Arap Ngeni Kot

A Nengeni Minne mi Mürinnö Ren Emön me Emön

1 KING 14:13

“PUN ewe Samol mi Lapalap a etittina letip meinisin o weweiti iteiten akot me ekiek.” (1 Kronika 28:9) Ren ekkeei kapas, itä letipach epwe ur ren kilisou ngeni Jiowa pokiten alolloolun an tongekich. Jiowa a nennengeni minne mi mürinnö lon letipach inaamwo ika kich sise unusöch. Alon Jiowa usun Apia mi mak lon 1 King 14:13 a affata ena mettoch.

Apia a määritä lon eü famili mi fokkun ngaw. Seman we, Jeropoam, i meilapen tettelin familien sou nemenem mi rikilo seni Jiowa. * Ina popun, Jiowa a apasa pwe meinisin chon än Jeropoam we famili repwe ninilo, “usun eman aramas a pirumweela mettoch mi limengau.” (1 King 14:10) Nge Kot a erä pwe emön me lein chon än Jeropoam we famili epwe wor süfölün ren an epwe peias. Ina i Apia, ewe mi fokkun semwen. * Pwata? Kot a äweweei: “Pokiten a wor och me won, mine ewe Samol mi Lapalap ewe Koten Israel a efich.” (1 King 14:1, 12, 13) Met ekkeei kapas ra äiti ngenikich usun Apia?

Ewe Paipel ese apasa pwe Apia emön chon fel ngeni Kot mi tuppwöl. Iwe nge, a wor och föfförün mi mürinnö a pwäratä fän iten Jiowa, neman a weneiti an fel ngeni. Ekkewe sou mak rappai ra erä pwe neman Apia a feilo lon ewe imwenfel Jerusalem are a asüolo nöün seman kewe chon mas mi eppeti chon Israel ar repwe feilo Jerusalem.

Inaamwo ika sise silei met sokkun napanap mi mürinnö Apia a pwäralo, nge a amwarar. Äeüin, “a wor och [napanapöch] me won” a pwäri seni enletin letipan. Oruuan, a fokkun sokkolo aüchean. Pun inaamwo ika i emön me “lein chon leimwen Jeropoam,” nge a eäni och napanap mi mürinnö. Emön sou tipatchem a apasa: “Sipwe fokkun apünga chokkewe mi akkamwöchü ar föfföröch inaamwo ika ra nonnom lon ekkewe leeni me famili mi ngaw.” Pwal emön a apasa pwe napanapöchün Apia a “pwäpwälo . . . , usun saramaramen ekkewe füü mi ttin le kiroch, me lingöchün ekkewe irä mi fokkun arawaraw chöör lein ekkewe irä mi morolo chöör.”

Ekkewe kapas mi mak lon 1 King 14:13, ra äkkäeüin äiti ngenikich och mettoch mi amwarar usun Jiowa me met a nennengeni lon kich. Chechchemeni pwe Jiowa a küna och mettoch mi mürinnö a nom “won” Apia. Jiowa a etittinafichi letipan tori an a küna ekis napanapöchün. Emön sou tipatchem a kapas usun Apia me an famili, a apöpööi Apia ngeni eföü faü mi kkolo aüchean mi nom lein ekkewe faü esor aüchear. Jiowa a äfänni napanapöchün me efeiöchü ren an ümöümöch ngeni inaamwo ika i a choni eü famili mi ngaw.

Esap iei eü minen auruur ach silei pwe Jiowa a kükkütta me äfänni öchüüch, inaamwo ika sise unusöch? (Kölfel 130:3) Ach silei ei, itä epwe amwökütükich le akkarap ngeni Jiowa, ewe Kot mi etittinaöchü letipach le kükkütta pwal mwo nge ekis napanapöchüch.

[Ekkewe Pwóróus fan]