Geeshsha Maxaafaa Nibaabiyaappe Goˈettanau Maaddiya Laappun Ogeta

“Geeshsha Maxaafay awudenne bayzettida maxaafaappe aaruwan bayzettidoogaa xalla gidennan, haˈˈikka layttan layttan ay maxaafappenne aaruwan bayzettiiddi deˈees.”—TAYM MAXEETIYAA

“Taani issi issitoo Geeshsha Maxaafaa nabbabays; shin hegee tana keehi salettees.”—KET, INGGILIZE BIITTAN ERETTIDA YETTANCHAA

DARO asau Geeshsha Maxaafay deˈikkonne eti a nabbabidi goˈettannaagee azzanttiyaaba. Gidikkokka, harati Geeshsha Maxaafaappe nabbabiyo qofaa xoqqu oottidi xeelloosona. Leemisuwau, Nansso geetettiya maccaasiyaa hagaadan gaasu: “Taani ubbatoo guuran Geeshsha Maxaafaa nabbabada an wotta dentta qoppiyoogaa doommoosappe hanno gakkanau, hegee gallassan tana gakkana danddayiya metuwaa xoonanau giigettanaadan oottiis. He meezee taani aadhida 35⁠ppe dariya layttan malido aybippenne aaruwan unˈˈettiyoogaappe woppaa demmanaadan keehi maaddiis.”

Neeni Geeshsha Maxaafaa nabbaba erennaba gidikkokka, harati nabbabidi goˈettidoogan garamettay? Neeni Geeshsha Maxaafaa nabbabiyaaba gidikko, ne nibaabiyaappe daro goˈˈaa demmanau koyay? Koyiyaaba gidikko, ha huuphe yohuwan qonccida laappun ogeta kaalla.

OGE 1 Suure qofaa oyqqada nabbaba

◼ Neeni Geeshsha Maxaafaa, coo loˈˈo maxaafadan woy nabbabana koshshiyo gishshau woy ha metiya alamiyan kaaletuwaa demmanau qoppada nabbabana danddayaasa. SHin, neeni a nabbabiyoy Xoossaabaa tumaa eranau halchada gidikko, keehippe goˈettana. Hegaa bollikka, Geeshsha Maxaafaa qofay ne deˈuwaa waatidi bochiyaakko akeekanau koyiyoogan nabbabikko, daro anjjuwaa demmaasa.

Xoossaa Qaalay suure qofaa oyqqidi nabbabiyoogee keehippe koshshiyoogaa qonccissanau Geeshsha Maxaafaa heregan leemisees: “Qaalaa siyidi oottenna urai de7⁠ikko, i ba meraa heregan xeelliya uraa mala. I bana xeellidi bees; biidi sohuwaarakka i ai malakkonne dogi aggees. SHin  ooninne ailletettaappe kessiya bali bainna higgiyaa xeellidi, aani aqiyaagee qassi a naagiyaagee, siyidoogaakka dogennaagee, he urai ba oottiyo oosuwan anjjettana.”—Yaaq. 1:23-25.

Ha leemisuwan odettida bitanee heregan ba meraa xeellidi, giigissana koshshiyoobaa giigissibeenna. Woykko ba meraa lemˈˈi oottidi xeelliis; woy geella giigissanau koyibeenna. Hegaara issi mala hanotan, nuuni Geeshsha Maxaafaa saxaa gattanau nabbabikko, woy nabbabiyoobaa oosuwan peeshshennaba gidikko goˈettokko. Hegaappe dumma ogiyan, nu qofaanne nuuni oottiyoobaa Xoossaa qofay molanaadan paqqadiyoogan, ‘an aqanau’ giidi Geeshsha Maxaafay giyoobaa xeellikko, tumu ufayssaa demmana danddayoos.

OGE 2 Ammanttiya birshshettaa doora

◼ Neeni dooranau ne qaalan daro Geeshsha Maxaafaa birshshettati deˈana danddayoosona. Geeshsha Maxaafaa birshshettay ubbay nena goˈˈana danddayikkokka, issi issi birshshettati akeekanau metiya, ha wodiyan goˈettenna guussaa woy eranchati goˈettiyo guussaa goˈettoosona. (Oos. 4:13) Issi issi birshshettati asa wogan zemppiyoogan Geeshsha Maxaafaa suure qofaa ubba laammoosona. Leemisuwau, ha maxeetiyau doomettaa heeran deˈiya huuphe yohotun nuuni beˈidoogaadan issi issi birshshettati Yihoowa yaagiya Xoossaa sunttaa sohuwan “Xoossaa” woykko “Godaa” yaagiya boncho sunttaa goˈettidosona. Yaatiyo gishshau, issi birshshettaa dooriyo wode, nabbabanau minttettiya, akeekanau metenna qaalan xaafettida, Geeshsha Maxaafaa suure qofaa oyqqidaagaa koya.

Geeshsha Maxaafaa nabbabiya, alame yuushuwan deˈiya miilooniyan qoodettiya asay Ooratta Alamiyaa Birshshettay hegaa mala gidiyoogaa akeekiis. * Bulggaariyaa biittan deˈiya issi cima bitaniyaa hanotaa qoppa. I Yihoowa Markkatu shiiquwan beettin Ooratta Alamiyaa Birshshettay ayyo imettiis. Hegaappe simmin, i hagaadan giis: “Taani daro layttau Geeshsha Maxaafaa nabbabaas, shin akeekanau metennanne wozanaa denttettiya birshshettaa nabbaba erikke.”

OGE 3 Woossa

◼ “Ne higgiyaa giddon de7⁠iya maalaalissiya tumatettaa taani be7ana mala ta aifiyaa poga” yaagida mazamuraawiyaagaadan, Geeshsha Maxaafaa Xaafissidaagee maaddanaadan oychiyoogan neeni a Qaalaa loyttada akeekana danddayaasa. (Maz. 119:18) Geeshsha Maxaafaa nabbabiyo wode ubban Xoossaa woossa, a Qaalaa akeekanaadan maaddana mala a oycha. Geeshsha Maxaafay baynnaakko nuuni Xoossaa erana danddayenna gishshau, hegaa demmido gishshau galatana danddayaasa.—Maz. 119:62.

Hegaadan maaduwaa koyidi woossiyo woosaa Xoossay siyii? Uraguway biittan deˈiya, michentta gidida naaˈˈu yelagata gakkidabaa qoppa. Eti Daaneela 2:44n Geeshsha Maxaafay giyoobaa akeekanau metootidi, hegaa akeekanau maaddana mala Xoossay issi ura kiittanaadan woossidosona. Eti he xiqisiyaa kessi uttidaashin naaˈˈu Yihoowa Markkati eta soo yiidi, he naati eranau koyidi Xoossaa woossido xiqisiyaa nabbabidosona; yaatidi asaa naatu kawotettaa sohuwan Xoossaa Kawotettay eqqanaagaa qonccissidosona. * Maaddanaadan woossido woosaa Xoossay zaaridoogaa he yelaga michentti ammanidosona.

OGE 4 Galla galla nabbaba

◼ Daroti banttana metoy gakkiyo wode xallan Xoossaa Qaalaa nabbaboosona. Leemisuwau, shabbirssiyaageeti Masqqala 11, 2001n Amarkkan shabbirssaa gatti simmin “asay sohuwaara daro Geeshsha Maxaafaa shammiyoogaa” doommidoogaa, maxaafaa attamissiya issi bitanee yootiis. Gidoppe attin, Geeshsha Maxaafay, “Ha Higgiyaa Maxaafai ne doonaappe shaahettoppo; an xaafettidabaa ubbaa minttada naaganau, gallassinne qammi a qoppa. Yaatikko, neeyyo ubbabaikka injjetananne giigana” yaagiyo gishshau, nuuni a galla galla nabbabanaadan zoree imettiis.—Yaa. 1:8.

Geeshsha Maxaafaa ubbatoo nabbabiyoogaa goˈˈaa, wozanaa harggee oyqqin bana maaddiya qumaa maanau qofaa qachida ura hanotan leemisana  danddayettees. He bitanee, tiraa heeran sakkiyo wode xallan hegaa mala qumaa miikko, hegee a maaddii? Akkay. I keehippe maadettanau ubbatoo hegaadan maana koshshees. Hegaadankka, galla galla Geeshsha Maxaafaa nabbabiyoogee, ‘neeyyo ubbabay injjetanaadaaninne giiganaadan’ maaddees.

OGE 5 Dumma dumma ogiyan nabbaba

◼ Geeshsha Maxaafaa Doomettaabaappe Ajjuutaa gakkanaashin nabbabiyoogee loˈˈo gidana danddayees; shin hara ogiyan nabbabiyoogan ufayttana danddayaasa. Hagaappe kaallidi amarida qofay deˈees.

Issi uraara gayttidabaa nabbaba. Kaallidi deˈiyaageetu mala, Xoossau goynniya issi uraabaa yootiya shemppota woykko maxaafata ubbaa nabbaba.

• Yooseefa: Doo. 37-50.

• Uruto: Uru. 1-3.

• Yesuusa: Maa. 1-28; Mar. 1-16; Luq. 1-24; Yoh. 1-21. *

Issi huuphe yohuwan qofaa wotta. He huuphe yohuwaara gayttida xiqiseta nabbaba. Leemisuwau, woosaa xeelliyaagan pilgga, yaatada qassi Geeshsha Maxaafan deˈiya daro woosaappe issota issotanne hegaa xeelliyaagan Geeshsha maxaafay zoriyoobaa nabbaba. *

Cenggurssaa sissada nabbaba. Geeshsha Maxaafaa cenggurssaa sissada nabbabiyoogan keehippe goˈettana danddayaasa. (Ajj. 1:3) So asay issippe xiqiseta kayan kayan woy taarikiyan odettida asatudan hanidi cenggurssaa sissidi nabbabanaukka danddayettees. Issoti issoti cenggurssan giigida Geeshsha Maxaafaa ezggiyoogan ufayttoosona. Issi maccaasiyaa hagaadan gaasu: “Geeshsha Maxaafaa nabbabiyoogaa doommanau keehippe metootaas; yaatiyo gishshau, cenggurssan giigida Geeshsha Maxaafaa ezggiyoogan doommaas. Coo loˈˈo maxaafaappe aaruwan Geeshsha Maxaafay ufayssiyoogaa haˈˈi akeekaas.”

OGE 6 Wotta dentta qoppa

◼ Dirbbissiyaanne unˈˈissiya ha wodiyaa deˈoy wotti dentti qoppanau metootanaadan oottees. Gidikkokka, nuuni miyo qumaappe goˈettanau loyttidi coommana koshshiyoogaadan, Geeshsha Maxaafaappe nabbabiyooban goˈettanau wotti dentti qoppana bessees. Nabbabiyoobaa nu qofan zaarettiyoogaaninne, “Xoossaa Yihoowa xeelliyaagan hagaappe ay tamaaridanaa? Hegaa waatada oosuwan peeshshana danddayiyaanaa? Haraata maaddanau hegaa waatada goˈettana danddayiyaanaa? yaagiyaageetu mala oyshaa oychiyoogan hegaadan oottana danddayoos.

Hegaadan qoppiyoogee Geeshsha Maxaafaa qofay nu wozanaa denttettanaadaaninne Xoossaa Qaalaa nabbabiyoogan keehippe ufayttanaadan oottees. Mazamure 119:97y, “Taani ne higgiyaa aiba siiqiyaanaa! Gallassaa kumettaa taani qoppiyoogee a” yaagees. Mazamuraawee Geeshsha Maxaafaa qofaa gallassaa kumettaa wotti dentti qoppiis. Hegaadan oottidoogee i tamaariyoobaa keehippe siiqanaadan maaddiis.

OGE 7 Akeekanau maaduwaa koya

◼ Xoossay nuuni a Qaalaa nurkka wurssi akeekana danddayennaagaa erees. Geeshsha Maxaafay ubba “akeekanau waayissiya” yohoy an deˈiyoogaa yootees. (2 PHe. 3:16) Oosuwaa maxaafay, Geeshsha Maxaafaappe nabbabidobaa akeekanau metootida, Toophiyaa biittaa suntta gidida bitaniyaabaa yootees. A maaddanaadan Xoossay issi ba ashkkaraa kiittiis; hegaappe denddidaagan bitanee “ba ogiyaa ufaittiiddi biis.”—Oos. 8:26-39.

Nabbabiyoobaa akeekanau maaduwaa demmiyoogan, neenikka Geeshsha Maxaafaa nabbabiyoogan goˈettana danddayaasa. Miishsha qanxxennan Geeshsha Maxaafaa xannaˈanau ne heeran deˈiya Yihoowa Markkatuura gaytta woykko ha maxeetiyan sinttaa 4n deˈiya adraashan xaafa.

[Tohossa qofata]