Bintu Bikasokolwa na Difuku dya Yehova

“Difuku dya Yehova dikāyanga bwa ngivi; . . . ne ntanda mīne ne bilongwa byayo bidi monka bikasokolwa.”—2 PET. 3:10.

1, 2. (a) Lelo ngikadilo imbi ya bintu ya dyalelo isa kufula namani? (b) Le i bipangujo’ka byotusa kubandaula?

 NGIKADILO imbi ya bintu ya dyalelo imanine pa bubela bubajinji bwa amba muntu ubwanya kuludika ntanda biyampe pambulwa kuludikwa na Yehova. (Mit. 2:2, 3) Lelo kudi kintu kimanine pa bubela kikokeja kwimana nyeke? Nansha dimo! Kadi, ketukelaijapo ntanda ya Satana īfudile ayo mine. Ikonakanibwa na Leza pa kitatyi kitungwe ne mu muswelo wasaka. Bisa kulonga Leza pa ino ntanda mibi bisa kulombola patōkelela boloke ne buswe bwandi.—Mit. 92:7; Nk. 2:21, 22.

² Mutumibwa Petelo wāsonekele amba: “Nanshi difuku dya Yehova dikāyanga bwa ngivi; monka mo mukapityila madiulu ne mikungulo mikatampe mīne, ne byamūlu bīne bikasunguluka ku kyanga kikatampe, ne ntanda mīne ne bilongwa byao bidi monka bikasokolwa.” (2 Pet. 3:10, New World Translation) Lelo “madiulu” ne “ntanda” bitelelwe pano i bika? Ne “byamūlu” nabyo bikasunguluka i bika? I bika byādi bisaka kunena Petelo pa kutela “ntanda mīne ne bilongwa byao bidi monka” amba “bikasokolwa”? Kuyuka malondololo a bino bipangujo kuketukwasha twiteakanye ku kinkumenkume kileta moyo kisa kufika panopano ponka.

Madiulu ne Ntanda Bikapityidila

3. Lelo “madiulu” atelelwe mu 2 Petelo 3:10 i madiulu’ka, ne akapita namani?

³ Kyaba kingidija Bible kishima “madiulu” mu muneneno wa kyelekejo, afunkilanga pa bulopwe bwendeja, bubikele pa bantu. (Is. 14:13, 14; Kus. 21:1, 2) ‘Madiulu akapita’ afunkila pa imbikalo ya bantu mine iludika pa bantu bakubulwa bwine Leza. Kupita koakapita na mikungulo mikatampe—nansha “lupumo lukomo,” mungya bwalamuni bukwabo—kukokeja kufunkila pa konakanibwa fututu kwa ano madiulu.

4. Lelo “ntanda” i bika, ne ikonakanibwa namani?

⁴ “Ntanda” yelekeja bantu babomboke kudi Leza. Ntanda ya uno muswelo yāikele’ko mu mafuku a Noa ne, yāonakanibwe ku Dilobe, mungya butyibi bwa Leza. “Ku kinenwa kimo kyonka, nabyo i bibīkilwe mudilo, bilaminwe ku difuku dya kidye kya konakanya bantu bakubulwa bwine-Leza.” (2 Pet. 3:7) Kitatyi’kya, Dilobe dyāonakenye bonso bakubulwa bwine Leza dimo kete, ino bonakani bwiya busa kufika bityebitye mu bula bwa “malwa makatakata.” (Kus. 7:14) Mu kipindi kibajinji kya ano malwa, Leza ukatununa balopwe ba politike ba ino ntanda bonakanye “Babiloni Mukatakata,” kintu kikalombola mushikwa obakashikwa wabwitwa wa mitōtelo. (Kus. 17:5, 16; 18:8) Penepa, Yehova mwine ukakombelela basheleshele ba ntanda ya Satana ku divita dya Amakedona, kipindi kine kya mfulo kya malwa makatakata.—Kus. 16:14, 16; 19:19-21.

“Byamūlu . . . Bikasunguluka”

5. Mu byamūlu bya kyelekejo mubadilwa bika?

⁵ Lelo “byamūlu” bine “bikasunguluka” i bika? Dibuku dishintulula bishima bya Bible dishintulula “byamūlu” amba i “bintu bibajinji,” nansha “bya kyalwilo.” Dinena’mba, kino kishima “kyaingidijibwe enka na mwingidijibwanga masomo a alufabe pa kunena kishima.” Nanshi, “byamūlu” bitelelwe na  Petelo bifunkila pa bintu bya pa kitako bine bilengeja ntanda ikale na ngikadilo, milongelo, mashinda, ne bitungo byampikwa bwine Leza. Mu bino “byamūlu” mubadilwa ne ‘mushipiditu wa pano pa ntanda’ “wa kulonga mudi bāna bampikwa kikōkeji.” (1 Kod. 2:12; tanga Efisesa 2:1-3.) Uno mushipiditu nansha “luvula,” i muyule mu ntanda ya Satana. Utononanga bantu balange, bakale ñeni, banene, ne kulonga bintu mungya milangwe ya Satana, “mulopwe wa lupusa lwa luvula” wa mitatulo ne bongojani.

6. Lelo mushipiditu wa ntanda wimwekejanga namani?

⁶ Boba basambukilwe na mushipiditu wa ntanda, bekale bayuke nansha kebayukile, ibaleke ñeni ne mityima yabo yendejibwa na Satana, enka nenki ke bamwekeja milangwe ne ngikadilo yandi. Mfulo mfulō, ke balonga byobasaka, pampikwa kubanga kiswa-mutyima kya Leza. Mu ngikadilo yonso ibatana, balonga bintu na mitatulo nansha kwisakila, balombola ngikadilo ya kutombokela lupusa, ne kwiela ku kusaka mu “kilokoloko kya ngitu, ne kilokoloko kya meso.”—Tanga 1 Yoano 2:15-17. *

7. Mwanda waka tufwaninwe ‘kulama mityima yetu’?

⁷ Bine i kya kamweno ‘tulame mityima yetu’ na kwingidija tunangu twa Leza po tutonga balunda, bya kutanga, kwipwija mukose, mateba otukokeja kutala ku Entelenete! (Nk. 4:23) Mutumibwa Polo wāsonekele amba: “Dyumukai kadi, mwanda wa kunena’mba wakemukwata bu-misungi ku byamanwa byandi, ne kyongo kyampikwa kwendelamo, monka mwikadile bisela bya bantu, ne bya bunkasampe bya panopantanda, kemwikadilepo bya Kidishitu nabya, mhm.” (Kol. 2:8) Uno musoñanya i wa kampeja-bukidi nakampata pano pafwena difuku dya Yehova mwanda ‘kyanga’ kekyamwekele kashā kikasungulula “byamūlu” byonso bya ngikadilo ya bintu ya Satana, ne kulombola amba kebikokejapo kukomena kyanga kya bukalabale bwa Leza. Kino kituvuluja binenwa bya Malaki 4:1 bya amba: “difuku dīyanga ditēma’nka bwa nkelwa; ino bakwitatula bonsololo balonga bupupakane, bakekala bityakuku; kabidi difuku dīyanga dikebasōkelela”

“Ntanda Mīne ne Bilongwa Byayo

Bidi Monka Bikasokolwa”

8. Lelo ntanda mine ne bilongwa byayo bidi monka “bikasokolwa” namani?

⁸ Lelo Petelo pa kusoneka amba, “ntanda mīne ne bilongwa byayo bidi monka bikasokolwa” wādi ukimba kunena bika? Kishima “kusokolwa” kikokeja kadi kwalamunwa bu “kusokwela patōka” nansha “kutūla padi tō.” Petelo wādi usaka kunena amba pa kyamalwa kibūke, Yehova ukatūla padi tō ntanda ya Satana, kwiituluja amba i mimutombokele aye ne Bulopwe bwandi ne amba ifwaninwe konakanibwa. Isaya pa kwisamba bupolofeto butala kino kitatyi, wānene bino byotutanga mu Isaya 26:21 amba: “Yehova ulupuka mu kifuko kyandi kudingila byamwiko bekadi ba panopanshi mwanda wa bukondame bwabo; panshi napo pakasokola mashi apo, ne kupūtapo monka bepaibwe bandi mpikila.”

9. (a) Le i bika byotufwaninwe kufundula, ne mwanda waka? (b) Le i bika byotufwaninwe kutamija, ne mwanda waka?

⁹ Mu difuku dya Yehova, boba balondele ntanda ne mushipiditu wayo mubi bakalombola byobadi binebine, enka ne kwikubija abo bene na bene. Nanshi, biyamweka patōka’mba miswelo mivule ya makayo a bikandangobo atumbile dyalelo aludikanga milangwe ya bavule kufika ne kitatyi kyobakekwata ku dikasa “enselele ku dikasa au ku mukwabo au ku mukwabo.” (Zek. 14:13) I kya mvubu’po kashā tufundule kintu kyo-kyonso—mafilime, mabuku, makayo a video, ne bikwabokwabo—kibwanya kubutula motudi ngikadilo ya munyanji kudi Leza, kimfwa mitatulo ne kuswa bya bikandangobo! (2 Sam. 22:28; Mit. 11:5) Nanshi tutamijei kipa kya mushipiditu sandu wa Leza, mwanda ngikadilo ya uno muswelo  keikonakanibwapo ku kyanga kya kyelekejo kya difuku dya Yehova. —Ngat. 5:22, 23.

“Madiulu Mapya, ne Ntanda Ingi Mipya”

10, 11. Lelo “madiulu mapya” ne “ntanda mipya” i bika?

¹⁰ Tanga 2 Petelo 3:13. “Madiulu mapya” i Bulopwe bwa Leza bwa mūlu bwashimikilwe mu mwaka wa 1914, kitatyi kyafudile “myaka ya baJentaila.” (Luka 21:24) uno umbikalo wa Bulopwe i mubundwe na Yesu Kidishitu ne bakabikala nabo bantu 144000, kadi bavule umbukata mwabo kebapwe kutambula mpalo ya momwa mūlu. Bano batongwe i batelwe mu mukanda wa Kusokwelwa bu “kibundi kikola’kya, Yelusalema umpya, utūka mūlu kudi Leza, mulongololwe kala bwa musongwa, mudyangibwe dyangi dya ku mulume wandi.” (Kus. 21:1, 2, 22-24) Enka mwādi mwikadile Yelusalema wa pano panshi bu kibikelo kya umbikalo wa Isalela wa kala, mo monka ne Yelusalema mupya ne musongwa wandi nabo babundile umbikalo wa ngikadilo mipya ya bintu. Kino kibundi kya mūlu ‘kikatūka mūlu,’ ko kunena’mba kuta mutyima ku kuludika ino ntanda.

¹¹ “Ntanda mipya” ifunkila pa kisaka kya bantu ba pano panshi bakakōkelela ne mutyima umo ku Bulopwe bwa Leza. Paladisa ya ku mushipiditu idi’mo bantu ba Leza dyalelo ikamwekelelela padi tō mu “yoya ntanda ikaya’ko” milumbuluke. (Bah. 2:5) Lelo tukokeja kubadilwa namani mu ino ngikadilo mipya ya bintu?

Witeakanye ku Difuku Dikatakata dya Yehova

12. I kika kinenenwa amba difuku dya Yehova dikāya pa ntanda pamo bwa lufimbo?

¹² Ba Polo ne Petelo bālaile amba difuku dya Yehova dikāya “pamo bwa ngivi”—bya kibozo, kadi mu kitulumukila. (Tanga 1 Tesalonika 5:1, 2.) Nansha ke Bene Kidishitu ba bine batengele dino difuku bakatulumuka muswelo o dikapapamuka. (Mat. 24:44) Inoko ntanda ikabozokelwa mpata. Polo wāsonekele amba: “Ino po banena’mba: Ke talala, nyā, yonka ndoe; po ponka pa kupapamukilwa ko badi, ne konakanibwa, pamo’nka bwa misongo ya mwana-mukaji pa kubutula mwana, ino ne mwakupandila mwine mpika.”—1 Tes. 5:3.

13. Lelo tubwanya kwepuka namani kongolwa na lubila lwa “Ke talala, nyā, yonka ndoe”?

¹³ Lubila lwa amba “Ke talala, nyā, yonka ndoe” i bubela bukwabo bukatamba ku bademona; ino kebukongolapo bengidi ba Yehova. Polo wāsonekele amba: “kemudipo mu fukutu’mba, dyodya difuku dīmupapamukile pamo bwa ngivi, mhm. Bānwe bonso mwi bāna ba mwinya, ne bāna ba dyuba.” (1 Tes. 5:4, 5) Nanshi tushalei mu mwinya, kulampe na fukutu ya ntanda ya Satana. Petelo wālembele amba: “Bānwe baswedibwe, byo umbapu kuyūka kala bīne bino’bi, dyumukai mwanda wa kutyina’mba, pa kuselwa kwa kutūpatūpa kwa babi [bafundiji ba bubela badi mu kipwilo kya Bwine Kidishitu], mwakapona ku bukankamane bwenu.”—2 Pet. 3:17.

14, 15. (a) Lelo Yehova witulēmekele muswelo’ka? (b) Le i binenwa’ka bya ku bukomo bwa mushipiditu byotufwaninwe kulama mu ñeni?

¹⁴ Yuka’mba Yehova ketunenenepo’tu ‘kudyumuka’ bitupu, ketwikwete makasa mu  kyadi. Ino witulēmekele na kwitupa na kanye bukomo bwa “kuyuka kala” nshintulwilo ya bikalongeka mu kitatyi kīya kumeso.

¹⁵ Ino yō bulanda, bamo bamwene bino bivulujo bilombola kamweno ka kwikadila badyumuke bu kebibatalepo, bakwabo bebifutulula. Bakokeja kunena amba, ‘ketudi bevwaneivwane byabyo bivulujo’byo myaka mivule.’ Inoko bano bantu bafwaninwe kuyuka amba, na kunena namino, batatananga Yehova ne wandi Mwana, ke enkapo kabumbo ka umpika. Yehova unena amba: “Kunga’kyo.” (Hab. 2:3) Yesu nandi amba: “Tengelai bidi . . . ke-mwi-bantu kemuyūkile dyuba dikafika Mfumwenu, shi dyuba ka, kadi shi dyuba pi.” (Mat. 24:42) Petelo nandi utentekela’po amba, “lelo kitufwaninwa kwikala muswelo wa bu-bantu ka? wakwikalamo bu-bakola ba bwine-Leza. Bakutengela ne kusakidila byamalwa kwiya kwa difuku dya [Yehova]”! (2 Pet. 3:11, 12) Kabumbo ka umpika ne kyandi kitango kyendeji kebakekalapo nansha dimo na mumweno mubi pa bino binenwa bisumininwe!

16. Lelo i ngikadilo’ka yotufwaninwe kwepuka, ne mwanda waka?

¹⁶ Bine, “mupika mubi” ye ufulanga ku kunena amba Mfumwetu waije kwiya. (Mat. 24:48) Uno mupika mubi ubadilwa mu kisumpi kitelelwe mu 2 Petelo 3:3, 4. Petelo wālembele amba: “Mu mafuku a kumfulo bakibengo bakāyanga” benda “banangila monka mupityila bilokoloko bya abo bene,” bafutulula boba balamine difuku dya Yehova mu ñeni. Eyo, pa kyaba kya kuta mutyima ku tumweno twa Bulopwe, betele mutyima abo bene ne kuta’o ku bilokoloko byabo bya ngitu. Bine, ketwakitamijai mu ñeni ino ngikadilo yakubulwa kikōkeji ileta kyaka! Ino, tumonei “kutūkija mutyima kwa Mfumwetu [bu] lo lupandilo” na kwipāna mu mwingilo wa kusapula Bulopwe ne kulonga bana ba bwanga, kadi ketwakizumbijai mutyima bipitepite pa mwanda utala kitatyi kya binkumenkume, ke-kintu kitalanga Yehova Leza.—2 Pet. 3:15; tanga Bilongwa 1:6, 7.

Kulupila Mudi Leza wa Lupandilo

17. Lelo Bene Kidishitu ba kikōkeji bālondele namani kidyumu kya Yesu kya kunyema mu Yelusalema, ne mwanda waka?

¹⁷ Bibumbo bya Bene Loma pa kupwa kutamba Yudea mu 66 K.K., Bene Kidishitu ba kikōkeji bālondele kidyumu kya Yesu kya kunyema mu Yelusalema pāmwekele mukenga umbajinji. (Luka 21:20-23) Mwanda waka bānyemene na kampeja-bukidi ne na kusumininwa? Ne kutatana mpika, bālamine kidyumu kya Yesu mu ñeni. Na bubine, bādi bayukile amba bakatananga bikoleja mu butyibi bwabo monka mwēbadyumwinine kala Yesu.  Ino kadi bādi bayukile amba Yehova kakalekapo nansha dimo bantu bandi ba kikōkeji.—Mit. 55:22.

18. Lelo binenwa bya Yesu bidi mu Luka 21:25-28 bikulengeja umone kyamalwa kikatampe kīya’ki namani?

¹⁸ Netu tufwaninwe kukulupila mudi Yehova, mwanda aye kasuku kandi ye ukekala lupandilo lwetu kitatyi kikafikilwa ino ngikadilo ya bintu na kyamalwa kikatampe mu mānga. Mu kitatyi kampanda kupwa kwa kyamalwa kikatampe kushilula ne kumeso kwa Yehova kuleta butyibi bwandi pa basheleshele ba pano pa ntanda, bantu “mityima īkebapungila moyo, mwanda wa kuvuluka bisaka kwiya panopanshi.” Inoko nansha balwana na Leza byobazakala, bengidi ba Leza ba kikōkeji abo kebakevwanapo moyo. Ino bakasepelela pa kuyuka’mba lupandilo lwabo pano lubafwena.—Tanga Luka 21:25-28.

19. I bika byotukabandaula mu kishinte kilonda’ko?

¹⁹ Bine, kinkumenkume kisangaja kitengele bantu basansene na ntanda ne “byamūlu” byayo! Ino enka na motusa kwikimwena mu kishinte kilonda’ko, shi tusaka kumona būmi, tufwaninwe kulonga bivule kupita’ko’tu kwepuka bibi kete. Tusakilwa kutamija ngikadilo isangaja Yehova ne kulonga bintu byaitabije.—2 Pet. 3:11.

[Kunshi kwa dyani]

Le Ukokeja Kushintulula?

• Lelo i bika byelekejibwe na . . .

Ano ‘madiulu ne ntanda’

“byamūlu”?

“madiulu mapya ne ntanda ingi mipya”?

• Mwanda waka tukulupile mudi Leza ne pa mfulo?

[Bipangujo bya Kifundwa]

[Kifwatulo pa paje 17]

Lelo “ukalama mutyima obe” ne kusansana na ntanda namani?

[Kifwatulo pa paje 18]

Tukalombola namani amba ‘tumwene kutūkija mutyima kwa Mfumwetu bu lupandilo’?