Ubuka Imisebenti Lemihle Bantfu Labayentako
Sondzela KuNkulunkulu
Ubuka Imisebenti Lemihle Bantfu Labayentako
“UHLOLISISA tinhlitiyo acondzisise tonkhe tinjongo temicabango.” (1 Tikhronike 28:9) Lamavi laphefumulelwe abhalelwa kutsi asente sijabule ngekwati kutsi Jehova unendzaba natsi. Jehova ubuka lokuhle lokusetinhlitiyweni tetfu nanobe sinemaphutsa lamanyenti. Bufakazi baloku butfolakala emavini lakhuluma nga-Abiya lasembhalweni wa-1 Emakhosi 14:13.
Abiya abelilunga lemndeni longamhloniphi Nkulunkulu. Babe wakhe Jerobowamu nguye lobekahola umbuso wetihlubuki. a Jehova abefuna kuyibhubhisa indlu yaJerobowamu ‘ayishise njengemuntfu ashisa lilongwe.’ (1 Emakhosi 14:10) Kodvwa Nkulunkulu wakhipha umyalo wekutsi lilunga linye kuphela lemndeni waJerobowamu lokungu-Abiya—lobekagula abangwa netibi—angcwatjwe kahle. b Kungani akhipha loyo myalo? Nkulunkulu wachaza: “Nguye yedvwa umntfwana waJerobowamu lotawungcwatjwa, ngobe nguye yedvwa endlini yakaJerobowamu Simakadze Nkulunkulu waka-Israyeli lamtfole anentfo lenhle.” (1 Emakhosi 14:1, 12, 13) Asitjelani lamavi nga-Abiya?
LiBhayibheli alisho kutsi Abiya abesikhonti saNkulunkulu lesetsembekile. Nobe kunjalo, tikhona tintfo letinhle labetenta. Letintfo letinhle abetentela ‘Jehova,’ ecinisweni abenta tintfo letihambisana nekumkhonta. Babhali bemaJuda bebanembono wekutsi Abiya wesusa emasotja endzaweni letsite uyise labewabeke kuyo kute avimbele ema-Israyeli kutsi angangeni eJerusalema.
Nanobe singatati ngalokucondze ngco tintfo letinhle abetenta Abiya, kodvwa siyaciniseka kutsi loko bekakwenta bekujabulisa. Kwekucala, loko abekwenta bekusuka enhlitiyweni. ‘Bekukuye’ kwenta tintfo letinhle. Kwesibili, indlela labenta ngayo tintfo letinhle, yayehlukile. Abiya wakhombisa lokuhle nanobe nje ‘abesendlini yakaJerobowamu.’ Lesinye sifundziswa satsi: “Kuyajabulisa nangabe bantfu bentelana tintfo letinhle nanobe kungenteka kutsi baphila endzaweni lembi nobe baphila nemalunga emndeni langenti tintfo kahle.” Labanye batsi tintfo letinhle letatentiwa ngu-Abiya “taphumela ebaleni . . . , kuhle kwetinkanyeti letikhanya bha esibhakabhakeni lesimnyama tsu. Taphindze tafanana nemisedari leba mihle kakhulu nangabe itungeletwe tihlahla letite emacembe.”
Lokubaluleke kakhulu kutsi emavi labhalwe encwadzini ya-1 Emakhosi 14:13 asifundzisa tintfo letinhle ngaJehova kanye naloko lakugadzile kitsi. Khumbula kutsi naku-Abiya kukhona lokuhle Jehova ‘lakutfola.’ Jehova watinika sikhatsi waphenyisisa inhlitiyo ya-Abiya wate wakutfola lokuhle lobekulotita. Lesinye sifundziswa samfanisa “nemvu lehacwe timphisi.” Jehova wabutsakasela buhle balendvodza kangangekutsi wayinika umvuzo wayibonisa bubele nobe beyichamuka emndenini lomubi.
Akusiniki yini umndlandla kwati kutsi Jehova ufuna lokuhle kitsi aphindze akutsakaselele, nanobe ati kutsi sishikiliswa ngemaphutsa etfu? (Hla. 130:3) Kwati loko kufanele kusente sitive sikhululekile kunamatsela kuJehova, longuNkulunkulu logudvuta etinhlitiyweni tetfu kute agcine abutfolile buhle lobulotitako kuto.
[Imibhalo lengentasi]
a Jerobowamu abente litfole kute bantfu balikhonte embusweni waka-Israyeli lobewakhiwa tive letilishumi nambili lebetitinte enyakatfo. Sizatfu sakhe besikuvimba ema-Israyeli kutsi angenyukeli ethempelini lebeliseJerusalema kute ayokhonta Jehova.
b Ngesikhatsi kusabhalwa liBhayibheli, kungangcwatjwa ngendlela lehloniphekile kwakutsatfwa njengekutsi Nkulunkulu akamemukeli loyo muntfu.—Jeremiya 25:32, 33.