Sevenpela Rot Bilong Kisim Helpim Long Ritim Baibel

“Long bipo yet Baibel em i nambawan buk ol man i save baim, na i stap yet olsem nambawan buk ol man i save baim long olgeta wan wan yia.”​—NIUS TIME.

“Mi save ritim Baibel long sampela taim, tasol mi save les nating taim mi wok long ritim.”​—KEITH, MAN INGLAN I GAT NEM LONG MUSIK.

PLANTI man i gat Baibel, tasol ol i no kisim helpim tumas taim ol i ritim. Tasol sampela narapela i save pilim tru samting ol i ritim. Olsem, wanpela meri nem bilong em Nancy, i tok: “Kirap long taim mi stat ritim Baibel long ol bikmoning na tingim tingim long bel ol tok bilong en, mi pilim olsem mi redi long bungim ol hevi bilong dispela de. Dispela pasin mi bihainim i bin helpim tru mi long lusim pasin bilong bel hevi, winim ol narapela samting mi bin traim insait long 35-pela yia.”

Maski yu no bin ritim Baibel long bipo, yu kirap nogut long save olsem sampela i bin kisim helpim taim ol i ritim? Sapos yu save ritim Baibel, yu laik kisim sampela helpim moa taim yu wok long ritim? Sapos olsem, traim bihainim ol dispela 7-pela rot em dispela atikol i stori long em.

NAMBA 1​—I mas i gat gutpela as taim yu ritim Baibel

◼ Yu inap ritim Baibel olsem wanpela gutpela buk i gat ol stori, o long wanem yu gat wok long ritim, o bilong painim ol gutpela tok bilong helpim yu long nau we i gat planti hevi long graun. Tasol yu bai kisim gutpela helpim moa sapos yu tingting strong long lainim tok i tru bilong save long God. Na tu, yu bai kisim planti gutpela blesing sapos yu ritim Baibel bilong save long olsem wanem tok bilong Baibel inap helpim laip bilong yu.

Ol ves bilong Baibel i kamapim olsem em i bikpela samting long i mas gat gutpela as na yumi ritim Baibel. Em i tok Baibel i olsem glas bilong lukluk: “Sapos wanpela man i harim nating tok bilong God, na em i no bihainim, em i olsem man i lukim  pes bilong en long glas. Em i lukim pes bilong em yet, tasol em i go na kwiktaim em i lusim tingting long em i gat wanem kain pes. Tasol dispela lo i save brukim strong bilong sin na mekim yumi i stap fri, em i stret olgeta. Na sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru. Tasol em i no ken harim nating na lusim tingting hariap.​—Jems 1: ​23-​25.

Dispela man long tok piksa i lukim pes bilong em long glas, tasol em i no stretim gut skin na klos bilong em. Ating em i lukluk hariap tasol long em yet long glas, o ating em i no gat laik long mekim ol senis. Wankain tu, yumi bai kisim liklik helpim tasol sapos yumi ritim Baibel hariap hariap tasol, o yumi no mekim ol samting em Baibel i tok yumi mas mekim. Tasol yumi inap kisim amamas tru sapos yumi ritim Baibel, long wanem, yumi laik “bihainim tru tok,” olsem larim tingting bilong God i stretim ol tingting na pasin bilong yumi.

NAMBA 2​—Makim Baibel ol i tanim gut tok

◼ Ating yu gat planti Baibel yu inap makim, ol i tanim long tok ples bilong yu. Tru olgeta Baibel inap helpim yu, tasol sampela i gat ol wed em man i no yusim tumas o i gat ol wed em man nating i no inap save long en. (Aposel 4:13) Sampela tok ol i tanim long ol Baibel i bin senisim tru ol tok i tru na ol i kamapim sampela tok em ol man yet i kamapim. Olsem yumi lukim long tripela stori long kirap bilong dispela magasin, sampela i bin senisim nem bilong God, Jehova, na putim ol biknem, olsem “God” o “Bikpela.” Olsem na taim yu makim wanpela Baibel, painim wanpela em ol i bin tanim stret na ol tok bilong en i klia na bai yu amamas long ritim olgeta taim.

Planti milion man long olgeta hap bilong graun i bin painimaut olsem Baibel New World Translation i mekim olsem. * Tingim wanpela lapun man long Balgeria. Em i go long wanpela miting bilong ol Witnes Bilong Jehova na ol givim em wanpela Baibel New World Translation. Bihain em i tok, “Mi bin ritim Baibel inap planti yia, tasol no gat wanpela Baibel mi bin ritim em i isi long kliagut long ol tok na i save go insait stret long bel.”

NAMBA 3​—Beten

◼ Yu inap kisim sampela save moa long Baibel long rot bilong askim Man i as bilong ol tok bilong Baibel long helpim yu, olsem man bilong raitim song, em i tok: “Yu kliaim tingting bilong mi bai mi inap save gut long olgeta gutpela gutpela tok i stap long lo bilong yu.” (Song 119:18) Beten long God long olgeta taim yu ritim tok bilong Baibel, askim em long helpim yu long kliagut long Tok bilong em. Na tu, yu ken tok tenkyu long yumi gat Baibel, long wanem sapos nogat, yumi no inap save long God.​—Song 119:⁠62.

Tru God i save harim kain beten bilong kisim helpim? Tingim samting i bin kamap long tupela tineja susa long Yurugwai. Ol i no kliagut long tok Baibel i mekim long Daniel 2:44 na ol i beten long God i mas salim wanpela man i kam long helpim ol long kliagut long dispela tok. Taim Baibel bilong tupela i op i stap yet, tupela Witnes Bilong Jehova i kam long dua bilong ol, ritim dispela wankain ves tupela susa i beten long en, na ol i kamapim insait bilong en olsem ol gavman bilong graun bai pinis na Kingdom Bilong God bai kamap senis bilong ol. * Dispela tupela susa luksave olsem God i bin harim beten bilong ol long kisim helpim.

NAMBA 4​—Ritim olgeta de

◼ Long taim bilong hevi tasol, planti man i save kirap ritim Tok Bilong God. Wanpela man bilong wokim ol buk, em i tok olsem “planti manmeri tru i bin kirap baim Baibel” bihain long ol teroris i kamapim bikpela bagarap long Amerika long Septemba 11, 2001. Tasol Baibel i kirapim yumi long ritim tok bilong en long olgeta wan wan de: “Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta  arapela samting yu mekim bai i kamap gutpela tasol.”​—⁠Josua 1:⁠8.

Bilong helpim yumi long save olsem pasin bilong ritim Baibel olgeta de em i bikpela samting, yumi ken tok piksa long wanpela man i bin kisim hat atek na nau em i wokim tingting long kisim ol kaikai i gutpela moa. Yu ting em bai kisim gutpela helpim sapos em i kisim tasol gutpela kaikai long taim em i pilim pen long bros? Nogat. Em i mas kisim gutpela kaikai long olgeta taim. Olsem tasol, pasin bilong ritim Baibel long olgeta de bai helpim yu na olgeta “samting yu mekim bai i kamap gutpela tasol.”

NAMBA 5​—Traim kain kain rot bilong ritim Baibel

◼ Pasin bilong ritim Baibel kirap long Buk Stat i go long Kamapim Tok Hait em i gutpela samting tru, tasol i gat ol narapela pasin tu yu ken bihainim bilong kisim nupela strong. Em hia sampela rot.

Ritim ol stori bilong wanpela man o meri bilong Baibel. Ritim ol sapta o ol buk em ol i stori long wanpela wokman bilong God long bipo, kain olsem:

• Josep: Stat 37-50.

• Rut: Rut 1-3.

• Jisas: Matyu 1-28; Mak 1-16; Luk 1-24; Jon 1-21. *

Ritim stori bilong wanpela bikpela tok. Ritim ol skripsa i stori long dispela wankain tok. Olsem: Mekim wok painimaut long dispela tok beten, na ritim tok Baibel i mekim long beten, na tu, long sampela bilong ol planti beten ol i raitim insait long Baibel. *

Ritim long maus. Yu inap kisim gutpela helpim sapos yu ritim Baibel long maus. (KTH 1:⁠3) O famili olgeta i ken bung na ritim long maus, olsem wan wan i ken ritim wanpela paragraf o wan wan i ken makim ol narapela narapela man long Baibel taim ol i rit. Sampela i amamas long harim wanpela stori bilong Baibel rekoding. Wanpela meri i tok: “Mi bin hatwok long kirap ritim Baibel, olsem na mi stat long harim rekoding bilong Baibel. Nau mi save olsem Baibel em gutpela moa long ol buk nating.”

NAMBA 6​—Tingim tingim long bel

◼ Ol samting ol man i mekim long nau i wok hariap hariap na i pulim tingting na i no helpim yumi long tingim tingim long bel ol samting. Tasol olsem yumi mas larim kaikai i go daun long bel bambai em inap helpim yumi, yumi mas tingim tingim long bel ol samting yumi ritim long Baibel bambai dispela i ken helpim yumi. Yumi mekim olsem long rot bilong tingim ol samting yumi ritim na givim ol askim long yumi yet olsem: ‘Mi lainim wanem samting long God Jehova? Olsem wanem mi ken bihainim dispela tok? Olsem wanem mi inap yusim dispela tok bilong helpim ol narapela?’

Pasin bilong mekim wok long tingting olsem, i save mekim na tok bilong Baibel i save go stret long bel bilong yumi na mekim amamas bilong yumi i go bikpela long ritim Tok Bilong God. Song 119:97 i tok: “Mi laikim tru lo bilong yu. Mi save tingting long en long san na long nait.” Long rot bilong tingim tingim long bel Tok Bilong God, man bilong raitim song i kisim pasin bilong laikim tru samting em i lainim.

NAMBA 7​—Askim narapela long helpim yu long kliagut long Baibel

◼ God i save olsem, long save bilong yumi yet yumi no inap kisimgut Tok bilong em. Na Baibel yet i tokaut olsem em i gat ‘sampela tok i stap long en i no klia tumas.’ (2 Pita 3:16) Buk Aposel i stori long wanpela man Itiopia husat i bin tingting planti long wanpela hap bilong Baibel em i bin ritim. God i salim wanpela wokman bilong Em long helpim dispela man, na samting i kamap em olsem dispela man Itiopia “i amamas na i bihainim rot bilong en na i go.”​—⁠Aposel 8:​26-39.

Yu tu inap kliagut moa long ol tok bilong Baibel yu ritim sapos yu askim narapela long helpim yu. Toksave long ol Witnes Bilong Jehova long hap bilong yu o raitim pas long atres i stap long pes 4 bilong dispela nius bilong ol i ken stadi wantaim yu long Baibel, i no gat pe.

[Ol Futnot]