Dọnsẹpọ Jiwheyẹwhe

E Nọ Doayi Dagbe Gbẹtọ lẹ Tọn Go

1 AHỌLU LẸ 14:13

“OKLUNỌ to ayiha lẹpo mẹ dinpọn, bosọ tunwun aṣàvà linlẹn tọn lẹ.” (1 Otannugbo lẹ 28:9) Ohó gbọdo ehelẹ yin kinkan nado hẹn mí gọ́ na pinpẹn-nutọn-yinyọnẹn na ojlo sisosiso he Jehovah tindo to mí mẹ. Dile etlẹ yindọ mí ma yin omẹ pipé, Jehovah nọ doayi dagbe he tin to ahun mítọn mẹ go. Nugbo ehe họnwun hezeheze to ohó etọn lẹ gando Abija go mẹ, he yin mimọ to 1 Ahọlu lẹ 14:13 mẹ.

Abija nọgbẹ̀ to whédo ylankan de mẹ. Otọ́ etọn, Jeloboami, wẹ yin nukọntọ to atẹṣiṣi hukan gandudu tọn de mẹ. a Jehovah magbe nado zà whédo Jeloboami tọn sẹ̀, “dile mẹde nọ zà ogbó sẹ̀ do.” (1 Ahọlu lẹ 14:10) Ṣigba Jiwheyẹwhe degbe dọ mẹdopo gee sọn whédo Jeloboami tọn mẹ, yèdọ Abija—he to azọ̀njẹ sinsinyẹn—ni yin dìdì po yẹyi po. b Etẹwutu? Jiwheyẹwhe dọmọ: “Na to ewọ mẹ yè mọ onú dagbe vude wutu hlan OKLUNỌ dali, Jiwheyẹwhe Islaeli tọn, to owhé Jeloboami tọn gbè.” (1 Ahọlu lẹ 14:1, 12, 13) Etẹwẹ hogbe ehelẹ plọn mí gando Abija go?

Biblu ma dọ dọ Abija yin sinsẹ̀n-basitọ nugbonọ Jiwheyẹwhe tọn de gba. Etomọṣo, onú dagbe vude to ewọ mẹ. E wà onú dagbe ehe “hlan OKLUNỌ dali,” vlavo to kọndopọ mẹ hẹ sinsẹ̀n-bibasi Etọn. Wekantọ he yin Labi lẹ dọ dọ Abija basi gbejizọnlin yì tẹmpli mẹ to Jelusalẹm kavi dọ e de nuhọ́tọ he otọ́ etọn de do aliji nado glọnalina Islaelivi lẹ ma nado yì Jelusalẹm lẹ sẹ̀.

Onú dagbe he Abija wà lẹ yin ayidego tọn, dile etlẹ yindọ mí ma yọ́n nuhe yé yin taun. Tintan, e wá sọn ahun mẹ. Onú dagbe ehe tin‘to ewọ mẹ’—yèdọ to ahun etọn mẹ. Awetọ, e jẹna ayidego. Abija wà onú dagbe ehe dile etlẹ yindọ e tin ‘to owhé Jeloboami tọn gbè.’ Weyọnẹntọ de dọmọ: “Nuhe jẹna pipà taun wẹ e yin na gbẹtọ lẹ nado hẹn dagbewiwa yetọn go dile yé to gbẹnọ to lẹdo po whẹndo he mẹ oylan nọ yin wiwà te lẹ po mẹ.” Devo dọ dọ dagbewiwa Abija tọn yin “ayidego tọn . . . , kẹdẹdile sunwhlẹvu lẹ nọ na hinhọ́n susu to whenue aslọ dozinvlu, bọ kedali lẹ nọ yọnwhanpẹ taun to whenue amà vọ̀ sọn atin he lẹdo yé lẹ ji do.”

Nuhe yin nujọnu hugan wẹ yindọ hogbe he tin to 1 Ahọlu lẹ 14:13 mẹ lẹ plọn mí onú dagbe de gando Jehovah po nuhe e nọ dín to mí mẹ po go. Flindọ onú dagbe de yin ‘mimọ’ to Abija mẹ. E họnwun dọ Jehovah gbeje ahun Abija tọn mẹ pọ́n kakajẹ whenue E mọ onú dagbe vude. To vogbingbọn mẹ na whẹndo etọn, dile weyọnẹntọ de dọ do, Abija yin peali dopo “to bẹplidopọ zannu lẹ tọn mẹ.” Jehovah yọ́n pinpẹn dagbewiwa ehe tọn bo suahọ etọn, gbọn lẹblanu didohia mẹdopo ehe to whẹndo ylankan de mẹ dali.

Be e ma vọ́ jidenamẹ nado yọnẹn dọ mahopọnna mapenọ-yinyin mítọn, Jehovah nọ doayi dagbe mítọn go bo nọ yọ́n pinpẹn etọn ya? (Psalm 130:3) Ehe yinyọnẹn dona whàn mí nado dọnsẹpọ Jehovah dogọ, yèdọ Jiwheyẹwhe he nọ gbeje ahun mítọn mẹ pọ́n kitokito nado mọ etlẹ yin onú dagbe vude to e mẹ.

[Nudọnamẹ odò tọn]