Oware Nọ Ẹdẹ Jihova O Ti Dhesẹ via
Oware Nọ Ẹdẹ Jihova O Ti Dhesẹ via
“Ẹdẹ Ọnowo ọ rẹ te tha wọhọ oji, . . . akpọ na gbe eware nọ e riẹ kpobi e vẹte to.”—2 PITA 3:10.
1, 2. (a) Ẹvẹ uyerakpọ omuomu nana u ti ro kuhọ? (b) Enọ vẹ ma te ta kpahe?
EVIẸHỌ a rọ to uyerakpọ omuomu nana họ inọ ahwo-akpọ a rẹ sai su omobọ rai ababọ Jihova. (Ol. 2:2, 3) Kọ oware nọ a rehọ eviẹhọ tohọ o rẹ sae jọ bẹdẹ bẹdẹ? Vievie. Ghele na, ma re rẹro ho inọ akpọ Setan o ti kuhọ kẹ omobọ riẹ. Ukpoye, Ọghẹnẹ ọ te raha iẹe eva oke nọ o fihọ gbe oghẹrẹ nọ ọ gwọlọ. Owọ nọ Ọghẹnẹ ọ te jẹ kpahe akpọ omuomu nana u ti dhesẹ ẹdhoguo-okiẹrẹe gbe uyoyou riẹ via.—Ol. 92:7; Itẹ 2:21, 22.
2 Pita ukọ na o kere nọ: “Ẹdẹ Ọnowo ọ rẹ te tha wọhọ oji, kẹsena ihru e vẹte vrẹ avọ edo ologbo, erae e vẹte raha ekwakwa akpọ na, akpọ na gbe eware nọ e riẹ kpobi e vẹte to uno.” (2 Pita 3:10) Eme họ “ihru” gbe “akpọ” nọ a jọ etenẹ fodẹ na? Eme họ “ekwakwa akpọ na” nọ e te raha no na? Kọ eme Pita o wo họ iroro nọ ọ ta nọ “akpọ na gbe eware nọ e riẹ kpobi e [te] to uno”? Ma tẹ riẹ iyo enọ nana, u ti fi obọ họ k’omai ruẹrẹ oma kpahe kẹ eware idudu nọ e te via kẹle na.
Ihru gbe Akpọ nọ E te Vrẹ Na
3. Eme họ “ihru” nọ a fodẹ eva 2 Pita 3:10 na, kọ ẹvẹ ẹraha rai ọ te jọ?
3 Evaọ Ebaibol na, a rẹ rehọ “ihru” dhesẹ isu, keme a kpehru vi enọ a bi su. (Aiz. 14:13, 14; Evia. 21:1, 2) ‘Ihru nọ e te vrẹ’ na họ egọmeti nọ i bi su uyerakpọ nana. “Edo ologbo” nọ e te rọ vrẹ na u dhesẹ epanọ ẹraha isu nana ọ te kpata te.
4. Eme họ “akpọ na,” kọ ẹvẹ a te rọ raha iẹe?
4 “Akpọ na” o dikihẹ kẹ ahwo-akpọ nọ a riẹ Ọghẹnẹ hẹ. Oghẹrẹ akpọ otiọye ọ jọ evaọ oke Noa, uwhremu na Ọghẹnẹ ọ tẹ rọ Ẹvo raha iẹe. “Jẹruọ ẹme ọvo na, a rọ ruẹrẹ ihru gbe akpọ nọ erọ enẹna kpahe kẹ erae, enọ a ruẹrẹ kpahe bọ ẹdẹ oziẹobro gbe ẹraha otu nọ ekare erọ Ọghẹnẹ.” (2 Pita 3:7) Evaọ oke Noa, Ẹvo na ọ raha ahwo yoma na kpobi oke ovona, rekọ evaọ ‘uye ulogbo na,’ ọraha na ọ te via othotha. (Evia. 7:14) Evaọ abọ ọsosuọ uye na, Ọghẹnẹ o ti duobọte isu akpọ na udu re a raha “Babilọn ologbo na,” ọ vẹ rọ ere dhesẹ epanọ egagọ erue i bi tu ei oma te. (Evia. 17:5, 16; 18:8) Kẹsena, eva ẹmo Amagẹdọn, koyehọ abọ urere ọrọ uye ulogbo na, Jihova ọ vẹ te raha abọ akpọ Setan nọ o kiọkọ.—Evia. 16:14, 16; 19:19-21.
“Ekwakwa Akpọ na” E te Raha No
5. Eme họ ekwakwa akpọ na?
5 Eme họ “ekwakwa akpọ na” nọ e te raha no na? “Ekwakwa akpọ na” nọ Pita ọ fodẹ na họ ikpehre eware nọ e be lẹliẹ eyoma vihọ nẹnẹ na. “Ekwakwa” nana i kugbe “ẹzi akpọ na” nọ “o bi ru iruo eva emọ udu uyoma.” (1 Kọr. 2:12; se Ahwo Ẹfẹsọs 2:1-3.) Ẹzi nana ọ da akpọ Setan fia. Ọ be wọ ahwo roro, jiroro, ta ẹme, jẹ rọ aro kele ọkpọ uruemu Setan, osu akpọ na.
6. Ẹvẹ ẹzi akpọ na o bi ro dhesẹ oma via?
6 Fikiere, enọ ẹzi akpọ na o kpomahọ no e kẹ uvẹ re Setan ọ kpọ ae, a te wo ọkpọ uruemu riẹ. Fiki onana, a bi ru oware nọ u je rai, a be daezọ oreva Ọghẹnẹ hẹ. Omorro gbe oriobọ o da rai oma fia, a re veghe uzou kẹ udu-esuo, yọ a rẹ rehọ oma rai kpobi kẹ “urusio uwo, gbe urusio ibiaro.”—Se 1 Jọn 2:15-17.
7. Fikieme ma jẹ ‘sẹro udu mai’?
7 Fiki onana, o r’oja gaga re ma ‘sẹro udu mai’ ẹkwoma areghẹ nọ ma rẹ rọ salọ ahwo nọ ma rẹ nyusu kugbe, ebe nọ ma re se, ighe nọ ma re riwi, gbe eria nọ ma re rovie kpohọ evaọ Itanẹte. (Itẹ 4:23) Pọl ukọ na o kere nọ: “Wha yọrọ oma re ohwo ọvo ọ siọ eriariẹ ifofe gbe ẹghẹ rai ba ẹ rọ viẹ owhai họ, enọ erọ uwuhrẹ ahwo akpọ avọ izi akpọ na, e nọ e rọ e rọ Kristi hi.” (Kọl. 2:8) Ujaje yena o mae r’oja nẹnẹ nọ ẹdẹ Jihova ọ be kẹle na, keme ẹdẹ ọyena Ọghẹnẹ ọ te raha “ekwakwa” uyerakpọ Setan kpobi muotọ. Onana o kareghẹhọ omai eme nọ e rrọ Malakae 4:1, inọ: “Ẹdẹ ọ be tha, nọ a re ti ku iruimuomu avọ erọ uvre kugbe mahe ae eva uwou-erae; ẹdẹ ọyena nọ ọ rẹ te tha na ọ rẹ te mahe ae no.”
“Akpọ na gbe Eware nọ E Riẹ Kpobi E [Te] To”
8. Eme họ otofa ẹme Pita na inọ “akpọ na gbe eware nọ e riẹ kpobi e [te] to uno”?
8 Eme Pita o wo họ iroro nọ ọ ta nọ “akpọ na gbe eware nọ e riẹ kpobi e [te] to uno”? Ẹme Griki nọ a fa ‘ẹto uno’ na o sai je dikihẹ kẹ ẹfere via. Oware nọ Pita o wo họ iroro họ evaọ etoke uye ulogbo na, Jihova ọ te fere akpọ Setan via inọ o fo kẹ ọraha keme o be wọso Ọye omariẹ gbe Uvie Riẹ. Aizaya 26:21 o ta kpahe oke oyena inọ: “ỌNOWO o bi no oria riẹ tha re ọ kẹ ahwo akpọ na uye fiki umuomu rai, akpọ na o reti dhesẹ ahwo nọ a kpe ku ei via, yọ o gbeti ruru enọ o kpei dhere he.”
9. (a) Eme ma rẹ whaha, kọ fikieme? (b) Oghẹrẹ ubi vẹ ma rẹ mọ, kọ fikieme?
9 Evaọ ẹdẹ Jihova, enọ i wo ẹzi akpọ na kpobi a ti dhesẹ oghẹrẹ ahwo nọ a rrọ via, tube kpe omoma rai dede. Evaọ uzẹme, o sae jọnọ ighe ozighi nọ ahwo a be hai riwi nẹnẹ na e be ruẹrẹ ae họ kẹ oke nọ ‘ohwo ọ te họre ohwo.’ (Zek. 14:13) Fikiere o r’oja gaga re ma whaha oghẹrẹ ighe ividio, ebe, aruọzaha, gbe eware efa nọ e rẹ sae lẹliẹ omai wo omorro je you ozighi keme e rẹ dha Ọghẹnẹ eva. (2 Sam. 22:28; Ol. 11:5) Ukpoye, joma mọ ubi ẹzi ọfuafo Ọghẹnẹ keme e rẹ raha ha evaọ ẹdẹ ẹdhoguo Ọghẹnẹ.—Gal. 5:22, 23.
“Ihru Ekpokpọ avọ Akpọ Ọkpokpọ”
10, 11. Eme họ “ihru ekpokpọ” gbe “akpọ ọkpokpọ” na?
10 Se 2 Pita 3:13. “Ihru ekpokpọ” na họ Uvie Ọghẹnẹ nọ o rrọ obọ odhiwu, onọ u muhọ esuo evaọ 1914 nọ “oke ahwo Egedhọ na” u kuhọ no. (Luk 21:24) Kristi Jesu avọ ibe isu idu udhuhrẹ gbe ene (144,000) riẹ nọ ibuobu rai i kpohọ odhiwu no, a te jọ isu erọ Uvie nana. Evaọ obe Eviavia, a dhesẹ enana nọ a salọ na wọhọ “okpẹwho ọrẹri na, Jerusalẹm ọkpokpọ na, nọ o bi no obọ Ọghẹnẹ nọ ọ rọ odhiwu ze, nọ a ruẹrẹ kpahe wọhọ ọva nọ ọ be hẹrẹ ọzae riẹ.” (Evia. 21:1, 2, 22-24) Nwanọ epanọ Jerusalẹm otọakpọ ọ jọ okpẹwho-esuo evaọ Izrẹl anwae na, ere Jerusalẹm Ọkpokpọ na avọ Ọva riẹ a rrọ isu erọ akpọ ọkpokpọ na. Jerusalẹm Ọkpokpọ nana o ti no “odhiwu” ziọ otọakpọ ẹkwoma isuẹsu riẹ nọ u ti su akpọ na.
11 “Akpọ ọkpokpọ” na o dikihẹ kẹ ahwo-akpọ nọ e roma kpotọ kẹ esuo Ọghẹnẹ. Aparadase abọ-ẹzi nọ ahwo Ọghẹnẹ a be reawere riẹ enẹna, a vẹ te reawere riẹ vọvọ evaọ “akpọ nọ be tha” na. (Hib. 2:5) Ẹvẹ ma sae rọ jọ usu ahwo nọ a te rria akpọ ọkpokpọ yena?
Ruẹrẹ Oma Kpahe kẹ Ẹdẹ Ologbo Jihova
12. Fikieme ẹtha ẹdẹ Jihova o ti ro gbe akpọ na unu?
12 Pọl gbe Pita a ruẹaro inọ ẹdẹ Jihova ọ te tha ‘wọhọ oji,’ koyehọ ọ te tha evaọ oke nọ a rẹro riẹ hẹ. (Se 1 Ahwo Tẹsalonika 5:1, 2.) Ẹdẹ ọyena nọ ọ te ze kpregede na u ti gbe makọ uvi Ileleikristi nọ a jaja aro vi unu. (Mat. 24:44) Rekọ, rọkẹ enọ e riẹ Ọghẹnẹ hẹ, orọnikọ ẹdẹ ọyena o ti gbe ai unu ọvo ho. Pọl o kere nọ: “Okenọ ahwo [nọ e riẹ Ọghẹnẹ hẹ] a rẹ te ta nọ, ‘Oke onana oke udhedhẹ gbe omofọwẹ,’ idudhe na ọraha ọ vẹ nwane bru ae ze, nwane wọhọ epa nọ aye ọ rẹ thuẹ othuẹ eyẹ, a rẹ sae dhẹ vabọ họ.”—1 Tẹs. 5:3.
13. Eme ma re ru nọ ubo “udhedhẹ gbe omofọwẹ” o gbẹ viẹ omai họ họ?
13 Ubo “udhedhẹ gbe omofọwẹ” na yọ eviẹhọ ọfa nọ Ẹdhọ ọ te wha haro; ghele na, o te viẹ idibo Jihova họ họ. Pọl o kere nọ: “Wha [rọ] eva ebi hi, re ẹdẹ ọyena ọ te ruọ owhai ọza wọhọ oji. Keme whai kpobi emọ elo gbe emọ uvo.” (1 Tẹs. 5:4, 5) Fikiere, j’oma daji elo na, jẹ kẹnoma lelele no ebi akpọ Setan. Pita o kere nọ: “Whai iyoyou mẹ, epanọ wha riẹ onana vẹre ino na, wha sẹro oma [rai no otu iwuhrẹ erue nọ e rrọ ukoko Ileleikristi na], ogbẹrọ erehe iruthọ ahwo omuomu e rẹte wọ owhai vrẹ, odikihẹga rai ọ vẹ te va owhai abọ vru.”—2 Pita 3:17.
14, 15. (a) Ẹvẹ Jihova o ro bru ọghọ họ omai oma? (b) Eme ọ Ebaibol na vẹ ma re se gb’oja ziezi?
14 Muẹrohọ inọ orọnikọ Jihova ọ vuẹ omai inọ ma tẹ “sẹro oma” mai no ma vẹ rọ abọ muoma ha. Ukpoye o bru ọghọ họ omai oma nọ ọ vuẹ omai kpahotọ eware nọ e te jọ obaro via.
15 Rekọ u yoma gaga inọ, ahwo jọ a bi gbabọkẹ hayo tubẹ siọ ehrẹ nọ a be kẹ omai kpahe epanọ o r’oja te re ma jaja aro vi. Ejọ e sae ta nọ ‘U kri akpọ no nọ ma bi ro yo eme nana.’ Rekọ, jọ ahwo nọ a be ta eme itieye na a vuhumu inọ orọnikọ utu ọrigbo ẹrọwọ na ọvo a be vro na ha, rekọ te Jihova avọ Ọmọ riẹ. Jihova ọ ta inọ ma hai rẹro ẹdẹ na. (Hab. 2:3) Jesu ọ ta re inọ: “Wha [hai rroro] keme wha riẹ ẹdẹ nọ Ọnowo rai ọ rẹ te tha ha.” (Mat. 24:42) Pita o fibae nnọ: “Didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ!” (2 Pita 3:11, 12) Utu ọrigbo ẹrọwọ na avọ Ugboma Esuo riẹ a rẹ rehọ eme yena jeve jeve he.
16. Uruemu vẹ ma rẹ whaha, kọ fikieme?
16 “Odibo omuomu” na họ ọnọ ọ jọ udu riẹ roro inọ Olori na o bi lehie. (Mat. 24:48) Odibo omuomu yena ọ rrọ usu ahwo nọ a dhesẹ evaọ 2 Pita 3:3, 4 na. Pita o kere nọ: “Eva edẹ uwremu iseẹkoko e rẹ te tha,” a vẹ te rọ “urusio” obọ rai se ahwo nọ a be jaja aro vi kẹ ẹdẹ Jihova ẹkoko. Ẹhẹ, ukpenọ isẹkoko yena a rẹ tẹrovi Ọghẹnẹ nọ a rẹ gọ, a te bi le isiuru oriobọ rai. Joma wo uruemu uyoma orọ aghẹmeeyo utioye vievie he! Ukpoye, joma “kele akothiho Ọnowo mai gbe usiwo” ẹkwoma iruo usiuwoma ota gbe ilele-iruo na nọ ma re ru avọ ajọwha, jẹ siọ awa ba ẹruọ kpahe oke nọ Jihova Ọghẹnẹ o fihọ nọ eware e te rọ via.—2 Pita 3:15; se Iruẹru Ikọ Na 1:6, 7.
Rẹroso Ọghẹnẹ Esiwo Na
17. Eme uvi Ileleikristi a ru kpahe unuovẹvẹ Jesu inọ a dhẹ no Jerusalẹm, kọ fikieme?
17 Nọ egbaẹmo Rom a wọ ohọre ziọ Judia evaọ ukpe 66 C.E., uvi Ileleikristi a tẹ kareghẹhọ unuovẹvẹ Jesu inọ a dhẹ no Jerusalẹm, a tẹ ginẹ dhẹ nọ uvẹ u rovie. (Luk 21:20-23) Fikieme a rọ j’owọ kpata kpata ere? Ababọ avro, a kareghẹhọ unuovẹvẹ Jesu. A riẹ inọ odhẹ rai na o te wha ọbẹwẹ se ai, wọhọ epanọ Kristi ọ vẹvẹ unu. Rekọ evaọ oke ovona, a riẹ inọ Jihova o ti vu erezi riẹ wa ha.—Ol. 55:22.
18. Ẹvẹ eme ọ Jesu nọ e rrọ Luk 21:25-28 na i kpomahọ oghẹrẹ nọ who rri uye ulogbo nọ o be tha na?
18 Epọvo na re, ma re fi eva mai kpobi họ Jihova keme ọye ọvo o ti siwi omai okenọ uyerakpọ nana ọ te ruẹ uye nọ o mae rro kpobi evaọ ikuigbe ahwo-akpọ na. Nọ uye ulogbo na u te muhọ no, taure Jihova ọ tẹ te raha uyerakpọ nana, ahwo a ti “kie ewawa fiki ozọ gbe fiki ẹruore eware nọ e bete tha akpọ na.” Rekọ dede nọ ewegrẹ Ọghẹnẹ a ti nuhu fiki ozodhẹ, idibo Jihova a te dhozọ họ. Ukpoye, a te wereva keme a riẹ inọ esiwo rai o kẹle no.—Se Luk 21:25-28.
19. Eme ma ti wuhrẹ evaọ uzoẹme nọ o rrọ aro na?
19 Ẹhẹ, eghale buobu e rrọ obaro kẹ enọ i siomano akpọ nana gbe iruẹru riẹ. Rekọ wọhọ epanọ ma ti wuhrẹ evaọ uzoẹme nọ o rrọ aro na, ma tẹ gwọlọ wo uzuazọ, orọnikọ ma rẹ whaha oware uyoma ọvo ho. U fo re ma wo ekwakwa-aghae nọ i re ru Jihova eva were, ma ve je ru eware nọ ọ rẹ jẹrehọ.—2 Pita 3:11.
Kọ Whọ Sae k’Iyo Enọ Nana Vevẹ?
• Eme họ . . .
‘ihru gbe akpọ’ na?
“ekwakwa akpọ na”?
“ihru ekpokpọ avọ akpọ ọkpokpọ” na?
• Fikieme ma re ro fi eva mai kpobi họ Ọghẹnẹ?
[Enọ Uwuhrẹ]
[Uwoho nọ o rrọ ẹwẹ-obe avọ 5]
Ẹvẹ whọ sae rọ ‘sẹro udu ra’ re who siomano akpọ na?
[Uwoho nọ o rrọ ẹwẹ-obe avọ 6]
Ẹvẹ ma re ro dhesẹ inọ ma bi “kele akothiho Ọnowo mai gbe usiwo”?