Bibliata entiendenapaq qanchis yanapaykuna

“Ni mayqin libropis Bibliajina vendekunchu. Imaraykuchus Bibliaqa, watamanta wata, ima libromantapis astawan vendekun.” (TIME NISQA REVISTA)

“Bibliata wakin kutilla ñawirini, chaywanpis puñuyllata atichiwan.” (INGLATERRAMANTA KEITH, TAKIYKUNATA RUWAQ)

ACHKHA runas Bibliayuq kanku. Chaywanpis, wakillan yachachiyninwan yanapachikunku. Juk warmi Nancy sutiyuq, nin: “Kay 35 watastaña, sinchi llakisqa unquyniyta atipanaypaq, imaymana yanapasta maskʼarqani. Chaywanpis, Bibliata sapa paqarin ñawiriy, mayta yanapawarqa”.

Bibliata ni jaykʼaq ñawirirqankichu chayqa, ichá tapukunki: “¿Imaraykutaq Biblia runasta yanapan?”. Bibliata ñawirichkanki chayqa, ¿imaynatá astawan entiendewaq? Kay yachaqanaqa, qanchis yanapasta sutʼinchan.

1: Chiqan yuyaywan ñawiriy

▪ Wakin runasqa, kʼacha parlaykunata tarinankurayku, yuyaychaykunata munasqankurayku, ñawirinanku kasqanta yuyasqankurayku ima, Bibliata ñawirinku. Chaywanpis, chiqamanta yanapachikunaykipaqqa Diosmanta yachakuyta munaspa, nisqanmanjina kawsayta munaspa ima, ñawirinayki tiyan.

Bibliaqa imaraykuchus ñawirina kasqanta, rikuchiwanchik: “Pichus Diospa nisqanta uyarispa mana kasojqa rijchʼakun espejopi uyanta qhawarikoj runaman. Chay runaqa uyanta qhawarikuytawankama ripullan, chantataj qonqapun imaynachus uyan kasqanta. Pichus allinta qhawan Diospa sumaj kacharichej leyninta, chayllapipuni sinchʼita sayaspa, manataj qonqapojllachu kaspa leypa kamachisqanta juntʼan, chay runaqa kusikuyniyojmin ruwasqampi” (Santiago 1:23-25).

 Kay runaqa, espejopi uyanta qhawakun. Chaywanpis mana imatapis ruwanchu. Ichá, usqhayllata qhawakusqanrayku chayri mana allinchakuyta munasqanrayku. Kikillantataq, qhillakuspa chayri mana kasukuyta munaspa Bibliata ñawirinki chayqa, mana yanapasunqachu. Chaywanpis, yachakuyta munaspa, ñawirinki chayqa, kusisqa kanki.

2: Juk sumaq Bibliata maskʼakuy

▪ Ichá qalluykipi, imaymana Biblias akllanaykipaq tiyan. Mayqillantapis ñawiriyta atispapis. Wakin Bibliasqa, mana entiendenapaqjina (Hechos 4:13). Chayrí wakinkunataq, pantasqa yuyaykunawan chaqrunku. Sutʼincharinapaq, wakin Bibliaspi, Jehová sutita, “Señor” chayri “Dios” nispa tikrachinku. Chayrayku, entiendenapaqjina, chiqanta willaq Bibliata maskʼakuy.

May chhika runas, kay Traducción del Nuevo Mundo nisqa Bibliata ñawirinku. * Imaraykuchus entiendenapaqjina, chiqanta willasqantataq ninku. Bulgariamanta juk machuyasqa runaqa, Jehovamanta sutʼinchaqkunap tantakuyninkumanta, chayjina Bibliata apakusqa. Nirqa: “Unaytaña ñawirini. Ni jaykʼaqtaq chayjina chʼuwitata entienderqanichu, sunquymanpuni chayawan”.

3: Diosmanta mañakuy

▪ Bibliata ñawirichkaspa Diosmanta mañakunki chayqa, aswan sumaqta entiendenki. Salmos librop juknin qillqaqninqa, Jehovamanta ajinata mañakurqa: “Ñawisniyta kichariy rikuyta atinaypaj chay jina kʼacha kamachisqasniykita”, nispa (Salmo 119:18). Diosmanta mañakuchkaspaqa, Palabranta quwasqanchikmanta agradecesqa kasqanchikta nisunman. Imaraykuchus, Biblianiqta Payta riqsiyta atinchik (Salmo 119:62).

¿Imaynatá Dios mañakuyninchikta uyarisqanta yachanchik? Uruguay suyupi iskay sipaskunamanta parlarina. Kay iskay ñañasqa, Daniel 2:44 pʼitita mana entiendeyta atichkarqankuchu. Entiendenankupaqtaq pillatapis kachamunanta Diosmanta mañakusqanku. Bibliankuta niraq wisqʼachkaptinku, iskay Jehovamanta sutʼinchaqkuna, punkunkuta takamusqanku. Paykunataq, chay pʼititapuni, ñawiripusqanku. Sutʼinchasqankutaq, Diospa Reinon, kay pachapi tukuy kamachiqkunata chinkachinanta. * Chay iskay sipaskunaqa, Dios mañakuyninkuman kutichisqanta sutʼita repararqanku.

4: Sapa pʼunchay ñawiriy

▪ May chhika runas, chʼampaypi, llakiypi rikukuspalla, Bibliata ñawirinku. Sutʼincharinapaq, librosmanta negociopi kamachiq runaqa, nirqa: “Kay 2001 wata 11 septiembre killapi, iskay jatuchaq edificiosta, avioneswan urmachisqankumanta qhipaman, runasqa, Bibliata mayta rantiyta qallarirqanku”. Chayrayku Diosqa, Palabranta sapa pʼunchay ñawirinanchikta niwanchik: “Kay libropi Diospa leyninmanta kajtaqa willaypuni kʼiskimanta. Tuta pʼunchay unanchay kay libropi, imatachus nisqanta ruwanaykipaj, ajinamanta tukuy ima ruwasqaykipi allin risunampaj” (Josué 1:8).

¿Imaraykutaq Bibliata ñawirinapuni tiyan? Sutʼinchana. Juk runa, wiksan nanaptillan mikhunamanta cuidakuptin, ¿chay ruwasqan yanapanmanchu? Mana, ¿icharí? Imaraykuchus, sapa pʼunchay cuidakuspalla, sanoyapunqa. Jinallatataq, Biblia ‘tukuy  ima ruwasqanchikpi’ yanapanawanchikpaqqa, sapa pʼunchay ñawirinanchik tiyan.

5: Tukuy imaymanamanta ñawiriy

▪ Bibliata qallariyninmantapacha ñawiriyqa, may allin. Astawan miskʼirichikunaykipaqqa, kayjinasmantawan ñawiriwaq:

Juk runamanta. Diospa juknin kamachinmanta parlaq librosta chayri tʼaqasta maskʼariy. Ichá ñawiriwaq:

• Josemanta: Génesis 37-50.

• Rutmanta: Rut 1-3.

• Jesusmanta: Mateo 1-28; Marcos 1-16; Lucas 1-24; Juan 1-21. *

Juk yachaqanamanta. Juk yachaqanamanta parlaq pʼitista maskʼariy. Sutʼincharinapaq, mañakuymanta imatachus Biblia yachachisqanta, imaynatachus Diospa kamachisnin, mañakusqankuta maskʼarispa ñawiriy. *

Uyarikunanpaqjina ñawiriy. Bibliaqa, chayta ruway allin kasqanta niwanchik (Nehemías 8:8). Familiaykipi ichá sapa juk chayri imaynatachus ñawpaqpi parlasqankumanjina uyarikunanpaqjina ñawiriwaqchik. Chantá, Bibliamanta grabacionesta uyarillawaqchiktaq. Juk warmi nin: “Bibliata ñawiriyta, qhillakuq kani. Chayrayku grabacionespi uyariyta qallarirqani. Kunanqa, Bibliawan miskʼichikuni, ima novelamantapis aswan sumaqpuni”.

6: Tʼukuriy

▪ Achkha ruwanasniyuq kasqanchikrayku, tʼukurinapaq mana tiempochakuyta atillanchikchu. Chaywanpis, Bibliawan yanapachikunapaqqa, ñawirisqanchikpi tʼukurinapuni tiyan. Imaynatachus mikhusqanchik kallpachanawanchikpaq, wiksanchik llamkʼan. Kikillantataq, Bibliapi ñawirisqanchik yanapanawanchikpaq, tʼukurinanchik tiyan. ¿Imaynatá chayta ruwasunman? Imatachus yachakusqanchikta yuyarina, tapurikunataq: “Kay ñawirisqay, ¿imatá Jehová Diosmanta yachachiwan? ¿Imaynatá kawsayniypi yanapawanman? ¿Imaynatá kay yachakusqaywan, wakkunata yanapayman?”, nispa.

Diospa yachachiynin, sunqunchikman chayananpaqqa, tʼukurinanchikpuni tiyan. Chayta ruwaspaqa, salmistajina may kusisqa nisunchik: “Maytapuni kamachisqasniykita munakuni; tukuy pʼunchaynintin chayllapi unanchani” (Salmo 119:97). ¿Imaraykutaq salmista Diospa leyninpi unanchaq? Imaraykuchus unanchasqanqa, chayri tʼukurisqanqa, Diospa Palabranpi yachakusqanta astawan munakunanpaq yanapaq.

7: Yanapata maskʼay

▪ Diosqa, Bibliapi wakin yachachiykunata mana entiendeyta atinanchikta yachan. Chayrayku, Bibliapi niwanchik: “Wakin imasqa mana usqhayta entiendenapaj jina kanku” (2 Pedro 3:16). ¿Maypi yanapata tarisunman? Hechos libro, juk etíope runamanta parlawanchik. Payqa, Diosmanta Qillqasqapi ñawirisqanmanta, mana entiendeyta atichkarqachu. Chayrayku Diosqa, juk kamachinta entiendechinanpaq kacharqa. Allinta entiendespaqa, “may kusisqa riporqa” (Hechos 8:26-39).

Qampis, Bibliap yachachiykunasninta astawan entiendeyta munanki chayqa, llaqtaykipi Jehovamanta sutʼinchaqkunata maskʼawaq. Chayrí, kay 4 paginapi rikhuriq, mayqin lugarllamanpis qillqamuwaq.

[Sutʼinchaykunasnin]