Onapit ed Dios

Say Kamaongan so Aanapen To

1 ARARI 14:13

“SI Jehova usisaen to so saray amin a puso, tan natalosan to so saray amin a panisip na saray nonot.” (1 Awaran 28:9) Diad sarayan salita et lalo tayon naapresya a talagan interesado si Jehova ed sikatayo. Say kamaongan so aanapen to ed kapusoan tayo anggano ag-itayo perpekto. Say sakey a paneknek ed saya et saramay salitan imbaga to nipaakar ed si Abias, a nabasa ed 1 Arari 14:13.

Mauges so pamilya nen Abias. Tinaynan na ama ton si Arin Jeroboam so tuan panagdayew ed si Jehova. * Lapud satan et imbaga nen Jehova a ‘paandipaten toy pamilya’ nen Jeroboam, a “singa dutak a pinoolan na sakey a too.” (1 Arari 14:10, Maung a Balita) Balet ingganggan na Dios a sakey labat a membro na pamilya nen Jeroboam, si Abias​—a diad saman et grabe sakit to​—so nawalaay desentin ponpon. * Akin? Oniay rason ya inter na Dios: ‘Dia ed sikato et aromog so maong a bengatla nipaakar ed Jehova a Dios na Israel, dia ed abung nen Jeroboam.’ (1 Arari 14:1, 12, 13) Antoy naaralan tayo’d sarayan salita nipaakar ed si Abias?

Agnabasa’d Biblia a si Abias et matoor a nandayew ed Dios. Anggaman ontan, anggan panon et walay kamaongan ya anengneng nen Jehova ed sikato. Satan a kamaongan et “nipaakar ed Jehova,” anganko et mikonektaan ed panagdayew ed Sikato. Walaray managsulat a Judio a mangibabagan nambiahe si Abias paonla’d templo ed Jerusalem odino pinaekal to iramay guardia ya pambabantayen nen ama to a manesebel ed saray Israelita ya onla’d Jerusalem.

Anggaman agtayo amta so eksakton kamaongan a ginawa nen Abias, nibagan makapadinayew itan. Unona, aliwa itan a kuankuanan. Sayan kamaongan et anengneng “dia ed sikato” odino diad puso to. Komadua, nikadkaduma itan. Impanengneng nen Abias so kamaongan anggano sikatoy wala “ed abung nen Jeroboam.” Oniay imbaga na sakey ya iskolar: “Talagan makapadinayew iramay napansiasiansia day kamaongan da anggano mauges so kaliberliber tan pamilya ra.” Imbaga na sananey nin iskolar a say kamaongan nen Abias et “sankaimano . . . , no panon a saray bitewen et lalon makirkirlap no ambilbilunget so tawen, tan no panon a saray kiew na sedro et lalon ondarakep no saray akapaliber ya kiew et andiay bulong.”

Say sankaimportantian balet a naaralan tayo ed 1 Arari 14:13 et nipaakar ed marakep a kualidad nen Jehova tan no antoy aanapen to ed sikatayo. Imanoen ed satan a teksto a walay maong ya “aromog” to’d si Abias. Mapatnag sirin ya inusisa nen Jehova so puso nen Abias ya anggad walay aromog Ton kamaongan ditan. No ikompara’d pamilya to, unong ed impangibaga na sakey ya iskolar, si Abias so alenleneg a perlas “ed abunton ya angkekelag a bato.” Pinabli nen Jehova iyan kamaongan tan binales to itan, ya impanengneng toy panangasi ed sayan membro na mauges a pamilya.

Agta makapaliket a naamtaan a say aanapen tan papablien nen Jehova et say kamaongan tayo anggano ag-itayo perpekto? (Salmo 130:3) Nepeg sirin a mas onapit itayo ed si Jehova, say Dios ya aliling to et manasapit ed puso tayo diad panaanap to na anggan samsamet a kamaongan.

[Saray paimano ed leksab]