Yuma Yakamwekana Hefuku Dayehova

“Ifuku daYehova dakenza neyi chenzaña ikombi, . . . niiseki ninyidimu yidumu akayisolola.”—2 PET. 3:10, NW.

1, 2. (a) Indi kaayi kamakonu katama kakakuma ñahi? (b) Malwihwinyi itukuhanjekahu?

 KAAYI katama kamakonu kashindamena hakutwamba kwakweni kwakwila nawu antu anateli kuyuula dinu iseki chakadi wunlomboli waYehova. (Mas. 2:2, 3) Komana chuma chejima chashindamena hakutwamba chinateli kutwalekahu? Kwakulehi! Hela chochu, hitwatela kuhembelela netu kaayi kaSatana kakajilumuki kakenuku. Ilaña, akakijilumuna kudi Nzambi hampinji yindi yatoñolayi dehi nawa munjila yakafuukulayi yomweni. Yuma yakakoñayi Nzambi yakujilumuna kanu kaayi katama yakamwekesha chikupu wuñanji windi waloña nikukeña kwindi.—Mas. 92:7; Yish. 2:21, 22.

² Kapostolu Petulu wasonekeli nindi: “Ifuku daYehova dakenza neyi chenzaña ikombi, denodu ifuku mawulu akahita nalushindu lwalweni, ilaña yuma yejima yakasuñunuka neyena dakesi, niiseki ninyidimu yidumu akayisolola.” (2 Pet. 3:10, NW) Indi awa “mawulu” “niiseki” anashimunuwu hiyumanyi? Indi “yuma” yakasuñunuka hiyumanyi? Indi Petulu watalishili mudihi hakuhosha nindi “iseki ninyidimu yidumu akayisolola”? Neyi twiluka ñakwilu yanawa malwihu chikutukwasha kudiloñesha kumona yuma yakutiyisha woma yikukeña kumwekana kumbidi.

Mawulu niMaseki Amba Kahita

3. Indi “mawulu” atenawu ha 2 Petulu 3:10 hiyumanyi, nawa akahita ñahi?

³ Izu dakwila nawu “mawulu” neyi adizatisha muBayibolu muchifwikija kakavulu datalishaña kuyiyuulu, yabadika antu ayulañawu. (Isa. 14:13, 14; Chim. 21:1, 2) ‘Mawulu amba kahita’ emenañaku chiyuulu chawantu abulaña kumwakama Nzambi. Kwesekeja nakubalumuna kukwawu, ‘kuhita nalushindu lwalweni’ hela “nakukanka kwakweni,” kwamwekesha nawu awa mawulu akayijilumuna neyi mukulabula kwadisu.

4. Indi “iseki” hichumanyi, nawa akadijilumuna ñahi?

⁴ “Iseki” demenañaku kaayi kawantu anamufutaleli Nzambi. Kaayi kamuchidiwu kadiñaku mumafuku aNowa, nawa Nzambi washimwini nindi akijilumuni naDibaji. “Hakwinza mawulu niiseki aduku katataka, anayiswekeli kesi nezu dodimu, anayiswekeli ifuku dakusompesha nikujilumuka kwawantu asekeshaña Nzambi.” (2 Pet. 3:7) Chineli Dibaji dajilumwini antu ejima atama hampinji yoyimu, kujilumuka kunakwinza kukamwekanaña chovu-chovu hampinji ‘yayihuñu yeneni.’ (Chim. 7:14) Muchibalu chatachi chaniyi yihuñu, Nzambi wakasañumuna anyuuli jamatuña nachiyuulu amukanu kaayi kulonda akamujilumuni “Babiloni Muneni,” dihamba kamwekeshayi Nzambi chamudiwulayi iwu chivumbi wansakililu. (Chim. 17:5, 16; 18:8) Kuhiñahu, hanjita yaAmagedoni, chibalu chakukumishaku chayihuñu yeneni, Yehova wakajilumuna kaayi kejima kaSatana.—Chim. 16:14, 16; 19:19-21.

“Yuma . . . Yakasuñunuka”

5. Indi yuma yachifwikija yabombelamu yumanyi?

⁵ Indi “yuma” yamba ‘kasuñunuka’ hiyumanyi? Dikishonali yimu yaBayibolu yalumbulula “yuma” nawu ‘hinshimbi jatachi,’ hela “yuma yalema.” Yahosha nawu idi izu, “adizatishileña munsona, neyi mazu amunhoshelu.” Dichi, “yuma” yateneniyi Petulu  yatalisha kuyuma yalema yaleñelaña kaayi kumwekesha yililu, yaaku, jinjila, niyikonkwanyi yatama. ‘Yumiyi’ yabombelamu “spiritu yamunu mwishina,” ‘yakoñeshaña mudi akwakujikwa.’ (1 Kor. 2:12; tañenu Aefwesesa 2:1-3.) Iyi spiritu, hela “luzwizu” diyi yinenzali mukaayi kaSatana. Yaleñelaña antu kutoñojoka, kufuukula, kuhosha, nikwila yuma munjila yamwekeshaña maana aSatana, “mwanta wamuluzwizu wañovu” mukwakudisamba nikudikaña.

6. Indi spiritu yamukaayi yamwekenaña munjilanyi?

⁶ Dichi, antu anahuñumunuwu naspiritu yamukaayi mukudikeñela hela chakubula kwiluka, etejaña yitoñojoka yawu ayiyuleña kudi Satana, kulonda amwekesheña yililu niyitoñojoka yindi. Chafumañamu, eleña yuma yinakukeñawu, chakadi kulemesha yuma yakeñañayi Nzambi. Elaña yuma mukudivwimba hela mukudikeña aweni, amwekeshaña yililu yakudikaña nawanlomboli, nawa adiñijaña ‘mukufwila kwachisemwa chaheseki, nikufwila kwamesu.’—Tañenu 1 Yowanu 2:15-17.

7. Muloñadi wutwatela ‘kuhembela muchima wetu’?

⁷ Komana, twatela ‘kuhemba muchima wetu’ kuhitila mukumwekesha maana aNzambi hakutonda amabwambu, nyikanda yakutaña, yisela nimaWebu sayiti itwasandujolaña haIntaneti! (Yish. 4:23) Kapostolu Pawulu wasonekeli nindi: “Babalenu hakenda kamwekana muntu wukuyipupa namaanindi namakasu amukunkulwayi, mwaya yaaku yawantu, mwaya yuma yampata yamunu mwishina yakuhemesha, himwaya Kristuku.” (Kol. 2:8) Dichi twatela kunyakala kwovwahila ilu lushimbi chineli ifuku daYehova dinakuswila kwakwihi, muloña idi ‘iyena’ dasweja dakasuñununa yuma yejima yamukaayi kaSatana, nakuyisolola nawa hiyikatwesha kuumika iyena dakuzuwa kwaNzambuku. Chumichi chatwanukishaña mazu asonekawu haMalaki 4:1 nawu: “Ifuku dakadikita neyi kesi kamuluteñi; niadinka wanta ejima, niakoñaña yatama ejima, akekala neyi ntotu. Odu ifuku dakenza dakayishita bwi-i.”

“Iseki niNyidimu Yidumu Akayisolola”

8. Indi iseki ninyidimu yekalamu ‘yakasoloka’ ñahi?

⁸ Indi Petulu watalishili mudihi hakusoneka nindi “iseki ninyidimu yidumu akayisolola”? Petulu watalishili mukwila nindi hampinji yayihuñu yamaneni, Yehova wakaleta ituña daSatana hatooka nikudisolola muloña damuzuñishaña Yena niWanta Windi nawa datela kujilumunewa. Wuprofwetu wutwatañaña haIsaya 26:21 wahoshaña hayuma yakamwekana haniyi mpinji nawu: “Yehova hakufuma mwindi mwekalayi hakwinza nakubabesha akwakushakama hanu heseki nakuluwa kwawu; iseki dakamwekesha mashi adu hidakabuta nawa cheñi indi ajahewaku.”

9. (a) Yumanyi yitwatela kutondolwela, nawa muloñadi? (b) Yililwinyi yitwatela kusoña, nawa muloñadi?

⁹ Mwiifuku daYehova, antu alombolewaña nakaayi nispiritu yatama yamukaayi akadimwekesha aweni chekalawu, nawa akadijaha wumu namukwawu. Eñañi, tunateli kuhosha netu yisela yamadombu yinasweji kuvula makonu yinakuhimpa yitoñojoka yawantu amavulu, yikaleñela kumpinji yakumbidi chikasa chaniwu ‘chikanyamukila chikasa chamukwawu.’ (Zek. 14:13) Dichi, twatela kutondolwela yuma yidi neyi, nyivwimbimbi, nyikanda, yisela yajividiyo, niyuma yikwawu, yatela kutuleñela kumwekesha yaaku yahelayi Nzambi, yidi neyi kudinka wanta nikukeña madombu! (2 Sam. 22:28; Mas. 11:5) Ilaña, twatela kusoña mukabu waspiritu yajila yaNzambi, muloña yililu yeniyi hiyikatwesha kusuñunuka neyena dachifwikija hefuku daYehovaku.—Ŋal. 5:22, 23.

“Mawulu Amaha niIseki Dadiha”

10, 11. Indi “mawulu amaha” “niiseki dadiha” hiyumanyi?

¹⁰ Tañenu 2 Petulu 3:13. “Mawulu amaha hiWanta waNzambi wamwiwulu, watachikiluwu muchaaka cha 1914 mpinji yamanini “nyaka yawaJentili.” (Luka 21:24) Iyi nfulumendi yaloña yatuñewa naKristu Yesu nianyuli  a 144,000 akayulayi nawu, amavulu atambula dehi wuloku wawu wamwiwulu. Mumukanda waChimwekeshu, awa atondewa ayimwekesha neyi “ñanda yajila, yowu Yerusalema yayiha, yidi nakusuluka kudi Nzambi kwiwulu, ayiloñesha dehi neyi nsumbuki anawahishuwu kulonda asumbuki nanfumwindi.” (Chim. 21:1, 2, 22-24) Neyi chochadiña Yerusalema yahamaseki itanda danfulumendi yamuIsarela wakunyaka, Yerusalema yayiha niNsumbuki yindi diwu ekala munfulumendi yetuña dadiha. Iwu musumba wamwiwulu ‘wakasuluka mwiwulu’ kuhitila mukuyula yuma yahamaseki.

¹¹ “Iseki dadiha” datalisha kumunza wawuha wawantu akamwekesha kwovwahila chikupu Wanta waNzambi. Nkumininaku paradisa yakuspiritu yinakudiluñishawu antu jaNzambi makonu yakekala ‘heseki dawantu dakenza’ dalubanji. (Heb. 2:5) Chumanyi chitwatela kwila kulonda twakekali munidi ituña dadiha?

Diloñeshenu Kumona Kwinza Kwefuku Deneni daYehova

12. Muloñadi kwinza kwefuku daYehova chikwakahayamishila kaayi?

¹² Pawulu niPetulu wonsu wawu ashimwineñahu dehi nawu ifuku daYehova dakenza “neyi chenzañayi ikombi”—wumweneni, nawa chakadi kwiluka. (Tañenu 1 Atesalonika 5:1, 2.) Hela tuhu akwaKristu alala, anakutalila idi ifuku, akahayama chidakenza chakukasumwisha. (Mat. 24:44) Ilaña, kaayi kakamona ikezeñi. Pawulu wasonekeli nindi: “Chakwilawu [antu amufutalela Yehova] nawu, Kwamwena, kwazo-o; hohenohu kujilumuka hikwakayikasumwisha, neyi chakasumwishañawu mumbanda wudi nevumu kudi nyisoñu yakuvwala; hiyakapuluka nihantuku.”—1 Tesa. 5:3.

13. Chumanyi chitwatela kwila kulonda abuli kutudimba nakubidika kwakwila nawu “Kwamwena, kwazo-o”?

¹³ Kubidika nezu dahewulu nawu “Kwamwena, kwazo-o;” hihoshelu yamakudi yawandemoni; nawa, hikwakadimba ambuña aYehovaku. Pawulu wasonekeli nindi: “Himwekala mumwidima, mwaka ifuku odu dakayishintakeshi neyi ikombuku. Muloña wejima wenu mudi akwachejeji, mudi akwakwenda namwaana.” (1 Tesa. 5:4, 5) Dichi twatela kushakama muchijeji, nakutondolwela chikupu mwidima wamukaayi kaSatana. Petulu wasonekeli nindi: “Enu akwetu twakeña, chimuneli mweluka dehi, babalenu mubuli kuhuñumuka nakuluwañesha kwawantu atama, [kwawantañishi akutwamba amuchipompelu chawakwaKristu] mubuli kufuma mukukola kwenwenu aweni.”—2 Pet. 3:17.

14, 15. (a) Indi Yehova watulemesha ñahi? (b) Mazwinyi onenewa itwatela kutiyilila chikupu?

¹⁴ Ilukenu nenu Yehova hakuminaña hohu mukutusoñamisha nindi ‘babalenuku.’ Ilaña, watulemesha kuhitila mukutukwasha ‘kwilukañahu dehi’ chachiwahi yuma yikamwekana kumbidi.

¹⁵ Chawushona, antu amakwawu hiyashañaku maana hela hiyetejaña kufumba kwakuyanukisha nawu ekali asoñamaku. Aleñululaña nawu ‘twatachikili dehi kutiya oyu yanukishu.’ Hela chochu, awa antu atela kwiluka nawu kuhitila mukuhosha mazu amuchidawa,  anakudiwula Yehova niMwanindi, bayi neyi izanvu danduñu wamaana hohuku. Yehova wahosheli nindi, “Chichiñilili.” (Hab. 2:3) Yesu niyena wahosheli nindi: “Tonenu, muloña himuneluki ifuku dakenzayi Mwanta wenuku.” (Mat. 24:42) Kubombelahu, Petulu wasonekeli nindi: “Shakamenu nakujila nakwakama Nzambi, nakutalila nakukeña nankashi chakenza ifuku daNzambi.” (2 Pet. 3:11, 12) Dichi izanvu danduñu wamaana niIzaza Dalombolaña hidamba kadiwula awa mazu akusoñamisha chikupuku!

16. Yililu yamuchidinyi yitwatela kutondolwela, nawa muloñadi?

¹⁶ Eñañi, “nduñu watama” diyi wahoshaña nindi Nkaka nakulaba. (Mat. 24:48) Iwu nduñu watama wekala kukabadi kezanvu dalumbululawu ha 2 Petulu 3:3, 4. Petulu wasonekeli nindi, “Hamafuku akukuminina kwakenza akwakuseha nakuseha, nakwila mwaya kufwila kwawu aweni kwatama;” nakudiwula antu ovwahila atoñojokaña hefuku daYehova. Dichi, chatela ashi maana hakumukalakela Nzambi nikuhakwilaku Wanta windi, awa akwakuseha aditoñojokaña aweni nakufwila kwawu kwalwisu. Bayi twikala naniyi yitoñojoka yatama yakubula kwovwahilaku! Ilaña, “toñojokenu nenu chakubulayi Mwanta kuzuwa swayi hiwamwinu” kuhitila mukudikita chikupu mumudimu wakushimwina nikwilisha atumbanji nikubula kusweja kudakamena hansañu yakubula kwiluka mpinji yambala yaYehova Nzambi yayuma yinakumwekana.—2 Pet. 3:15; tañenu Yililu 1:6, 7.

Kuhwelelenu Nzambi waWamwinu

17. Indi akwaKristu ashinshika elili ñahi nakusoñamisha kwaYesu kwakutemuka muYerusalema, nawa muloñadi?

¹⁷ Chelili mashidika awaRoma alukuki musumba waYudeya mu 66 C.E., akwaKristu ashinshika alondeleli kufumba kwaYesu kwakwila nawu, akanyakali kutemuka mumusumba waYerusalema. (Luka 21:20-23) Muloñadi chanyakeluwu kutemuka? Chakadi kujina, ahembeli chikupu kusoñamisha kwaYesu. Dichi, elukili nawu kufuukula kwawu kwakayileñela kukabakana, neyi chasoñamishiliyi Kristu. Hampinji yoyimu, elukili nawu Yehova hanateli kushiya antu jindi ashinshikaku.—Mas. 55:22.

18. Indi mazu aYesu ekala haLuka 21:25-28 anayileñeli kutiya ñahi kutalisha hayihuñu yeneni yinakwinza?

¹⁸ Ninetu twatela kumukuhwelela Yehova, muloña yena hohu diyi wakatwamwina hampinji yakamona kanu kaayi yihuñu yeneni yakadi kumonañahu dehi muchihandilu chawantu. Dichi hampinji yimu henohu yihuñu yeneni kanda nawa henohu Yehova kanda yasompeshi kaayi kejima, antu “akahwidijela nawoma, nakutalila yuma yidi nakwinza hamatuña.” Ilaña chakatiyañawu ayilumbu jaNzambi woma, antu jaYehova ashinshika hiyakatiya womaku.  Kwambukaku, akatwa nyiñula muloña akeluka nawu kupuluka kwawu kudi mukamwihi.—Tañenu Luka 21:25-28.

19. Yumanyi yitukuhanjeka muchibaaba chinahiñuhu?

¹⁹ Eñañi, antu anakutwalekahu kwambuka kukaayi nikubula kukwata ‘kuyuma’ yamukaayi akazañalala kumpinji yakumbidi! Hela chochu, neyi chinalumbululi chibaaba chinahiñuhu, neyi tunakukeña kuheta wumi, hitwatela hohu kutondolwela yuma yatamaku. Twatela kwikala nayililu yikumuzañaleshaña Yehova nikukoña nyidimu yetejewa kudi yena.—2 Pet. 3:11.

Munateli Kulumbulula?

• Yumanyi yinakwimenaku . . .

‘mawulu nimaseki’ akatataka?

“yuma”?

‘mawulu amaha niiseki dadiha’?

• Muloñadi chitwamukuhwelelaña Nzambi chikupu?

[Malwihu aKuzatisha haKudiza]

[Mwevulu wudi hefu 5]

Munateli ‘kuhemba ñahi muchima wenu’ nikutwalekahu kwambukaku kuyuma yamukaayi?

[Mwevulu wudi hefu 6]

Twamwekeshaña ñahi netu twamonaña “chakubulayi Mwanta kuzuwa swayi netu hiwamwinu”?