Se Usen Jehovah Ediyararede

“Usen Jehovah edidi nte inọ, . . . ndien isọn̄ ye mme utom emi ẹdude ke esịt ẹyeyarade.”—2 PET. 3:10.

1, 2. (a) Didie ke idiọk ererimbot emi edisịm utịt? (b) Ewe mbụme ke idibọrọ ke ibuotikọ emi?

IDIỌK ererimbot emi ọkọtọn̄ọ ye nsu oro Satan okosude ete ke owo ekeme ndikara idemesie, inyụn̄ iyomke un̄wam Jehovah. (Ps. 2:2, 3) Ndi n̄kpọ ndomokiet emi ẹtọn̄ọde ke nsu ekeme ndidu ke nsinsi? Ikemeke! Edi ererimbot Satan emi idibehe ifep ke idemesie. Abasi edisobo enye ke edikem ini esie ye nte enye amade. Se Abasi edinamde idiọk ererimbot emi eyenen̄ede owụt edinen ikpe ye ima esie.—Ps. 92:7; N̄ke 2:21, 22.

² Apostle Peter ọkọdọhọ ete: “Usen Jehovah edidi nte inọ, emi enyọn̄ edibede efep ye ọkpọsọn̄ uyom, edi se ẹdade ẹbot enye ẹyetara ke ọkpọsọn̄ ufiop, ndien isọn̄ ye mme utom emi ẹdude ke esịt ẹyeyarade.” (2 Pet. 3:10) Nso idi “enyọn̄” ye “isọn̄” emi ẹtịn̄de ẹban̄a ke itien̄wed emi? Nso ke ‘ẹda ẹbot enyọn̄ ye isọn̄ emi ẹditarade’? Peter ọkọdọhọ ke “isọn̄ ye mme utom emi ẹdude ke esịt ẹyeyarade”; nso ke ikọ esie ọkọwọrọ? Ndifiọk ibọrọ mbụme emi ayanam iben̄e idem inọ enyene-ndịk n̄kpọ emi editịbede ke mîbịghike.

Enyọn̄ ye Isọn̄ Emi Ẹdibede Ifep

3. Nso idi enyọn̄ emi ẹtịn̄de ẹban̄a ke 2 Peter 3:10, ndien didie ke enye edibe ifep?

³ Ke ini Bible etịn̄de aban̄a “enyọn̄” ke ndamban̄a usụn̄, emi esiwak ndidi ukara owo emi ẹmenerede ke enyọn̄ ẹkan mbon emi enye akarade. (Isa. 14:13, 14; Edi. 21:1, 2) Ukara ererimbot emi edi ‘enyọn̄ emi edibede ifep.’ Etie nte enye ndibe mfep ye “ọkpọsọn̄ uyom” ọwọrọ ke ẹdisobo enye ke ediyịp enyịn.

4. Nso idi “isọn̄,” ndien didie ke ẹdisobo enye?

⁴ “Isọn̄” ada aban̄a ubonowo emi ẹdian̄arede ẹkpọn̄ Abasi. Mbon eyo Noah ẹketie ntem, ndien Abasi ama osobo mmọ ke Mmọn̄ Ukwọ. Udiana Peter 3:7 ọdọhọ ete: “Ẹda ukem ikọ emi ẹmụm enyọn̄ ye isọn̄ emi ẹdude ke emi ẹnịm ẹnọ ikan̄ ẹnyụn̄ ẹnịm ẹnọ usen ubiereikpe ye nsobo mbon unana uten̄e Abasi.” Ukwọ okosobo kpukpru ndiọi owo ini kiet, edi nsobo enye emi edide mi, emi editọn̄ọde ye “akwa ukụt” edisobo ndiọi owo ke ikpehe ke ikpehe. (Edi. 7:14) Ke akpa ikpehe akwa ukụt oro, Abasi ayanam ukara ererimbot emi osobo “Akwa Babylon,” ndiwụt nte imọ isuade akpara emi. (Edi. 17:5, 16; 18:8) Ekem Abasi ayada ekọn̄ Armageddon, emi edidide akpatre ikpehe akwa ukụt, osobo nyọhọ nsụhọ ererimbot Satan.—Edi. 16:14, 16; 19:19-21.

“Se Ẹdade Ẹbot Enye Ẹyetara”

5. Nso ke ẹda “ẹbot” enyọn̄ ye isọn̄ emi?

⁵ Nso ke ‘ẹda ẹbot enyọn̄ ye isọn̄ emi ẹditarade’? Enye edi idiọk ye obukpo ido oro ẹyọhọde ererimbot mfịn, ye utịtmbuba ererimbot emi. Enye esịne n̄ko “spirit ererimbot” emi “anamde utom . . . ke esịt nditọ ntụtutọn̄.” (1 Cor. 2:12; kot Ephesus 2:1-3.) Idụhe ebiet emi spirit m̀mê “ofụm” emi  mîdụhe ke ererimbot Satan emi. Enye anam mme owo ẹkere n̄kpọ, ẹduak n̄kpọ, ẹtịn̄ ikọ, ẹnyụn̄ ẹnam n̄kpọ nte Satan, kpa okohode idem owo nsọn̄ibuot emi “[akarade] odudu ofụm” emi.

6. Mbon oro ẹnyenede spirit ererimbot ẹsinam n̄kpọ didie?

⁶ Ntre, mbon emi spirit ererimbot emi adade usụn̄ ẹsikokoi mîdịghe ke unana ifiọk ẹyak Satan akara mmọ, ndien emi esinam mmọ ẹkere ẹnyụn̄ ẹnam n̄kpọ nte Satan. Emi n̄ko esinam mmọ ẹnam se ẹmama, ikereke Abasi. Mmọ ẹsikohode idem, ikereke iban̄a mbon en̄wen, ikponoke ukara, ẹsinyụn̄ ẹma “mbumek obụkidem ye mbumek enyịn.”—Kot 1 John 2:15-17. *

7. Ntak emi anade ‘ikpeme esịt nnyịn’?

⁷ Imokụt ndien ntak anade inen̄ede ‘ikpeme esịt nnyịn,’ ida se ikpepde ke Bible imek mbon emi idụkde nsan̄a, idiọn̄ọ utọ n̄wed emi ikotde, idiọn̄ọ nte ikpọnọde idem inemesịt, ye mme ebiet emi ikpesede ke Intanet. (N̄ke 4:23) Apostle Paul ekewet ete: “Ẹkpeme idem: mbak edidi odu owo eke edidade ukpepn̄kpọ akwaifiọk owo ye ikpîkpu abian̄a obụme mbufo nte asan̄ade ekekem ye item owo, nte asan̄ade ekekem ye mme akpa n̄kpọ eke ererimbot inyụn̄ isan̄ake ikekem ye Christ.” (Col. 2:8) Oyom ẹsọsọp ẹnam item emi nte usen Jehovah enen̄erede asan̄a ekpere koro ‘ufiop’ iyatesịt esie emi mînyeneke mbiet ayatara kpukpru “se ẹdade ẹbot” ererimbot Satan, onyụn̄ osobo mmọ taktak. Emi anam iti se idude ke Malachi 4:1, emi ọdọhọde ete: “Usen oro ke edi, ke asak nte usan̄-uyo: ndien kpukpru mbon iseri, ye kpukpru mme anam idiọk ẹyekabade edi etak nnyanyan̄a: ndien usen eke edidide ayata mmọ.”

“Isọn̄ ye Mme Utom Emi Ẹdude ke Esịt Ẹyeyarade”

8. Didie ke ẹdiyarade isọn̄ ye mme utom emi ẹdude ke esịt?

⁸ Peter ọkọdọhọ ke “isọn̄ ye mme utom emi ẹdude ke esịt ẹyeyarade.” Nso ke ikọ esie ọwọrọ? Ọwọrọ ke Jehovah ayayarade m̀mê esuene ererimbot Satan emi akwa ukụt ama ọtọtọn̄ọ tutu kpukpru owo ẹdi ẹdifiọk ke enye ọkọbiọn̄ọ Imọ ye Obio Ubọn̄ Imọ, ntre ke enye odot nsobo. Isaiah ama etịn̄ ntịn̄nnịm ikọ aban̄a ini oro ete: “Jehovah ọmọn̄ oto ke ebiet esiemmọ ọwọrọ, ete inọ ererimbot ufen iban̄a mme idiọk ido mmọ; ndien isọn̄ ayayarade iyịp esie, idinyụn̄ ifụkke aba nditọ esie emi ẹkpan̄ade afai.”—Isa. 26:21.

9. (a) Nso ke ikpesịn, ndien ntak-a? (b) Ewe edu ke akpana inyene, ndien ntak-a?

⁹ Ke usen Jehovah oro, mbon oro ererimbot emi ye idiọk spirit esie ẹdade usụn̄ ẹyewụt utọ owo emi mmimọ idide, idem ẹwotde kiet eken. Ekeme ndikam ndi kpukpru afai emi ẹsision̄ode mfịn ke mme ọwọrọetop edinam unọ idem inemesịt edi ndida nsọn̄ mme owo esịt mben̄e ini emi mme owo ‘ẹdimenerede ubọk in̄wana ye mbọhọidụn̄ mmọ.’ (Zech. 14:13) Ntre, enen̄ede ọfọn isịn ndise, n̄wed, mme mbre vidio m̀mê n̄kpọ ekededi emi ekemede ndinam nnyịn inyene mme edu oro Jehovah esede ke mbubiam, utọ nte n̄kohodeidem ye ndima afai. (2 Sam. 22:28; Ps. 11:5) Utu ke oro, ikpakam in̄wụm mbun̄wụm edisana spirit Abasi sia mme edu emi ẹdin̄wam nnyịn ibọhọ usen iyatesịt Jehovah.—Gal. 5:22, 23.

“Mbufa Enyọn̄ ye Obufa Isọn̄”

10, 11. Nso idi “mbufa enyọn̄” ye “obufa isọn̄”?

¹⁰ Kot 2 Peter 3:13. “Mbufa enyọn̄” edi Obio Ubọn̄ Abasi eke heaven, emi ọkọtọn̄ọde ke 1914, ke ini “edimek ini mme idụt” ekesịmde utịt. (Luke 21:24) Christ Jesus ye  owo 144,000 emi ẹditienede enye ẹkara, emi edide ekese ke otu mmọ ke heaven idahaemi, ẹnam Obio Ubọn̄ heaven emi. N̄wed Ediyarade okot mmọ “edisana obio, Obufa Jerusalem, [emi] otode Abasi osụhọde ke heaven edi [emi ẹnyụn̄ ẹtịmde idem] nte n̄wanndọ emi ẹbanade ẹben̄e ebe esie.” (Edi. 21:1, 2, 22-24) Kpa nte ndidem Israel eset ẹkesitiede ke Jerusalem ẹkara, ntre n̄ko ke Obufa Jerusalem ye Ebendọ esie ẹdikara obufa editịm n̄kpọ. Ndidọhọ ke obio emi “osụhọde ke heaven edi” owụt ke enye ọyọnọ isọn̄ emi ọyọhọ ntịn̄enyịn.

¹¹ “Obufa isọn̄” ada aban̄a obufa ubonowo emi ẹnamde n̄kpọ ndiwụt ke imama ndisụk ibuot nnọ Obio Ubọn̄ Abasi. Mme owo ẹyenen̄ede ẹkop inem paradise eke spirit emi ikọt Abasi ẹdude idahaemi ke ediye “isọn̄ oro edidide.” (Heb. 2:5) Nso ke ikpanam man ikpetiene idu ini oro n̄ko?

Ben̄e Idem Bet Akwa Usen Jehovah

12. Nso idinam usen Jehovah akpa ererimbot idem?

¹² Paul ye Peter ẹkedọhọ ke usen Jehovah edidi nte “inọ,” ke ini emi owo mîdorike enyịn. (Kot 1 Thessalonica 5:1, 2.) Nte enye edibuatde mme owo ayanam idem akpa idem ata mme Christian emi ẹben̄ede idem ẹbet enye. (Matt. 24:44) Edi se idiwọrọde ererimbot ayakam akan n̄kpọ n̄kpaidem. Paul ọkọdọhọ ete: “Ini ekededi emi mmọ ẹdọhọde: ‘Emem ye ifụre!’ adan̄aoro mbabuat nsobo ayabuat mmọ kpa nte ubiak uman abuatde n̄wan idịbi; ndien mmọ idikwe usụn̄ ubọhọ ndomokiet.”—1 Thess. 5:3.

13. Nso ke ikpanam mbak owo edida etop “Emem ye ifụre” ibian̄a nnyịn?

¹³ Nditan̄a “Emem ye ifụre” edi nsu en̄wen emi mme demon ẹdisude inọ mme owo, edi mmọ idikemeke ndibian̄a ikọt Jehovah. Paul ọkọdọhọ ke nnyịn “idụhe ke ekịm, emi akpanamde usen oro abuat [nnyịn] nte inọ, koro kpukpru [nnyịn idi] nditọ un̄wana ye nditọ uwemeyo.” (1 Thess. 5:4, 5) Mbọk, ẹyak idu ke un̄wana, ida ata nsannsan ikpọn̄ ekịm ererimbot Satan emi. Peter ekewet ete: “Ndima, ke ẹma ẹkebem iso ẹfiọk emi, ẹdu ke ukpeme mbak ndudue mme abiatibet [oro edi, nsunsu mme andikpep emi ẹdude ke esop Abasi] edida mbufo awaha ọkpọn̄ usụn̄ onyụn̄ anam mbufo ẹduọ ẹkpọn̄ nsọn̄ọnda mbufo.”—2 Pet. 3:17.

14, 15. (a) Didie ke Jehovah okpono nnyịn? (b) Ewe item Bible ke nnyịn mîkpefreke?

¹⁴ N̄kọ omokụt ke ikedịghe Jehovah ọdọhọ nnyịn ‘idu ke ukpeme,’ enye ọkpọn̄ nnyịn ntre. Edi enye ọnọ nnyịn ukpono ke ndibem iso nsian nnyịn se iditịbede ke ini iso.

¹⁵ Edi ndusụk owo idaha edidu ke ukpeme ke akpan n̄kpọ, ẹkam ẹda ẹnam n̄kpọ usak imam. Ndusụk owo ẹsidọhọ ke idịghe mfịn ke ẹketọn̄ọ ẹtịn̄ ikọ nsobo emi. Akpana mbon emi ẹtịn̄de utọ ikọ emi ẹfiọk ke idịghe ofụn anam-akpanikọ kpọt  ke mmimọ mînịmke ke akpanikọ, edi ke mmimọ inịmke Jehovah ye Eyen esie n̄ko. Jehovah ọdọhọ ke Habakkuk 2:3 ete yak ‘ibet imọ.’ Jesus n̄ko ọkọdọhọ ete: “Ẹdu ke ukpeme koro mbufo mîfiọkke usen eke Ọbọn̄ mbufo edidide.” (Matt. 24:42) Ndien Peter ọdọhọ ete: “Nso orụk owo ke mbufo ẹkpedi ke edisana ido uwem ye ke mme edinam uten̄e Abasi, nte ẹtiede ẹbet ẹnyụn̄ ẹsọn̄ọde ẹnyene edidu usen Jehovah ke ekikere!” (2 Pet. 3:11, 12) Tutu amama, ofụn anam-akpanikọ ye Otu Ukara esie ididehedei ikere ke Jehovah, Jesus, ye Peter ẹkebre mbre!

16. Nso utọ edu ke nnyịn mîkpenyeneke, ndien ntak-a?

¹⁶ ‘Idiọk ofụn’ kpọt ekeme ndidọhọ ke Eteufọk imọ ebịghi ndidi. (Matt. 24:48) Idiọk ofụn emi esịne ke otu mbon oro ẹtịn̄de ẹban̄a ke 2 Peter 3:3, 4. Peter ekewet do ete: “Ke mme ukperedem usen mbon nsahi ẹyeda nsahi mmọ ẹdi, ẹsan̄ade nte ekemde ye idiọk udọn̄ mmọ,” ẹdi ẹdisak mbon n̄kopitem emi ẹtiede ẹbet usen Jehovah. Ih, utu ke nditiene n̄n̄wam ke utom Obio Ubọn̄ Abasi, mbon nsahi emi ẹkam ẹkere ẹban̄a idemmọ ye idiọk udọn̄ mmọ. Mbọk, yak owo nnyịn ndomokiet okûtiene enyene utọ idiọk edu emi. Nnyịn ikpakam ibat “ime Ọbọn̄ nnyịn nte edinyan̄a,” ke ndika iso n̄kwọrọ etop Obio Ubọn̄, nnam mme mbet, utu ke nditie mfịna idem mban̄a se mîbeheke nnyịn, oro edi, ini emi Jehovah Abasi edinamde se enye aduakde.—2 Pet. 3:15; kot Utom 1:6, 7.

Buọt Idem ye Abasi Edinyan̄a

17. Mme anam-akpanikọ Christian ẹkenam didie n̄kpọ ke ini ama ekekem ndifehe n̄wọrọ ke Jerusalem nte Jesus eketemede, ndien ntak-a?

¹⁷ Ke mbonekọn̄ Rome emi ẹkekande Judea ẹkụk ke 66 E.N. ẹma ẹkenyọn̄ọ, mme anam-akpanikọ Christian ẹma ẹsọsọp ẹfen̄e ẹwọrọ ke Jerusalem nte Jesus eketemede. (Luke 21:20-23) Nso ikanam mmọ ẹsọsọp ẹnam n̄kpọ ntre? Ọwọrọ ke mmọ ikefreke item oro Jesus ọkọnọde. Mmọ ẹma ẹfiọk ke uwem ọyọsọn̄ ye mmimọ ima ifen̄e iwọrọ kpa nte Christ ọkọdọhọde. Edi mmọ ẹma ẹfiọk n̄ko ke Jehovah isikpọn̄ke ikọt esie emi ẹsọn̄ọde ẹda ẹnam akpanikọ.—Ps. 55:22.

18. Ikọ Jesus ke Luke 21:25-28 anam ese didie akwa ukụt emi edide mi?

¹⁸ Ana nnyịn n̄ko inen̄ede ibuọt idem ke Jehovah sia enye ikpọn̄ edikeme ndinyan̄a nnyịn ke ini akwa ukụt emi akanam mîtịbeke editịbede ke ererimbot emi. Nte akwa  ukụt emi osụk akade iso, “idem [ẹyeyemede] mme owo oto ke ndịk ye editie mbet mme n̄kpọ eke ẹdiwọrọde ẹnọ isọn̄” idem mbemiso Jehovah osobode ererimbot emi fapfap. Kpa ye oro idem ediyemerede mme asua Abasi, idem idinyekke mme anam-akpanikọ asan̄autom Jehovah. Edi esịt edikam inenem mmọ sia mmọ ẹfiọk ke edinyan̄a mmimọ asan̄a ekpere.—Kot Luke 21:25-28.

19. Nso ke idikpep urua en̄wen?

¹⁹ Nso inem inem ini iso ke mbon oro mîdịghe ubak ererimbot emi ye “se ẹdade ẹbot enye” ẹdinyene ntem! Ke adianade ye ndisua se idiọkde, urua en̄wen, iyeneme mme n̄kpọ en̄wen emi anade inam man inyene nsinsi uwem. Ana itọn̄ọ ndinyene mme edu emi Jehovah amade inyụn̄ inam mme n̄kpọ emi enye amade—2 Pet. 3:11.

[Ikọ Idakisọn̄]

Nte Afo Emekeme Ndinam An̄wan̄a?

• Nso . . .

ke ‘mme enyọn̄ ye isọn̄’ emi ẹdude idahaemi ẹda ẹban̄a?

ke ‘ẹda ẹbot enyọn̄ ye isọn̄ emi’?

idi ‘mbufa enyọn̄ ye obufa isọn̄’?

• Ntak emi inen̄erede ibuọt idem ke Abasi?

[Mme Mbụme Ukpepn̄kpọ]

[Ndise ke page 5]

Didie ke ekeme ‘ndikpeme esịt fo’ nnyụn̄ nda san̄asan̄a ke ererimbot?

[Ndise ke page 6]

Didie ke ikeme ndiwụt ke ibat “ime Ọbọn̄ nnyịn ke edinyan̄a”?