Met Ränin Jiowa We Epwe Pwäralo
Met Ränin Jiowa We Epwe Pwäralo
“Ränin Jiowa we epwe war usun emön chon solä, . . . iwe, fönüfan me an kewe angang repwe pwäpwäälo.”—2 PET. 3:10, NW.
1, 2. (a) Ifa usun ei ototen mettoch mi ngaw epwe sopwolo? (b) Ikkefa ekkewe kapas eis sipwe pwoppworaus usun?
EI OTOTEN mettoch mi ngaw a alongolong woon ewe kapas chofona a erä pwe aramas ra tongeni sopwöch le nemeni fönüfan me lükün Jiowa. (Kölf. 2:2, 3) Itä a tongeni nomofoch eü mettoch mi alongolong woon kapas chofona? Aapwi! Ese lamot ach sipwe witiwiti an epwe pwisin sopwolo än Setan otot. Nge, Jiowa epwe asopwalo lon eü fansoun a fen pwisin filitä. Än Kot atai ei otot mi ngaw epwe pwäralo an pwüng me tong.—Kölf. 92:7; SalF. 2:21, 22.
2 Ewe aposel Piter a makkeei: “Ränin Jiowa we epwe war usun emön chon solä, iwe, ekkewe läng repwe morolo usun isisin äsepwäl, nge minen fönüfan repwe telilo pokiten pwichikarer, iwe, fönüfan me an kewe angang repwe pwäpwäälo.” (2 Pit. 3:10, NW) Met weween “ekkewe läng” me “fönüfan” lon ei wokisin? Met weween ekkewe “minen fönüfan” repwe telilo? Met weween än Piter erä pwe “fönüfan me an kewe angang repwe pwäpwäälo”? Ach silei pölüwen ekkeei kapas eis epwe älisikich le mmolnetä ngeni ekkewe mettoch mi eniuokkus repwele fis lon mwachkkan.
Weween Ekkewe Läng me Fönüfan Repwele Morolo
3. Met weween ekkewe “läng” lon 2 Piter 3:10, iwe, ifa usun repwe morolo?
3 Lupwen Paipel a eäni kapas äwewe usun ewe kapas “läng,” fän chommong a weneiti nemenem mi tekia seni ekkewe aramas mi nom faar. (Ais. 14:13, 14; Pwar. 21:1, 2) “Ekkewe läng repwe morolo” ra liosuetä än ekkewe mwuun aramas nemenem woon aramas mi imu seni Kot. Taloor epwe usun “isisin äsepwäl” a tongeni wewe ngeni ar repwe chök mwittir morolo.
4. Met weween ewe “fönüfan,” iwe, ifa usun epwe katalo?
4 Ewe “fönüfan” a liosuetä aramas mi imu seni Kot. A usun chök ewe fönüfan Jiowa a ataielo ren ewe Noter lon ränin Noa we. “Nge ren ewe chok kapas a iseis ekkeei lang o fonufanen ei fansoun ngeni ekkei, a iseis ir tori ewe ranin apung, ranin an ekkewe aramas ingau poutmwalilo.” (2 Pit. 3:7, TF) Ewe Noter a nielo aramas mi ngaw meinisin lon eü chök fansoun, iwe nge, kataloon ekkena mettoch epwe fis lon eü me eü tettelin atun ewe “riaföü mi lapalap.” (Pwar. 7:14) Lon ewe äeüin tettel, Kot epwe amwökütü ekkewe sou nemenemen fönüfan ar repwe ataielo “Papilon mi Lapalap,” pwe epwe pwälo an oput ewe fin lisowu. (Pwar. 17:5, 16; 18:8) Mwirin, lon ewe maunen Armaketon, Jiowa epwe amoielo lusun än Setan otot, ina säingonoon kinikinin ewe riäfföü mi lapalap.—Pwar. 16:14, 16; 19:19-21.
“Minen Fönüfan Repwe Telilo”
5. Met a kapachelong lon ekkewe “minen fönüfan repwe telilo”?
5 Met weween “minen fönüfan repwe telilo”? Ra wewe ngeni ekkewe mettoch mi lamotongaw mi efisi napanapen, ekiekin, föfförün, me kokkotun chon fönüfan mi ü ngeni Kot. A pwal kapachelong ekiekin fönüfan, weween, an kewe minen etipetipa aramas le äkkäppirü Setan, ewe mi “nemeni ekewe aramas mi aleasolap ngeni Kot.” (1 Kor. 2:12; älleani Efisus 2:1-3, TF.) Ekkena minen etipetip ra usun chök ewe “asapwal” mi enifetäl lon än Setan ei otot. A amwökütü aramas le eäni ekiek, kokkot, kapas, me föfför mi pwäri ekiekin Setan, ewe “mi samoluni manamanen asapwal.”
6. Ifa usun a pwäpwäälo ekiekin fönüfan?
6 Ina popun, ekkewe ra ngasangaseri äsepwälin fönüfan ra mut ngeni Setan an epwe anapanapa ekiekiir me letiper, iwe, ra äppirü ekiekin me sorosorun. Mwiriloon, ra föri pwisin mocheniir, nge rese ekieki letipen Kot. Föfförür a alongolong woon ar lamalam tekia me ekieki pwisin iir, ra ü ngeni nemenem, me ra föri “mochenian fituk, [me] mochenian lemas.”—Älleani 1 Jon 2:15-17.
7. Pwata sipwe ‘tümwünü lelukach’?
7 Iwe, a ifa me lamoten ach sipwe ‘tümwünü lelukach’ ren ach äeä tipatchemen Kot le fili chiechiach, met sia äkkälleani, minen apwapwa, me met sia kakkatol woon Internet! (SalF. 4:23) Ewe aposel Paul a makkeei: “Oupwe tümwünükemi, pwe esap wor eman epwe liapenikemi ren atuputupun tipachemen fanüfan mi aücheangau, a popu seni sokopaten uruwon lom aramas ra aiti ngeni aramas, . . . nge esap pop seni Kraist.” (Kol. 2:8) Ena fön a kon lamot lon ei fansoun a arapoto ränin Jiowa we, pun pwichikkaran epwe etenaalo ekkewe “minen fönüfan” meinisin lon än Setan ei otot, epwe mecheres ar repwe karelo. A ächema ngenikich usun alon Malakai 4:1 “Epwe war eu rän, epwe pulopul usun eu um. Iwe, ekewe chon lamalamtekia me ekewe chon föföringau repwe wewe ngeni fetilipwas. Lon ewe rän ekkei epwe kenirela pwe esap chüen wor eman lusun.”
“Fönüfan me an kewe Angang Repwe Pwäpwäälo”
8. Ifa usun fönüfan me an kewe angang repwe “pwäpwäälo”?
8 Met weween än Piter makkeei pwe “fönüfan me an kewe angang repwe pwäpwäälo”? Ena kapas “pwäpwäälo” a pwal tongeni wewe ngeni “lingetä.” Piter a äweweei pwe atun ewe riäfföü mi lapalap, Jiowa epwe pwäri pwe än Setan ei otot a ü ngeni I me an we Mwu, iwe, a fichiiti an epwe katalo. Aisea 26:21 a apasa: “Iwe, ewe Samol mi Lapalap epwe towu seni lon lenian, pwe epwe apwüngü chon fanüfan pokiten ar tipis. Ewe angangen nimanau mi fis won fanüfan le monomon epwe pwäpwäla, nge ewe pwül esap chüen aopala chokewe mi ninnila.”
9. (a) Met sipwe tümünükich seni, iwe, pwata? (b) Met sipwe ämääraatä, iwe, pwata?
9 Atun ränin Jiowa we, chokkewe ra fen mut ngeni etipetipaen ei fönüfan me äsepwälin we mi ngaw an epwe anapanapa manauer repwe pwäri wesewesen napanaper, iwe, repwe pwal mwo nge nnifengeniir. Eli sokkun minen apwapwa mi mwänesol me chöüfetäl ikenäi ra kan anapanapa ekiekin aramas ngeni ewe fansoun lupwen emön me emön “epwe turufi chienan o fiu ngeni.” (Sek. 14:13) Iwe, a ifa me watteen lamoten ach sipwe tümünükich seni kachito, puk, video game, me met kkan mi tongeni ämääraatä ekkewe sokkun napanap Kot a oput, usun choweän lamalam tekia me tongen föfförün mwänesol! (2 Sam. 22:28; Kölf. 11:5) Nge sipwe ämääraatä napanapen Kot kewe, pun ekkena napanap resap tongeni karelo ren pwichikkaren ränin Jiowa we.—Kal. 5:22, 23.
“Eü Läng mi Fö me Eü Fanüfan mi Fö”
10, 11. Met weween “läng mi fö” me “fanüfan mi fö”?
10 Älleani 2 Piter 3:13. Ewe “läng mi fö,” ina än Kot we Mwu lon läng a poputä lon ewe ier 1914 atun a muchulo “än chon lükün Israel nemenem.” (Luk 21:24) Ei mwu a wewe ngeni Kraist Jises me chienan kewe 144,000 sou nemenem, iwe, lap ngeniir ra fen angei liwiniir lon läng. Lon ewe puken Pwäratä, chokkeei mi kefilitä ra wewe ngeni “ewe Telinimw mi Pin, ewe Jerusalem mi fö, a feitiu me läng seni Kot, a molotä usun eman fin apwüpwülu söfö a tolong lon foutan pwe epwe apwüpwülü ngeni pwülüan.” (Pwar. 21:1, 2, 22-24) Usun chök Jerusalem iolapen mwuun Israel loom, iwe, ewe Jerusalem mi Fö me ewe mwän apwüpwülü sefö ra wewe ngeni ewe nemenem woon ewe otot mi fö. Ena telinimw epwe “feitiu me läng,” weween, epwe äfänni fönüfan.
11 Ewe “fanüfan mi fö” a wewe ngeni ewe mwichen aramas mi fö ra fen anomuur fän nemenien än Kot we Mwu. Ewe paratis lon kapas monomon nöün Kot kewe aramas ra pwapwaiti pwal mwo nge iei epwe nom lon wesewesen leenian we lon ena “fanüfan mi fö epwe fisitä.” (Ipru 2:5) Ifa usun sipwe tongeni kapachelong lon ena otot sefö?
Mmolnetä ngeni Ränin Jiowa we mi Lapalap
12. Pwata warotoon ränin Jiowa we epwe fokkun örüköi chon fönüfan?
12 Paul me Piter ra fen oesini pwe ränin Jiowa epwe waroto “usun chök än eman chon solä,” weween, epwe ännifelong lupwen sise tepereni. (Älleani 1 Tesalonika 5:1, 2.) Ekkewe Chon Kraist mi enlet mi ökkösükü warotoon ena rän, repwe pwal mwo nge mäirü ren weiweitään. (Mt. 24:44) Iwe nge, chon fönüfan repwe fen kon rükö. Paul a makkeei: “Lupwen aramas [chokkewe mi imu seni Jiowa] ra apasa, ‘Mettoch meinisin a kinamwe o nükünüköch,’ mürin feiengau epwe müttir toriir usun cheuchen fam a tori eman fefin, nge esap wor eman aramas epwe tongeni sü seni.”—1 Tes. 5:3.
13. Ifa usun sipwe tümünü pwe site tupulo ren ewe kökköön “kinamwe o nükünüköch”?
13 Ewe kökköön “kinamwe o nükünüköch” eü chök kapas chofona seni ekkewe chonläng mi ngaw, nge nöün Jiowa kewe chon angang resap tupulo ren. Paul a makkeei: “Ousap nonom lon rochopwak, pwe ousap serengau ren ewe Rän usun än eman serengau ren eman chon solä. Ämi meinisin oua aramas mi nom lon saram, oua chon lerän.” (1 Tes. 5:4, 5) Iwe, sipwe nonnom lon saram, towau seni kirochen än Setan ei fönüfan. Piter a makkeei: “Iwe, ämi chiechiei mi achengicheng, oua fen silei ei. Iei mine oupwe mamasakemi, pwe ousap tokola ren ekewe afalafal mi mwäl än ekewe aramas mi ngau, [ekkewe sense mi chofona lon ewe mwichefel], ousap pwal tur seni leniemi mi nükünük.”—2 Pit. 3:17.
14, 15. (a) Ifa usun Jiowa a ösüfölükich? (b) Ikkefa ekkoch pworaus lon Paipel sipwe ekilonei?
14 Nengeni pwe Jiowa ese chök erenikich pwe sipwe ‘tümünükich,’ iwe, ina chök. Nge a pwal pwäri an kirekiröch ren an äiti ngenikich met epwe fis lon mwachkkan.
15 Iwe nge, solapan pwe ekkoch rese meefi atapwalapwalen ei fansoun, ra pwal mwo nge turunufaseei ewe kapasen ächchem pwe repwe mammasa. Eli ekkoch ra erä: ‘Sia piin rong me rong ekkena mettoch seni chök loom.’ Iwe nge, chokkana repwe chechchemeni pwe ika ra eäni ena esin kapas, weween, ra tipemwaramwareiti Jiowa me Jises, nge esap chök ewe mwichen chon angang mi tuppwöl. Jiowa a apasa: “Kopwe chök witiwit.” (Ap. 2:3) Jises a pwal apasa: “Oupwe mamasa, pun ousap silei lon meni rän ämi Samol epwe wareto.” (Mt. 24:42) Piter a pwal makkeei: “Oupwe usuni sokkun aramas mi föfföri föfför mi fel o angang mi fich ngeni Kot, lupwen oua witiwiti o ekipwichi warotoon ewe ränin Jiowa!” (2 Pit. 3:11, 12, NW) Ewe mwichen chon angang mi tuppwöl me ewe Mwichen Sou Pwüngüpwüng rese fokkun tenechepwäk ngeni ekkena kapas mi atapwalapwal!
16. Ifa ewe ekiek sipwe tümünükich seni, iwe, pwata?
16 Ewe a apasa pwe ewe Masta a mmangoto, ina i ewe “chon angang mi ingau.” (Mt. 24:48, TF) A kapachelong lon ewe mwich 2 Piter 3:3, 4 a äweweei usun. Piter a makkeei pwe “Lon ekkewe ranin le sopolon chon esiit . . . repwe tapwelo mwirin pwisin ar mochenia ingau,” me repwe esiita chokkewe mi älleasochis le ekipwichi ränin Jiowa we. Ewer, ekkena chon esiit ra akkomwa pwisin iir me mocheniir kewe, nge esap angangen ewe Mwu. Sisap fokkun eäni ena sokkun ekiek mi lükümach me efeiengaw! Nge amwo sipwe ekieki pwe ‘ren mosonotamen ach Samol, sia küna manau.’ Sipwe tinikken lon ewe angangen afalafala ewe Mwu me föralo chon käeö, nge sisap kon aüreki ineet epwe fis ekkewe mettoch Jiowa Kot a pwisin akkota.—2 Pit. 3:15, TF; älleani Fofor 1:6, 7.
Lükülük woon ewe Koten Amanau
17. Met ekkewe Chon Kraist mi tuppwöl ra för ngeni än Jises öüröür pwe repwe sü seni Jerusalem, iwe, pwata?
17 Mwirin än ekkewe sounfiun Rom tööki Jutia lon ewe ier 66, ekkewe Chon Kraist mi tuppwöl ra älleasochisi alon Jises pwe repwe mwittir sü seni Jerusalem. (Luk 21:20-23) Pwata ra mwökütükkäi fän lükülük? Ese mwääl, ra chök chechchemeni me ekkekieki än Jises we kapasen öüröür. Pwüngün, ra silei pwe ar kefil epwe äweiresiir, usun Kraist a fen öüröürer. Nge ra pwal silei pwe Jiowa esap fokkun likitalo nöün kewe mi tuppwöl.—Kölf. 55:22.
18. Ifa usun alon Jises lon Luk 21:25-28 a anapanapa ekiekum usun warotoon ewe riäfföü mi lapalap?
18 A wesewesen lamot ach sipwe pwal unusen lükülük woon Jiowa pun i chök epwe selänikich atun epwe fis ewe riäfföü mi lapalap seni meinisin. Mwirin an a poputä ewe riäfföü mi lapalap, nge me mwen än Jiowa apwüngü lusun ei otot, aramas repwe “masarochola ren ar niuokus, lupwen ra witiwiti mine epwe fis won fanüfan.” Iwe nge, atun chon oputa Kot repwe chechchech ren ar niuokkus, nöün Jiowa kewe chon angang mi tuppwöl resap niuokkus. Nge repwe pwapwa pun ra silei pwe ar amanau a arapoto.—Älleani Luk 21:25-28.
19. Met sipwe käeö lon ewe lesen mwirin ei?
19 Epwe amwarar minne epwe fis lon mwachkkan ngeni chokkewe mi imulo seni ei otot mi ngaw me “minen fönüfan”! Iwe nge, ewe lesen mwirin ei epwe äweweei pwe esap naf ach sipwe chök sü seni minne mi ngaw ika sia mochen küna manau. A pwal lamot sipwe ämääratä ekkewe napanap me föfföri ekkewe angang mi apwapwaai Jiowa.—2 Pit. 3:11.
Ka Tongeni Äweweei?
• Met weween . . .
‘ekkewe läng me fönüfan’ mi nom iei?
“minen fönüfan”?
ewe ‘läng mi fö me fanüfan mi fö’?
• Pwata sipwe unusen lükülük woon Kot?
[Ekkewe Kapas Eis Fan Iten Ewe Lesen]
[Sasing lon pekin taropwe 13]
Ifa usun kopwe ‘tümwünü lelukom’ me ikkimulo seni ei otot mi ngaw?
[Sasing lon pekin taropwe 14]
Ifa usun sipwe pwäratä ach lükü pwe ‘ren mosonottamen ach Samol, sipwe küna manau’?