafagi e fekau he Tohi Tapu ke hokotia ke he tau loto ha tautolu ti fakatupu e olioli kua moua e tautolu he totou e Kupu he Atua. Pehē e Salamo 119:97: “Kua lahi ni haku a manako ke he hāu a fakatufono; kua manamanatu au ki ai ke he aho oti.” Puhala he manamanatu fakahokulo, ne eke he salamo e tau Tohiaga Tapu mo manamanatu haana he tau aho oti. He taute pihia ne lagomatai a ia ke feaki e fiafia lahi mahaki ke he mena ne fakaako e ia.

Puhala 7—Moua e lagomatai ke maama

◼ Nakai amanaki e Atua ki a tautolu ke maama katoatoa e Kupu haana he malolō ni ha tautolu. Talahau pihia foki he Tohi Tapu kua ha ha ai “falu a kupu kua uka ke [maama] ai.” (2 Peteru 3:16) Ko e tohi ha Gahua ne fakamaama kua uka he takitaki Aitiope ke maama e faahi kupu Tohi Tapu ne totou e ia. Ne fakafano he Atua e taha he Haana tau fekafekau ke lagomatai a ia, mo e fua ko e tagata Aitiope ne “fano foki a ia he hana fenoga mo e fiafia.”—Gahua 8:26-39.

Maeke foki ia koe ke aoga lahi mai he totou e Tohi Tapu he moua e lagomatai ke maama e mena ne totou e koe. Matutaki ke he Tau Fakamoli a Iehova he matakavi haau, po ke tohi ke he kaina he lau 4 he mekasini nei ma e fakaako Tohi Tapu he kaina ne nakai totogi.

[Tau Matahui Tala]