Ufuna Okuhle Ebantwini
Tjhidela KuZimu
Ufuna Okuhle Ebantwini
“UJEHOVA uhlola zoke iinhiziyo, begodu ulemuka koke ukutjhigamela kweemcabango.” (1 IMilando 28:9) Amezwi aphefumulelweko la atlolelwe ukusenza sithokozele ukutjhinga kwekareko uJehova anayo kithi. UJehova uqala okuhle eenhliziyweni zethu ngitjho nofana sibabantu abanesono. Lokhu kubonakala ngokukhanyako emezwini wakhe amalungana no-Abiya, afumaneka ku-1 AmaKhosi 14:13.
U-Abiya wakhulela emndenini oziphethe kumbi. Uyise uJerobhowami, gade ayihloko yerhelo lomndeni wamakhosi aziinhlubuki. * UJehova bekanqophe ukutjhabalalisa umndeni kaJerobhowami, “njengalokha umuntu asusa ubulongwe.” (1 AmaKhosi 14:10) Kodwana uZimu walayela bona ilungu elilodwa tere lomndeni kaJerobhowami, u-Abiya—obesele kumbulwa kwembeswa kuye—abulungwe ngokuhloniphekileko. * Kubayini? UZimu wahlathulula: “Okuthileko okuhle malungana noJehova uZimu ka-Israyeli kufumanekile kuye endlini kaJerobhowami.” (1 AmaKhosi 14:1, 12, 13) Amezwi la asitjelani ngo-Abiya?
IBhayibhili ayitjho bona u-Abiya bekamkhulekeli kaZimu othembekileko. Nanyana kunjalo, bekunokuthileko okuhle kuye. Ubuhlobu gade ‘bumalungana noJehova,’ mhlamunye kuhlanganise Ukumkhulekela. Abatloli baboRabi balinganisa bona u-Abiya wayokukhulekela etempeleni eJerusalema nofana wasusa abonogada uyise ababeka bona bakhandele ama-Israyeli ukuya eJerusalema.
Namtjhana singazi ngokunqophileko bonyana ngibuphi ubuhle abutjengisako, ukulunga kwaka-Abiya gade kubonakala. Kokuthoma, bebunganabuzenzisa. Ubuhlobu ‘bebukuye’—okutjho bona, ehliziywenakhe. Kwesibili, bebukhethekile. U-Abiya wabutjengisa ubuhlobu nanyana gade ‘asendlini kaJerobhowami.’ Esinye isazi sathi: “Kuyintwehle ngabantu bona babulunge ubuhle babo nanyana bahlala eendaweni nemindenini emimbi.” Esinye sathi ukulunga kwaka-Abiya “bekusepepeneneni . . . , njengeenkwekwezi ezikhanya khulu lokha isibhakabhaka nesimnyama, nemithi yemisidare emihle khulu lokha imithi eyibhodileko inganamakari.”
Okuqakatheke khulu, amezwi aku-1 AmaKhosi 14:13 asifundisa ngobuhle bakaJehova nangalokho akufunako kithi. Khumbula bona okuthileko okuhle “kwafumaneka” ku-Abiya. Kubonakala uJehova ahlola ihliziyo ka-Abiya bekwaba kulapho Afumana okuhle kuye. Omunye umtloli wathi, u-Abiya nekamadaniswa nomndenakhe, uZimu wamfumana anjengeparela linye “ematjeni amanengi.” UJehova wabuthabela ubuhlobu begodu wabutlomelisa, ngokupha ilungu lomndeni obe uziphethe kumbi lo umusa olingeneko.
Akududuzi na ukwazi bona nanyana singakapheleli uJehova uqala begodu uyakuthabela okuhle akufumana kithi? (AmaRhalani 130:3) Ukwazi lokhu kufuze kusenze sitjhidele kuJehova, uZimu ohlolisisa ngitjho nokuncani okuhle okuseenhliziyweni zethu.
[Imitlolo yaphasi]
^ isig. 5 UJerobhowami wathomisa ukukhulekela kwethole embusweni osetlhagwini weentjhaba ezilitjhumi zakwa-Israyeli ukuvimbela abantu bona bangayi eJerusalema bayokukhulekela uJehova etempeleni.
^ isig. 5 Eenkhathini zeBhayibhili, ukungabulungwa ngendlela ehloniphekileko bekuqalwa njengokobana umuntu loyo akamukeleki kuZimu.—Jeremiya 25:32, 33.