San̄a Kpere Abasi

Enye Oyom Eti N̄kpọ ke Esịt Nnyịn

1 NDIDEM 14:13

“JEHOVAH odụn̄ọde kpukpru esịt owo, onyụn̄ etịm ọfiọk kpukpru se ekikere obotde.” (1 Chronicles 28:9) Ikọ oro ẹkedade odudu spirit ẹwet mi anam nnyịn ikụt nte Jehovah enen̄erede enyene udọn̄ ke idem nnyịn. Jehovah oyom eti n̄kpọ oro odude nnyịn ke esịt kpa ye oro nnyịn mîfọnke ima. Inen̄ede ikụt emi ke ikọ emi enye eketịn̄de aban̄a Abijah, emi ẹwetde ke 1 Ndidem 14:13.

Abijah ikotoho eti ufọk. Jeroboam ete esie ekedi ibuot ke ufọk ubọn̄ mbon mfiakedem. * Jehovah ama ọn̄wọn̄ọ ke iyọkpọri ufọk Jeroboam ifep “kpa nte owo ọkpọride ifụm efep.” (1 Ndidem 14:10) Edi Abasi ama ọnọ ewụhọ ete ẹbụk owo kiet kpọt ke ubon Jeroboam ukpono ukpono—kpa Abijah emi ekenen̄erede ọdọn̄ọ. * Ntak-a? Abasi ọkọdọhọ ete: “Se Jehovah Abasi Israel esede ke eti n̄kpọ odu enye ke esịt, ke ufọk Jeroboam.” (1 Ndidem 14:1, 12, 13) Nso ke ikọ emi asian nnyịn aban̄a Abijah?

Bible idọhọke ke Abijah ama ọsọn̄ọ ada atuak ibuot ọnọ Abasi. Kpa ye oro, eti n̄kpọ ama odu enye ke esịt. Eti n̄kpọ oro ke ‘Jehovah ekese,’ ndien eyedi emi akaban̄a utuakibuot Abasi. Mme rabbi emi ẹkedide mme ewet n̄wed ẹnọ ekikere ẹte ke Abijah ama esika temple ke Jerusalem ndikokpono Abasi mîdịghe ke enye ama atan̄ mbon ukpeme oro ete esie okobonde man ẹbiọn̄ọ nditọ Israel ndika Jerusalem, efep.

Kpa ye oro nnyịn mîfiọkke eti n̄kpọ oro Abijah akanamde, se ifiọkde edi ke eti n̄kpọ emi ekedi n̄wọrọnda. Akpa, enye akada eti esịt anam n̄kpọ emi. Bible ọdọhọ ke eti n̄kpọ emi “[okodu] enye ke esịt.” Ọyọhọ iba, se enye akanamde ekedi n̄wọrọnda. Abijah ama anam eti n̄kpọ emi kpa ye oro enye okodude “ke ufọk Jeroboam.” Eyen ukpepn̄kpọ kiet ọdọhọ ete: “Enen̄ede odot ẹtoro mbon emi ẹkade iso ẹnam nti n̄kpọ kpa ye oro mmọ ẹdude ke idiọk itie ẹnyụn̄ ẹtode idiọk ufọk.” Eyen ukpepn̄kpọ en̄wen ọdọhọ ke eti ido Abijah ama “ọwọrọ ada . . . , ukem nte emi ntantaọfiọn̄ esinen̄erede ayama ke ini enyọn̄ ekịmde, ye nte eto cedar esinen̄erede eye ke ini adade ke ufọt mme eto emi mînyeneke ikọn̄.”

Se ikam idide akpan n̄kpọ ikan edi ke 1 Ndidem 14:13 ekpep nnyịn ata eti n̄kpọ aban̄a Jehovah ye se enye oyomde ke esịt nnyịn. Ti ete ke se Jehovah esede ke eti ama “odu” Abijah “ke esịt.” Etie nte Jehovah okododụn̄ọde esịt Abijah tutu Enye okụt eti n̄kpọ do. Ke ẹmende Abijah ẹdomo ye mbon ubon esie, enye ekedi se eyen ukpepn̄kpọ kiet okotde ọsọn̄urua itiat “ke otu n̄kwaitiat.” Jehovah ama enen̄ede ama eti n̄kpọ oro onyụn̄ ọnọ enye utịp, atua owo kiet emi okotode idiọk ufọk emi mbọm.

Nte idịghe n̄kpọ ndọn̄esịt ndifiọk ke Jehovah esiyom eti n̄kpọ ke idem nnyịn onyụn̄ ada eti n̄kpọ oro enye okụtde ke ọsọn̄urua kpa ye unana mfọnmma nnyịn? (Psalm 130:3) Ndifiọk emi ekpenyene ndinam nnyịn itetịm isan̄a ikpere Jehovah, kpa Abasi emi enen̄erede odụn̄ọde esịt nnyịn oyom eti n̄kpọ, ekpekpri nte ekpekpri.

[Mme Ikọ Idakisọn̄]