Igbenda Itiankarihiar i Se Ôr Bibilo Ve Se Zua a Iwasen Yô

Ipipaabaver i í yer ér TIME MAGAZINE la kaa ér, “Hii sha ayange a tsuaa la je, takerada môm ngu u i hembe teen u a Bibilo ga, shi nyian kpa, hanma inyom yô ka i hemba teen Bibilo a hanma takerada ugen cii.”

KEITH, OR U KUHWAN ITYOGHOLOUGH U ZAN GWA, U KEN TAR U INGILA kaa ér, “Ka m ôr Bibilo ashighe agen, kpa m ngu a nenge a kwagh môm ker u doon mo ga.”

KWAGH u kpilighyol yô, ior kpishi mba a Bibilo, kpa mba fe zuan a iwasen sha u ôron i ga. Kpa mbagenev yô, akaa a ve ôron ken Bibilo la doo ve je zua ga. U tesen ikyav yô, kwase ugen u i yer un ér Nancy yô kaa ér: “Er m gem ôron Bibilo hanma iyange pepe, shi m gem gbidyen kwar sha kwagh u m er ker la yô, hanma iyange yô ka m zua a ishimataver i ia wasem u nôngon a nyityô mzeyol u alaghga me tagher a mi ken sev mbura cii. Kwagh u m gem eren ne hemba wasem mo u panden ishimanyian a nyityôkwagh igen i m vande eren ken atô u anyom 35 a karen la cica cii.”

Wea lu a vande ôron Bibilo ga je kpa, kpiligh we iyol er mbagenev ka vea ôr i ve ve zua a iwasen yôô? Wea vanden ôron i yô, a sar u u ôron i sha gbenda u ia hemba wasen we ga zee? Aluer ka nahan yô, dondo ase igbenda itiankarihiar i í ter ken ngeren ne la.

Gbenda 1​—Ôr Bibilo a awashima u dedoo

◼ Ú fatyô u ôron Bibilo sha ci u ú nenge wer ka takerada u doon u ôron, shin ka hange hange u ôron i. Shin alaghga ú ôr i sha ci u ú nenge wer akaa nga ker a aa wase u ken tar u ú ngee a mbamzeyol yum ne. Nahan cii kpa, ú hemba zuan a iwasen aluer awashima wou ka u henen mimi sha kwagh u Aôndo yô. Heela tseegh ga, ú zua a iveren kpishi aluer ú ngu ôron Bibilo sha ci u ú soo wer loho u Bibilo u̱ gema uma wou yô.

Ruamabera kaa ér Bibilo ngi er ka ijingi nahan, sha nahan yô Ruamabera pase var var er i doo u se ôron Bibilo a ityôkyaa i dedoo yô. I nger ken Yakobu 1:23-25 ér: “Aluer ma or ngu ungwan kwaghôron la, kpa nan ngu eren sha mi ga yô, nan ngu inja er or  u nan nenge ishigh ki nan ki marami la ken ijingi nahan. Gadia ka nan nenge iyol i nan, kpa nan yemen kera yô, fese je i hungur nan er nan lu yô. Kpa or u nan kenger sha tindi u vough u a pasen se a toho la shi nan veren ishima yô, á saan nan iyol ken aeren a nan cii, gadia u ungwan kwagh yô, nan ngu or u kwagh hungur nan fefa ga, kpa nan ngu or u eren tom je.”

Or u i er kwagh na ken ikyav i tesen ne la nan nenge ishigh ki nan ken ijingi kpa nan sôr mbamshi mba nan nenge a mi la ga. Alaghga nan nenge ishigh ki nan kpase, shin alaghga nan nenge tsembelee je kpa gba nan ishima u sôron mbamshi mba nan nenge a mi la ga. Kape aluer se kpa se mba ôron Bibilo sha inja ga shin se mba eren sha kwagh u se er la ga ve se zua a iwasen ga je la. Kpa aluer se mba gban ashe ken Bibilo sha ci u se soo u “eren tom” sha kwagh u se nenge a mi ker la, nahan se de ser mhen u Aôndo a̱ bende a mhen wase man aeren a ase yô, se zua a msaanyol u mimi.

Gbenda U Sha 2​—Wea ôron Bibilo yô, ôr Bibilo i í Gem i sha inja yô

◼ Alaghga i gema Ubibilo atô kposo kposo ken zwa wou mba ú fatyô u tsuan môm ker ôron yô. Hanma Bibilo cii, ia fatyô u wasen we, nahan cii kpa i gema Ubibilo mbagenev sha asember a mbayiase shin sha asember a mbafantakerada, nahan alaghga asember ne aa taver we u ôron. (Aerenakaa 4:13) Ubibilo mbagenev je yô, i nger ukaaer mba iorov ker, nahan i gema loho u vough u ken Bibilo la i ta kera. U tesen ikyav yô, i dugh iti i Aôndo i í yer ér Yehova la ken Ubibilo mbagenev kera, i gema i wa atiatom, amba er “Aôndo” shin “Ter” nahan sha ityough ki iti i Aôndo la. Nahan wea soo u ôron Bibilo yô, ôr Bibilo i í gem i vough, sha asember a taver ga man sha gbenda u a maa or iyol u ôron kpaa yô.

Ior mba ôron Bibilo umiliôn umiliôn sha tar, nenge ér i gema Bibilo i í yer ér New World Translation la vough, shi i taver u ôron ga, shi ka Bibilo i maan or iyol u ôron kpaa. * Se tese ikyav sha ortamen ugen ken tar u Bulgaria. Or ne yange za mkombo u Mbashiada mba Yehova, nahan i na un kôpi u Bibilo i New World Translation la. Er i yô, a kaa ér, “M ôr Bibilo ica gba hegen, kpa m ngu a ôr Bibilo i i leghem u ôron shi i kerem ken ishima er ngin nahan ga.”

Gbenda U Sha 3​—Msen

◼ Ú fatyô u seer kaven Bibilo sha u sônon Un u a ne i nger Bibilo la iwasen, vough er orpasalmi kpa yange er nahan. Yange sôn Un iwasen kaa ér: “Bughum ashe, m̱ nenge akaakpilighyol a ken atindiakaa a Ou la.” (Pasalmi 119:18) Hanma shighe u ú soo u ôron Ruamabera yô, sôn Aôndo a̱ wase u ú kav Mkaanem nam. Shi ú fatyô u wuese Aôndo er a ne se Bibilo nahan, gadia a Bibilo shio yô se fa Aôndo ga.—Pasalmi 119:62.

Aôndo ongo mbamsen mba pinen iwasen hen a na mban je kpa? Nenge ase kwagh u yange er agumaukase agen ahar ken tar u Uruguay, a a lu ngô môm yô. Kwagh u Bibilo i er ken Daniel 2:44 la yange tsume ve kpishi, nahan ve er msen ér Aôndo a̱ tindi or nana va ta ve iwanger. Mbayevkasev mban lu a cir Bibilo ve ga je tsô Mbashiada mba Yehova mbagenev uhar va kuma uwegh sha hunda ve, ve hii iliam a ve, nahan ve bugh Bibilo hen ivur shon i môm i̱ ve er msen ér Aôndo a̱ tindi or nana ta ve iwanger sha mi la, ve ôr her shi ve pase ve er ijiir la i lu ôron kwagh u ugomoti mba uumace, mba Tartor u Aôndo ua tim ve kera, ua kar a hemen uumace la. * Mbayevkasev mban na jighjigh ér Aôndo ungwa msen u ve er ér a̱ wase ve la.

Gbenda U Sha 4​—Ôron i ayange ayange

◼ Or u gberen takerada ugen kaa ér zum u ior mbawan tswam ta num sha tar u Amerika ken uwer u Setemba 11, 2001 la, “ior yam Bibilo hen shighe la kpishi.” Ior kpishi kwagh ka una tser ve yô ve hii u ôron Mkaanem ma Aôndo. Nahan kpa, Bibilo wa se kwagh ér se ôron i hanma iyange; i̱ kaa a vese ér: “Ruamabera u atindigh ne a̱ de karen sha zwa wou kera ga, kpa zer timen kimi tugh man atetan, sha er ú ver ishima u eren akaa a i nger kimi cii; gadia ka  nahan man ikyôr ia lagh u sha akaa cii, shi ka nahan man ú er kwagh sha inja kpaa ye.”—Yosua 1:8.

Se fatyô u nengen a mtsera u ôron Bibilo hanma shighe la ken ikyav i tesen i sha kwagh u or u nan lu a angev mbu ishimaa, u nan gem yan kwaghyan u dedoo yô. Aluer nan ngu yan kwaghyan u dedoo la shighe u ishima i hii u nyoon nan ker kpoghuloo la tseegh nahan, kwaghyan la una wase nan kpa? Mayange ga. Gba u nana yaan kwaghyan u dedoo ne hanma shighe ve nana hemba zuan a iwasen ye. We kpa, aluer u ngu ôron Bibilo hanma iyange yô, ia wase u nahan “ikyôr ia lagh u sha akaa cii.”

Gbenda U Sha 5​—De er Bibilo gbenda môm tseegh ga

◼ Aluer u hii u ôron Bibilo ken Genese zan zan Mpase yô, u zua a mtsera kpishi, nahan kpa igbenda igen kpa ngi i u ôr Bibilo ve a maa u iyol a mi yô. Nenge ase igbenda shon.

Ôr kwagh u ma or u i er kwagh u nan ken Bibilo yô. Ôr mtom ma Bibilo shin ityakerada i Bibilo i í er kwagh u ma or u civir Aôndo yô, er ior mba se ter shin heen ne nahan:

• Yosev: Genese 37-50.

• Rutu: Rutu 1-3.

• Yesu: Mateu 1-28; Mark 1-16; Luka 1-24: Yohane 1-21. *

Ver ishima sha ma itinekwagh. Ôr avur a Bibilo a á te iwanger sha itinekwagh shon la. U tesen ikyav yô, time sha kwagh u msen u eren, maa ôr kwagh u Bibilo i we se sha kwagh u msen u eren yô, kua mbamsen atô kposo kposo mba i nger ken Bibilo la. *

Ôron Bibilo i duen sha. Aluer ú ngu ôron Bibilo ka duen sha yô, ú zua a iwasen kpen kpen. (Mpase 1:3, NW) Ne fatyô u ôron Bibilo imôngo hen tsombor wen kpaa; ne er kwagh ne sha u ôron avur shin ôron kwagh u ior mba i ter ve ken Bibilo la sha adondo adondo. Mbagenev yô ka i doo ve u ungwan tser u i kor avur a Bibilo ker yô. Kwase ugen kaa ér, “Yange taver mo kpishi u hiin Bibilo i ôron, nahan m hii u ungwan icer i Bibilo. Hegen ne ka hembe maan mo iyol u ôron Bibilo a ma takerada u dedoo u i er kwagh u ior ker cii.”

Gbenda U Sha 6​—Henen sha Kwagh u Ú Er La

◼ Mlu u tar u ainge, u ior ve eren akaa ayem ayem shi akaa a danen ior kpa a ngee yum ne na yô, ka i lu se ican kpishi u teman inya ijiir môm henen sha kwagh. Kpa, gba u se henen sha kwagh u se er ken Bibilo la sha er se zua a iwasen yô, di vough er ka i gba u se tam kwaghyan se mena, iyol yase ia ngohol un ve una wase se nahan. Se fatyô u henen sha kwagh u se er ken Bibilo la sha u hiden gbidyen kwar sha kwagh shon, man sha u pinen ayol a ase mbampin inja er: ‘Kwagh u m er ne tesem nyi sha kwagh u Yehova Aôndoo? Kwagh ne bende a mo nena? Me yar tom a mi sha u wasen mbagenev nena?’

Ka sea hide sea hen sha kwagh u se er ken Bibilo la yô, loho u Bibilo la u bende a ishima yase, nahan i hemba saan se iyol u ôron Mkaanem ma Aôndo. Pasalmi 119:97 kaa ér: “Atindiakaa a Ou, doom ishima zee! Kam kwagh u shin henen sha mi didi.” Er orpasalmi henen sha akaa a i nger ken Ruamabera la didi yô, akaa shon doo un ishima kpishi.

Gbenda U Sha 7​—Lumun iwasen sha er u kav Bibilo yô

◼ Aôndo fa er i lu kwagh u se fatyô u kaven Mkaanem nam sha iniôngon yase tseegh ga yô. Bibilo iyol i i pase ér ‘akaa agen ker nga ican u kaven.’ (2 Peteru 3:16) Takerada u Aerenakaa ôr se kwagh u Oretiopia ugen u eren tom ken ya u tor, u yange ôr ijiir igen ken Bibilo, nahan nzughul un kpishi yô. Aôndo yange tindi ortom na ugen ér a̱ za wase Oretiopia ne, nahan or ne ‘yem zende na la a iember.’—Aerenakaa 8:26-39.

We kpa aluer u lumun wer i̱ wase u ú kav kwagh u ú er ken Bibilo la yô, kwagh u ú er la una hemba wasen we. Wea soo wer i va hen Bibilo a we hen ya wou gbilin yô, lam a Mbashiada mba Yehova mba hen ijiir you, shin nger se washika sha adereshi môm ken mbaadereshi mba ve lu sha peeji 4 u magazin ne la.

[Ngeren mba shin kpe]