Bibliata leinqantsik alli yanapamänapaq qanchis yachatsikïkuna

“Bibliaqa manam unëpitana más rantikuyanqa librollatsu, hina watachö imëpis más rantikuyanqan librom.” (REVISTA TIME.)

“Hora höraqa Bibliata leïmi, pero alläpa aburripaqtanömi rikä.” (KEITH, INGLATERRAPITA MÚSICO.)

¡MANA creipaqnömi! Hinantin Patsachö Biblia kaptimpis, mëtsika nunakunam ardëlla katsikuyan. Pero wakin nunakunataqa Biblia yanapanmi. Tsëta rikärishun, Nancy shutiyoq warmim kënö nin: “Alläpa llakinëwan qeshyarmi kima chunka pitsqa watakuna yamë këta ashirqa. Pero imëkata pasarpis alli tsarakunapaqqa más yanapamashqa, llapan qoyakuna [wäraykuna] Bibliata leinqäman pensëmi”.

Mana imëpis leishqa karqa, ¿tapukushqankiku wakin nunakunata imanöpa Biblia alläpa yanapanqanta? Y imëpis leirqa, ¿imanöraq leinkiman más yanapashunëkipaq? Qateqnin yachatsikïkuna itsa yanaparishunki.

1 Yanapashunëkita munar lei

▪ Unë pasanqankunata shumaq willakuptinlla, alli yachatsikïkunata tarita munarlla y leiyänan kaptinllam wakinkunaqa Bibliata leiyan. Pero Bibliataqa leinantsik Diospita yachakïta munar y yachakunqantsik kawënintsikchö imanö yanapamänapaq kaqtapis musyëta munarmi.

Kikin Bibliam huk igualatsikïwan rikätsikun yanapamänantsikta munar leinantsik imanir precisanqanta, kënömi nin: “Sitsun alli willaquininta juc nuna wiyecar mana cäsucurnin, cumplenqatsu; tse nunaqa espejucho qaqllanta ricacoq cuentam quecan. Tse nunam espejucho ricapäcurir eucurnin, imanopis cashqanta paqwepa qonqarin. Peru meqan nunapis salbacoq alli willaquininta alcabu wiyar mana qonqashpa cäsucuptenqa, ima rurenincunachopis Diosmi bendisiconqa” (Santiagu 1:23-25).

Kë texto ninqannöpis, kë nunaqa espëjochö rikäkurirpis manam imanta altsakurqantsu.  ¿Imanir? Itsachi raslla rikakushqa kar o mana altsapäkïta munëkar rikakushqa kar. Hina tsë cuentallam qelanëkar o yachatsikunqannö mana kawëta munëkar Bibliata leiqa yanapakuntsu. Pero llapan shonqïkiwan Bibliata leir y yachatsikunqannö kawëta tïrarqa imëpis kushishqam kakunki.

2 Alli traducishqa Bibliata lei

▪ Castellänochöqa atska Bibliakunam kan akranapaq. Mëqampis allim kanman, pero alli yanapashunëkita munarqa imanö traducishqa kanqantam shumaq rikänëki. Wakinkunaqa manana pï parlanqan palabrakunawan o alli estudiashqakunalla parlayanqan palabrakunawan traducishqa kaptinmi, alläpa sasa käyinan o mayanan (Hechos 4:13). Wakinkunanam, costumbrekunata qatir rasun kaq yachatsikïkunata hukläyaman tumatsiyashqa. Kë revistapa qallanan yachatsikïninchö ninqannömi wakinkunaqa Diospa shutin Jehoväta churayänampa rantin “Señor” y “Dios” nirllana churayashqa. Tsëmi alli traducishqa y mana sasa käyinan Bibliata leinantsik precisan.

Mëtsika nunakunam Traducción del Nuevo Mundo nishqan Biblia alläpa alli kanqanta niyan. * Tsënömi pasarqan Bulgaria nacionpita huk awkin nunawan, Jehoväpa testïgonkuna ëllukäyanqan wayichömi tsë Bibliata qoyarqan. Kananqa kënömi nin: “Unënam Bibliata lei, pero kë mana sasa yachakunan y shonquman chaq Bibliatanöqa manam imëpis leishqatsu kä”.

3 Diosman mañakï

▪ Bibliata leinëkipaq imëpis Diosman mañakurqa, masmi leinqëkipita yachakunki. Tsënömi rurarqan salmokuna qellqaqpis: Tsëmi, “nawïta kichëkullë, leynikichö alläpa shumaq këkaqkunata rikänäpaq” nir mañakurqan (Salmo 119:18). Hina Diosman mañakurqa agradecikushwanmi Bibliata qomanqantsikpitapis, tsëta qomashqantsik kaptinmi pëta reqintsik (Salmo 119:62).

Pero ¿imanötaq musyashwan mañakushqa Diosnintsik wiyamanqantsikta? Tsëta musyanapaqqa, Uruguay nacionchö ishkaq nanapura shipashkunata pasanqanta rikärishun. Daniel 2:44 texto imapaq parlanqantam allillaqa musyayarqantsu, tsëmi pillapis yachëkatsinampaq Diosman mañakuyarqan. ¿Imataq pasarqan? Manaraqpis Bibliankunata wichqayaptinmi ishkaq Testïgokuna punkunman takakuriyarqan, nïkurmi tsë yachakïta munëkäyanqan textota leirapur, Diospa Gobiernon nunapa gobiernonta ushakätsinampaq kaqpaq parlëkanqanta yacharatsiyarqan. * Tsëchömi mañakïninkunata Dios wiyanqanta ishkan shipashkuna cuentata qokuriyarqan.

4 Llapan hunaqkuna lei

▪ Problëmakuna kaptin o ima desgraciapis pasaptinllam wakinkunaqa Bibliata leipäyan. Tsëtam rikätsikun librokuna rantikuyänan wayipa directornin willakunqan, 11 de septiembre de 2001 watachö Torres Gemëlasta terroristakuna ushakäratsiyaptinshi, “imëpitapis más Bibliata nunakuna rantiyä[naq]”. Pero kikin Diosmi Palabran Bibliata llapan hunaqkuna leinata munar kënö nimantsik: “Kë librochö leykunaqa shimikichömi imëpis këkänan, y paqasta hunaqtam leinëki y leinqëkimanmi yarpachakunëki; tsëchö qellqarëkaq ninqannö imëpis ruranëkipaq, tsëqa nänikichö allim yarqapushunki y alli kaqllatam rurankipis” (Josué 1:8).

¿Imanirtaq alläpa precisan imëpis Bibliata leinantsik? Këman yarpärishun. Huk nuna wirakunata y imëkakunata lluta mikunqampita huk kuti ataque cardiaco qoshqa kaptin, imëkatapis mana lluta mikunampaq churakanman. Pero ¿shonqun nanaptinraq lluta mikïkunapita  cuidakunqan allitsuraq kanman? Manam. Antis llapan hunaqkuna lluta mikïkunapita cuidakunqanmi alliqa kanman. Tsënöllam, imëkapis ‘alli yarqapamänapaq y alli kaqllata ruranapaqqa’, Bibliata llapan hunaqkuna leinantsik.

5 Tukïnöpa leïta tïrë

▪ Bibliachö këkaq librokunata qatinallaman leinan alli kaptimpis, hukmampa leïpis yanapashunkim mishkipäkur yachakunëkipaq:

Unë nunakunapaq parlaqta. Unë Diosta sirveq nunakunapaq parlaq librota o capïtulota ashikur lei. Pëkunam wakinkunaqa kanman:

• José: Génesis 37-50.

• Rut: Rut 1-3.

• Jesús: Mateo 1-28; Marcos 1-16; Lucas 1-24; Juan 1-21. *

Yachatsikïkunapa. Huk yachatsikïllapita parlaq textokunata ashikur lei. Kënömi rurankiman: Diosman mañakïpaq Biblia imata ninqanta yachakï, nïkurna Diospa unë sirveqninkuna imanö mañakuyanqanta lei. *

Sinchipa lei. Tsënö leiqa alli yanapakunqantam Biblia rikätsikun (Apocalipsis 1:3, NM). Hina familiachö llapëkikuna leiyänëkipaqpis churakäyankimanmi; hukniki kaqkuna itsa leiyankiman huk o ishkë versïculota y pipaqpis parlëkanqampa vozninwannö leiyankiman. Hina grabashqa Bibliatapis allim wiyashwan. Huk warmin kënö nin: “Bibliata leinä sasaraq kaptinmi grabashqa Bibliata wiyar qallarqä. Kananqa ima novëlata qawarëpitapis, grabashqa Biblia wiyëmi más gustaman”.

6 Leinqëkiman pensanëkipaq tiempota horqë

▪ Imëka ruranantsik kaptinmi leinqantsikman pensanapaq tiempota tarinantsik sasaraq. Pero tsëta rurëqa alläpam precisan Bibliata leir alli yachakunapaq. Imanömi mikurishqa pachantsik alimentota shoqunan precisan, tsaq tsënöllam leinqantsikman pensanantsikpis precisan. Tsëqa, imëka pachantsik mikïta shoqoq cuenta, Bibliapita yachakunqantsik yanapamänapaq, ¿imanöraq leinqantsikman pensashwan? Leinqantsikta yapë yarparnin y këkunata tapukurmi: “¿Imatataq Jehoväpita këchö yachakö?” “¿Imanötaq kawënïchö yanapaman?” “¿Imanöraq kë yachakunqäwan wakinkunata yanapäman?”.

Kë tapukïkunaman pensanantsikqa alläpam precisan, tsënöpa Diospa yachatsikïnin shonquntsikman chänampaq. Tsëqa Bibliata leir alläpam kushikushun, Salmo qellqaqnöpis, “¡imanömi leynikita kuyëkö! Paqasta hunaqtapis tsëllamanmi yarparëkä” nishunmi (Salmo 119:97). ¿Imanirtaq kë Salmota qellqaq nuna Diospa Palabranllaman yarparäkoq? Leinqankunaman pensanqanmi yanaparqan Diospa Palabrampita yachakunqanta más kuyanampaq.

7 Bibliapita alli yachatsikoqta tapukï

▪ Bibliachö llapan leinqantsikta kikintsikllapita käyinata o mayanataqa manam Dios shuyarantsu. Rasun kaqchöqa, kikin Bibliam nin wakin yachatsikïninkuna ‘sasa cäyinan’ kanqanta (2 Pedru 3:16). ¿Piraq yanapamashwan? Hechos librom willakun, Etiopía nación gobiernopaq trabajaq nuna Bibliata leir mana käyinqanta. Tsëmi huk sirveqninta Dios kacharqan yachatsinampaq. Y yanapariptinqa, “allapa cushishqam eucorqan” (Hechos 8:26-39).

Qampis Biblia ninqampita alli yachakïta munarqa, huk alli yachatsikoqta tarinkim. ¿Imanö? Jehoväpa testïgonkunawan parlari, o kë revistata qellqamoqkunaman Bibliapita debaldilla yachatsiyäshunëkipaq qellqari (4 kaq päginanchömi atska direccionkuna këkan). Bibliata leinqëki alli yanapashunëkipaq kë qanchis yachatsikïkuna yanapashunëkitam munayä.

[Päginapa ura kuchunchö willakïkuna]