Magoza Ya Nkombo Lama Nga Ku Pfunaka Loko U Hlaya Bibele

“Bibele a ko va buku leyi nga xavisiwa ku tlula tibuku hinkwato ematin’wini ntsena, kambe hi yona leyi xavisiwaka ngopfu lembe ni lembe.”—MAGAZINI LOWU VURIWAKA TIME.

“Minkarhi yin’wana ndza yi hlaya Bibele, kambe ya ndzi lolohisa.”—KEITH, MUYIMBELERI LA DUMEKE WA LE NGHILANDHI.

LEXI twisaka ku vava hileswaku vanhu vo tala lava nga ni Tibibele a va vuyeriwi ha nchumu loko va ti hlaya. Kambe van’wana va swi tlangela swinene leswi va swi hlayaka eBibeleni. Hi xikombiso, wansati la vuriwaka Nancy u ri: “Ku sukela loko ndzi sungule ku hlaya Bibele siku ni siku ni ku anakanyisisa hileswi ndzi swi hlayaka eka yona, ndzi titwa ndzi lunghekele ku langutana ni swiphiqo swa siku ni siku. Mukhuva lowu wu ndzi pfune leswaku ndzi hlula ntshikilelo lowu a ndzi ri na wona ku tlula leswi ndzi swi ringeteke emalembeni yo tlula 35 lama hundzeke.”

Hambiloko u nga si tshama u yi hlaya Bibele, xana a swi ku tsakisi ku tiva leswaku van’wana va pfunekile hikwalaho ko yi hlaya? Loko ku ri leswaku ana se wa yi hlaya, xana wa swi lava ku vuyeriwa swinene hileswi u swi hlayaka? Loko swi ri tano, ringeta magoza ya nkombo lama hlamuseriweke exihlokweni lexi.

GOZA 1—Yi Hlaye Hi Xikongomelo Lexinene

▪ Swa olova ku hlaya Bibele ku fana ni buku yin’wana ni yin’wana kumbe hi ku va u titwa u boheka kumbe leswaku u ta kuma nkongomiso emisaveni leyi yo homboloka. U ta vuyeriwa swinene loko u yi hlaya hi xikongomelo xo lava ku tiva ntiyiso hi Xikwembu. Ku engetela kwalaho, u ta vuyeriwa swinene loko u yi hlaya hi xikongomelo xo lava ku vona ndlela leyi rungula ra yona ri byi khumbaka ha yona vutomi bya wena.

Matsalwa ma kandziyisa nkoka wo hlaya hi xikongomelo lexinene hi ku fanisa Bibele ni xivoni loko ma ku: “Loko un’wana ni un’wana a ri mutwi wa rito, kambe a nga ri muendli, yena u fana ni munhu loyi a langutaka xikandza xakwe xa ntumbuluko exivonini. Hikuva wa tilanguta, kutani a famba, hi ku  hatlisa a rivala leswaku i munhu wa muxaka muni. Kambe loyi a kambisisaka nawu lowu hetisekeke lowu fambisanaka ni ntshunxeko ni loyi a phikelelaka eka wona, munhu yoloye, leswi a nga vangiki mutwi loyi a rivalaka, kambe a veke muendli wa ntirho, u ta tsaka eku wu endleni kakwe.”—Yakobo 1:23-25.

Munhu loyi ku vulavuriwaka ha yena eka xikombiso lexi, u languta xikandza xakwe exivonini kambe a nga yi lunghisi ndlela leyi a langutekaka ha yona. Swi nga ha endleka leswaku u ti langute hi ku hatlisa kutani a hundza naswona a nga wu voni nkoka wo tilunghisa. Hilaha ku fanaka, a hi nge vuyeriwi loko hi hlaya Bibele hi nga ri na xikongomelo kumbe hi nga swi tirhisi leswi hi swi hlayaka eka yona. Ku hambana ni sweswo, hi nga va ni ntsako wa xiviri loko hi yi hlaya hi xikongomelo xo va ‘vaendli,’ kutani hi pfumelela mianakanyo ya Xikwembu leswaku yi kongomisa mianakanyo ni swiendlo swa hina.

GOZA 2—Hlawula Vuhundzuluxeri Lebyinene

▪ Swi nga ha endleka leswaku ku ni vuhundzuluxeri byo tala bya Bibele lebyi u nga hlawulaka eka byona hi ririmi ra wena. Hambileswi vuhundzuluxeri hinkwabyo bya Rito ra Xikwembu byi nga ha ku vuyerisaka, byin’wana byi tirhisa marito ya khale swinene kumbe ririmi ra vanhu lava dyondzekeke, naswona a swi olovi ku byi twisisa. (Mintirho 4:13) Byin’wana byi cince ni rungula leri tengeke ra Bibele hikwalaho ka mindhavuko. Hi xikombiso, hilaha hi swi voneke hakona eswihlokweni swo sungula swa magazini lowu, byin’wana byi sive vito ra Xikwembu leri nge Yehovha hi swithopo leswi nge “Xikwembu” kumbe “Hosi.” Kutani loko u hlawula vuhundzuluxeri, hlawula lebyi twisisekaka hi ku olova lebyi nga ku susumetelaka ku ya emahlweni u byi hlaya.

Vahlayi va timiliyoni emisaveni hinkwayo va xiye leswaku Bibele leyi vuriwaka Vuhundzuluxeri Bya Misava Leyintshwa ya pakanisa naswona yi twisiseka hi ku olova. * Xiya xikombiso xa mukhalabye un’wana wa le Bulgaria. U ye eminhlanganweni ya Timbhoni ta Yehovha naswona loko a fika u nyikiwe Bibele ya Vuhundzuluxeri Bya Misava Leyintshwa. Hi ku famba ka nkarhi u te: “Se ndzi ni malembe ndzi hlaya Bibele, kambe a ndzi si tshama ndzi hlaya vuhundzuluxeri lebyi twisisekaka hi ku olova ni lebyi fikelelaka mbilu ya mina ku fana ni lebyi.”

GOZA 3—Khongela

▪ U nga yi twisisa swinene Bibele loko u kombela Mutsari wa yona leswaku a ku pfuna, hilaha mupisalema a vuleke hakona loko a ku: “Pfalula mahlo ya mina, leswaku ndzi ta vona swilo leswi hlamarisaka leswi humaka enawini wa wena.” (Pisalema 119:18) Minkarhi hinkwayo loko u hlaya Bibele, khongela eka Xikwembu u xi kombela leswaku xi ku pfuna u twisisa Rito ra xona. U nga ha tlhela u xi nkhensa leswi xi hi nyikeke Bibele, hikuva handle ka yona a hi nga ta xi tiva.—Pisalema 119:62.

Xana Xikwembu xa swi twa swikhongelo swo tano swo kombela mpfuno? Xiya leswi humeleleke swinhwanyetana swimbirhi swa le Uruguay, leswi nga emalembeni ya kondlo-a-ndzi-dyi. Swi hlamarisiwe hileswi Bibele yi swi vulaka eka Daniyele 2:44 kutani swi khongela leswaku Xikwembu xi rhumela munhu leswaku a ta swi pfuna swi twisisa tsalwa leri. Loko swinhwanyetana sweswo swa ha pfule Bibele ya swona, ku fike Timbhoni ta Yehovha timbirhi leti nga fika ti hlaya ndzimana leyi a swi pfule yona kutani ti swi hlamusela leswaku tihulumendhe ta vanhu ti ta siviwa hi Mfumo wa Xikwembu. * Swinhwanyetana sweswo swi khorwisekile leswaku Xikwembu xi hlamule xikhongelo xa swona.

GOZA 4—Yi Hlaye Siku Ni Siku

▪ Mutsari wa buku yin’wana u xiye leswaku “vanhu va sungule ku xava Tibibele” endzhaku ka loko matherorisi ma hlasele eUnited States hi September 11, 2001. Vanhu vo tala va hlaya Rito ra Xikwembu loko va langutane ni maxangu. Nilokoswiritano, marito lama landzelaka ma hi khutaza ku hlaya Bibele siku ni siku: “Buku leyi ya nawu yi nga suki enon’wini wa wena, naswona u fanele u yi hlaya hi rito ra le hansi nhlikanhi ni vusiku, leswaku u ta hisekela ku endla hi ku landza hinkwaswo leswi tsariweke eka yona; hi  kona u nga ta endla ndlela ya wena yi humelela kutani u endla hi vutlhari.”—Yoxuwa 1:8.

Nkoka wa ku hlaya Bibele siku ni siku wu kombisiwa kahle hi munhu la nga ni vuvabyi bya mbilu naswona a dyaka ntsena swakudya leswi nga ni rihanyo. Xana a nga vuyeriwa loko swakudya sweswo o swi dya ntsena loko a twa ku vava exifuveni xakwe? Nikatsongo. U fanele a dya swakudya leswi nga ni rihanyo minkarhi hinkwayo leswaku a ta vuyeriwa. Hilaha ku fanaka, ku hlaya Bibele siku ni siku swi ta ku pfuna leswaku u “endla ndlela ya wena yi humelela.”

GOZA 5—Yi Hlaye Hi Tindlela To Hambana-hambana

▪ Swi nga va swinene ku hlaya Bibele ku suka eka Genesa ku ya eka Nhlavutelo, kambe ku ni tindlela tin’wana leti nga ha ku pfunaka. Hi leswi swiringanyeto swin’wana.

Hlaya hi ximunhuhatwa xo karhi. Hlaya matsalwa kumbe tibuku hinkwato leti vulavulaka hi vagandzeri vo karhi va Xikwembu, vo tanihi lava landzelaka:

• Yosefa: Genesa 37-50.

• Rhuti: Rhuti 1-3.

• Yesu: Matewu 1-28; Marka 1-16; Luka 1-24; Yohane 1-21. *

Tiendlele nhloko-mhaka leyi u nga ta hlaya ha yona. Hlaya matsalwa lama fambisanaka na yona. Hi xikombiso, endla ndzavisiso hi mhaka ya xikhongelo kutani u hlaya rungula leri vulavulaka hi xikhongelo swin’we ni swikhongelo swin’wana leswi nga eBibeleni. *

Hlayela ehenhla. U nga vuyeriwa swinene loko u yi hlayela ehenhla Bibele. (Nhlavutelo 1:3) Kumbexana mi nga ha yi hlaya tanihi ndyangu, mi avelana tindzimana kumbe mi tlanga swiphemu swo karhi swa swimunhuhatwa sweswo. Vanhu van’wana va tsakela ku yingisela rungula ra Bibele leri rhekhodiweke. Wansati un’wana u te: “A swi ndzi tikela ku yi sungula, hiloko ndzi sungula ku yingisela rungula ra yona leri rhekhodiweke. Sweswi ndza swi xiya leswaku Bibele yi tsakisa ku tlula xibukwana xin’wana ni xin’wana xa switori.”

GOZA 6—Anakanyisisa

▪ Swilo swa manguva lawa ni swikavanyeto leswi nga kona swa vutomi swi endla leswaku swi hi tikela ku anakanyisisa hileswi hi swi hlayaka eBibeleni. Kambe tanihi leswi hi faneleke hi gayela swakudya leswaku hi ta xurha, hi fanele hi anakanyisisa hileswi hi swi hlayaka eBibeleni leswaku hi ta vuyeriwa. Leswi hi nga swi endla hi ku pfuxeta leswi hi swi hlayeke hi ku tivutisa swivutiso swo tanihi leswi nge: ‘I yini leswi ndzi swi dyondzaka hi Yehovha Xikwembu? Xana rungula leri ri ndzi khumba njhani? Xana ndzi nga ri tirhisa njhani ku pfuna van’wana?’

Ku endla tano swi ta endla leswaku rungula rero ri dzika etimbilwini ta hina ni ku engetela ntsako lowu hi wu kumaka loko hi hlaya Rito ra Xikwembu. Pisalema 119:97 yi ri: “Ndzi wu rhandza swinene nawu wa wena! Ndzi anakanya ha wona siku hinkwaro.” Ku anakanyisisa swi pfune mupisalema leswaku a hanya hi leswi a a swi hlaya eMatsalweni. Leswi swi endle leswaku a ya a swi tlangela swinene leswi a a swi hlaya.

GOZA 7—Kuma Mpfuno Leswaku U Ta Twisisa Bibele

▪ Xikwembu a xi langutelanga swona leswaku hi twisisa Rito ra xona hi ri hexe. Hambi ku ri Bibele ya pfumela leswaku ku ni “swilo swo karhi leswi nonon’hwaka ku swi twisisa.” (2 Petro 3:16) Buku ya Mintirho yi vulavula hi mutirhela-mfumo wa Muetiyopiya loyi a a nga xi twisisi xiphemu xo karhi xa Bibele lexi a a ri eku xi hlayeni. Xikwembu xi rhumele nandza wa xona leswaku a ya n’wi pfuna, naswona wanuna yoloye wa Muetiyopiya “u ye emahlweni a tifambela a tsakile.”—Mintirho 8:26-39.

Na wena u nga vuyeriwa loko wo kombela mpfuno wo twisisa leswi u swi hlayaka eBibeleni. Tihlanganise ni Timbhoni ta Yehovha ta le ndhawini ya ka n’wina kumbe u tsalela eka adirese leyi faneleke eka leti nga eka tluka 4 ra magazini lowu, leswaku u ta kuma dyondzo ya mahala ya le kaya ya Bibele.

[Tinhlamuselo ta le hansi]